Gyenesise 4
4
Kein ne Abel
1Adam ne ɔye Hawa bɛlale, ɔnwonzɛle, na ɔwole Kein. Na Hawa hane kyɛ, “AWURADE adaworoma, mawo bienzua.” 2Nziɛ ye, ɔwole oliɛma bienzua Abel. Né Abel te mmoaenneafoɛ, yeɛ Kein koso te kuaniɛ. 3Nziɛ ye ne, Kein fale fieso nningyein ne bie ɔɔbɔle afɔleɛ mane AWURADE. 4#Heb 11.4 Na Abel koso fale ye mmoaen ne anu nyii bɔ belili moa bɛwole bɛ ne, na ɔfale bɛ loe ne ɔɔbɔle afɔleɛ. Na AWURADE nye sɔle Abel ne ye afɔleɛ ne, 5nakoso ye nye anzɔ Kein ne ye afɔleɛ ne. Yiti Kein fɛle yaa hahii, na ye wora bɔle. 6Na AWURADE bisale Kein kyɛ, “Nzu ati yeɛ afɛ yaa ye? Nzu ati yeɛ wɔ wora abɔ ye? 7Aso ɛyɔ bɔ ɔte paa a, engonya animnyam? Nakoso anyɔ bɔ ɔte paa ne ati, bɔne tetɛ wɔ w’anoa nu berɛ. Ɔpena kyɛ onya wɔ nwo ate, nakoso odi kyɛ edi ye so” 8#1 Yoh 3.12 Na Kein sele oliɛma Abel kyɛ, “Maa yɛhɔ fieso.” Na bɛwɔ fie ne aso nen, Kein hɔle oliɛma Abel so, na ohuni ye. 9Na AWURADE bisale Kein kyɛ, “Eliɛma Abel wɔ nisua?” Na obuale kyɛ, “Menze. Nniɛma ne, me yeɛ menea ye so hɔ ɔ?” 10#Edw 9.12; Mat 23.35 Na AWURADE sele kyɛ, “Nzikyɛ nikye yeɛ ayɔ ye? Eliɛma ne, ye mogya ɔteatea nu sũ frɛ me fi aseɛnwo. 11Na aseɛ bɔ wabukye ye noa nu wano eliɛma ne mogya bɔ ɛha guale nen, musue ato wɔ wɔ so. 12Sɛ ɛyɔ aseɛ ne aso boo a, ɔngɔhye aleɛ ngɔma wɔ ko. Ɛkɔyɛ kobɔniɛ, na engonya amandena wɔ aseɛ so.” 13Na Kein sele AWURADE kyɛ, “M’asohwenɛ ne ɔbo me so. 14Ɛnɛ afoa me afi aseɛ ye aso, ngɔfa me nwo ngɔfea wɔ. Ngɔyɛ kobɔniɛ bɔ nnne amandena wɔ aseɛ ye aso ɔ, na ebiala bɔ okonwu me ne, okohu me.” 15Na AWURADE sele ye kyɛ, “Nna sɔ ɔ! Sɛ ebie ku Kein a, bɛkɔtɔ sɔ sona ne so wereɛ pɛen nzoo.” Na AWURADE hyɛle Kein nzorɛ, kyɛbɔ ɔkɔyɛ na ebie nwu ye a ongohu ye ɔ. 16Afei Kein fili AWURADE nyunu berɛ hɔle, na ɔɔtenane Nɔɔdo#4.16: NƆƆDO: Ye bo kyire: Bɔ olle amandena ɔ. aseɛ so wɔ Eden eyia afiteleɛ. 17Kein ne ɔye bɛlale, ɔnwonzɛle, na ɔwole Henɔke. Kein kyekyele kuro bie, na ɔfale ɔwa Henɔke dumaa tole kuro ne. 18Henɔke wole Yirade, Yirade wole Mehuyael, Mehuyael wole Metusael, yeɛ Metusael wole Lamɛke. 19Lamɛke gyale mmraa nyɔ: ko dumaa li Ada, yeɛ ko wora oli Sila. 20Ada wole Yabal, bɔ ye bosofoɛ te mmenia bɔ né bɛtete ɛtena sua nu na besa besie ngaka ɔ. 21Né oliɛma bienzua ole Yubal, bɔ ye bosofoɛ te mmenia bɔ bɛbɔ sangoo na behu awɛen ɔ. 22Sila wole Tubal Kein, bɔ né ɔte kɔɔbere ne mmuralɛ mukoraa dwumvoɛ ne. Né Tubal Kein aliɛma brasua ole Naama.
23Na Lamɛke sele ɔye mɔ kyɛ,
“Ada ne Sila, ɛ́mɔtie bɔ meka ye,
Lamɛke aye mɔ, ɛmɔma bɛ so bra wa,
mahu biaa bie bɔ opurale me ɔ,
na mahu aberandeɛ bie bɔ ɔbɔle me ɔ.
24Sɛ bɛkɔtɔ Kein so wereɛ pɛen nzoo de a,
nzaade bɛkɔtɔ Lamɛke so wereɛ aburasoo ne nzoo.”
25Adam ne ɔye lale bieku; braa ne wole bienzua, na ɔtole ye dumaa Sɛte, ofikyɛ braa ne hane kyɛ, “Nyameɛ amaa manya baa foforɛ masi Abel bɔ Kein huni ye ne gya nu.” 26Sɛte koso wole baa bienzua, na ɔtole ye dumaa Enose. Na sɔ mmerɛ ne yeɛ mmenia hyɛle ye bo kyɛ bɛ́bɔ AWURADE dumaa bɛsɔne ye ɔ.
ప్రస్తుతం ఎంపిక చేయబడింది:
Gyenesise 4: EBP
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Esahie Bible © Bible Society of Ghana, 2018.
