John 6
6
Jisü no Timi 5,000 Lojí
1Ado hami thiu Jisü ye putou no Galilee züghi (tiye Tiberias züghi ghí pi cheni) mükü küdau kathasü wue, 2ikelo timi kutomo no Jisü no küsükinimi shipivi keu vechewo amichipu kümlàqo shikeu ithulupüa kehu panongu ye Jisü pape ighie. 3Tisheno Jisü no naghuto küdau iku püzü pa khopemiqo gholo iqa ae. 4Jewmi Hechekulu ghulhu Tiqhitini tsalà ye kupunukhoi ae.
5Kughou Jisü no timi kutomo pa küdau chekeu pishipuwo ithulu keno, pa no Philip vilo pi, “Ningu ye timi hipaqo ghenguno khile no achuqupu qhüni kea?” 6Jisü ye pa peju nike ghengu likhi no hi iniju ke, kughengu pa ye kiu shinishi akeno pa mulo lo kümsü pe ngove no ake.
7Philip no pa khochile, “Kümtsü pelo asho tachu lakhi chulu penike qhü kepu shinamu ampe tüxa jume nguno akichiù#6:7 Momu denarii 200. avehupu shi nanie.”
8Pa khopemi kütau, tiye Simon Peter thiküzüu Andrew, no pi, 9“Apú lakhi barleythi shopa aghulo pungu eno akha aghulo kini pesü hi anie, ikemu hilikhi pesü kíshi timi hijejehi lojílu nani kea?”
10Jisü no pi, “Timiqo pelo iqave pelo.” Tipau-a lo atsüni kutomo akehu panongu ye tilehi iqave (tilehi kipitimi 5,000 qhalo ae). 11Tisheno Jisü no asho ikhilu, shikimthi tsü, eno iqa akemiqo no chunishi ke thaqhü kijétsü. Hitoi akha ghí kijétsü.
12Kughou panongu kümtsü no aghakiqishi chuve keno, Jisü no pa khopemiqo vilo pi, “Chuve no alá ipeghi keu munomughoqo kümtsü kumqolo. Lakhimu kilheve pe kevilo.” 13Ike panongu no kiche kumqo kelo timiqo no barleythi shopa pungu chu keu lo alá ipeghi keu no ashoghi chighikini pichhilu.
14Jisü no amichipu kümlà shikeu ithuluve kethiu timiqo no ishi pi, “Kuchou no hiye ayeghi lo ighi niye piakeu Tungkupuu ke.” 15Jisü ye timiqo no tsüikhomo pa pesü akükau shipe niye shi akeu ithive no itaghi pa likhi naghuto lakhi küdau wuve.
Jisü no Azü Shou Alache
16Kughou avelau shive keno, pa khopemiqo ye ayizükucho lo iqi 17püzü tilau no ashuka lakhi lo ikuve no ayizükucho kathasü Capernaum lo wuve. Hipau ghuloki lo zümoive, eno Jisü ye ti kutólo panoqo gholo kümtsa müla no ae. 18Amlhü kijè lakhi ighia eno azü fuchighi thuve. 19Kughou panongu no mile küthü ngò bidí qhalo ashuka tuha ighi keno, Jisü no azü shou no alà chesü ashuka küdau ighi keu ithulu püzü panongu ye shishe müsàve. 20Ikemu Jisü no panongu vilo pi, “Ni ke; Müsà kevilo.” 21Tipathiu panongu no alokivishi ashuka lo Jisü sasü luve eno paikhavi lono ashuka ye panongu no wuche keu küdau ayizükucho mükü toluve.
22Tishi thoghiu ayizükucho mükü hukukuu aqokitikhi akeqo ye ashuka lakhi likhi akeu kümsüchilelu püzü Jisü ye pa khopemiqo gholo ashuka lo ikumo no panongu ye panongu likhi wuve keu ithive. 23Ampeu no shikimthi keu tsü püzü timiqo no asho chuve keu-a phivilo Tiberias lono ashukaqo hami ighi. 24Kughou aqokitikhi no Jisü ngò pa khopemiqo ghí tile küha keu ithive keno, panongu no ashukaqo lo ikuve no Jisü phusü Capernaum lo wuve.
