1 Samuel 15
15
Saúl nomachichidiñe gaa'me Amalec laje'
1'Uo jo'me nolo' Samuel dojapegue' ñe'me Saúl, eetac:
«Ca'li ñe'me Jaliaĝanec jayem yamaĝalegue qaedi am ja'alegue, queda'me en am lejaliaĝane'j gaa'me Israel laje'pi jo'ne mach'e c'oqo'tepi. Chane'eja nayi anaquiaĝana ga'me jetaque am 'yaĝatem joñe'me. 2Eetac jenjo' 'laqatac ñe'me Jaliaĝanec jo'ne napacalegue ena'uac: “Ja'uo qomle ga'me lachoĝode'j gaa'me Amalec laje', jouaĝat ga'me ja no'en jo'ne 'yeteque ca'li gaa'me Israel laje', qa'a da'me nauanegueta ca'li chiyoĝotegue di'me Egipto. 3Chane'eja auec'atalo qama'le anomachichidiñe gaa'me Amalec laje'. Ena'te avichoĝode'n gaa'me jiyaĝadipi, gaa'me yauodipi, gaa'me ñoqolqapi, chayovida'alo gaa'me yemta 'niyidiñe, nataq'aen gaa'me uacapi, gaa'me 'nanaĝatelpi, gaa'me camello choqogaa'me ajenadi nataq'aen ena'uac ga'me yauata.”»
4Chane'eja Saúl en yema'a't gaa'me coicopi ua'a di'me noic jo'ne Telaím, qama'le naloqote'n. Uo'oe doscientos mil gaa'me nalada't lo'ol jo'ne petedañe, nataq'aen diez mil gaa'me chiyoqoda'ña di'me Judá. 5Chane'eja Saúl yauetegue ga'me nalada't lo'o di'me noic Amalec, qama'le cha'li ueda'a ga'me lae ga'me ñache. 6Qama'le Saúl yamaĝalo ga'me 'laqatac gaa'me quenita laje', eetac:
«Da'me ami gaa'me auachiyoĝoyegueta qa'a yiyamaĝate'tape ca'li gaa'me Israel laje'pi da'me chiyoĝotegue di'me Egipto. Chane'eja, da'me ami, ¡aneyochiyegue, oquiya'ae jogaa'me Amalec laje', qaedi ja ami 'te japetenegueta jogaa'me qom ñolaĝachidiñe!»
Qama'le jogaa'me quenita laje' ca'ae jogaa'me Amalec laje'. 7Chane'eja Saúl choqogaa'me nalada't lo'ol male quiiñguilo jogaa'me Amalec laje', qama'le nomachichidiñe. Yecaa'tape jogaa'me chiyoqochi'ña di'me Havilá chayovida'a di'me Sur jo'ne tayi'iñgui di'me Egipto. 8Yala't yemeda gaa'me jiyaĝadipi, temaq'aen da'me ja yala't ñe'me Agag jo'ne jaliaĝanec di'me Amalec. 9Ja nach'edata da'me dojo', ñe'me Saúl choqoga'me coicopi ja yala't gaa'me yejidi jo'ne 'noe'n: ga'me 'nanaĝatelpi, ga'me uacapi choqogaa'me uaca c'oqo'te jo'ne 'yaĝadayaqa. Nataq'aen ja yolaĝachiguilo ga'me 'uo da'me lajo'viyaĝac; joga'me qaya'te lajo'viyaĝac qamqa'me yolaĝachiguilo.
Ñe'me Jaliaĝanec yeguem ñe'me Saúl da'me lejaliaĝane'j gaa'me Israel laje'pi
10Chane'eja ñe'me Jaliaĝanec dojapegue' ñe'me Samuel, qama'le eetac:
11«Jayem totelegue da'me jen lejaliaĝane'j gaa'me Israel laje' ñe'me Saúl, qa'a jouaĝat da'me jayem ca'ae, qama'le ja ya'uo ga'me jamaĝalegue ta'le ya'uo.»
