Ubutukilo 10
10
Vungu lia Noa
(Tala nawa 1 San 1:5-23)
1Wano e mavungu ja ana ja Noa a malunga, Sheme ni Hame ni Jafete. Muze sanga lia meya hiliahwa yaasemasema ana a malunga.
2Ana ja Jafete a malunga wano: Gomere, ni Magoge, ni Madai, ni Javane, ni Tubale, ni Mesheke, ni Tirase. 3Ana ja Gomere a malunga wano: akwa Askenaze, ni akwa Rifate, ni akwa Togarma. 4Ana ja Javane a malunga wano: akwa Elisha, ni akwa Espanya, ni akwa Shipre, ni akwa Rodese. 5Wano e tushakulu twa waze atwama mu yifuchi ku mbumbulu ya kalunga lwiji ni mu mahongo. Lino lie vungu lia Jafete, waze atwama jimo ni jimo mu chifuchi cho, nikulita ni liji lio.
6Ana ja Hame a malunga wano: Kushe, ni Egiptu, ni Libia, ni Kanana. 7Mavungu ja Kushe wano: akwa Seba, ni akwa Havila, ni akwa Sabtahe, ni akwa Rama, ni akwa Sabteka. Mavungu ja Rama wano: akwa Sheba, ni akwa Detane. 8Kushe yasema Nimrode, iye mwe chitakame mutangu hano hashi. 9Mwene Zambi yamukwasa nawa kubwa yanga munene wa kushiha yifwo. Kashika atu akwamba ngwo: “Zambi akupwise yanga munene ngwe Nimrode ha kushiha yifwo.” 10Mu wanangana wenyi utangu yayula membo wano: Babilone, ni Ereke, ni Akade, eswe atatu a mu chifuchi cha Babilonia. 11Yakatuka mu chifuchi chize, yaya ni kutunga mu chifuchi cha Asuria. Yatunga membo wano: Ninive, ni Rehobote Ire, ni Kala, 12ni Resene, hakachi ka Ninive ni lie limbo linene lia Kala.
13Lino lie vungu lia Egiptu: Lidia, ni Aname, ni Lehabe, ni Naptuhe, 14ni Patruse, ni Kashluhe, ni Kaptore, tushakulu twa Afilistia.
15Ana ja Kanana a malunga wano: Sidone, mwe mukulwana, ni Hete. Mavungu jo wano: akwa Sidone ni akwa Hete. 16Kanana yabwa nawa kashakulu ka mavungu wano: akwa Jebuse, ni akwa Amore, ni akwa Girgashe, 17ni akwa Hive, ni akwa Arke, ni akwa Sine, 18ni akwa Arvade, ni akwa Zemare, ni akwa Hamate. Mavungu eswe a Kanana yamwangashana mwamwaa ndoo 19ku njiza ja Kanana yaaheta ku limbo lia Sidone ku norde, ni ku limbo lia Gerare hehi ni limbo lia Gaza ku sude, ni membo ja Sodome, ni Gomora, ni Adma, ni Zeboime hehi ni limbo lia Lasha ku chivumbuko. 20Wano e mavungu ja Hame waze atwama vungu ni vungu ku chifuchi cho nikulita ni liji lio.
21Sheme yayo ya Jafete, mwe kashakulu ka akwa Hebreu eswe. 22Ana ja Sheme a malunga wano: Elame, ni Ashure, ni Arfashede, ni Lude, ni Arame. 23Wano e mavungu ja Arame: akwa Uze, ni akwa Hule, ni akwa Getere, ni akwa Mesheke. 24Arfashede yasema Shela, ni Shela yasema Ebere. 25Ebere yasema ana aali a malunga. Umuwika jina lienyi Pelege#10:25 pelege ha kulivuluka mu hebreu linalifu ni “Kuhandununa.”, mumu ha matangwa jenyi akwa hashi yaalihandununa. Mwana mukwo jina lienyi Joktane, 26Mavungu ja Joktane wano: akwa Almodade, ni akwa Shelepe, ni akwa Hazarmavete, ni akwa Jera, 27ni akwa Hadorame, ni akwa Uzale, ni akwa Dikila, 28ni akwa Obale, ni akwa Abimaele, ni akwa Sheba, 29ni akwa Ofiri, ni akwa Havila, ni akwa Jobaba. Wano eswe mavungu ja Joktane. 30Chifuchi chize te atwama yichikatuka ku Mesha yichiheta ndoo ku Sefa mu chifuchi cha milundu ku chivumbuko. 31Wano e mavungu ja Sheme, vungu ni vungu mu chifuchi cho, nikulita ni liji lio.
32Mavungu wano eswe kaali mavungu a Noa nikulita ni chize asemukine ni chize amwanganyine hashi heswe. Akwa hashi eswe kaali mavungu ja ana ja Noa.
ప్రస్తుతం ఎంపిక చేయబడింది:
Ubutukilo 10: CHK1970
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
