Matio 9

Jusu pǔh-i klɔ-nyɔ̍

(Maɛ 2.1-12; Luu 5.17-26)

1Wɛ̀ Jusu gbǎ dě blǎgbè di̍i̍ dode̍, ɔ̍ tàn. Iě ɔ̍ mu̍ dě ɔ̍ blǐ wlɔ̀. 2Wɛ̀ nyɔ̍gbei blě-e klɔ-nyɔ̍ dě sabli̍ di̍i̍, u̍h ja ɔ̍ dǒ Jusu we̍. Sɔ Jusu juo ɛ̍ i̍ ka u̍h nu̍-a wlùh gbaɛ blě-ɛɛ. Iě ɔ̍ la̍a̍ dě klɔ-nyɔ̍ we̍, “Ǎn jǔ, ku̍ wlùh, àn gblɛ̍n sɔ̀ɛ̀n-a tìh tǎli-ɛ i̍ wɛ̀.”

3Wɛ̀ ùh nu̍-a telě nǎ poe nyɔ̍-ɛ u̍h-a wlu. U̍h la̍a̍, “Jɔ̍gbau la ɔ̍ nyni-i Nyɔsoa-a nynɛ̌ jii̍.”

4Sɔ Jusu juo dɛ̍ u̍h-a bla̍-a dě u̍h di̍i̍-ɛ, wɛ̀ ɔ̍ la̍a̍ dě u̍h we̍, “Dɛ̍nu̍ mɔ̀-a naɛ dɛ̍ kaɛn la wlùh i̍ ɛ? 5Jɔ̍gbau la ɔ̍ gblɛ̍n sɔ̀ɛ̀n-a tìh i̍ tǎli-ɛ jɛ ǎn sà-a ka dǒ wɔ̍i̍n-ɛ ke, jɛ ǎn mu̍-a ka sɔ bloɔ̍ ìè na nu̍-ɛ, jɛwe̍ bo ɛ̍ pe̍ɛ i̍ ɛ? 6Jɛ ǎn pɔ̀n mɔ̀ iě ɛ̍ i̍ juo ka Nyi̍ɔ̍-a Jǔ blě-a tùn nɔ̌ bloɔ̍ ɔ̍ iě-a gblɛ̍n sɔ̀ɛ̀n-a tìh i̍ tǎli-ɛ.” Iě ɔ̍ la̍a̍ dě klɔ-nyɔ̍ we̍, “Sɔ bloɔ̍, dǔ àn sabli̍-i ìè gbò we̍ mu̍.”

7Iě jɔ̍gbau laa̍ ɔ̍ sɔ bloɔ̍, wɛ̀ ɔ̍ mu̍ ɔ̍ blǐ. 8Ti̍ nyɔ̍ tlùgbei̍ jě-a dɛ̍ la-aɛ, sɔ ɛ̍ flɔn-ɛ u̍h wɔ̍n, iě u̍h-a tùi Nyɔsoa nynɛ̌ i̍, ɔ̀ nu̍-a ka wlɔ̀ nyi̍ɔ̍ bu̍hᵻ de̍e̍ i̍ tba̍ sɔɛn-ɛ.

Poa-nyɔ̍ bo ɔ̀ pɔ̀n kwɛ̍i̍n nyɔ̍ i̍

(Maɛ 2.13-17; Luu 5.27-32)

9Ti̍ Jusu-a sɔ-a la̍ dǒ tà-a chɛ̀-ɛ, dǒ ɔ̍ jě-e jɔ̍gbau due ɔ̍ nynɛ̌ bo Matio. Nɛ̀ ɔ̍ tè i̍ dě ɔ̍ taa̍sìh sà gbò juwɛ sɔ̀n. Wɛ̀ Jusu la̍a̍ dě ɔ̍ we̍, “Gbǎ dǒ ǐn de̍e̍.”

Wɛ̀ Matio sɔ bloɔ̍, iě ɔ̍ gbǎ dǒ ɔ̍ de̍e̍.