Da'me domachiya da'me dojo' ñe'me Samuel, yataqachiñe jaqachigui da'me ja matelegue, qama'le yema jo'me pi'yaq nachoĝodetapecot ñe'me Jaliaĝanec. 12Jo'me ne'teta, ñejeguem qama'le dajoyi ñe'me Saúl, qalaĝaja qot'aqataĝanem da'me joote ec, ue'ta jodi'me Carmel, jo'ne ua'a da'me 'uo ga'me 'noĝojeguem jo'ne mach'e li'yoĝodaĝat, qama'le naqaedi chiyaqa'ña da'me 'viyelaĝa di'me Guilgal. 13Chane'eja ñe'me Samuel ec, yovita ga'me ue'ta ñe'me, qama'le eetac ñe'me Saúl:
«¡Ñe'me Jaliaĝanec am ue'tajop! Joote ja'uo ga'me jayem yamaĝalegue ñe'me Jaliaĝanec.»
14Qalaĝaja Samuel 'yateguet:
«Qama'le, ¿toqoch'e jomachiya gaa'me noenaĝa'j gaa'me 'nanaĝatelpi choqoga'me uacapi?»
15Qama'le Saúl 'yateguet:
«Naajo' yejidi qoyachiyoĝoteda'ague di'me Amalec. Gaa'me jiyaĝadipi ja yala't gaa'me jo'ne 'noe'n 'nanaĝatelpi choqoga'me uacapi, qa'a jetaque yegouelo, yate'm ñe'me Jaliaĝanec mach'e Anedios. Qalaĝaja joote qoyolaĝachigui ena'uac ga'me lae ga'me yauata jogaa'me.»
16Qalaĝaja Samuel yitaĝa enaac:
«¡At'emaqata! Yataqata anaquiaĝana ga'me jo'ne jayem 'yaĝatem ñe'me Jaliaĝanec jepi'yaq.»
'Yat ñe'me Saúl:
«Am ñaquiaĝana.»
17Qama'le eetac ñe'me Saúl:
«¿Qo'li ja eja ca'li da'me auetapela't ja am 'te p'ajaye nataq'aen qaya'te adi'yoĝodic? Qalaĝaja ñe'me Jaliaĝanec en am lajoĝola't gaa'me c'oqo'tepi di'me Israel. 18Qama'le ja copaja'a, ñe'me Jaliaĝanec am yamaĝalegue, da'me am dojapegue', eetac: “Auec'atalo jogaa'me Amalec laje' qama'le auolaĝachiguilo ena'uaque jogaa'me. Aueloi'ye'to chayovida'a anomachichidiñe jogaa'me.” 19Qama'le, ¿toqoch'e ja aua'uo ga'me jo'ne am yamaĝalegue ñe'me Jaliaĝanec, maq joda'me anachi ga'me adeuodanaĝat chiyaqauelo gaa'me adaute'upi? Qama'le aualoĝona ga'me ja 'noota ñe'me Jaliaĝanec.»
20Qalaĝaja 'yateguet ñe'me Saúl:
«Da'me jayem joote ja'uo ga'me jayem yamaĝalegue ñe'me Jaliaĝanec. Qama'le ñauequena ñe'me Agag lejaliaĝane'j jogaa'me Amalec laje', qaedi qo'yamaqaten queda'me yema ñomachichidiñe jogaa'me. 21Qalaĝaja gaa'me coicopi naqaegaua jo'ne yaconalo gaa'me yataqachiñe 'noe'n 'nanaĝatelpi nataq'aen gaa'me uacapi, jo'ne naqaegaua ta'le 'uaediñe qoyolaĝachiguilo, jouaĝat da'me jetaque yegouelo, yate'm ñe'me Jaliaĝanec mach'e Anedios, yacheda'ña jena'me jenjo' Guilgal.»
22Qalaĝaja Samuel 'yateguet joñe'me:
«Ñe'me Jaliaĝanec yataqachiñe 'yamaqaten da'me qoyoqocha'alo gaa'me lamajoĝonaĝaco,
ja en 'te p'ajaye ga'me najaqajec jo'ne qoyegoue nale.
Nataq'aen da'me 'yamaqaten da'me qonaquiaĝanalo daa'me 'laqataqa,
ja en 'te p'ajaye ta'le qoyanem ga'me cheta ga'me 'nanaĝate.
23Ga'me nautena joñe'me Jaliaĝanec
ena'am ga'me jo'ne napaĝaguena da'me pi'yoĝonaq,
nataq'aen ga'me ja damichigui lauel
ena'am ga'me jo'ne p'iya'alo gaa'me ch'e nequi'il.
