Pula 35
35
Mbehi na iɗsiɗkohse
1Musaa cohɗohha cuuɓaŋ Israayel jen, a woosa ɓa ne : « In cii ceɗ Nikiɗi nakoh ne ca taambɗu : 2Neeh yasna-yino ceɗ na hee pangkasse, wi yasna-kanakɗoh waa hee nike nga ɗu mbeh hooliɗ, mbehi na iɗsiɗkohse wi hoolɗu wuu Nikiɗi. Ɓo' nu panguk ŋ mbeheem ɗah, a hey apse. 3Ɗu heyɗi sah fuuɗe yongkaah ŋ ali ɗisik ŋ mbehi na iɗsiɗkohse. »
Musaa teeɓohiɗ in ci joy onohu ne Genohaani haɓɗu
4Musaa taalndiɗta woyeeɗa Israayel ci jen an : « In cii ceɗ Nikiɗi nakoh : 5ɓayaat ŋ in ci ɗu raakoot, ɗu eɗoh ca wuu Nikiɗi. Ɓo' nu teyɗuka tum na keeñ soosiɗ ɗah, a hey eɗohe ini a onoh wuu Nikiɗi.
A miniɗ eɗoh : urus, haalis wala moos.
6A namiɗ min eɗoh : ooy bulo, ooy ruumind eɗfiɗ, ooy ruumind coy, leeŋ wala find pe'.
7A namiɗ min eɗoh : ɓi und kuy mbaal suupuuɗ ruumind wala ɓi und inoh cookom wala ndooɗ kassiya.
8A namiɗ min eɗoh : diwliin fuuɗoha laampaaci, wala ɓi eeñɗoha haɓɗohu diwi na hoolɗohse, wala wuu cuuraayi.
9A namiɗ min eɗoh pemeeci na woyse sooham wala ɓi peme wiiriis, moɗsinoha efoodi na nafaani ŋ fikiiri. »
Musaa woyiɗ in ci joy haɓɗu jen
10Musaa woyissa ne : « Ɓi raak min-min nga ɗu jen, hayaat ne ɓa haɓiɗ in ci Nikiɗi nakoh jen.
11Ɓa hay ɗah, ɓa haɓiɗ Genohaani, na baasiŋ wa na in ci ula, korohaaci, kaadar ci, laat ci, kumbin ci, na tufkohaaci.
12Ɓa haɓiɗ Wahndeeni na ndooɗ ciŋ wa na kunohaaniŋ wa, ɗiski na romkohse.
Ɓa haɓiɗ ridooni na ɗasɗe Ɗiski Hoolohngaani.
13Ɓa nam haɓiɗ taaɓli na ndooɗ ciŋ wa, na tumohaaci hunan naa jen, na mbuuruuci degsan nga, wuu Kooh.
14Ɓa nam haɓiɗ degohaaniŋ laampaaci na in ci hunan naa, laampaaciŋ wa na diwliiniŋ wa.
15Ɓa nam haɓiɗ keesi seeƴkohaani suusohsan cuuraay ci na ndooɗ ciŋ wa.
Ɓa haɓiɗ diwi na hoolɗohse, na cuuraayi eeñɗohaani.
Ɓa haɓiɗ ridooni nikan ŋ aasohaani.
16Ɓa nam haɓiɗ keesi seeƴkohaani dohohsan hoosuuɗ ci, na giryaasiŋ wa moosi, na ndooɗ ci wa ɓayohsan, na tumohaaci hunan naa jen.
Ɓa haɓiɗ beñwaari tumohsan masmi ɓoktukohsan na degohaaniŋ wa.
17Ɓa nam haɓiɗ piis ci ɗingohsan bayaali, na kumbin ci, na tufkohaaciŋ ca, na ridooniŋ aasohaaniŋ bayaali.
18Ɓa haɓiɗ tatohaaci amban Genohaani ngaŋ kehƴi, na niy ciŋ ca, na tatohaaci amban ɗingiŋ bayaali ngaŋ kehƴi, na niy ciŋ ca.
