Matius 5
5
HO'BANA PUANG YESUS YAHO DI TANETE
(PASAL 5-7)
Kahsi tau ang untindo' pa'elo'na Puang Alataala
1Donetoo Puang Yesus ungngita mai'di liu tau sule. Ya' dai'mi di mesa tanete anna mohko'i yaho mampakuhu. Sulei toune' yato sangngaka-sangngaka to pentindo'na. 2Napahandu'mi Puang Yesus mampakuhu pano diii naoatee,
3”Puang Alataala umbehe tau ang nasa'ding memase-mase di mendehatanna lambi' supung hannu dai' di Puang Alataala, aka' setonganna diaete' ang la ungngampui Kapahentaanna Puang Alataala.
4Puang Alataala umbehe tau ang masuhsa yaling di katuhoanna, aka' sika la napakahanga.
5Puang Alataala umbehe tau ang mahempo' inaha, aka' dianto ang la ungngampui inde lino.
6Puang Alataala umbehe tau ang pemala lolo umbabe kamarohoang, sinnoa tau ang manono anna mahähäng pemala lolo supu mande anna menu', aka' inang la napasanta'i Puang Alataala aka siamo ang napemala.
7Puang Alataala umbehe tau ang marota' pano di solana, aka' yato tau la nakarota'i toe' Puang Alataala.
8Puang Alataala umbehe tau ang masero yaling di inahanna, aka' yato tau la ungngita Puang Alataala.
9Puang Alataala umbehe tau ang supung nakärä'i mampasikapiai, aka' yato tau la disangai nei' petauanna.
10Puang Alataala umbehe tau ang napakauho-uho solana aka' umbabe kamarohoang, aka' yato tau la ungngampui nei' Kapahentaanna Puang Alataala.
11La nabeheo Puang Alataala ponna aha tau mangngita-ita naungngo anna mandahhao bahtu' napatanda'i tomande'o umbabe ingkänna hupanna kakarakeang aka' untindo'ä'. 12Penau-nauii yatoo anna kahsio, aka' setonganna daete' aha mallondo sahomu yaho di suruka. Daa untungke'du' ke ahai tau mandahhao, aka' umba sika napanoa undahha senabiang dolu, la napanoa tuntone' nadahhakoa'.”
To pentindo'na Puang Yesus sihapang sia anna kamabayaang yaling di lino
13Napatahhi' bumi tula'na Puang Yesus naoatee, ”Dioa' sihapangkoa' sia yaling inde di lino. Ampo' ponna ke dang mäsing yato sia, ya' dante' aha lalang la dipamäsing sala. Supurante' yato sia ditibe anna nasiindä'-indä'i tau aka' dang aha kunanna.
14Dioa' sihapang toukoa'ne' kamabayaang yaling di lino. Ponna aha bohto mahoa' ang ma'ongeang yaho di tanete, ya' yato bohto mahoa' la naita asangngete' ingkänna tau. 15Noa tunne' daete' aha mesa tau la umpau' lampunna mane nasalohko'i baki, ampo' yato lampunna napatokoete' dai' di ongeang ang malängkä' anna malai umballoi yato huäng dasang. 16Noa tungnga' dio, pepaitaing pano di ingkänna tau kamapiaammu sinnoa mata allo ang umballoi lino, anna malai yato pembabemua' ang mapia la naita ingkänna tau, lambi' la umpamatande sanganna Ambemua' yaho di suruka.”
Puang Yesus sule anna malai umpasundung Atohanna Musa
17Napatahhi' bumi tula'na Puang Yesus naoatee, ”Daa unsangaia' inde kasuleangku tama di lino la umpa'daiä' Atohanna Musa anna yato ang puha napalambi' senabiang dolu. Aka' nasuhung suleä', anna malai kupasundung asang ingkänna yatoo. 18Kutula'ingkoa' setonganna sumbana dake' pa'da langi' anna lino, inang daete'ne' aha la pa'da moi poro mesa huru' bahtu' mesa titi' yaling mai di Atohanna Musa sibaha yato ang nauki' senabiang dolu, ke dake' dahi asang ang puha natula' lohpo' Puang Alataala ang nalombung nabi. 19Dahi menna-menna untehkai mesa di alla'na yato pahenta, moinnakato anna nasangai dai pahallu sakali yatoo, anna umpaturui tau senga' untehkai toe' yato pahenta, ya' yato tau la diangka' nei' mesa tau ang handang madihoi'ang yaling di Kapahentaanna Puang Alataala. Ampo' menna-menna untuhu'i yato pahenta anna umpaturu toe' tau senga' untuhu'i yato pahenta, ya' yato tau la diangka'ne' mesa tau ang handang dipakeangka' yaling di Kapahentaanna Puang Alataala. 20Anna ponna dai umpala'bi puhaa' dio kamarohoammu andana kamarohoanna ingkänna to pampakuhu ada' anna to Farisi, ya' inang darea'te' la umpemitai la tama di Kapahentaanna Puang Alataala.”
