मत्ती 4
4
यीशु परखुणौ
(मरकुस 1:12-13; लुका 4:1-13)
1तैबै पवित्र आत्मै यीशु शुनशान ज़ागाह दी नियौं ताकी शैताना तेस पौरखा। 2यीशु चालिस दीन और चालिस राची भुखौ रौ, तैबै तेसकै भूख लागी। 3तैबै शैतानै नज़दीक आशीयौ तेसलै बोलौ, “अगर तू परमेश्वरा रौ छ़ोहरु ई, ता बोल, की इऐ पात्थर रोटी बौणा।” 4यीशुऐ ज़वाब दैऔ, “पवित्रशास्त्रा दी आ लिखौ औन्दौ, ‘आदमी सिरफ रोटी ई कौरी नाईं, पर परमेश्वरा रै बोलै औन्दै हर एकी वचन मानियौ, ज़िउंदौ रौआ लौ।’ ”
5तैबै शैतानै यीशु पवित्र शहर यरुशलेमा दी निऔं और तिऐ परमेश्वरा रै घौरा रै छ़ापरा माथै खौड़ौ कियौ 6और तेसलै बोलौ, “अगर तू परमेश्वरा रौ छ़ोहरु ई ता इदरु तौल़ै फाल़ दै। कैलैकि पवित्रशास्त्रा दी इणौ आ लिखौ औन्दौ तैरै बारै दी, ‘कि परमेश्वर आपणै दूता लै हुकम दिया कि सै ताऊं हाथा-हाथा दी च़ुंगा ई ताकी तैरै बांगणै दी पात्थरा कु ठोकर ना लागा।’ ” 7यीशुऐ तेसलै बोलौ, “पवित्रशास्त्रा दी इणौ भी आ लिखौ औन्दौ, ‘तू प्रभु आपणौ प्रभु परमेश्वर नाईं पौरखै।’ ” 8तैबै शैतानै यीशु एक भौरी उंच़ै पहाड़ा माथै निऔं और धौतरी रौ सारौ राज़ और तेथरौ ठाठ-बाठ देखाल़ियौ, 9तेसलै बोलौ, “अगर तू मुकै झुकियौ ढाल कौरालौ, ता हाऊं एस सारौ कुछ़ ताउंकै दिआऊ।” 10तैबै यीशुऐ तेसलै बोलौ, “ओ शैतान दूर डेऊ, कैलैकि पवित्रशास्त्रा दी आ लिखौ औन्दौ कि, ‘तू प्रभु आपणै परमेश्वरा कै झुकियौ ढाल कर, और सिरफ तेसी री भौक्ती कर।’ ”
11तैबै शैतान तेस काऐ कु डेई गौ, सौरगदूत तेस काऐ आशीयौ यीशु री सेवा कौरदै लागै।
यीशु रै सेवा रै कामा री शुरुआत
(मरकुस 1:14-15; लुका 4:14-15)
12ज़ेबी यीशुऐ इणौ शुणौ की यहुन्ना कैदा दी पाई गौ, ता सेऊ यहुदिया परदेशा छ़ाड़ियौ गलील परदेशा रै नासरता गांवा दी आशौ। 13और तैबै नासरत गांवा छ़ाड़ियौ कफरनहूम गांवा दी डेइऔ रौउंदै लागौ, ज़ो झ़िला रै डिका काऐ जबूलून और नप्ताली रै इलाकै दी सा। 14ताकी ज़ो यशायाह भविष्यवक्ता रै ज़ौरिऐ बोलौ औन्दौ थौ, सेऊ पुरौ हुआ। 15“जबूलून और नप्ताली रै इलाकै, झ़िला री बाटा कु यरदना नौईं पार, दुजी ज़ाती रौ गलील 16ज़ो लोग न्यारै दी बोशै औन्दै थै, तिंउऐ बौड़ौ प्याशौ देखौ। और ज़ुण लोग मौउती रै डौरा दी थै ज़िउंदै लागै औन्दै, तिऊं माथै प्याशौ च़ौमकौ।” 17सेज़ै बौगता कु यीशुऐ परचार कौरणौ और इणौ बोलणौ शुरु कौरी गौ कि, “सारै लोग आपणै-आपणै पापा कु माफी पाइणा लै बुरै कामा कु मन बौदल़ौ। कैलैकि सौरगा रौ राज़ नज़दीक आशी गौ आ।”
पैहलै च़ेलेऊ औटाउणै
(मरकुस 1:16-20; लुका 5:1-11; यहुन्ना 1:35-42)
18यीशुऐ गलीला री झ़िला रै डिका काऐ घुमदै दुई भाई देखै ज़ासरै नाऊं शमौन ज़ासलै पतरस बोलाई, और तेसरौ भाई आन्द्रियास झ़िला दी ज़ाल़ पाइंदै देखै। कैलैकि सै झ़ींवर थै। 19यीशुऐ तिउंलै बोलौ, “मुं पिछ़ु आशौ, ता हाऊं तुमु लोगु मुं काऐ आणनै वाल़ै चाणाऊ।” 20सै खरकच़ार ज़ाल़ा छ़ाड़ियौ यीशु पिछ़ु हुई गौऐ।
21तिदरु आगुड़ै डेइयौ, यीशुऐ तौंइऐ दुई भाई जबदी रै छ़ोहरु याकूब और तेसरौ भाई यहुन्ना देखौ। सै आपणै बाब जबदी आइलै किश्ती दी आपणै ज़ाल़ ठीक कौरदै थै लागै औन्दै। यीशुऐ सै भी औटाऐ। 22सै खरकच़ार किश्ती और आपणौ बाब छ़ाड़ियौ तेस पिछ़ु हुई गौऐ।
यीशु बिमार लोगु ठीक कौरा
(लुका 6:17-19)
23यीशु सारै गलील परदेशा दी डेइयौ तिउंरी आराधनालय दी शिक्षा दैंदै, और राज़्य रौ परचार कौरदै, और लोगु री हर बिमारी और लाच़ारी दूर कौरदै लागौ। 24और सारै सीरिया परदेशा दी यीशु री महिमा फैअली गोई। और लोग सारी बिमारी, ज़ो कई रौंगा री बिमारी और दुखा दी पौड़ै औन्दै थै, और ज़ासदी बुरी आत्मा थी, और मिर्गीवाल़ै और इणै आदमी ज़ासरै ज़िसमा रौ केज़ौ भी आंग नाईं हिला थौ, यीशु काऐ आणै और यीशुऐ सै ठीक किऐ। 25गलील परदेश और दिकापुलिस इलाकै, यरुशलेम शहर, यहुदिया परदेश और यरदन नौईं रै पारा कु भीड़ा री भीड़ यीशु पिछ़ु हुई गोई।
ప్రస్తుతం ఎంపిక చేయబడింది:
मत्ती 4: BFZ-NT
హైలైట్
షేర్ చేయి
కాపీ
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
