مزگینیا مەتتای 16

فەریسی داخوازا نیشانەكێ دكەن

(مەرقۆس 8‏:11‏-13؛ لوقا 12‏:54‏-56)

1فەریسی و سەدوقی هاتنە نك عیسای، دا وی تاقی بكەن، داخواز ژێ كر كو نیشانەكێ ژ ئەسمانی#16‏:1 ژ ئەسمانی: ئانكو ژ نك خودێ نیشا وان بدەت. 2بەرسڤا وان دا: «دەمێ رۆژ ئاڤا دبیت، هوین دبێژن: ‹دێ ساهی بیت، چنكو ئەسمان یێ سۆر بووی.› 3لێ سپێدێ دبێژن: ‹ئەڤرۆ دێ سەقا یێ نەخۆش بیت، چنكو ئەسمان یێ سۆر و گرتییە.› هوین دزانن دیمەنێ ئەسمانی شڕۆڤە بكەن، لێ هوین نەشێن نیشانێن سەردەمان شڕۆڤە بكەن. 4نفشەكێ خرابكار و دەهمەنپیس نیشانەكێ دخوازیت، لێ ژبلی نیشانا یونس پێغەمبەری#16‏:4 مەتتا 12‏:38‏-42، چ نیشان بۆ ڤی نفشی ناهێنە دان.» پاشی ئەو هێلان و چوو.

هەڤیرترشێ فەریسی و سەدوقیان

(مەرقۆس 8‏:14‏-21)

5دەمێ شاگردێن وی چووینە كنارێ دی، ژ بیر كربوو كو نانی ل گەل خۆ ببەن. 6عیسای گۆتە وان: «ئاگەهدار بن، هشیار بن ژ هەڤیرترشێ فەریسی و سەدوقیان!» 7شاگردان د ناڤبەرا خۆ دا دەست هاڤێتە دانوستاندنێ و گۆتن: «مە نان ل گەل خۆ نە ئینایە، لەوما یێ ڤێ دبێژیت.» 8عیسای زانی و گۆتە وان: «هەی ئەوێن كێمباوەر، هوین بۆچی د ناڤبەرا خۆ دا دبێژن: ‹مە نان نینە›؟ 9ما هێشتا هوین تێنەگەهشتینە؟ ما بیرا هەوە ناهێتە پێنج نانێن كو پێنج هزار تێر كرین و هەوە چەند سەڵك ژێ كۆم كرین؟ 10و وان حەفت نانێن چوار هزار تێر كرین و هەوە چەند سەڤیك ژێ كۆم كرین؟ 11هوین چەوا تێناگەهن كو من بەحسێ نانی نەدكر؟ هشیاری هەڤیرترشێ فەریسی و سەدوقیان بن.» 12هنگی ئەو تێگەهشتن، كو وی نە ژ بەر هەڤیرترشێ نانی، لێ ژ بەر فێركرنا فەریسی و سەدوقیان ئەو ئاگەهداركرن.

پەترۆس دانپێدانێ دكەت كا عیسا كیە

(مەرقۆس 8‏:27‏-30؛ لوقا 9‏:18‏-21)