Jisü ye Aküxüpu Sho
25Kughou panongu no ayizükucho tüxa küdau Jisü ithulu keno panongu no Jisü vilo ishi iniju, “Rabbi! No ye kughou no hilau wo tova kea?”
26Jisü no khochile, “Ino kuchou tsà nongu vilo pìní, nongu ye ino amichipu kümlàqo shikeu ithulu keu ghenguno kumo püzü nongu no asho chu no nongu kive pichhilu keu ghenguno iphu chenie. 27Shipüsave chekeu chuqu ghenguno mülà kevilo, ikemu lhokta küxü kutó ngolu chekeu chuqu ghenguno mülà lo, tiye Timi Nu no nongu tsü nani. Kughengu Apù Alhou no pa shou pulobe mekhavae.”
28Tipathiu panongu no Jisü vilo iniju, “Ningu ye Alhou no avehupu shi akeu kümlà shini ke ghenguno kiu shimoayesa kea?”
29Jisü no khochile, “Alhou kümlà hu ye hike: pa no puwu keu shou pülübe nikeu.”
30Ike panongu no pa vilo iniju, “Tishiaye ningu no ithulu no opülü kepu shini ke ghenguno no ye amichipu kiu tsü nani ke? No ye kiu shi nani kea? 31Ni pù-asüqo ye asayeqha lo manna chue; kughengu ishi yèpüani: ‘Pa no panongu pelo chu penike kungugha lono asho tsüe.’#6:31 Ipe 16:4; Nehe 9:15; Leshe 78:24,25”
32Jisü no panongu vilo pi, “Ino kuchou tsà nongu vilo pìní, kungugha lono asho tsükeu ye Moses no kumoe, ikemu I Pù no kungugha lono asho kuchou pesü nongu tsü cheni. 33Kughengu Alhouʼw asho ye kungugha lono iqighi cheni eno ayeghilomi lau aküxüpu tsü chenie.”
34Panongu no pi, “Akijeu, asho hipau alhokuthu ningu tsülo.”
35Tisheno Jisü no asheshu ghi pi, “Ni ye aküxüpu sho ke. Ilau ighi kemi ye khilemu müzüthimo nani, eno ipülü kemi ye khilemu tüghüthimo nani. 36Ikemu ino nongu vilo pive ketoi, nongu ye ni ithuluve keghi ipülümo ke. 37I Pù no itsü kemiqo kümtsü ilau ighi nani, eno khukhumu ilau ighi aye niye khilemu hapuwuvemo nani. 38Kughengu ni ye ipulou shini ke ghenguno kungugha lono iqighimoe ikemu ipuwu keu pulou shi niye ighike. 39Eno hino ipuwu keu pulou ke, tiye pa no itsü kemi lakhimu pühavemo püzü ashekha tsalà lono panoqo xüputhuni keu ke. 40Kughengu I Pù pulou ye Anu lau jupuku no pa pülülu kemi kümtsü lhokta küxü alu penikeu ke, eno ino ashekha tsalà lono panongu xüputhu nani.”
41Jisü no, “Ni ye kungugha lono iqighi keu sho ke,” ipikeu ghenguno tilehi Jewmi akeqo ye nhenheshi Jisü ghili küghathuve. 42Panongu no ishi pi, “Hiye Joseph nopu Jisü ke kumo keshea, ningu ye papù eno pazá ithi anike kumo? Kíshi no pa ye itehi ye, ‘Ni ye kungugha lono iqighi ke,’ ipini kea?”