Puang Yesus mampakuhu didiona tau ang maromi' keaha' anna pa'siba'diang
21Nalombungngi bumi tula'na Puang Yesus naoatee, ”Unghingngingnga' umba noa pepaturunna Puang Alataala pano di to baha' dolu ang naoatee, ‘Dai tau mala papateang. Anna menna-menna ang papateang pahallu ditahungkung.’ 22Ampo' kutula'ingkoa' dinoa kuoatee: menna-menna ang keaha' pano di solana#5:22 menna-menna ang keaha' pano di solana Aha suha' dolu ang aha tiuki': menna-menna ang keaha' pano di solana ke dai aha suhunna, ya' yato tau pahallu ditahungkung. Noa tunne' menna ang umbisi' solana pahallu dipapengngolo pano di to Mahkeada' anna ditahungkungngi. Anna tau ang untändoi solana la londo puha nei' anna sihatanne' dipatama di api nahaka.
23Dahi ponna umbahao penombaammu pano di pantunuang penombaang, ampo' tahpamu lambi' pano yato di pantunuang penombaang ya' ungkalehaing halirako dio siba'di solamu lambi' nakahiri'kangko, 24ya' dakangngi' dolu umpenomba, laoo dolu sikapiai yato solamu ang hali unsiba'diing. Puhaitoo mane umpatulu'i yato penombaammu dai' di Puang Alataala.
25Dolummu nabaha pano di to panghohto' balimmu, ya' sikapiai lohpo'o dolu. Aka' ponna dai umpanoa, ya' la napapengngoloo pano di olona to panghohto', anna yato to panghohto' la napapengngoloo pano di polisi ang la mampatamao di tahungkung. 26Kutula'ingkoa' setonganna darakoa'te' la mala nalahpa' yaling mai yato di tahungkung ke dai umbaya' asang dolu yato dendamu.”
Puang Yesus mampakuhu didiona dai tau mala ungngindä'-indä' pa'bannetauang
27Napatahhi' bumi tula'na Puang Yesus naoatee, ”Unghingngingnga' pahentana Puang Alataala ang naoatee, ‘Dai tau mala ungngindä'-indä' pa'bannetauang.’ 28Ampo' kutula'ingkoa' dinoa kuoatee: menna-menna ang ungngita mesa bahine anna nakailuii lambi' yaling di inahanna la pemala nakamahoi, ya' yato tau ang noa diangka' ungngindä'-indä'mite' pa'bannetauang yaling di inahanna anna diangka' madosang. 29Dahi, ponna mata kuanammu mandosaio, ya' kahohe'i yato matammu anna untibei. Aka' dotanne' sambali supu matammu dinoa andana tontongke' aha sibali matammu ampo' la tamao di api nahaka. 30Noa tunne' ponna teyye kuanammu mandosaio, ya' bose'i yato teyyemu anna untibei. Aka' dotanne' sambali supu teyyemu dinoa andana tontongke' aha sibali teyyemu ampo' la tamao di api nahaka.”
Puang Yesus mampakuhu didiona kasitibeang
31Nalombungngi bumi tula'na Puang Yesus naoatee, ”Aha toe' pepakuhu ang naoatee, ‘Menna-menna ang untibe bahinena, pahallu umbabe suha' kasitibeang.’ 32Ampo' kutula'ingkoa' dinoa kuoatee: ponna aha mesa muane untibe bahinena, ya' dianto disanga yato muane umpamadosa yato bahinena ke kemuane salang, sehalinna ke yatoi bahinena ungngindä'-indä' pa'bannetauang. Noa tunne' tau senga' ang umpobahine sala yato bahine, ya' diangka' toete' ungngindä'-indä' pa'bannetauang.”
