Lukas 23
23
Puang Yesus napahehsa Pilatus
1Ya' sika paliängkä' asammi yato ang menge manghohto', anna umbahaii Puang Yesus mengngolo pano di Tuambahsa' Pilatus. 2Di hao di olona Pilatus sika napahandu'mi yato ingkänna tau untanda' Puang Yesus. Sika naoatee, ”Indee tau hali kilambi' umpasähsä' lalang petauangki', anna ullahang tau umbaya' sima pano di to ma'pahenta. Anna unsanga toi kalaena To Dilanti' la Mepasalama', dianto tomaraya ang didandi la sule.”
3Mekutanang Pilatus pano naoaintee, ”Diongka ne tomarayanna to Yahudi?”
Natimba'mi Puang Yesus naoatee, ”Noanto ne ang untula'.”
4Ma'tula'mi Pilatus pano di kapala-kapala imang anna pano di ingkänna tau naoatee, ”Dai aha kulambi' kasalaanna inde tau. ”
5Ampo' tuhtuang sika kakoha yato tau umpahsa Pilatus naoatee, ”Indee tau umpasala'kuhu tau mai'di ungngolai pepakuhunna unsamba kalanena Yudea, napahandu' di hao di Galilea lambi' dinne.”
6Tahpana nahingngi Pilatus yato tula'naii, ya' mekutanang naoatee, ”To Galilea turakane' inde tau?” 7Tahpana nahingngi Pilatus yato pentimba'naii, ya' nainsammi naoate Puang Yesus dianto mesa tau ang sule di hao mai di bohto kapahentaanna Herodes. Dahi napesuoing do napapengngolo pano di Herodes, ang donetoo tohho sängkä toune' yaho di Yerusalem.
Puang Yesus menge napahehsa Herodes
8Tahpana Herodes ungngita Puang Yesus, ya' kahsi liung nasa'ding, aka' inang masaeng pemala la naita, ampo' supung si napelele umba noa kahebana. Londonang aka' pemala naita toe' tanda ang mepusa'-pusa' ang si nababe Puang Yesus. 9Mai'di liu pekutananna Herodes pano di Puang Yesus ampo' dai naaku natimba' Puang Yesus moi poro la mesa. 10Lella' siang yato kapala-kapala imang sibaha to pampakuhu ada' sika mao pano di olona Herodes anna untanda'i Puang Yesus sitonda keaha'. 11Ya' napahandu'mi Herodes sibaha setantaraanna umpetae'-tae' Puang Yesus sitonda napakasili-sili, naangka'i napapakei kaya' tomaraya anna nasuoi sumule napapengngolo pano di Pilatus. 12Donetoo sikapaiai pole' sumule Herodes anna Pilatus, ang setonganna masae allong dai sibea inaha.
Puang Yesus napahehsa bou sumule Pilatus
13Ya' napatihimpummi Pilatus ingkänna kapala imang, ingkänna to pambahanang anna ingkänna hupatau. 14Anna ma'tula'i pano diii naoatee, ”Indee tau umbahaingkä'a' sule di oloku la kuhohto' anna ungngoaa'tee, ‘Mai'ding tau nabulingngi.’ Ya' ungngita tubungnga' dio kalaemu umba kupanoa kupahehsa, ampo' dai aha moi poro la sai'di' kulambi' yato kasalaang ang untanda'ingnga' nababe. 15Noa tunne' Herodes datoe' aha nalambi' kasalaanna. Dianto anna napasule sia bung pano di kami' sumule. Setonganna dai aha pembabe tahuhu ang nababe ang la napolalang ditahungkung mate. 16Dahi supung la kudahha dolu mane kulahpa'i sumule.” 17[Donetoo di tempona pa'mahoa'-hoa'ang pahallu aha mesa to ditahungkung ang dipabeba'ingngii.]
18Ampo' sangka' sika koha supu naoatee, ”Pa'daii sungnga'na ne tau! Lahpa'ingkang ta Barabas!” 19(Inde ta Barabas ditahungkung aka' papateang anna aka' umpaaha pa'tolla'ang yaling di bohto mahoa' umpa'bali to ma'pahenta.)