10Ti̍ Jusu ke ɔ̍ kòà-a di̍-a dɛ̍ dě Matio blǐ gbò-ɛ, taa̍sìh sà nyɔ̍ dɔu duuh ke gblɛ̍n sɔ̀ɛ̀n nyɔ̍ gbǎ u̍h nynɛ̌ u̍h-a di̍ dɛ̍. 11Ti̍ Fɛlesii nyɔ̍ jě-a u̍h-ɛ, iě u̍h tèle ɔ̍ kòà i̍, u̍h la̍a̍, “Dɛ̍nu̍ mɔ̀-a dlǔtu ke ùh kaɛn la u̍h-a di̍-i dɛ̍ tàdùè ɛ?”

12Jusu wɔ̌n-a u̍h-a wlu̍-ɛ, iě ɔ̍ la̍a̍, “Nyɔ̍ ùh nɛ-a blee-ɛ, u̍h se̍ kwɛ̍i̍n nyɔ̍ i̍ pɔ̀n. Jɛ poa-nyɔ̍ nɔ̀ɔ̍, u̍h-a pɔ̀n ɔ̍ i̍. 13Jɛ wlu̍ la ɛ̀ la̍a̍, ‘Wɔɛ bo ǎn pɔ̀n, ǐn se̍ slaǎ sà-a pɔ̀n,’ mɔ̀ mu̍ mɔ̀ iě ɛ̍ cheǎn mɔ̀ iě ɛ̍ gbɔ̀ juo. Dɛ̍nu̍ɛ, ǐn se̍ i̍ slɛ̌-nyɔ̍ i̍ pɔ̀n la̍-a ji̍, jɛ gblɛ̍n sɔ̀ɛ̀n nyɔ̍ bo ǐn ji̍ i̍ pɔ̀n la̍-a.”

Chɔɔn-a kòà tèle Jusu i̍

(Maɛ 2.18-22; Luu 5.33-39)

14Wɛ̀ Chɔɔn ɔ̀ po̍-a nyɔ̍ nǐ dlǔ-ɛ, ɔ̍ kòà ji̍, iě u̍h tèle Jusu i̍, u̍h la̍a̍, “Ka ɛ̍ nu̍ iě à ke Fɛlesii nyɔ̍-a po̍ jlǔh dě Nyɔsoa dɛ di̍i̍ chɛ̍chɛ̍, wɛ̀ nàɛ̀ kòà nɔ̀ɔ̍ u̍h-u po̍ jlǔh ɛ?”

15Iě Jusu la̍a̍ dě u̍h we̍. “Pò nynɔ̌ delee-a kɔan nɛ dǒ nynɔ̌ jla̍ ja peě kɛ̍n-ɛ, nɛ̀ dihwi̍hᵻ se̍ jlǔh po̍ mu̍. Jɛ ɛ̍ mu̍ ti̍ kɔn wɛ̀ nynɔ̌ delee-a kɔan iě dě u̍h nynɛ̌ we̍ sà-ɛ, wɛ̀ u̍h iě jlǔh po̍-ɛ dǔ.

16“Ɛ̍ se̍ nyɔ̍ kɔn ɔ̍ iě jliɛ̍ delee-a fɔ̌ plɛ̀i̍ soa pǎ-ɛ. Nɛ̀ pò jliɛ̍ delee jeǎ-ɛɛ, nɛ̀ ɛ̍ mu̍ plɛ̀i̍ soa laa̍ ɛ̍ fǎle-ɛ dě de̍ i̍ po̍. 17Dɛ̍ku sòlɛ̀ soa ɛ̀ se̍-a tɔ̀ɔ̀n nɛ-ɛ, nyɔ̍ se̍ kɔn ɔ̍ iě ɛ̍ nmɔ̍ delee di̍i̍ po̍. Pò nyɔ̍ nu̍ ɛ̍-ɛ, nɛ̀ dɛ̍ku-a mu̍ wa̍, wɛ̀ nmɔ̍ iě i̍ wlǎ. Nɛ̀ dɛ̍ku sòlɛ̀ wɔ̍ nyni jii̍ ke. Ɛ̍ tìh-ɛ, nmɔ̍ delee bo nyɔ̍-a po̍ dě dɛ̍ku sòlɛ̀ delee di̍i̍ wɛ̀ i̍h-a gbɛ̍n gba̍n.”