Qama'le da'me am, queda'me ja auoqo'cha joga'me am yamaĝalegue ñe'me Jaliaĝanec,
joñe'me nach'e ena'am am yeguem da'me te'me am lejaliaĝane'j gaa'me Israel laje'pi.»
24Qama'le Saúl 'yateguet joñe'me Samuel:
«Eja, jateton queda'me ja'uo da'me ja no'en. Ñepaten ga'me lamajoĝonaĝac ñe'me Jaliaĝanec choqogaa'me at'aqataqa. Qa'a jouaĝat da'me 'uo ga'me yoqolanaĝa, jo'oiyapegalo gaa'me coicopi, qama'le joqo'cha ga'me jo'ne yepaquetedapega. 25Chane'eja nayi, am ñachoĝodenot qaedi jayem avichoĝoden, qama'le jayem oquegue qaedi 'ñonaĝachigui ñe'me Jaliaĝanec.»
26Qalaĝaja Samuel 'yateguet:
«Ja naq'aeta, ja am 'te jequegue, qa'a ja auoqo'cha da'me 'laqatac ñe'me Jaliaĝanec. Joñe'me nach'e ena'am am yeguem da'me te'me am lejaliaĝane'j gaa'me Israel laje'pi.»
27Samuel 'ñemaĝañe da'me male ec, qalaĝaja Saúl yaconegue ga'me lae ga'me lapoto, qama'le joga'me lapoto colqa'ague. 28Chane'eja Samuel eetac ga'me 'laqatac yanem ñe'me Saúl:
«Naq'aeta qomle da'me dojo', ñe'me Jaliaĝanec yecolaĝat nayi da'me am lejaliaĝane'j gaa'me Israel laje'. Male doĝotaĝanec qaedi yanem joga'me jo'ne p'ajaye, ja am 'te ena'am. 29Ñe'me Jaliaĝanec, jo'ne nach'eñe 'lonaĝac ga'me Israel, ja doqovinaĝan nataq'aen ja nejouoĝoñe, qa'a ñe'me ja ch'e jiyaĝaua qaedi nejouoĝoñe ga'me lelnataĝac.»
30Qama'le Saúl 'yateguet joñe'me:
«Ñatetola't queda'me ja'uo da'me ja no'en. Chane'eja am ñachoĝodenot qaedi maliaĝa 'uo ga'me nauategaĝa da'me jajoya'agueta gaa'me 'yaĝaicachidi nataq'aen ena'uaque jogaa'me Israel laje'pi: qama'le cha'li jayem oquegue da'me jetaque 'ñonaĝachigui ñe'me Jaliaĝanec jo'ne mach'e Anedios.»
31Samuel male eja yoqo'cha, qama'le equegue joñe'me Saúl qaedi 'nonaĝachigui ñe'me Jaliaĝanec.
32Yem da'me dojo', qama'le Samuel eetac:
«Anaviquiquena ga'me Agag, jo'ne lejaliaĝane'j gaa'me Amalec laje'.»
Qama'le joñe'me Agag qoyen dajoya'aguet ñe'me Samuel. Ñe'me Agag yataqachiñe matacolec: uenate'ta da'me joote yem ga'me nalada't qama'le etapega ja qoyalat. 33Qalaĝaja Samuel enaac:
«Da'me am jalcote dia'me Israel laje'pi 'me aualatec ga'me adedaĝanaĝat, qama'le gaa'me yauo' nayi qa'a qaya'te c'oĝo't. Qama'le nach'e ena'am jaga'me adat'e, male qaya nayi ga'me mach'e c'oĝot.»
Qama'le nach'edi ua'a di'me Guilgal da'me qodajoya'aguet ñe'me Jaliaĝanec, ñe'me Samuel yichaqatapiye, en mach'e lael di'me Agag.
34Yem da'me dojo', Samuel 'viyelaĝague di'me Ramá, nataq'aen Saúl nach'e ena'am queuo, dajoyi di'me 'lachaqa' jo'ne Guibeá. 35Qama'le Samuel ja yitaĝa yauana ñe'me Saúl, temaq'aen da'me noyetapelegue joñe'me. Qama'le ñe'me Jaliaĝanec totelegue queda'me en ñe'me Saúl da'me en lejaliaĝane'j gaa'me Israel laje'pi.
ప్రస్తుతం ఎంపిక చేయబడింది:
1 Samuel 15: TDO
హైలైట్
షేర్ చేయి
కాపీ
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.
