MATIUS 9
9
Yesus, kam ipit ajaoromtaere atakam
(Mrk. 2:1-12; Luk. 5:17-26)
1Yesus ti asojuuen. Are poman ajiren. Poman ajirerawa, akota aofasien. 2Oweam kam ipit tapini aptam Yesus atoomtinesen. Yesusam era owe Ara bamesem eemnak aporen. Ararawa, atakam era kam ipit akoromen. “Jak fiaka! Dere wadosa bimak binip ajanimemtammin.” Emes atakam aesimen. 3Me wan Musa Basakamtam Atakam baememtam owerawa, bimak binip atetaramesen. “Ara aemema Ipit Allah awaren. Erarawa Are pota atakam daytu akorem.” Emes atakam aesimesen. 4Yesusam era owe bimak binip atetarames amsamen. Ararawa, “Tare wama bimak binip pota tetarammakam? 5Tene atakam ere, wama atakamum? ‘Dere wadosa bimak binip ajanimemtammin,’ emes atakam ape? ‘Bawasitey! Wonom bajarey,’ emes atakam ape? 6Me Asamot Anakot Ajaoreme Ipit, ere ara aemansa tapirmi owe dosa bimak binip bajanimemtam fiak pak aoemommar. Dere era pak tara aporomtammin.” Emes atakam aesimen. Armat Ipit arawa, atakam era kam ipit aokoromen. “Bawasitey! Wonom te! Wotapini bataerey!” Emes atakam aesimen. 7Emesare, era kam ipit awasiten. Are atame aesosen. 8Era owe tananeam emes apores, are ombare aememesen. Allah, emes fiak pak daytu, asamot owe atetame aporesen. Erarawa are Allah tere aeomesen.
Yesus, Matius, Ara bajamkai ajate atakam
(Mrk. 2:13-17; Luk. 5:27-32)
9Emesare, Yesus era asan beken ajiose. Ajare ere, Armat Ipit, Matius, pemerintah uang bajanimtam tame bomon aemape apore. Yesus arawa, “Dera jamkaian!” Emes atakam aesime. Emesare, Matius awasite. Are Armat Ipit ajamkaie.
10Yesus Matius tame bomon, amos banda aemape. Pemerintah uang bajanimtam karai owe tananeam, era Yahudi agama pak tai aooes owe tananeam, ambaromes. Are Yesusam, abajamkai oweam, amos takan ajamdes. 11Parisi oweam era pak apores. Ararawa, Yesus bajamkai owe ajatepores. “Taguru, pemerintah uang bajanimtam karai oweam, Yahudi agama pak tai aooes oweam, amos takan andeemas. Ere wama tamenem?” Emes atakam aesimes. 12Yesusam emes atakam jane ajie. “Damo akot owe, dokter atakam bajanim apok aememas. Me damo pota owe ere, dokter atakam ajanimemas. 13Alkitabam, ‘Dere, owe soro bajiomem, jak aseserommin. Dere ere, owe pak Dera bataetiitam, jak baseseromem apok.’ Emes atakam akorem. Emesare. Tare baesosay, wanam era atakam, bimak binip atetaramay. Dere turu owe bajate bandae apok. Dere jaos owe bajate andaeo.” Yesus emes atakam aesime.
Owe banda pak bamase atakam
(Mrk. 2:18-22; Luk. 5:33-39)
14Ajoferawa, Yohanes bajamkai owe, Yesus ajinaomes. “Danom, era Parisi oweam, bare tanane banda pak ambasememarom. Me wobajamkai owe ere, juiin afaafemar banda pak andemas. Ere wama tamenem?” Emes atakam aesimes. 15Yesus arawa, “Ai petae ipit, ajoo owe takan ajamemapemas apaye, ajoo owe jak pota ape? Emesare, are jak pota apok. Asep bare ere, owe, era ai petae ipit, ajoo owe waut aeresumtaertemas. Me ajoo owerawa, banda pak ambasetemas.
16Owe, ai kain, tarai baju ten bakekemapompor apok. Are ai kain, tarai baju ten akekemapomtas, wanam era baju bwi aeosomtas, era ai kain, era baju akekemtaaem. Era tarerawa, daytinak aotarem. 17Oweam ai anggur bwi, tarai pitini bwi ese bomon baoweapompor apok. Owe ai anggur, tarai pitini bwi ese bomon aoweapomtas, era pitini ese atarem. Me anggur bwiam aokoameskoromum. Era pitini aseam andanaesuamsem. Me, owe ai anggur bwi, ai pitini ese bomon aoweapomemas. Emesare, era bwiam, era eseam, akot ajapaaremas.” Yesus emes atakam aesime.