19Ɓa haɓiɗ kulɓaaci hoolɗuuɗ ci pangkohsan ŋ Ɗiski Hooliɗi, ca nikka ciŋ Aaruna seeƴkiɗohi, na ciŋ kuɓuuciŋ ɗe ne ɓa pangkee findi seeƴkiɗoh ɗah. »
Israayel ci haytohiɗ onoh ci wuu Genohaani
20Wa Musaa woo ɓa nakoh ceem, coha reehha, Israayel ca cootta. 21Ɓi waaɗee eɗoh, te ɓa teyɗukkaa tum na keeñ soosiɗ, ɓa hayya eɗohe in ci ɓa onoh wuu Nikiɗi, ɓa eɗohha ca wuu haɓɗuuki na taambkohuukiŋ Ɗiipi-na-Cohohse, na kulɓaaci hoolɗuuɗ ci.
22Ƴaar ci na ɓitiɓ ci jen, ɓi teyɗukee wa na keeñ soosiɗ, ɓa ɓayeeɗa ɓi tokkaah kulɓa, ɓi long-long, ɓi jaaru ndukun, ɓi tokkaah wiiriis, na in nu nik ne wa urus ɗah, yaa nu nga ɗah ɓayya ursi fu eɗoh, fu eɗohhaa findi eɗohi na raɗsasse wuu Nikiɗi.
23Ɓi raakee ooy bulo, ruumind eɗfiɗ wala ruumind coy, leeŋ wala find pe', und kuy ruumndiɗuuɗ wala und inoh cookom, ɓa jen, ɓa haytohha ca. 24Ɓi pulɗee in haɓɗohuuɗ haalis na moos ruumind eɗohaah wuu Nikiɗi haytohha ca. Ɓi namee raak ndooɗ kassiya haytohha ca wuu in ci joy haɓɗu.
25Ɓitiɓ ci raakee min-min jen monnda na yaah ciŋ ɓa, ƴutta ɓa haytohha in ci ɓa mond, ɓi ooy bulo na ooy ruumind eɗfiɗ, na ruumind coy na ooy leeŋ.
26Ɓitiɓ ci teyɗukee wa na keeñ soosiɗ te ɓa minnda mond, ɓa mondeeɗa find pe' ne ɓa haɓiɗ ooy.
27Ɓi adgohee cuuɓi haytohha pemeeci na woyse sooham na ɓi peme moɗiɗ wiiriis moɗsinoha efoodi na nafaani ŋ fikiiri ; 28ɓa nammba ɓay eeñɗoha na diwliin, ne laampaaci min fuuɗu, diwi na hoolɗohse na cuuraayi eeñɗohaani nam haɓɗu.
29Israayel ci kommba Nikiɗi in ci ɓa onoh ŋ ini neɓ ɓa. Ɓi teyɗukee na keeñ soosiɗ jen, ƴaar na ɓitiɓ, haytohha ca, ne in ci Nikiɗi woo Musaa jen min haɓɗu.
Betsalel na Oholiyaab tanuuɗ
30Musaa woosa Israayel ci ne : « Inhaat ne Nikiɗi taniɗ Betsalel, kuɓu Uri, a setiŋ Hur, a ɓaah ŋ cuuɓiŋ Yudaa. 31A riifɗiɗ Betsalel na Fuuɗsiŋ ɗe po a raakiɗ min-min, a ñaañiɗ, a raakiɗ inah-inah ŋ panguk nu panguk. 32A miniɗ marak po a inah findi a joy haɓɗoh in moɗiɗ ngaŋ urus, haalis, wala moos ; 33a miniɗ pes atoh peme, a namiɗ min ɓek peme ŋ ɓekoha, a miniɗ pes kidig, a miniɗ haɓiɗ panguk nu nik.
34A namiɗ ɗe on po a miniɗ jangɗoh, a na Oholiyaab kuɓu Ahisamaak yi ɓaah ŋ cuuɓiŋ Daan. 35A tumiɗ min-min ŋ haf ciŋ ɓa po ca riifiɗ ne ɓa min pes peme, ɓa min fer in moɗiɗ ŋ liiɓ ciŋ ɓa, ɓa min moɗsin piis na ooy bulo, na ruumind eɗfiɗ, na ruumind coy na leeŋ, ɓa min teɗ, te ɓa min haɓiɗ panguk nu nik, ɓa min fer in moɗiɗ.
ప్రస్తుతం ఎంపిక చేయబడింది:
Pula 35: YM
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Wycliffe Bible Translators, Inc
