Akisiakinet 4
4
Kain ka Abel
1Topero Adam ka aberu keng, topoti aberu kidou Kain.#4:1 Kain; esibit akiroit naga a Ngaeburaniae ngesi atamar “Aanyu.” Tolim aberu tama, “Kengarak ayong Ekapolon Akuj aanyu ikoku nisapat.” 2Ani erumor kidou nabo ikoku nisapat iche enyaritae Abel. Arai Abel ekeyokon ngamesekin, tarai Kain eketan ngamanat. 3Ani ekisidi yau Kain ngakipeyos a ngalemet keng nia Ekapolon Akuj. 4Yau Abel imesek ni ekingaren a amesek keng, taar ani erumor tolem ngaringo naatumak kipeyok Akuj. Talakar Ekapolon Akuj ani a Abel ka ngakipeyos keng. 5Nakaneni nyemisikina Ekapolon Akuj ngakipeyos a Kain. Tongo Kain noi, tosiny. 6Kingit Ekapolon Akuj Kain tama, “Nyo ingoitor iyong kona, isinyitor? 7#Ebura 11:4 Ani kisub iyong naajokak, kichamunio iyong. Ani pekisub iyong naajokak, esadit akisech alokidor kisakit iyong. Nakaneni ejoikinit iyong ipiyori.”
8 #
Mat 23:35; Luk 11:51; 1 Yoa 3:12 Tolimok Kain lokaatokeng Abel tama, “Bua apana naro.” Ani enangete kesi naro, sodi tonyoik Kain lokaatokeng Abel taar.
9Kingit Ekapolon Akuj Kain tama, “Nyaali lokaatokon Abel?” Tatachu Kain tama, “Nyayeni ayong. Ayong arai ekeyokon a lokaatokang a?”
10Kingit Ekapolon Akuj ngesi tama, “Anukiro na isub iyong nugu? Kegoronokinete ayong ngaakot a lokaatokon analup, esakete atachakino. 11Kilamitae tokona iyong analup ana kolong apakasi kijuwasi ngaakot a lokaatokon alo iari iyong. 12#Ebura 12:24 Ani kitak iyong ngikinyam, nyerupunete analup. Iliwor iyong itwaan ni emam awi ni irimit akwap.”
13Tatachak Kain Ekapolon Akuj tama, “Etiono eriras kang noi nyapedori ayong anaikin. 14Kingolik a, kitwarak tokona iyong ayong anakwap kana nabo atongop alongaren kon. Aliwor ayong itwaan ni emam awi ni erimit akwap. Nakaneni eliwor daang nicha kaanyuni ayong, kaari.” 15Tolimok Ekapolon Akuj ngesi tama, “Nyikote neni. Ani ni cha kiari iyong, etachakinio ngatachakinet ngakan-kaarei.” Togerak Ekapolon Akuj Kain emachar sodi nyear ngesi itwaan ni iriamunotor. 16Torotok Kain alongaren Ekapolon Akuj, sodi tolom nakwap enyaritae “Akilare,” na eyei kide a Eden.
Ngalesea a Kain
17Topero Kain ka aberu keng, topoti aberu kidou Enok. Todukok ngesi ere sodi tolimok ekiro be Enok, lo erai ekiro a lokookeng. 18Abu Enok touriu Irad, lo arai apakeng a Meuyael. Abu Meuyael touriu Mesuchael, lo arai apakeng a Lamek. 19Kuut Lamek ngaberu ngaarei, anyaritae apei Ada, anyaritae nache Sila. 20Kidou Ada Yabal, lo erai apakeng kangulu elomito loeaman, tometo ngibaren. 21Anyaritae lokaatokeng Yubal, lo erai apaakeng alu ideese agita nabo tokusete ebune. 22Kidou Sila Tubal-Kain Naama.
23Tolimok Lamek ngaberu keng tama,
“Ada ka Sila, topupokisi ngakiro kang.
Esi ngaberu kang, topupokisi na asaki alimun.
Kainyo aar ayong esorokit ani kawanea ayong.
Aari ayong ngesi ani karamea ayong.
24 #
Mat 18:22 Ani ketachakin na a Kain ngatachakinet ngakan-kaarei,
etachakinio na a Lamek ngatachakinet ngatomwon-kaarei ka ngakan-kaarei.”
Set ka Enoch
25Topero Adam ka aberu keng nabo, sodi kidou aberu ikoku nisapat, tanyara ekiro keng Set.#4:25 Set; ikwaan ekiro lo ka akiroit a Ngaeburaniae na erai eger “ainaki.” Tolim Awa tama, “Kainaki ayong Akuj ikoku iche elunyokin nados a Abel alo aari Kain.” 26Touriu Set ikoku nisapat tanyara ekiro keng Enoch. Ngirwa ngulu, tolomakis ngitunga akilipit elimito ekiro a Ekapolon Akuj.
ప్రస్తుతం ఎంపిక చేయబడింది:
Akisiakinet 4: ABIBILIA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
BIBLE SOCIETY OF KENYA (c) 1999
