Luka 21
21
Mulambu wa pwo yoze te hanafwisa lunga
(Tala nawa Mar 12:41-44)
1Yesu yahetuka, yamona chize te pichi anase milambu mu mushete wa chawana cha mu zuwo lia Zambi lia Ayuda. 2Yamona nawa umwe pwo, chiswale, yoze te hanafwisa lunga, nikusa mo tumbongo twaali twa unengu. 3Mba yamba ngwenyi: “Chamwenemwene ngunanwambulwila ngwami, twamishi yono chiswale hasa mo kuhiana akwo eswe. 4Mumu waze akwo haalambula nikulita ni ubite wo unji Wahiana, alioze iye, mu uswale wenyi, hahana yize yeswe abwanga nayo ya yakulia yenyi.”
Yesu yambulula kubuzuka cha zuwo lia Zambi
(Tala nawa Mat 24:1-2; Mar 13:1-2)
5Amwe tumbaji yaahanjeka hakutwala ku zuwo lia Zambi lia Ayuda, ha ubeme walio ni mawe jalio abema, ni yuma yize atu haanalambula kuli Zambi. Mba Yesu yamba ngwenyi: 6“Yuma yino yeswe nunamono, matangwa makeza muze liwe nilimwe kulichi kasala liakunangika helu lia likwo, eswe kumaakabuzuka.”
Kabutu ka lamba
(Tala nawa Mat 24:3-14; Mar 13:3-13)
7Yaamuhula ngwo: “Longeshi mwiji muka yuma yino muyikabwa? Chilayi chayo chika?”
8Yesu ngwenyi: “Kanyamenu, nyi ka, maakanupiangula. Mumu anji maakeza mu jina liami nikwamba ngwo: ‘Yami mwe Chilamwina yoze Zambi alakenyene.’ Nawa ngwo: ‘Tangwa hiliaheta!’ Alioze kanda nukaakaula. 9Muze munukevwa sango ja jita ni lufuma wa jita, kanda nukevwa woma. Chatamba yino yeswe kuhanga kubwa, alioze songo kanda lichibwa.” 10Mba yaweza ho ngwenyi: “Vungu ni vungu kumaakasa jita. Wanangana kumuukalimika ni wanangana ukwo. 11Minyiko ya hashi yinene, ni zala, ni misongo yinji muyikabwa kweka ni kweka, ni yuma yakuvwisa woma, ni yilayi yinene ya mwilu.
12“Alioze shimbu yize yeswe kanda yichibwa, atu maakanukwata, maakanuhungumiona, maakanukunjika ha kunubatwila mu mazuwo ja kuwayila, maakanusa mu mazuwo a lamba, maakanuneha ku meso ja mianangana ni akwa kuyula mumu hali yami. 13Muchikabwa tangwa lienu lia shindakenyo ha chikuma cha yami. 14Kashika batulenu mu mbunge jenu ngwenu, kanda nukalibikala shimbu kanda chize munukakumbulula. 15Mumu yami mwene mungukanwaha maliji ni mana waze niumwe wa kuli akwa kole jenu mahasa kuhamika hanji kulituna. 16Chibwe yisemi jenu, ni ayayenu, ni akwenu, ni usoko wenu, ni masepa jenu maakanukunjika, mba akwa kuyula maakashiha amwe a kuli yenu. 17Atu eswe maakanuvutwokela mumu hali yami. 18Alioze lukambu wa ku mutwe wenu niumwe kechi katoka. 19Lihumikizenu, mumu Chenacho munukalamwina mwono wenu.”
Yesu yambulula hakutwala ku kwonona cha Yerusaleme
(Tala nawa Mat 24:15-21; Mar 13:14-19)
20“Muze munukamona mbunga ya tujita haajingilika Yerusaleme, ha tangwa lize munukanyingika ngwenu, kumwonona chenyi hichakundama. 21Hohene waze maakabwa mu chifuchi cha Yudea chaatamba kuchinyina ku milundu, ni waze maakabwa mu limbo chaatamba kutuhuka, ni waze maakabwa ku masesa kuchaatambile kunjila mu limbo. 22Mumu maakabwa ‘Matangwa a Kukala Milonga,’ hanga yikamanunune yize Mukanda wa Zambi unambe. 23Ha matangwa waze, tufumbakaji lamba linji maakamona ni waze maakamwisa ana. Mumu lamba linji mulikabwa mu chifuchi, ni Zambi makevwila atu wano ufwatulo. 24Maakashiha ni mukwale, maakatwala funge mu yifuchi yeswe. Mavungu akwo nwakaliata Yerusaleme ndoo tangwa lio mulikamanunuka.”
Kwiza cha Mwana Mutu
(Tala nawa Mat 24:29-31; Mar 13:24-27)
25“Mukukabwa yilayi ha tangwa ni ha kakweji ni ha matongonoshi. Hano hashi atu maakabihilila, maakayambashana mumu ha lundunjila ni miavu ya kalunga lwiji. 26Atu maakalezumuka ni woma ha yuma yize muyikeza hashi heswe, mumu tachi ja mwilu mujikanyikumuka. 27Hohene atu maakamona Mwana Mutu kaneza mu lelwa ni ndundo jinji ni uhenya Wahiana. 28Muze yize yeswe muyikabutuka, talenu, hetukenu, mumu ukule wenu hiwakundama.”
Chishima cha mukuyu (figu)
(Tala nawa Mat 24:32-35; Mar 13:28-31)
29Mba Yesu yaatela chishima chino ngwenyi: “Talenu mukuyu ni mitondo yeswe yikwo. 30Muze nwakumona mafwo jayo haabutuka kusokoloka, nwakunyingika ngwenu, kuma lwiza habwa hakamwihi. 31Chimuwika nawa, muze munukamona yuma yino, munukanyingika ngwenu, Wanangana wa Zambi hiwakundama. 32Chamwenemwene ngunanwambulwila ngwami, atu waze ali ni mwono haliabwila, keechi kafwa eswe ndoo yuma yize yeswe muyikabwa. 33Lilu ni hashi muyikahwa, alioze maliji jami keechi kwiza kuhwa nichimwe.”
Kanyamenu
34“Kanyamenu yenwene! Mbunge jenu kanda jilema ni yiteleka, ni kuzengewa, ni yibikalo ya mwakono. Nyi ka, tangwa lize mulikanutungumuna. 35Mumu mulikabwa ngwe muheto hali atu eswe waze atwama hano hashi. 36Kanyamenu, lembenu matangwa eswe, hanga nukabwe ni tachi ja kuchina yize yeswe muyikabwa, ni kumana ku meso ja Mwana Mutu#21:36 mwana mutu: tala 5:24..”
37Ha mwalwa Yesu te kakulongesa mu zuwo lia Zambi lia Ayuda, alioze ha ufuku te kakuya ni kubomba ha mulundu wa Olive.#21:37 mulundu wa olive: tala 19:29. 38Atu eswe te kaakwiza ha chichamene cheswe mu zuwo lia Zambi ni kumwivwa.
ప్రస్తుతం ఎంపిక చేయబడింది:
Luka 21: CHK1970
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
