MWAMBĨLĨLYO 4
4
Kaini na Aveli
1Na Atamu amanya Eva mũka wake; nake aya ĩvu, na asyaa Kaini, asya, Nĩnoosa mũndũ mũũme kwa kũtethw’a nĩ Yeova. 2Na ĩngĩ asyaa mwana‐a‐inyia Aveli. Na Aveli aĩ mũĩthi wa malondu, ĩndĩ Kaini aĩ mũĩmi wa nthĩ. 3Na kweethĩwa matukũ amwe mathela, Kaini aetee Yeova nthembo ya ũsyao wa nthĩ. #Kuma 23.19; Ali 2.12. 4Nake Aveli aete mosyao ma mbee ma ĩĩthya yake na mathunya mamo. Na Yeova eetĩkĩla Aveli na nthembo yake: #Kuma 13.12; 34.19,20; Mot 18.17; Aevl 11.4. 5ĩndĩ ndaaĩtĩkĩla Kaini na nthembo yake. Na Kaini aĩ mũthilĩku mũno, na aluta ũthyũ wake. #Nth 21.27. 6Na Yeova amwĩa Kaini, Ũthilĩkĩte nĩkĩ? Na ũlutĩte ũthyũ nĩkĩ? 7Weeka nesa, ndwĩĩtĩkĩlwa? Na ethĩwa ndwĩĩka nesa, naĩ yovesyaa mũomonĩ; na kwenda kwayo kũkeethĩwa kwaku; ĩndĩ naku ũmĩsumbĩke. #Mũta 8.12,13; Isa 3.10,11. 8Na Kaini aneena na mwana‐a‐inyia Aveli. Na kweethĩwa, yĩla maĩ kĩsesinĩ, Kaini amũkĩlĩla mwana‐a‐inyia Aveli, na amũaa. #Mt 23.35; 1 Yoa 3.12; Yuta 11.
9Na Yeova akũlya Kaini, Aĩva Aveli, mwana‐a‐mwenyu? Nake asũngĩa, ndyĩsĩ: ninyie mũsũvĩi wa mwana‐a‐ia? #Yoa 8.44. 10Nake akũlya, Wĩkie ata? Wasya wa nthakame ya mwana‐a‐mwenyu nũĩngaĩla kuma nthĩ. #Aevl 12.24. 11Na yu ĩndĩ nũumanĩwe kuma nthĩ, ĩla yathamisye kanyw’a wayo kwosa nthakame ya mwana‐a‐mwenyu kuma kw’okonĩ kwaku; #Mot 35.33; Kũt 27.24. 12ũkĩĩma nthĩ, ndĩkakũnengae ĩngĩ vinya wayo; ũkeethĩwa mũkĩi na mwangangi kũũ nthĩ. 13Na Kaini amũsũngĩa Yeova, Kũsilĩlwa kwakwa nĩ kũnene mbee wa ũndũ ndonya kũmĩĩsya. 14Sisya, ũmũnthĩ nĩwandũngya kuma ĩũlũ wa nthĩ; o na ũthyũnĩ waku ngavithĩka; na ngeethĩwa mũkĩi na mwangangi, kũũ nthĩ; na kũkeethĩwa, o ũla ũkambĩthĩa nũkambũaa. #Mwa 9.6; 2 Asu 24.20; Sav 51.11. 15Na Yeova amwĩa, Kwondũ wa ũu o ũla ũkoaa Kaini, nũkaĩvanĩw’a kũndũ mũonza. Na Yeova amwĩkĩa Kaini ũvano, kana o ũla ũkamwĩthĩa ndakaamũae. #Esek 9.4,6. 16Na Kaini auma mbee wa Yeova, na atũa nthĩ ya Noti, ngalĩ ya wumĩlonĩ wa syũa ya Eteni. #2 Asu 13.23; Yel 23.29.
Mosyaanĩo ma Kaini
17Na Kaini amanya mũka wake; nake aya ĩvu, na asyaa Enoko: na aaka ndũa, na eeta syĩtwa ya ndũa, o ta syĩtwa ya mwana wake, Enoko. 18Na Enoko asyaa Ilati; na Ilati asyaa Meuyaeli; na Meuyaeli asyaa Methusaeli; na Methusaeli asyaa Lameki. 19Na Lameki atwaa aka elĩ; syĩtwa ya ũmwe eetawa Ata, na syĩtwa ya ũla ũngĩ eetawa Nzila. 20Na Ata asyaa Yavali: nĩwe ĩthe wa ala matũaa maeemanĩ na me indo. 21Na syĩtwa ya mwana‐a‐inyia eetawa Yuvali: nĩwe ĩthe wa onthe ala makwataa mbeve na mũtũlilũ. 22Na Nzila nake asyaa Tuvali‐kaini, nĩwe mũmanyĩsya wa atwii onthe ma mĩio myũĩ ya ũthuku na kĩaa: na mwĩĩtu‐a‐inyia wa Tuvali‐kaini aĩ Naama. 23Na Lameki amea aka make:
Ata na Nzila, ĩw’ai wasya wakwa;
Inyw’ĩ aka ma Lameki, ĩthukĩĩsyei kũneena kwakwa:
Nũndũ nĩnooaa mũndũ nũndũ wa ũngũna,
O na mwanake nũndũ wa ũndumba:
24Ethĩwa Kaini akaĩvanĩw’a kũndũ mũonza,
Nĩ w’o Lameki nĩ kũndũ mĩongo mũonza na mũonza.
Sethi na ũsyao wake
25Na Atamu amanya mũka ĩngĩ; nake asyaa mwana, na amwĩta syĩtwa yake Sethi: akyasya, Nũndũ Ngai nũmbiĩe ũsyao ũngĩ vandũ va Aveli; nũndũ Kaini nĩwamũaie. 26Na Sethi o nake asyaĩwa mwana; amwĩta syĩtwa yake Enosi. Ĩvinda yĩu andũ mambĩlĩlya kwĩkaĩla syĩtwa ya Yeova. #1 Asu 18.24; Sav 116.17; Nzev 3.9.
ప్రస్తుతం ఎంపిక చేయబడింది:
MWAMBĨLĨLYO 4: Mbivlia
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