Yesus taot amnuk ajaoromtaere atakam
(Mrk. 5:21-43; Luk. 8:40-56)
18Yesus emes atakam era owe akorome ere, Yahudi owe samayen tame kapar ipitam ambareme. Are Armat Ipit bipu bi fop andaejiape. “Deparais dambir japen kamiansem. Wore ere, de! Woban era taot damo ten ataetiiey. Ararawa, ajaorwasittem.” Emes atakam aesime. 19Yesus arawa, awasite. Are, abajamkai oweam, era ipit takan ajamesoses.
20Taot takaam, tani esee tahun 12 bakari apok aemape. Era taot Yesus beak apopireme. Are Armat ipit baju ban bi akurume. 21Era taot bimak binip atetarame. “Dere Armat Ipit baju ban akurumtey, damo akot aemaptemin.” Emes atakam aesime. 22Yesusam asep banep aorome. Are era taot apore. “Jak fiaka! Wore eemnak ambesemkorommanim. Erarawa damo akot aememmarem.” Emes atakam aesime. Emesare, era taot damo akot ameteememe.
23Emesare. Yesus kapar ipit tame ajiieme. Are suling bajam owe apore. Are owe basawuam daytu apore. 24Armat Ipit arawa, “Tare baesosay! Era taot jii dambir apok. Are ise putamsar.” Emes atakam aesime. Era owe ere, Yesus wote awotomes. 25Yesusam era owe tanane era tame bomon ambirimjisime. Ambirimjisimerawa, Are era taot jii kamar ajiieme. Are era jii ban atapimome. Era jiirawa, awasite. 26Era tapirmi owe takes emes atakam jane ajies.
Yesus ipit amnuk banamek awaramomemtame atakam
27Emesare. Yesus era asan aesose. Ajare ere, banamek kapie ipit amnuk, Armat Ipit fe asaramemis. Are atakam daytu akorea ajiemis. “Daut Wurpise! Seekot aoorporaro!” Emes atakam aesima ajiemis. 28Emesare, Armat Ipit tame ajiie. Era banamek kapie ipit amnukam, Armat Ipit ambaromemis. Yesusam atakam era ipit amnuk akorome. “Dere tabanamek bawaramemomtam fiak pak aptam. Tare emes atakam eemnak Dera bamesemkorom ape?” Emes atakam aesime. Era ipit amnuk arawa, “Tuhan! Dare emes atakam eemnak ambesemkoromamum,” Emes atakam aesimemis. 29Emesare, Yesus ban era ipit amnuk banamek ataapome. “Tare emes atakam eemnak ambesemkorommankum. Erarawa tabanamek awaremmara.” Emes atakam aesime. 30Emesare, era ipit amnuk, banamek awarememis. Yesusam atakam fiak era ipit amnuk asakamtame. “Tare era pak atakam owe baesimtam bas.” Emes atakam aesime. 31Era ipit amnuk arawa aesosemis, wanam are Yesus atakam, era tapirmi samaniin samaniin owe aesimtamemis.
Yesus okor ipit jak bomon bii ambirimjisime atakam
32Era ipit amnuk aesosemis ere, wan owe, okor ipit, Yesuspu atoomtines. Okor bii era ipit jak bomon aemapaaririn. Erarawa era ipit okor aememaaririn. 33Yesus era bii era ipit jak bomon ambirimjisime. Era ipit arawa, atakam aopake. Era owe tananeam jinim daytu aees. “Dare Israel tapirmi emes pak basamo bata apoknak.” Emes atakam aesimes. 34Me Parisi oweam atakam akoromes, “Bii Kapar Ipit fiak pak ara aemema Ipit atetamum. Erarawa ara Ipit bii ambirimjisimum.” Emes atakam aesimes.
Yesus owe seis akot aoorpore atakam
35Emesare. Yesus kota takesam, samane takesam, afojieme. Are samaniin samaniin Yahudi owe samayen tame bomon atakam aememtama ajaie. Are Allah aobaomep owe baemem Akot Atakam, akoretama ajaie. Are owe damo pota kupisam, kumiti pota damo kupisam, ajaoromtaera ajaie.
36Era owe tanane, banamek batai ipit apok domba tamen aemapes. Are ajirisemes domba anama apatakuoses domba tamen aemapes. Yesusam emes apore. Erarawa Are era owe seis akot aoorpore. 37Armat Ipit arawa, atakam abajamkai owe akorome. “Pak taso eek pii, ere daytinak. Bakokomtaa owe ere, tanane apok. 38Tanom atakam era pak taso armat ipit ajanimay. Are owe aapak taso eek bakokomtaa atakam basakamtamto.” Emes atakam aesime.
ప్రస్తుతం ఎంపిక చేయబడింది:
MATIUS 9: LAIASC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
