1 Samuel 12
12
Da'me 'laqatac ñe'me Samuel ca'li yanem da'me nejaliaĝa ñe'me Saúl
1Yem da'me dojo' qama'le Samuel yitaĝa dojapegue'to jogaa'me Israel laje'pi, eetac:
«Ami qa'a auañiya da'me ami ñaquiaĝanalo yema ga'me jo'ne aviyaĝañiyaque ca'li, qama'le joote ja'uo jena'me adejaliaĝanequi. 2Chane'eja, nach'ena jena'me jenjo' adejaliaĝanequi jo'ne adajoĝola' nayi. Da'me jayem, joote nayi jayem 'yaĝaicachigui nataq'aen male yapagaq jena'me yayoĝot, nataq'aen jogaa'me yalaqa joote ami uetauelo. Chiyoqo'teguet da'me jayem nejoqolec chayovida'a nayi, nach'e jayem jo'ne auajoyita'ye. 3Naqayem male joueta'ñena nayi: ¿qo'li jecachiya ca'li joga'me uaca uotaĝa ajena jo'ne mach'e aloyi? Uotaĝa ¿qo'li 'uo joga'me ja jodinac, uotaĝa je'etec ga'me ja no'en, uotaĝa ja'uo lajo'vi ca'li qaedi jotauan joga'me? Qom naq'aeta, qama'le 'noota ta'le jayem a'uaĝachiyem nayi, nataq'aen auechoĝochiyem joñe'me Jaliaĝanec Dios choqoñe'me adejaliaĝanequi jo'ne mach'e liquiyac joñe'me, qama'le jayem jejeten nayi yema joga'me ñep'iayaĝac.»
4Qalaĝaja jogaa'me 'yadeteguet:
«Ja jauanaĝa ta'le ja qo'mi 'te auodina'ape, uotaĝa ta'le qo'mi aualate'tape, uotaĝa ta'le qo'mi auajela'y nale.»
5Qama'le 'yategueta ñe'me Samuel:
«Joñe'me Jaliaĝanec Dios choqoñe'me adejaliaĝanequi jo'ne liquiyac joñe'me, nach'eñaua jo'ne dechoqotaĝatec nayi queda'me qaya'te 'uo ga'me ja no'en ta'le jayem auepoliquilegue.»
Jogaa'me enapega't:
«¡Yataqata eja!»
6Chane'eja Samuel yitaĝa dojouelo gaa'me jiyaĝadipi:
«Nach'eñe ñe'me Jaliaĝanec t'onataĝanouelo dia'me Moisés choqoñe'me Aarón, da'me naqatedegue jodia'me auachiyoĝoyegueta, yachiyoĝoteda'ña di'me Egipto. 7Chane'eja aniyamaĝacheta't, queda'me qauajoya'aguet ñe'me Jaliaĝanec, male ami ñetouenaĝanaĝaneque ena'uaque jogaa'me onaĝayaqa jo'ne ami 'yeteque joñe'me choqodia'me jo'ne auachiyoĝoyegueta. 8Ca'li di'me Jacob choqodia'me lec'oqo'tepi yec'adeta di'me Egipto, qama'le jogaa'me Egipto laje'pi e'n lelataqapi jogaa'me. Chane'eja jogaa'me doñiquetedapecot joñe'me Jaliaĝanec jouaĝat joda'me ja no'en jo'ne qo'yeteque, qama'le joñe'me yamaĝalo ñe'me Moisés choqoñe'me Aarón, jo'ne nach'ediaua naqatedegue, yachiyoĝoteda'ña di'me Egipto qama'le yaneda'ña jena'me jenjo' e'n 'lachaqa't. 9Qalaĝaja yem da'me dojo', jodia'me yapalaĝateteda'a ñe'me Jaliaĝanec mach'e Nedios. Chane'eja joñe'me yanem da'me lañoqotaĝanaĝac ñe'me Sísara jo'ne lajoĝola't gaa'me nalada't lo'ol jo'ne t'onataĝade'uo ñe'me lejaliaĝanec di'me noic Hasor, qaedi deloi'ye'to jogaa'me Israel laje'pi. Nach'e ena'am ñe'me Jaliaĝanec yanema da'me lañoqotaĝanaĝa'j jogaa'me filisteopi choqoñe'me lejaliaĝanec di'me Moab. 10Qalaĝaja yitaĝa jogaa'me yateto'n queda'me yauote da'me ja no'en da'me queda'e ñe'me Jaliaĝanec, 'nonaĝachedigui ñe'me Baal chaqañe'me Astarté,#12:10 Baal chaqañe'me Astarté: ñaa'me qop'iyapegalo gaa'me Canaán laje'pi jo'ne yanema ga'me uotep, ga'me noqopich'i nataq'aen da'me nec'oĝochiyaĝac. Auec'aten 1 Samuel 7:3,4. qama'le yitaĝa nachoĝodetot joñe'me Jaliaĝanec, enaa'j: “Qo'mi aue'uolo'te jouaĝat gaa'me qadaute'upi jo'ne qo'mi nejaliaĝatetapelo'te. Qo'mi avichoĝode'n, qaedi yitaĝa jenaĝa onolec da'me am qa'nonaĝachigui.”
