YOHAN 11

Lazaru Thueyc Kaz tueq

1Bethany ghaq jix vmuingc Lazaru ngoz yaq waz kuex vthuiuz rvtueq. Bethany ghaq kuex Mary nuiyc Mahta httaz juing ghaq rvtueq.#Luk 10:38-39 2(Mary kuex Taungjix yaz nuex murra vhomc tix maq shvy kuq ruiux, piq khux mul maq tuit kuy jix nyuiuz rvtueq, vthuiuz jix Lazaru kuex piq nox rvtueq.)#Yoh 12:3; Mat 26:7; Mak 14:3 3Kvkaq vnyaz nuiyc rueq, “Taungjix lex, mnoz rueq lungwawc hvlc waz vthuiuz rvkaz,” ngoz tueq Yesu muex bomjungc tvtay kuq tueq.

4Kvruex kvjaz kuex Yesu rueq tay vtueq, “Kvruex thuiuz yaq kuex vthueyc juing thuiuz rvmuq, Tishox ngauz vngax tvdungc wvnc tvkoc thuiuz yaq rvtueq, kvruex thuiuz kvraq Tishox Saz ngauz vngax muinz dung wvnc tuex,” ngoz tueq jungx tueq.

5Yesu rueq Mahta nanox nuiyc Lazaru kuex lungwawc hvlc rvtueq. 6Yuq muinz Lazaru vthuiuz thaungc tay tueq nuex, vpiq kuex vpiq httax yaq baung kvyuq raungnuiyq nueyc guilc shec yek tueq. 7Kvruex yimaq sangac bix muex, “Yuda mungx nuex naunghez kaz yek ix,” ngoz tueq jungx tueq.

8Sangac bix rueq, “Tvluingc waz lex, miq htenc rueq mnvp m-yac jix mnoz kuex lung maq tuip gay tvkoc hunglaungx wuez tueq, kvruex baung kvyuq kay yek haz dvnc vshuiux?” ngoz tueq.

9Yesu rueq, “Raungnuiyq shiz nuex shalhtaz rokshiz rac vnueyc rvmuq haz? Raungnuiyq nuex khuemc jix waz kuex mungkawx raungwuic khiz lvp shuex rvtueq, jel kuix muq rvtuex. 10Yuq muinz raungnyauk nuex khuemc jix waz kuex piq htauk nuex raungwuic vguez rvtueq vjelc vkuic rvhumc tuex,” ngoz tueq. 11Yesu rueq kvkhoc jungphvnc kuy lot yix, “Naunghez phunox waz Lazaru kvtsoalx rvkaz, yuq muinz piq kuex tvsvmc tvtenc kay ngaz vkay juing rvtueq,” ngoz tueq jungx tueq.

12Sangac bix rueq, “Taungjix lex, piq kvtsoalx rvkaz ngoz ruiux kuex kvsvmc rvwvnc tuex,” ngoz tueq tvralc tueq.

13Lazaru thueyc kaz shex ngoz tueq Yesu rueq jungx tueq, yuq muinz tsuinghez rueq kuex kvtsoalx ngoc ngoz yaq ikhoc dvyx tvmaung wuez tueq. 14Kvkhoc rvtueq Yesu rueq rvkhauk laz jungx kuq tueq kuex, “Lazaru vthueyc kay wuez shex; 15yuq muinz kvruex baung kvyuq ngaz vguez rvtauk kuex nuimshiq kvmluimx wvnc tvkoc rvtueq ngaz kokez vtaungx. Vpiq kox nuex kaz ix,” ngoz tueq.

16(Vpop ngoz yaq) Thoma rueq vsangac hez muex, “Naunghez muinz vpiq rulc vdvmz nuex thueyc naungc muex kaz naungx ix,” ngoz tueq ngoz kuq tueq.

Yesu kuex Vyuing Kvtenc wvnc nuiyc Rullungx Pauk

17Yesu httuiuc kaz tueq nuex Lazaru kuex vluip gay yix maq raungx bvlic shex rvtueq. 18Bethany ghaq kuex Yerusalem ghaq maq kilometer vthuimx tanc rvtueq. 19Mahta nuiyc Mary kuex vyungx waz moz wvnc ningkhvnc nuex sitenc yatenc kuy tvkoc Yuda miqsaz paunghvlc kaz tueq.

20Mahta kuex Yesu httuiuc kaz yaq lvmx tay vtueq vpiq humc kay kaz tueq, Mary kuex yuimx nuex dvyx rvtueq. 21Mahta rueq Yesu muex, “Taungjix lex, mnoz vyuq ngoz ruiux kuex iyungx waz thueyc kaz muq rvkhvmz tueq. 22Majuiuc muinz mnoz rueq thoz shuiux phvnx htenc Tishox rueq kuq shuex lvmx kuex ngaz rueq tuiuz vshaungx,” ngoz tueq khoar yaq lvmx maq jungx tueq.