43Jisü no khochile, “Nongu dolo nhenheshi akeu tavelo. 44Apù ipuwu keu no sasü ighitsümo ke thaqhülo timi khumu ilau ighi mülae, eno ashekha tsalà lo ino panongu xüputhu nani. 45Tungkupu kakuqo lo ishi yèpüani: ‘Panongu kümtsü Alhou no shika nani.’#6:45 Isa 54:13 Apù tsà chilu kemi eno pa lau no shikalu kemi kümtsü ilau ighi cheni. 46Alhou lau no ighi keu likhi no kumo aye khumu Apù ithumla aphie; pa likhi no Apù ithulu püani. 47Ino kuchou tsà nongu vilo pìní, timi khuu no pülüni keno pa ye lhokta küxü anie. 48Ni ye aküxüpu sho ke. 49Nongu pù-asüqo ye asayeqha lo manna chu ke, tishimu panongu ye thivei. 50Ikemu kungugha lono iqighi keu sho hi anie, eno hipau chukulumi khumu thimo nani. 51Ni ye kungugha lono iqighi keu aküxüpu sho ke. Khukhumu asho hipau chu keu ye lhokta kutólo xü anani. Asho hipau ye ishì#6:51 Jisü no pa shì piakeu kiqi ye pa phimpi ke. Hiye kuchou no pa phimpi shì chuni keu tsà piamoe, ikemu pa no ni ghenguno Kros lo ichhe-ime no thive keu piani. ke, tiye ino ayeghilomi pelo xülu penike ghenguno tsü niye akeu ke.”
52Ikelo Jewmiqo ye panongu dolo aloqhi kütsala ghi ishi pi, “Timi hipau ye kíshi püzü ningu pelo chu penike pa shì tsüní kea?”
53Jisü no panongu vilo pi, “Ino kuchou tsà nongu vilo pìní, Timi Nu shì chumo eno pa jì yemo ke thaqhülo nongu ye lhokta küxü ithumla nani. 54Khukhumu ishì chu eno ijì ye keu ye lhokta küxü anani eno ino ashekha tsalà lo panongu xüputhu nani. 55Kughengu ishì eno ijì ye kuchou chuqu-kusho ke. 56Khukhumu ishì chu eno ijì ye keu ye igholo kimepe ani eno ino panongu lolo ani. 57Xü akeu Apù no ipuwu eno Apù vechewo ino xü ake toi, khuu no ino lojí keu chuni keno pa ye ivechewo xülu nani. 58Hiye kungugha lono iqighi keu sho ke. Nongu pù-asüqo ye manna chu no thive ke, ikemu khukhumu asho hipau no lojí keu ye lhokta kutólo xüache nani.” 59Jisü no Capernaum lo synagog lono kütsü ake lono atsa hipau pike.
Apapemi Kutomo no Jisü Pheve
60Hipau chilu kelo pa papemiqo kutomo no ishi pi, “Hiye ighono kushokütsü kükütsü shi ani. Khuu no hi ikhikulupu kea?”
61Pa papemiqo no hipau tsà lo nhenheshi akeu ithive püzü Jisü no panongu vilo pi, “Hiye nongu mulo shipüsava keshea? 62Tishiaye tsalá Timi Nu no püzüu pa no achekeu-a lo ikuve keu nongu no ithulu aye kíshive nani kea! 63Aghungú no aküxü tsü cheni; ashi ye kiumu kihi akepu kühae. Ino nongu vilo pive keu tsaqo ye Aghungú eno aküxü no chhitoi ani. 64Tishimu nongu dolo pülümo kemi khami ani.” Kughengu Jisü ye abothu lono khunoqo no pa pülübemo eno khuu no pa thechu shi nani keno ithi ake. 65Pa no pikibe ghi ishi pi, “Hi ghenguno Apù no shilupemo ke thaqhülo ye timi khumu I lau ighi mülae ipi ino nongu vilo pivae.”
66Hipau thiu ye pa papemiqo kutomo no idechile wove eno pa papemove.
67Jisü no pano chighikini vilo iniju, “Nongu ghí wove nishi ani keshea?”
68Simon Peter no pa khochile, “Ampeu, lhokta küxüpu tsaqo ogholo anike ningu ye khuu lau wuni kea? 69No ye Alhouʼw Akimtheu Lakhi kepi ningu no ithivea eno pülüluvae.”
70Ike Jisü no khochile, “Ni ye nongu Chighikini kìshelu ke kumo keshea? Ikemu nongu dolo lakhi ye tüghami ke!” 71(Jisü ye Simon Iscariot nopu Judas khuu Chighikini dolo lakhi shi anamu, kutou pa thechu shive niye akeu ghili pe piake.)
ప్రస్తుతం ఎంపిక చేయబడింది:
John 6: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
