VPHAUNGC VYAUNGC 8
8
Yuix Ruic Wvnc tueq
1Tishox rueq Noa nuiyc svngpholix nuex httax yaq ngvmx saz htenc kuex lauk gay muq; vpiq rueq raungx tvguil koq tueq yuix kuex ruic wvnc phaungc tueq. 2Ghaq khung nuex httax yaq yuix nyuiuz dungc jungx htenc nuiyc raungwawc yuix kaluix htenc muinz tvtuingc gay tueq. Raungyunc thauk kaz tueq, 3yuix kuex raungnuiyq 150 nuex httuiuc laz jausuc suc maq ruic wvnc tueq. 4Svngpholix kuex lex mvshix yapix raungx rokshiz rac raungx mvshix raungnuiyq nuex Ararat kanx nuex kvdaungc kaz tueq. 5Yuix kuex tvhttoarc vtueq ruic wvnc ningkhvnc nuex yapix lex rokshiz, vphaungc raungnuiyq kankhux htenc dung wvnc wuez tueq.
6Raungx 40 lvy wvnc tueq yix maq Noa rueq kaluix puc kuex daz vtueq, 7wuzkhax vshiz tvkaz tueq. Wuzkhax kuex yek waung muq shex, yuix ruic kay nuex httuiuc laz baz khuemx kaz tueq. 8Kvkhoc rvkoq tueq, Noa rueq yuix ruic tueq shuex, ruic muq doc lac kuex tuiuz tvkoc hituiuc vshiz tvkaz tueq, 9yuq muinz yuix kuex ghaq lotlaz nuex luimz yaq doc rvtueq hituiuc kuex vdaungc juing humc muq. Kvkhoc rvtueq lix nuex yek waung koq tueq Noa rueq yauk tvlanc vtueq hituiuc kuex lvp ruiux svngpholix nuex htawc yek tueq. 10Raungx mvshix httaz yix maq hituiuc kuex laukshiz hulawx tvkaz yek tueq. 11Raungyac kox nuex hituiuc rueq olip yauk httuingx kuex vnuix nuex kvmx ruiux yek waung tueq. Kvkhoc rvtueq yuix ruic tueq lvmz Noa rueq tuiuz tueq. 12Kvruex yimaq piq rueq raungx mvshix hulawx bvmc yek ruiux, hituiuc kuex tvkaz yek koq tueq; kvruex lauk kuex yek waung muq shex.
13Noa rullungx wawc 601, vphaungc yapix vphaungc raungnuiyq nuex ghaq wawc yuix kuex ruic kaz tueq. Noa rueq svngpholix puingc kuex lanx vtueq kantsec nuex lawc koq tueq, ghaq wul phaungc yaq kuex khiz tueq. 14Lex nueyc yapix 27 raungnuiyq nuex ghaq kuex wulthawk shex rvtueq.
15Tishox rueq Noa muex ngoc, 16“Mnoz kuex mtaungx nyuiuz, msahez nuiyc mnvmx nyuiuz hez rulc vdvmz svngpholix maq dung kuinz shex. 17Wushawx htenc nuiyc ngvmx saz htenc kuex ghaq htauk nuex pux paung wvnc yek tvkoc kvruex htenc kuex mnoz rulc vdvmz tvdung naungx shuiuz,” ngoz tueq jungx tueq. 18Kvkhoc rvtueq Noa kuex vtaungx nyuiuz nuiyc vsaz vnvmx hez rulc vdvmz svngpholix maq dung kaz wuez tueq. 19Ngvmx saz htenc nuiyc wushawx htenc muinz kvkhoc vphvnx maq vphvnx svngpholix wawc dung kaz wuez tueq.
Noa rueq Shomc Nawk Kuy Shomc Kuq tueq
20Noa rueq Yehowa muex shomc kuy juing shomrawx kuex tvhungx vtueq; vsawc ngvmx saz nuiyc wushawx phvnx ruip saz htenc wawc kuiux phuq lvmz vtueq, shomrawx htauk nuex wvpumz tuimx jauk shomc kuq tueq. 21Yehowa rueq vhomc vtumc thuingc kuex raungc raq yaq rvtueq, “Ngaz rueq miq honc vyaungc ningkhvnc nuex yix maq mkaq muinz ghaq muex tuemc kuq shaungx rvmuq; miq kuex nosaz maq phuex honc vyaungc vbac kuex ngaz rueq tuiuz yaq. Ngaz rueq vtvraungx yungsuiuz yawxsaz htenc kuex majuiuc lauk vkhoc mkaq muinz laukshiz tvbac gay yek shaungx rvmuq. 22Mungkawx httax yaq wawwawx vkhic vyuingc jauz nuiyc vyut jauz httax wvnc tuex. Vkuiyq nuiyc vkalx, raungyux nuiyc raunglawc, raungnuiyq nuiyc raungwvrx kuex mkaq muinz httax wvnc tuex,” ngoz tueq vthuinz maq kvbot tueq.
ప్రస్తుతం ఎంపిక చేయబడింది:
VPHAUNGC VYAUNGC 8: HNOT01
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Hawa Naga Bible © Bible Society of Myanmar, 2014.