13دەمێ عیسا گەهشتیە دەڤەرا قەیسەریا فیلیپۆسی، پرسیار ژ شاگردێن خۆ كر: «خەلك دبێژن كوڕێ مرۆڤ كیە؟» 14وان بەرسڤ دا: «هندەك دبێژن یوحەننایێ تافیركەرە و هندەك دبێژن ئلیاسە و هندەك ژی دبێژن یەرمیایە یان ژی ئێكە ژ پێغەمبەرێن دی.» 15عیسای گۆتە وان: «و هوین چ دبێژن، ئەز كیمە؟» 16ئینا شەمعون پەترۆسی بەرسڤا وی دا و گۆت: «تۆ مەسیحی#16‏:16 ل فەرهەنگۆكێ بنێڕە مەسیح.، كوڕێ خودایێ زیندی.» 17عیسای بەرسڤ دا و گۆتە وی: «خوزیكێن تە، شەمعونێ كوڕێ یۆنای! چنكو چ خوین و گۆشتان ئەڤە بۆ تە دیار نەكریە، لێ بابێ منێ ل ئەسمانان. 18ئەز دبێژمە تە: تۆ پەترۆسی#16‏:18 رامانا ناڤێ ‹پەترۆسی› ب یونانی ‹كەڤر›ە. و ل سەر ڤی كەڤری دێ جڤاكا باوەردارێن#16‏:18 جڤاكا باوەرداران: ئانكو كەنیسە. ل فەرهەنگۆكێ بنێڕە جڤاك. خۆ ئاڤا كەم و دەرگەهێن وارێ مریان#16‏:18 ل فەرهەنگۆكێ بنێڕە. نەشێن ل دژی وێ سەركەفتنێ بینن. 19دێ كلیلێن پاشایەتیا ئەسمانان دەمە تە و هەر تشتەكێ تۆ ل ئەردی گرێ دەی، دێ ل ئەسمانان یێ گرێدای بیت و هەر تشتەكێ ل ئەردی ڤەكەی، دێ ل ئەسمانان یێ ڤەكری بیت.» 20هنگی عیسای فەرمان دا شاگردێن خۆ كو نەبێژنە كەسێ ئەو مەسیحە.

عیسا بەحسێ مرن و رابوونا خۆ دكەت

(مەرقۆس 8‏:31 تاكو 9‏:1؛ لوقا 9‏:22‏-27)

21د وی دەمی دا، عیسای دەست پێ كر شاگردێن خۆ ئاگەهدار كرن، كو پێدڤیە ئەو بچیتە ئورشەلیمێ و ژ لایێ ریهسپی و سەرۆكێن كاهنان و مامۆستایێن دەستووری ڤە بهێتە ئازاردان و كوشتن و ل رۆژا سێیێ راببیتەڤە. 22پەترۆسی ئەو ڤەدەر كر و پاشڤە بر و گۆتێ: «خودان، دویری تە! چ جاران ئەڤ تشتە ب سەرێ تە ناهێت.» 23عیسا ل پەترۆسی زڤڕی و گۆتێ: «ژ بەر چاڤێن من هەڕە هەی ئبلیس! تۆ ئاستەنگی ل پێشیا من، چنكو هزرێن تە نە ل سەر تشتێن خودێنە، لێ ل سەر تشتێن مرۆڤانە.»

24هنگی عیسای گۆتە شاگردێن خۆ: «ئەگەر ئێكی بڤێت ل دویڤ من بهێت، بلا خۆ ماندەل بكەت#16‏:24 ئانكو: بلا دەست ژ حەز و خۆشیێن خۆ یێن ڤێ جیهانێ بەردەت. و خاچا خۆ هەلگریت و ب دویڤ من بكەڤیت. 25چنكو ئەوێ بڤێت ژیانا خۆ قورتال بكەت، دێ وێ ژ دەست دەت، لێ ئەوێ ژیانا خۆ ژ پێخەمەتی من ژ دەست بدەت، دێ وێ پارێزیت. 26مرۆڤ دێ چ مفای كەت، ئەگەر جیهان هەمی ب دەست خۆ ڤە ئینا، لێ ژیانا خۆ ژ دەست دا؟ مرۆڤ دێ ب پێش ژیانا خۆ ڤە چ دەت؟ 27كوڕێ مرۆڤ دێ ب مەزناهیا بابێ خۆ ڤە ل گەل فریشتەیێن خۆ هێت، هنگی هەر كەسەك دێ ل دویڤ كارێن خۆ هێتە خەلاتكرن. 28ب راستی دبێژمە هەوە: هندەك ژ ئەوێن ل ڤێرێ راوەستیاین، تاكو هاتنا كوڕێ مرۆڤ د پاشایەتیا وی دا نەبینن، تام ناكەنە مرنێ.»

ప్రస్తుతం ఎంపిక చేయబడింది:

مزگینیا مەتتای 16: BHD

హైలైట్

షేర్ చేయి

కాపీ