PAMUNGKAAN 3
3
Pangaloan ni jolma tu Debata
1Ulok do binatang na umbisuk sian sude binatang na nitompa ni Tuhan Debata. Disapai ulok i ma tu dadaboru i, “Tutu ma he na so dipatola Debata hamu mangankon batu ni hayu na di bagasan kobun on sude?”
2“Tola do da panganonnami sian sude batu ni hayu na di bagasan kobun on,” ning dadaboru i, 3“asing sian hayu na di parsitongaan ni kobun on. Anggo sian hayu i dirarang Debata do panganonnami sanga jamaonnami, muda hami pangan sian i, mate ma hami.”
4Dialusi ulok i ma, “Nada tutu hamu mate. 5Didok Debata pe songon i, harana diboto Ia do muda dipangan hamu batuna i gabe tudos ma hamu tu Debata, umboto na denggan dohot na jahat.”
6Jeges ma antong hayu i diida dadaboru i, dohot tabona pe batuna i panganon jana marpikir ma ia, sonangna i antong muda gabe bisuk iba. Jadi gabe diputikkon ia ma batu ni hayu i lalu dipangan ia. Dilehen ia muse ma deba di halaklahinia i jadi dipangan halaklahinia i muse ma i. 7Disi dipangan halahi batu ni hayu i manigor marbuka ma pikiran ni halahi, gabe mamoto ma roha ni halahi. Gabe diboto halahi ma hape na so marpakean do halahi; gabe dibuat halahi ma bulung-bulung manutupi pamatang ni halahi.
8Marayak potang ari dibege halahi ma Tuhan Debata mardalan di kobun i, gabe martabuni ma halahi di holang-holang ni angka hayu i anso ulang diida Tuhan Debata halahi. 9Tapi pio-pio ma Tuhan Debata tu halaklahi i, “Di dia do ho?”
10Dialusi halaklahi i ma, “Mabiar do au dung hubege Ho ro tu kobun on gabe martabuni au, angke marsaemara do au.”
11“Ise mandok tu ho lakna, paboa na marsaemara ho?” ninna Debata manyapai. “Adong he dipangan ho batu ni hayu i na Hurarangi panganonmu?”
12Dialusi halaklahi i ma, “Dadaboru na nibaenMi gabe donganku, ia do mangalehen di au, gabe hupangan.”
13Disapai Tuhan Debata ma tu dadaboru i, “Biasi dibaen ho songon i?”
Jadi dialusi ia ma, “Na dipaoto-oto ni ulok i do au, gabe hupangan batu ni hayu i.”
Didabu Debata uhuman
14Dung i didok Tuhan Debata ma tu ulok i, “Hona uhum ma ho hara ni pangalahomi; sian sude na margoar binatang, hum ho ma manaon bura na songon on; mamungka sian on, manjurur noma ho dohot butuhamu, jana abu noma panganonmu salolot ho mangolu. 15Marsihosoman ma ho dohot dadaboru i. Marsalisi ma torus pomparanna tu pomparanmu. Ropukkonon ni pomparannia ma ulumu jana turbingonmu ma tambihulna.”
16Jadi didok Debata ma tu dadaboru i, “TambaonKu ma hasusaanmu di hatiha denggan pamatangmu, dohot hahancitanmu di na giot manubuhon dakdanak. Tapi haru pe songon i laing tongtong noma sai ro rohamu tu halaklahimu, jana anso dioloi ho halaklahimu.”
17Dung i didok Ia ma tu halaklahi i, “Dibaen madung dipatangi-tangi ho hata ni dadaborumu gabe dipangan ho batu ni hayu na Hudok na so tola panganonmu. Jadi hara ni pangalahomi, gabe hona bura ma tano. Angkon marsitutu noma ho karejo salolot di ngolumu, anso tuk panganonmu sian suha ni tano i. 18Partubuhonon ni tano i ma ramba-ramba dohot duri jana simarata noma sipanganonmu. 19Maradu loja noma ho markarejo jana hodohan laho pauli tano i anso marhasil, lopus mulak ho gabe tano angke na sian i do ho dijadihon, jana mangulahi muse ma ho gabe tano.”
20Digoari si Adam ma dadaborunia i si Hawa, angke dadaboru i ma na gabe ina ni sude jolma manusia. 21Jadi dipauli Tuhan ma sian bobak ni binatang pakean di si Adam dohot dadaborunia i, lalu di papakehon Ia ma tu halahi.
Dipaorot ma si Adam dohot si Hawa sian Kobun Eden
22Didok Tuhan Debata ma, “Saonnari madung gabe tudos songon Hita jolma i jana madung marparbinotoan taringot tu na denggan dohot na jahat. Nada patolaon panganonna batu ni hayu na mangalehen ngolu i, anso ulang mangolu ia salolot-lolotna.” 23Lalu dipaorot Tuhan Debata ma jolma i sian Kobun Eden i jana disuru Ia ma mangkarejohon tano na gabe asalna i hian. 24Dung i muse, di sabola Habincaran ni kobun i, dibaen Tuhan Debata ma angka kerub na marpodang sidua baba na marputar humaliang laho manjago anso ulang adong sahalak pe mandonohi hayu na mangalehen ngolu i.
ప్రస్తుతం ఎంపిక చేయబడింది:
PAMUNGKAAN 3: LAIAKB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Indonesian Bible Society