Jusu sà-e nynɔ̌gbaɔ jǔ iě ɔ̍ pǔh-i nynɔ̌ due

(Maɛ 5.21-43; Luu 8.40-56)

18Jusu nɛ dǒ wlu la̍ sǔh wɛ̀ Juu-a nyɔ̍ klaa due ji̍ dǒ ɔ̍ we̍. Wɛ̀ ɔ̍ chlìi i̍ dǒ ɔ̍ jǔ, iě ɔ̍ la̍a̍, “Kaka ǎn jǔ nynɔ̌gbaɔ chɛ̍n feɛ, jɛ ji̍ ìè ɔ̍ sɔ̍n dlǔ tè wɛ̀ ɔ̍ iě kmɔ̌ nɛ dode̍.”

19Wɛ̀ Jusu sɔ bloɔ̍, iě ɔ̍ ke ɔ̍ kòà gbǎ dǒ jɔ̍gbau laa̍ de̍e̍ u̍h-a mu̍.

20Wɛ̀ nynɔ̌ ɔ̀ nmi̍i̍wlì wɛ̌-a nu̍-a dǒ sɔ̀nᵻá pùè jɔ̌ sɔɔ̌n di̍i̍-ɛ, iě ɔ̍ jii dě Jusu de̍e̍ wɛ̀ ɔ̍ tǔh ɔ̍ plɛ̀i̍-a mlǎ i̍. 21Nynɔ̌ laa̍ ɔ̍ la̍a̍ dě ɔ̍ chɛ̀ we̍, “Pò ɛ̍ tù ɔ̍ plɛ̀i̍-a mlǎ-a chɛ̀ iě i̍ tǔh-ɛ, nɛ̀ ǎn mu̍ pǔh.”

22Jusu bǐi kwa̍ wɛ̀ ɔ̍ jě ɔ̍, iě ɔ̍ la̍a̍, “Nynɔ̌ chɛ̀, ku̍ wlùh, àn wlùh gbaɛ bo ɛ̀ nu̍ ɛ̍ wɛ̀ ìn pǔh.” Dǒ nynɔ̌ laa̍ ɔ̍ wɛ̌ nyna ɛ̍ bɔ̌.

23Ti̍ Jusu pa̍-a dě nyɔ̍ klaa laa̍ blǐ gbò-ɛ, iě ɔ̍ jě pànkɔɛ̍ bla̍ nyɔ̍, nɛ̀ nyɔ̍gbei-a po̍ tlùngbɛ̀n. 24Iě ɔ̍ la̍a̍, “Mɔ̀ sǐ-o sɔ̀n i̍, nynɔ̌gbaɔ jǔ la ɔ̍ se̍ mɛ̌, jɛ ɔ̍ mɔ̌-ɛ.” Sɔ u̍h-a kǐhlɛ ɔ̍ la̍-ɛ sǔh. 25U̍h wɔ̀-a dǒ sɔ̀n gbǎ-aɛ, wɛ̀ Jusu pa̍ dě gbòju di̍i̍, iě ɔ̍ nu̍ sɔ̍n, ɔ̍ dǔ nynɔ̌gbaɔ jǔ laa̍ ja̍i̍. Iě ɔ̍ sɔ bloɔ̍. 26Sɔ ɛ̍ pɔ̀n sɛ̍ i̍ dě fɔ̌ laa̍ we̍.

Jusu pǔh-i dɔ̌-nyɔ̍ sɔɔ̌n

27Ti̍ Jusu-a sɔ-a la̍ dǒ tà-a chɛ̀-ɛ, wɛ̀ dɔ̌-nyɔ̍ sɔɔ̌n wɔ̀ dǒ ɔ̍ de̍e̍, u̍h-a we̍le. U̍h la̍a̍, “Depe-a Jǔ, jě à wɔɛ lě.”

28Ti̍ Jusu pa̍-a dě gbò-ɛ, dɔ̌-nyɔ̍ laa̍ u̍h ji̍ dǒ ɔ̍ we̍. Iě ɔ̍ tèle u̍h i̍, ɔ̍ la̍a̍, “Mɔ̀ po̍ ɛ̍ tìh chɛ̀ dɛ̍ mɔ̀-a pɔ̀n-aɛ ǐn bɛ̌ɛ ɛ̍ nu̍-ɛ ae?”