23Yesu rueq, “Mnox kuex thuiuzthuic tvraungx wvnc yek tuex,” ngoz tueq.

24Mahta rueq, “Vtvsuip raungnuiyq nuex vthueyc jix yuing kvtenc wvnc tuex kvkaq, piq muinz yuing wvnc naungx tuex lvmx kuex ngaz rueq muinz tuiuz yaq,” ngoz tueq.

25Yesu rueq piq muex, “Ngaz kuex vyuing kvtenc wvnc juing lvmx nuiyc thuiuzthuic tvraungx lvmx rvtauk. Ngaz muex kvmluimx jix waz kuex thueyc ruiux muinz vyuing kvtenc rvwvnc tuex. 26Ngaz muex kvmluimx vtueq majuiuc tvraungx yaq jix htenc kuex mkaq muinz thueyc wvnc tuex rvmuq. Kvmac mnoz kvmx vtuiux haz?” ngoz tueq wiz tueq.

27Mahta rueq, “Rvtueq, Taungjix lex, kvkhoc doc mnoz kuex vruex mungkawx vyuq kay dvnc yaq Mesia ngoz yaq Tishox Saz rvtoq ngaz kvmx vtaungx,” ngoz tueq tvralc tueq.

Yesu Muik Phic Ruk tueq

28Kvkhoc jungc lot yix vnox Mary kox nuex vyumx maq waung vtueq, “Tvluingc waz httuiuc kaz tueq vpiq rueq mnoz wiz yaq,” ngoz tueq jungx tueq. 29Kvruex kvjaz kuex Mary rueq tay vtueq Yesu kox nuex lvmx lvy kvtenc kaz wvnc tueq. 30(Yesu kuex kez nuex max nyuip wvnc dvyx doc Mahta rueq vpiq humc kaz tueq baung kvyuq dvyx rvtueq.) 31Mary muex sitenc yatenc kuy tvkoc yuimx nuex httax yaq miq htenc rueq Mary lvmx lvy kvtenc kaz wvnc tueq kuex khiz vtueq, luip ruiux khux nuex vkhoarc kay kaz wvnc vtuex shvmx ngoz tueq phvnx laq naungx wuez tueq.

32Mary kuex Yesu kox kvyuq httuiuc kaz tueq, Yesu kuex khiz vtueq vpiq yaz phaungx nuex bumx ruiux, “Taungjix lex, mnoz vhttax ngoz ruiux kuex inox thueyc kaz muq rvkhvmz tueq,” ngoz tueq.

33Yesu rueq Mary khoar yaq kvmuinz, piq rulc kay naungc jix miq htenc khoar yaq kvmuinz khiz vtueq vpiq muinz vthuinz mungx nuex heq vtueq pinhtumc thuinbac tueq. 34Yesu rueq, “Piq kuex m-yuq lac luip tuinx?” ngoz tueq wiz tueq.

Tsuinghez rueq, “Taungjix lex, lawc kaz loq,” ngoz tueq tvralc tueq.

35Yesu muik phic ruk tueq. 36Kvkaq miq htenc rueq, “Lawc shuinz vpiq rueq Lazaru kuex lungwawc hvlc ix!” ngoz tueq.

37Yuq muinz tsuingshiq wawc wvyvmc rueq, “Muik mawz waz muex muik tvkhic tvhvlc kuy jix waz vraq Lazaru kuex thueyc kaz muq juing tvyaungc lot muq haz?” ngoz wuez tueq.

Lazaru muex Thuiuzthuic Tvyuing yek tueq

38Yesu kuex laukshiz hulawx thuinbac yek vtueq luip ruiuz khux nuex kaz tueq. Kvruex luip kuex lungshaung rvtueq vpuc kuex lung bux shiz maq tuing taq tueq. 39Yesu rueq, “Lungkuiux kuex lanx gay shuinz!” ngoz tueq.

Vthueyc vruex kaz waz shvlx nyuiuz Mahta rueq, “Taungjix lex, majuiuc kuex vnvmx thuingc hvlc shex, piq thueyc kaz tueq maq raungx bvlic shex!” ngoz tueq jungx tueq.

40Yesu rueq, “Mnoz kvmx ruiux yuq kuex Tishox ngauz vngax mnoz rueq khiz lvp shuiux ngoz tueq ngaz rueq jungx phaungx rvmuq haz?” ngoz tueq piq muex jungx tueq. 41Kvkhoc rvtueq tsuingshiq rueq lungkuiux kuex tvhttot gay tueq. Kvkaq Yesu rueq raungx nuex lawc vtueq, “Iwaz lex, mnoz rueq ngvy kvjaz tay kuq vphux ningkhvnc nuex ngaz rueq mnoz muex kejux vyungx ngoz vphaungx. 42Mnoz rueq mkaq muinz ngvy kvjaz tay kuq vphux kuex ngaz rueq tuiuz vshaungx. Yuq muinz mnoz rueq ngaz vtvkaz phux kuex vyuq httax yaq miq htenc kvmluimx wvnc muex tsuingshiq tvkoc ngaz rueq vkhoc thoz vphaungx,” ngoz tueq. 43Kvruex yimaq vpiq rueq kvjaz tvyungc vtueq, “Lazaru lex, dung kaz loq!” ngoz tueq. 44Kvkaq vthueyc vruex kaz waz kuex piq yauk vyaz nuex khvymvnz maq yop iruiux, vhtvlx phawc nuex muinz khvymvnz maq yop iruiux dung kaz tueq. Yesu rueq, “Piq vyop khvy kuex dawc kuq gay ruiux httvr gay shuinz,” ngoz tueq.