20Nasulei salang Pilatus ma'tula' pano diii napekäyyängngi liu, aka' pemala umpabeba' sumule Puang Yesus. 21Ampo' sika natimba' supu sika koha naoatee, ”Toke'i ne tau dai' di kayu sitambeng! Toke'i!”
22Naoa bunte Pilatus kapentallunna pano diii, ”Ampo' kakarakeang aka ang puha nababe? Dai aha moi poro sai'di' kasalaanna kulambi' menge kupahehsa ang la napolalang dipatei. Dahi supung la kupatoba' mane kulahpa'i sumule.”
23Ampo' tuhtuang sika koha yato tau mai'di umpahsa Pilatus anna malai ditahungkung mate yato Puang Yesus. Katämpä'anna patalo si'da yato tau mai'di aka' semata si koha. 24Ya' nabohtung Pilatus anna malai dituhu'i yato palau pahsaanna yato tau mai'di. 25Anna ullahpa'i yato tau ang ditahungkung napobua' pa'tolla'anna yaling di bohto mahoa' anna aka' papateang, situhu' palau pahsaanna tau mai'di. Ampo' Puang Yesusne' nabehone' pano di tantara diamo sika napanoa nadahha, situhu' pangngelo'na yato tau mai'di.
Puang Yesus ditoke' dai' di kayu sitambeng
26Sika le'ba'mi yato tantara ma'lulung umbaha Puang Yesus. Yaling di pellaoannaii sika sitammu mesa tau disanga Simon, to sule di hao mai di Kirene lella' lutama di bohto mahoa'. Sika nasahka tomande'mi di tängngä lalang anna nasuoi umbulle yato kayu sitambeng mentindo' di Puang Yesus. 27Mai'di liu tau ma'lulung untindo' Puang Yesus. Di alla'na yato tau mai'di aha toe' sangngaka-sangngaka bahine mangngumbui. 28Sika nasaileng Puang Yesus anna naoaintee, ”Oa' ingkämmu bahine to Yerusalem, daa Kodi'i undusengngia' ampo' kalaemurea'ne' sibaha änä'mu la undusengngi! 29Aka' itaia'too, la aha tempona ang la naoate tau, ‘Kehongko'ne' bahine ang dai aha unsa'ding kakeänä'ang, anna ang dai aha mansusu susunna. 30Ya'
napahandu'mi tau naoate pano di ingkänna tanete malängkä', ‘Kahuhsuiang mai!’
anna pano di ingkänna buntu naoatee, ‘Tambungngiang!’ Hos 10:8
31Aka' ponna Kodi' indee ang dai aha kasalaangku nahoa kakarakeang, ya' la londo puharea'to dio.”
32Donetoo aha toe' derua tau senga' ang sika nabaha toe' la dipatei sibaha Puang Yesus. Yato derua dianto to karake.
33Tahpana sika lambi' dai' di mesa tanete saohko' ang disanga ongeang kahuhhung, ya' sika untoke'mi Puang Yesus dai' di kayu sitambeng yaho. Noa tunne' yato derua to karake sika toke' toe', mesa tando di kuananna anna mesa tando di kaihinna Puang Yesus. 34Ma'tula'mi Puang Yesus naoatee, ”O Ambe', ampungngii inde maiii, aka' dai sika nainsang aka ang menge sika nababe.” Lella'ne' yato setantaraang unsusa-susa yato kaya'na umpake nomoro' anna pantangngi mandohe'.
35Yato tau mai'di sika ke'de' lipu' mehele. Ingkänna to pambahanang sika unte'le-te'le Puang Yesus sika naoatee, ”Tau senga' malane' napasalama'! Dahi ponna inang Dia si'da yato To Dilanti' la Mepasalama' ang napillei Puang Alataala, ya' malato la umpasalama' Kalaena.”
