Gyenesise 10
10
Nowa mma mmienzua nemɔ boso ama
(1 Aberɛso Dwirɛ 1.5-23)
1Nowa mma mmienzua Sem, Ham ne Yafɛte bɛ boso ama ɛhe: Nzueyilɛ ne asi ne, bɛwole mmaa. 2Yafɛte mma mɔ ole Gomɛre, Magɔgo, Madai, Yawan, Tubal, Meseke ne Tirase. 3Gomɛre mma mɔ ole Asekenase, Rifate ne Togama. 4Yawan mma mɔ ole Elisa, Tasise, Kitim ne Dodanim. 5Bɛ boso ama ole mmenia bɔ bato bapete mboanoa aseɛ so ne. Yafɛte mma mɔ bɔ bɛwɔ b’aseɛ so ɛhe: asora fekue biala ne ye dwudwolɛ, ye abusua ne ye maen.
6Ham mma mɔ ole Kuse, Misraim, Pute ne Kanaan. 7Kuse mma mɔ ole Seba, Hawila, Sabota, Raama ne Saboteka. Raama mma mɔ ole Hyeba ne Dedan. 8Kuse wole Nimrode. Na Nimrode yeɛ olili moa yɛle koɛhonɛniɛ ahoneserɛniɛ wɔ aseɛ ye aso ɔ. 9Ɔyɛle bɔfoɛ piri paa wɔ AWURADE nyunu. Na ɛhe ati yeɛ ɔmaa bɛka kyɛ, ‘Ɔte bɔfoɛ piri paa kyɛ Nimrode ala wɔ AWURADE nyunu.’ 10Ye ahennie ne bɔle ye bo wɔ Babɛl, Ɛreke ne Akade, na bɛ mukoraa bɛwɔ Sinari#10.10: SINARI: Anaa Babilɔn. aseɛ so. 11#Yona 1.2 Ofili sɔ aseɛ ne aso ɔhɔle Asiria ɔɔkyekyele Ninewe, Rehobote Yiri, Kala, 12yeɛ kuro piri Resen bɔ owura Ninewe ne Kala b’afia ne. 13Misraim suli Ludimfoɛ, Namimfoɛ, Lehabimfoɛ, Nafetuhimfoɛ, 14Patrusimfoɛ, Kasluhimfoɛ, yeɛ Kafitorimfoɛ bɔ besuli Filistifoɛ mɔ ne.
15Kanaan wole ye bamuɛbaa bienzua Sidon, yeɛ afei Hɛte, 16Yebusifoɛ, Amorifoɛ, Gɛgasifoɛ, 17Hiwifoɛ, Akifoɛ, Sinifoɛ, 18Awadifoɛ, Semarifoɛ ne Hamatefoɛ. Na ɛhe asi ne, Kanaan abusua ne trɛle hɔle dedeede. 19Na Kanaan maen ɛwɛen ne trɛle fili Sidon toonn hɔle Gera bue nu dɔ, na oodwuli Gasa, Sodom, Gomora, Adema ne Seboyim ne Lasa. 20Ham mma mɔ ɛne, na asora ebiala ne ye abusua, ye dwudwolɛ, ye aseɛ ne ye maen.
21 #
Gye 11.10
Sem bɔ ɔte Yafɛte aliɛma panyi ne, ye nu yeɛ Ebere boso ama mukoraa befi ɔ. 22Sem mma mɔ ole Elam, Asure, Afakesade, Lude ne Aram. 23Aram mma mɔ ole Yuse, Hule, Gɛta ne Mase. 24Afakesade wole Hyela, yeɛ Hyela koso wole Ebere. 25Ebere wole mmaa mmienzua nyɔ. Ko dumaa li Pɛlɛge,#10.25: PƐLƐGE: Ye bo kyire mbakyembakyemuɛ. ofikyɛ ye aberɛ so yeɛ mbakyembakyemuɛ wale aseɛ so ɔ; na oliɛma ne koso li Yoketan. 26Yoketan wole Almodade, Selefe, Hasamawɛte, Yera, 27Hadoram, Yusal, Dikla, 28Obal, Abimael, Hyeba, 29Ofire, Hawila ne Yobabo. Ɛhemɔ amukoraa bɛte Yoketan mma. 30Aseɛ bɔ né bɛte so ne trɛle fili Mesa hɔle Sefa maa oodwuli eyia afiteleɛ mmokaa aseɛ ne aso dɔ. 31Sem mma mɔ ɛne, na asora ebiala ne ye abusua, ye dwudwolɛ, ye aseɛ ne ye maen.
32Nowa mma nemɔ b’abusua, kyɛbɔ b’aworɛ ndoatoasoɛ te wɔ bɛ maen nu ɛhe. Na ofi bɛ nu yeɛ nzueyilɛ ne asi ne maen maen fifili na bɛto bɛpetene aseɛ so ɔ.
ప్రస్తుతం ఎంపిక చేయబడింది:
Gyenesise 10: EBP
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Esahie Bible © Bible Society of Ghana, 2018.