Yesu kuex Thvy tvkoc Dvnc tueq

(Mat 26:1-5; Mak 14:1-2; Luk 22:1-2)

45Kvruex kaq Mary kox nuex kay jix miq htenc rueq Yesu rueq shuimx wvnc tueq yauk shuimc kuex khiz vtueq vpiq muex kvmluimx wvnc wuez tueq. 46Yuq muinz tsuingshiq phungc wawc wvyvmc kuex Pharise nuk kox nuex kaz vtueq, Yesu rueq shuimx wvnc tueq lvmx kuex jungphvnx kaz tueq. 47Kvkhoc rvtueq shomc walaungx bix nuiyc Pharise nuk rueq vyungx vlaungx bix htenc kuex tvtuimx gvl vtueq, “Vruex waz vraq vwangc juing romzyac paunghvlc tvkhic kuq yaq! Naungshiq rueq yvmx khoc ruec juing lac? 48Naungshiq rueq vpiq kuex vkhoc dvyx tvguilc ruiux yuq kuex miq lotlaz vpiq muex kvmluimx wvnc tuex, kvruex kaq Roma vrangx vpangx vhttax jix bix kaz vtueq, naungshiq Shomc Yuimx nuiyc naungshiq mungtan muinz tvbac gay shuex!” ngoz tueq.

49Tsuingshiq phungc wawc kvruex raungwawc Shomc Wayungx yaungc jix vmuingc Kaiapha ngoz yaq waz rueq, “Nuimshiq kuex vngaz ikhoc dvyx ix! 50Phvnx vmaq lotlaz tvbac gay rvhumc miq juing, nuk miqsaz htenc tvkoc miq washiz thueyc khvmc ruiux kuex naungshiq tvkoc vhvlx pinhtumc rvtuex kuex nuimshiq rueq tvmaung muit haz?” ngoz tueq. 51Kvkhoc jungx tueq kvjaz kuex piq thuinz maq vjungx rvmuq, piq kuex kvruex raungwawc Shomc Wayungx yaungc ningkhvnc nuex, Yesu kuex Yuda miqsaz htenc tvkoc nuex vthueyc khvmc shuex lvmx rawshvmx bomc rvtueq, 52kvruex dvyx muinz rvmuq, baung ruip saz nuex rv-phvlc nyvnc httax yaq Tishox miqsaz htenc kuex vshiz dvyx tvyaungc vtueq tvtuimx tvkoc thueyc khvmc shuex, ngoz tueq muinz shvmmax bomc maq jungx tueq.

53Kvruex raungnuiyq maq phaungc vtueq Yuda miqsaz vyungx vlaungx bix rueq Yesu thvy gay tvkoc raz tsaz tvrungx raz wuez tueq. 54Kvkhoc rvtueq Yesu kuex Yuda mungx nuex raungraung khuemx shamx muq shex, kvruex baung kvwawc kvtenc kaz wvnc vtueq kumtsvy tvnx hep wawc Ephraim ngoz yaq ghaq nuex kaz wvnc vtueq sangac bix rulc vdvmz nuex httax tueq.

55Yuda miqsaz Tvlvy Wvnc Moalx httuiuc wvnc koq tueq, miqmac shauk vgvnz tvsawc nawc tvkoc miq htenc kuex moalx max phaungc shauk nuex dvyx Yerusalem nuex duiz woz wvnc wuez tueq. 56Tsuingshiq rueq Yesu kuex thuiyx yaq lvmx maq, Shomc Yuimx nuex rvtuimx vtueq, “Nuimshiq rueq yvmx khoc lac tvmaung vshuinx? Vpiq kuex vruex moalx vyuq vsuing kaz muq doc shuex rvtvnx?” ngoz tueq rvwiz soz wuez tueq. 57Shomc walaungx bix nuiyc Pharise nuk rueq uraq yuq muinz Yesu httax yaq baung kuex tuiuz ruiux yuq, tvtay tvkhic kuy rax, ngoz tueq nvr wuez tueq.

ప్రస్తుతం ఎంపిక చేయబడింది:

YOHAN 11: HNOT01

హైలైట్

షేర్ చేయి

కాపీ