36Noa tunne' yato setantaraang sika umpakauho-uho Puang Yesus. Sika napaenu' angkoro' mainsung dai' di kayu sitambeng, 37lella' sika naoaintee, ”Ponna ke inang tomarayanna si'dao to Yahudi, ya' pasalama'o Kalaemu!”
38Aha toi tiuki' yaho di hahona naoatee, TOMARAYANNA TO YAHUDI.
39Mesa di alla'na yato to karake ang ditoke' sibaha umpetae'-tae' Puang Yesus naoaintee, ”Tadiarakakote' ne Diong To Dilanti' la Mepasalama'? Ponna inang Dio, ya' pasalama'o Kalaemu anna kami' tou kami'.”
40Ampo' nasängkäi yato santokarakena naoaintee, ”Darakako ne mahea' dai' di Puang Alataala? Ke ladara ne aka' menge turako dio ditahungkung mate! 41Kita'-kita' inang sipäto'ingke ditoke' aka' bala'na kasalaang ang hali tababe, ampo' indene' Tau daine' aha aka nababe ang sala ang la sihatang ditahungkung mateing.”
42Mane natämpä'ii tula'na naoatee, ”O Puang Yesus, kalehairangkä' kodi' ke sulemo dako' mendahi tomaraya.”
43Naoaminte Puang Yesus, ”Kutula'ingko setonganna allo dinoa siang sibahaingke tohho yaling di ongeang kamasannangang.”
Kamateanna Puang Yesus
44Donetoo umbai tehte' sampulo derua tängngä allo, ya' pihsa' malillimmi kalane lambi' tehte' tallu di solo' allo. 45Nasuhung noa aka' dai mesilo mata allo. Yato kaing malua' ang diehte' yaling di Dasang Ada' seu' tiperederua. 46Ya' metambang Puang Yesus napekäyyängngi naoatee, ”O Ambeku, kubeho sungnga'ku tama di pala' teyyemu.” Puhanna ma'tula', ya' pohsu'mi penanahanna.
47Tahpana naita to pambahanang tantara yato aka ang dahi, ya' umpuding sanganna Puang Alataala naoatee, ”Ahana inang dai aha kasalaanna inde hupatau!” 48Naitanna yato ingkänna tau ang sule mehele aka ang dahi donetoo, ya' sika sumuleing punno panohsoang. 49Yato ingkänna ang mangnginsang liung Puang Yesus, noa tunne' yato ingkänna bahine ang mampentindo'i mengkalao di hao di Galilea, sika ke'de' asang ungngita makahao yato ingkänna kadahiang.
Puang Yesus diku'bu'
50-51Aha mesa tau disanga Yusuf ang sule di hao mai di Bohto Arimatea di Poropensi Yudea. Inde Yusuf mesa tau ang mapia inaha anna napakeangka' tau, anna menge toi ungngempei Kapahentaanna Puang Alataala. Moinnakatoo mesa toe' di alla'na To Mahkeada'na to Yahudi, ampo' daine' naakui yato kabohtuannaii. 52Le'ba' mengngolo pano di Tuambahsa' Pilatus umpalau bahkena Puang Yesus la naku'bu'. 53Tahpana puha napatuhung yato bahkena yaho mai di kayu sitambeng, ya' nabalummi umpake kaing mahasa, mane napalampa'i tama di ku'bu' batutung ang dake' aha dipampatamai bahkena tau. 54Donetoo dianto allo Juma' tempona tau mampatoka aka' la lambi'mi allo katohhoang.
55Yato sangngaka-sangngaka bahine ang sulei di hoi' mai di Galilea sibaha Puang Yesus sika mentindo' toe' di Yusuf anna naitai umba noa tilampa'na yato bahke yaling di ku'bu' batutung. 56Mane sika sumulei do umpatoka lohpo-lohpo bomammi' anna minnä'-minnä' ang la naminnä'ing yato bahke.
Tahpana di allo katohhoang, ya' sika untohhoing kähängannaii untuhu'i atohang ada'na to Yahudi.
Puang Yesus tuho sumule di hoi' mai di kamateang
ప్రస్తుతం ఎంపిక చేయబడింది:
Lukas 23: ATQ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