Iě u̍h la̍a̍, “I̍i̍n, nyɔ̍ klaa.”

29Wɛ̀ ɔ̍ tǔh u̍h-a jlǐh i̍, iě ɔ̍ la̍a̍, “Ka mɔ̀ nu̍-a ɛ̍ tìh chɛ̀ po̍-ɛ, kǎ ɛ̍ iě nɛ dǒ mɔ̀ we̍.” 30Wɛ̀ u̍h-a jlǐh pɔ̀ni dode̍. Iě Jusu nɛ̌ɛ u̍h wlu̍ doun i̍, ɔ̍ la̍a̍, “Mɔ̀-ɔ sèàɛ̍ nyɔ̍ dɔɔ wlùh de o.”

31Jɛ u̍h sǐ-a sɔ̀n-ɛ, iě u̍h sɛ̍-ɛ ɔ̍ pɔ̀n i̍ dě fɔ̌ kli̍hgbɛ̍ laa̍ we̍.

Jusu pǔh-i bo̍bo̍

32Jɔ̍gbauᵻ laa̍ u̍h nɛ dǒ sɔ̀n sǐ la̍ sǔh wɛ̀ u̍h ja jɔ̍gbau due dɔɔ dǒ Jusu we̍. Jeědih nɛ dǒ ɔ̍ de̍e̍, sɔ ɔ̍-ɔ wlu. 33Ti̍ Jusu wɔ̀-a jeědih laa̍ dǒ ɔ̍ de̍e̍ sà-aɛ, sɔ ɔ̍ wlu la̍-ɛ sǔh. Iě ɛ̍ kèle nyɔ̍ tlùgbei̍ laa̍ i̍ kaa̍. U̍h la̍a̍, “À-a se̍-a dɛ̍ nɛka la jě sàǐtòò da̍a Eslɔɛ blǔh la kɛ̍n.”

34Jɛ Fɛlesii nyɔ̍ la̍a̍, “Jeědih-a dlǔtu bo ɛ̀ nyǐ Jusu gbǐh wɛ̀ ɔ̍ sà nyɔ̍ jeědih de̍e̍ i̍.”

Jusu jě nyɔ̍gbei wɔɛ

35Jusu na wlɔ̀ᵻ klaaᵻ ke wlɔ̀ᵻ plìh kli̍hgbɛ̍ di̍i̍ i̍. Wɛ̀ ɔ̍ po̍ nyɔ̍ nǎ dě Juu nyɔ̍-a wɛɛ sà gbòᵻ sɔ̀n i̍. Iě ɔ̍ bla̍ pɔ̀n chɛ̀-a tìh dǒ Nyɔsoa-a kmɔ̌ wlu̍ i̍ kɔn dɛ we̍. Wɛ̀ ɔ̍ bɔ̌ɛ nyɔ̍gbei-a poa dɛ̍ᵻ ke wɛ̌ᵻ kli̍hgbɛ̍. 36Pò ɔ̍ sǐ tàjɛ̀ i̍-ɛ, nɛ̀ dɛ̍ nyɔ̍ tlùgbei̍-a nu̍-a ɔ̍ we̍ klui-ɛ, nɛ̀ ɛ̍ po̍ ɔ̍ wɔɛ kaa̍. Dɛ̍nu̍ɛ, u̍h-a jě tìh, wɛ̀ u̍h se̍ we̍ gbǎ nyɔ̍ kɔn. U̍h wɔ̀ blawɛ̌ᵻ ìh se̍-a dǒ we̍ i̍ gbɛ̀n nyɔ̍ kɔn-ɛ. 37Wɛ̀ ɔ̍ la̍a̍ dě ɔ̍ kòà we̍, “Klèᵻ la i̍h tìè i̍, jɛ i̍h-a chɛ̍n-nyɔ̍ se̍ i̍ tìè. 38Ɛ̍ tìh-ɛ, mɔ̀ wlu dě klè joi we̍ ɔ̍ iě kɔɔ chɛ̍n-nyɔ̍ dɔu nɔ̌ klè la dbo̍.”

ప్రస్తుతం ఎంపిక చేయబడింది:

Matio 9: KDNT

హైలైట్

షేర్ చేయి

కాపీ