Puang Yesus mampakuhu didiona dai tau mala mopinda
33Napatahhi' bumi tula'na Puang Yesus naoatee, ”Hali tungnga'ne' unghingngi umba noa pepaturu pano di to baha' dolu ang naoatee, ‘Ponna mopindao dai' di Puang Alataala didiona aka ang pahallu la umbabe, ya' yato popindamu pahallu umpembabe si'daing; dai mala dai.’ 34Ampo' kutula'ingkoa' dinoa kuoatee: daa umpopindai moi aka. Daa unsändä'i umpopindai langi', aka' yato langi' ongeannaete' Puang Alataala ma'pahenta. 35Noa tunne' lino, daa unsändä'i umpopindai aka' inde lino pengngindä'annaete' Puang Alataala. Londonang Bohto Mahoa' Yerusalem, aka' dianto bohto mahoa'na Puang Alataala Tomaraya ang matande. 36Noa tunne' daa unsändä'i umpopindai bää'mu, aka' daeto dio aha kakuasaammu la umpamaloteng bahtu' la umpamabusa beluhä'mu moi poro la sallamba'. 37Ampo' ang pahallu umbabe, dianto ponna inang la ungngoate, ‘io,’ ya' pengngioo. Anna ponna inang la ungngoate, ‘dai’ ya' oaite ‘dai.’ Aka' ponna ke unghängngängngi salake' tula'mu, ya' sule di haorante' mai di Pongkahana setang.”
Puang Yesus mampakuhu didiona dai tau mala umbala' pembabe karake
38Napatahhi' bumi tula'na Puang Yesus naoatee, ”Unghingngi tungnga' nei' umba noa pepaturu ang naoatee, ‘Mata pahallu dibala'i mata anna isi pahallu dibala'i isi.’ 39Ampo' kutula'ingkoa' dinoa: daa umbala' kakarakeang anna kakarakeang. Ampo' diare', ponna aha tau mantampiling pape kuanammu, bea toine' pape kaihimmu natampiling. 40Anna ponna aha tau ang la mambahao pano di to panghohto' aka' kaya'mu pemala la naala, ya' bea toine' kaya' kalambe'mu. 41Anna ponna aha tau mansuoo umposolai mesa kilo kahaona, ya' posolaii derua kilo. 42Ponna aha tau mampalau aka-akammu, ya' beai. Anna ponna aha tau la ungngindang aka-akammu, ya' paindangngii.”
Puang Yesus mampakuhu didiona umba dipanoa pano di balinta
43Nalombungngi bumi tula'na Puang Yesus naoatee, ”Unghingngi tungnga' nei' umba noa pepaturu ang naoatee, ‘Kalemuio ingkänna solamu ampo' kahi'di'i nei' ingkänna balimmu.’ 44Ampo' kuoaingkoa'te dinoa: kalemuio ingkänna balimmu anna palauing behe ingkänna tau ang mandahhao 45anna malao mendahi änä'-änä'na Puang Alataala, Ambemu, ang ma'ongeang yaho di suruka. Aka' Puang Alataala umpalelle' allo pano di tau mapia anna tau karake, noa tunne' umpatuhung kene' pano di tau mapia anna pano di tau karake. 46Anna ponna ungkalemuio supu tau ang mangkalemuio, ya' la unsangaraka kehängngämmi sahomu? Aka' ingkänna tau mala asangngete' membabe noa, moi tau ang handang mai'di dosanna mala tunne' membabe noa. 47Anna ponna supung tau ang unsiinsang liuing untabe'i, ya' akang kala'biammu? Darakae' mala asang ingkänna tau membabe noa, bahtu' moi ang dai ungnginsang Dehata mala tunne' membabe noa? 48Dahi pahallukoa' ungkalemui asang ingkänna tau dai aha unsehalii, sinnoa Ambemu yaho di suruka ang ungkalemui asang ingkänna tau.”
ప్రస్తుతం ఎంపిక చేయబడింది:
Matius 5: ATQ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
