PĚNDARIADI 17
17
Sunatẹ̌ e nakoạ kere tatialan pẹ̌kakakědọ e
1Piạ umburʼi Abram seng siom pul᷊o sio su taunge, Mawu e nẹ̌těngkasilo si sie kụ něhengetang, ”Iạ e kai Ruata Makawasa. Daringihẹ̌ bue si Siạ dingangu pẹ̌koạko kapulu-ku e sěntiniạ. 2Iạ e mẹ̌taingu pẹ̌kakědo ringangu mangonggọu pal᷊ahěnto makěpal᷊e si kau.” 3Mase nẹ̌subạe i Abram kụ Mawu Ruata e něhengetang, 4-5#Rm. 4:17 ”Seng ini e pẹ̌kakakědo Takụ kinoạ dingangu: Iạ e mẹ̌kědo u i kau sarung makoạ i upung u haghim bansa. Ual᷊ingu ene tangú arengu e sem bal᷊ine lai i Abram kaiso i Abraham.#17:4-5: Abraham: Areng ini su werang Ibrani daringihang kere wawera kụ mangal᷊ene: ”I upungu kal᷊awọu wansa.” 6Iạ e sarung mangonggọu anạ pulung makěpal᷊ẹ̌ e kụ sutal᷊oaran sire e sarung piạ u makoạ mararatu. Hitenu e sarung kereng kal᷊awọe, kụ i sire sarung makoạ haghim bansa.
7 #
Luk. 1:55
Iạ e sarung mapakasěhụ u kědo-Ku e si kau ringangu hitenu e měběbawěllasẹ̌, kụ pẹ̌kakědo ene e kai kakalẹ̌. Iạ e sarung makoạ Duatanu ringangu Duatan manga hitenu. 8#MMR. 7:5 Iạ e sarung mangonggọu ěntana ini si kau ringangu su manga hitenu kụ orasẹ̌ ini e pẹ̌tẹ̌tanakengu kere taumata mananumpang. Kasěllahu ěntanang Kanaan sarung makoạ tataghuanengu manga anạ dingangu manga pulung sarang marěngụ-děngụ dingangu Iạ sarung makoạ Duatan sire.”
9Mawu Ruata e něhengetang kapia si Abraham, ”I kau e mal᷊aing harusẹ̌ satia su pẹ̌kakakědo ini, baewe i kau arau waewe lai hitenu e měbẹ̌bawěllasẹ̌. 10#MMR. 7:8; Rm. 4:11 I kau ringangu kal᷊awọu hitenu manga esẹ e hinong i sunatẹ̌. 11-12Manětạ bọu orasẹ̌ ini i kau harusẹ̌ měnunatẹ̌ kal᷊awọu manga rariọ esẹ umbure ual᷊u ěllo, narekeng dingangu apang manga ěllang kụ nipěhanạ su wal᷊eng kamene ringangu niwělliang i kamene. Sunatẹ̌ ene sarung makoạ tatiala wọu pẹ̌dariandi su tal᷊oarang Iạ dingangi kamene. 13Sěngkatau-sěngkatau e harusẹ̌ i sunatẹ̌, kụ tangú sarung makoạ tatiala mạbadang kụ mělẹ̌lahẹu pẹ̌kakědo-Ku ringangu e kai kakalẹ̌. 14Apang manga esẹ kụ tawe nisasunatẹ̌ seng tawe lai nirekeng umatẹ̌-Ku u i sie kai tawe mangumbelẹ pẹ̌kakědo-Ku ene.”
15Bọu e Ruata něhengetang si Abraham, ”I kau e kuhạ e mẹ̌kui kawingu i Sarai; manětạ bọu orasẹ̌ ini e arenge kai seng i Sara. 16Iạ e sarung měngal᷊amatẹ̌ dingangu i sie sarung mamantelu sěngkatau rariọ esẹ kụ sarung Takụ ionggọ si kau. Ore, Iạ sarung měngal᷊amatẹ̌ si Sara, dingangu i sie sarung makoạ i upung gaghurang u kal᷊awọu wansa. Bọu manga hitene sarung piạ mararatu.”
17Mase nẹ̌těngkasumagẹ̌ i Abraham, kutẹu i sie kai lụl᷊ěge ringangu kạpěngěnnane, ”Sěngkatau taumata esẹ kụ umbure seng mahasụ su taunge kụ makaěbạ anạ? Kutẹu lai i Sara umbure seng siom pul᷊o su taunge kụ delain mamantelu rariọ?” 18Bọu ene nẹ̌berạete i sie su Ruata, ”Kawe unụe tawe i Ismaelẹ̌ e pinakakoạ mẹ̌musakạ u rarotongku tangu?”
19Kaiso Ruata e něhengetang, ”Tala. I Sara kawingu e sarung mamantelu anạ esẹ kụ i kau sarung pěsẹ̌bạu arenge i Ishak.#17:19: Ishak: Areng ini su werang Ibrani e mangal᷊ene: ”i sie liměge”. Iạ sarung manahuntěngadu pẹ̌kakědo-Ku e ringangu rariọ ěndaị dingangkewelain hitene sarang marěngụ-děngụ. Pẹ̌kakědo ene kakalẹ̌. 20Arawe Iạ e mal᷊aing dumaringihẹ̌ dorongu mạanung Ismael. Ual᷊ingu ene i sie sarung Takụ al᷊amateng dingangu Takụ onggotangu hitene mal᷊awọ. I sie sarung makoạ i upungu těmbonangu hěnto 12, dingangu hěntone sarung Takụ ipakakoạ kawanua sěmbaụ kụ masěllahẹ̌. 21Arawe pẹ̌kakědo-Ku e sarung Takụ sěgareng dingang i Ishak, anạu sarung ikawantelʼi Sara, su taung damahi, tempone kere ini.” 22Sarangke Mawu Ruata wọuten nangěnsue pal᷊ahumbisarane, i Sie naněntangken Abraham.
23Su ěllo ene lai, i Abraham dimaringihẹ̌ Duata kụ nakisunatʼi Ismael anạ e, ringangkeweng kěbị manga esẹ dal᷊ohom bal᷊ene, sarangkewelai manga ěllang kụ nawantelẹ̌ su ral᷊ungu wal᷊ene arau lai apan niwělline. 24I Abraham nisunatẹ̌ e umbure nahětibẹ̌ siom pul᷊o sio su taunge, 25ringangu i Ismael anạ e umbure kapul᷊o těllune su taunge. 26I sire nisunatẹ̌ e ěllone mẹ̌sul᷊ung, 27dingangu kal᷊awọu manga ěllang i Abraham.
ప్రస్తుతం ఎంపిక చేయబడింది:
PĚNDARIADI 17: SXN
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
