VPHAUNGC VYAUNGC 10
10
Noa Sahez muex Suiuz Vsaz htenc
(1Tvts 1:5-23)
1Yuix htuip yuix nyuing yix Noa sahez Shem, Ham, Japhet tsuingthuimx suiuz vsaz hez kuex vkhoc rvtueq. 2Japhet sahez kuex Gomer, Magog, Madai, Jawan, Tubal, Meshek nuiyc Tira rvtueq, tsuinghez muingc tv-phvnc yaungx wvnc tueq miqphvnx htenc kvmac jix vwaz tamx rvtueq. 3Gomer suiuz vsaz hez kuex Ashkenaza, Riphat nuiyc Togarma rvtueq. 4Jawan suiuz vsaz hez kuex Elisha, Spain, Khupru nuiyc Rode rvtueq; 5kvruex hez htenc kuex svmuktvrax yuix kawx tv-phvnc nuex httax jix nuiyc yuix lomz htenc nuex httaz ngaungc jix hez muex jix vwaz tamx rvtueq. Vruex miqphvnx htenc lotlaz kuex Japhet suiuz vsaz hez wawc vpux paung wvnc rvtueq, miq pungphvnx rv-phvnx rv-phvlc wvnc ruiux, mungx ruip saz nuex httax ngaungc vtueq, miq vdaungx phvnx tv-phvnc kvjaz muinz pungx kvjaz kvjak wvnc wuez tueq.
6Ham sahez kuex Kush, Ejip (Mizraim), Libya nuiyc Kanaan rvtueq, tsuinghez muingc kvruex tv-phvnc yaungx wvnc tueq miqphvnx htenc kvmac jix vwaz tamx rvtueq. 7Kush suiuz vsaz hez wawc kuex Seba, Hawila, Sabta, Raama nuiyc Sabteka miqsaz htenc rvtueq. Raama suiuz vsaz hez kuex Sheba nuiyc Dedan miqsaz htenc rvtueq. 8Kush saz vmuingc Nimrod ngoz tueq washiz httax yaq, kvruex waz kuex mungkawx nuex vphaungc shauk shauk ghaq vraungx htenc khvt taungx gay jix waz rvtueq. 9Piq kuex Yehowa rueq romc lawc kuy ningkhvnc nuex khvmc thuinz vhttax shvrvyx muex yaungx koq tueq miq htenc kvraq, “Yehowa rueq mnoz kuex Nimrod ikhoc shvrvyx yungx m-tvyaungc kv-phux!” ngoz tueq ngoz wuez ruiux yaq. 10Piq mungtan wawc vphaungc shauk shauk ghaqyungx kuex Babelon, Erek nuiyc Akad rvtueq, kvruex ghaq thuimx kuex Babelon miqsaz rvtueq. 11Kvruex mungx kvmaq Asiria mungx nuex kaz vtueq Ninewe, Rehobot Ira, Kala kvruex ghaqyungx htenc kvmuinz, 12Ninewe nuiyc Kala ghaq hvlwvl wawc Resen ghaqyungx kvmuinz tvhungx tec tueq.
13Ejip suiuz vsaz hez wawc kuex Lidia, Anam, Lehab, Naphtu, 14Pathru, Kaslu nuiyc Krete miqsaz htenc rvtueq, Krete phvnx kuex Philistin miqsaz muex yaungx wvnc tueq.
15Kanaan saz pekhux waz Sidon nuiyc Het kuex tsuingshiq muingc kvruex tv-phvnc yaungx wvnc tueq miqphvnx kvmac jix vwaz tamx rvtueq. 16Kanaan kuex Jebusi miqsaz, Amori miqsaz, Girgashi miqsaz, 17Hiwi miqsaz, Arki miqsaz, Sini miqsaz, 18Arwadi miqsaz, Zemari miqsaz nuiyc Hamathi miqsaz htenc muex jix vwaz muinz rvtueq. Pungpungx rvtueq Kanaan miqsaz htenc kuex, 19Kanaan ghaqruiy htenc rvtueq Sidon ghaq maq ghaqyaz kox wawc Gaza hep wawc Gerar ghaq nuex httuiuc laz muinz, shaldungc kox wawc Sodom, Gomorra, Adma nuiyc Zeboim hep wawc Lasha ghaq nuex httuiuc laz baung ruip saz nuex rv-nyanc httax wvnc tueq. 20Vruex htenc kuex miqphvnx pungpungx, kvjaz pungpungx, mungtan pungpungx nuiyc miqphvnx pungpungx yaungx tueq Ham suiuz vsaz hez rvtueq.
21Japhet phuz Shem kuex Hebre phvnx lotlaz muex jix vwaz rvtueq. 22Shem sahez kuex Elam, Ashur, Arpachshad, Lud nuiyc Aram rvtueq, tsuingshiq muingc kvruex tv-phvnc yaungx wvnc tueq miqphvnx kvmac jix vwaz tamx rvtueq. 23Aram suiuz vsaz hez wawc kuex Uza, Hul, Gether nuiyc Meshek miqsaz htenc rvtueq. 24Arpachshad saz Shela kuex Eber muex vwaz rvtueq. 25Eber kuex vsaz wanueyc httax yaq: vsaz washiz kuex Peleg ngoz tueq muingc tueq, kvruex waz pat nuex mungkawx nuex httax ngaungc yaq miqsaz htenc rv-phvlc nyanc wvnc ningkhvnc nuex rvtueq; vganc washiz kuex Joktan ngoz tueq muingc tueq. 26Joktan suiuz vsaz hez wawc kuex Almodad, Shelep, Hazarmawet, Jera, 27Hadoram, Uzal, Dikla, 28Obal, Abimael, Sheba, 29Ophir, Hawila nuiyc Jobab miqsaz htenc rvtueq. Kvhtenc kvruex kuex Joktan suiuz vsaz wawc rvtueq. 30Tsuingshiq httax ngaungc yaq ghaq vraungx kuex Mesha maq shaldungc kox wawc kuz vkanx vhtvy baung Sephar ghaq nuex httuiuc laz yungx yaq. 31Vruex htenc kuex miqphvnx pungpungx, kvjaz pungpungx, mungtan pungpungx nuiyc miqphvnx pungpungx yaungx tueq Shem suiuz vsaz hez rvtueq.
32Vruex miq lotlaz kuex Noa suiuz vsaz hez wawc rv-phvlc kaz wvnc wuez vtueq, vtaungx tv-phvnc vshiz maq vshiz rv-nyanc wvnc tueq miqphvnx htenc lvmz rvtueq. Yuix htuip yuix nyuing yix maq ghaq htauk nuex httax yaq miqphvnx lotlaz kuex Noa sahez wawc vrv-phvlc kaz wvnc htenc rvtueq.
ప్రస్తుతం ఎంపిక చేయబడింది:
VPHAUNGC VYAUNGC 10: HNOT01
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Hawa Naga Bible © Bible Society of Myanmar, 2014.