11»Chane'eja ñe'me Jaliaĝanec yamaq di'me Jerubaal,#12:11 Jerubaal: auec'aten Jueces 6:32. Barac,#12:11 Barac: da'me hebreo 'laqatac eetojo' Bedán. Auec'aten Jueces 4:6. Jefté#12:11 Jefté: auec'aten Jueces 11:29. nataq'aen da'me jayem Samuel#12:11 Samuel: auec'aten 1 Samuel 3:20. qaedi ami de'uolo'te queda'me ami nejaliaĝatetapelo'te jogaa'me adaute'udi'. Qama'le eja yitaĝa auaqanachichi da'me ami machidiñe q'ae'n joga'me oñita'ña. 12Qalaĝaja mane'e da'me auañiya ñe'me Nahas, lejaliaĝane'j gaa'me Amón laje'pi, da'me jetaque ami quiiñguilo, qama'le jayem auojiyapegue' qaedi ja'uo ga'me adejaliaĝanequi jo'ne ami yelolo'te. Qalaĝaja nach'eñe ñe'me Jaliaĝanec Dios mach'e Adejaliaĝanequi. 13Chane'eja da'me dojo' jiyaĝaua mach'e adejaliaĝanequi jo'ne adiquiyaqui, qa'a ñe'me Jaliaĝanec Dios joote ami yanema ga'me adejaliaĝanequi jo'ne aviyaĝañitaque. 14Da'me ami, qom adoqopichiya nataq'aen auoqochiiya ñe'me Jaliaĝanec Dios, nataq'aen da'me anaquiaĝañiya da'me lajamaĝa, qom ja a'uotañi' jodaa'me lamajoĝonaĝaco, qom da'me ami choqoñe'me adejaliaĝanequi jo'ne ami yelolo'te yataqata auauoyi ga'me jo'ne yepaquetapega ñe'me Jaliaĝanec Dios, qama'le 'noota ga'me ayi'tague. 15Qalaĝaja qom ja auoqochiiya joñe'me, maq joda'me a'uotañi' naa'me lamajoĝonaĝaco, qama'le ñe'me qa'a ya'uo ga'me ane'uaĝanaguequi, ena'am da'me ye'uaĝa'n ca'li jogaa'me auachiyoĝoyegueta. 16Chane'eja, cha'li ovi'tena, qama'le auañiya ga'me yataqachiñe p'ajaye 'lanec ñe'me Jaliaĝanec jo'ne ami yaloĝonalo. 17Qa'a nayi queda'me yovita da'me laloqo' da'me naqataĝanaĝac male qonapoc ga'me trigo, qama'le ja uotep. ¿Qo'li ja naq'aeta? Qalaĝaja cha'li ñachoĝodenot ñe'me Jaliaĝanec qaedi namaĝaquena da'me ne'uanaĝañe ga'me qajoĝonaĝa choqoga'me uotep. Chane'eja male auayachiñe queda'me ja no'en ga'me ami yec'ateneque ñe'me Jaliaĝanec, ca'li aviyaĝañiyaque ga'me adejaliaĝanequi.»
18Qampaja'a Samuel yiyaĝanot ñe'me Jaliaĝanec, qama'le joñe'me paja'a da'me en ne'uanaĝañe ga'me qajoĝonaĝa nataq'aen ga'me uotep, qama'le gaa'me jiyaĝadipi yataqachiñe jalcote da'me loqolanaqa', t'oita ñe'me Dios choqoñe'me Samuel.
19Chane'eja ena'uaque dojedapegue' ñe'me Samuel, enaa'j:
«Anachoĝodenot ñe'me Jaliaĝanec jo'ne Anedios, qo'mi aualoĝonataĝalo'te jo'ne qo'mi adalemaĝaje'te, qaedi ja qademichiñe qadeleu. Qa'a ena'uaque ñichigaĝataĝaye ga'me qadoec queda'me jiyaĝanaqataque qadejaliaĝanec.»
20Qama'le Samuel 'yategueta:
«Ena'te at'oiyi: yataqata eja queda'me ami yataqachiñe ja no'en da'me auauoyi, qalaĝaja nayi ena'te oquiya'e ñe'me Jaliaĝanec, maq joda'me nach'e eta't a'nañaĝachela't da'me auomachiiya joñe'me. 21Ena'te oquiyeguelo jogaa'me qop'iyapegalo jo'ne ja ejoda, jo'ne ja yaqanate't ta'le ami lecochiyalo nataq'aen ja ami 'te nec'alaĝatedegue, qa'a yataqachiñe ja ejoda. 22Qalaĝaja joñe'me Jaliaĝanec qamqa'me ja ami 'te yegue'm, qa'a joñe'me jetaque yataqachiñe ami lec'oqo'tepi, qaedi nach'e eta't qo'nonaĝachigui da'me lenaĝat. 23Da'me jayem, 'noota qom ñe'me Jaliaĝanec jayem yejoye qaedi ja ja'uo 'te yoec, qaedi ja jaĝañi da'me ami ñetamelo'te. Qama'le nayi, ami japaĝagueneque ga'me jo'ne 'noota nataq'aen ga'me chimaqachiñe. 24Ami qa'a onolec da'me auachiquiya'a ñe'me Jaliaĝanec nataq'aen da'me nach'e eta't a'nañaĝachela't da'me auomachiiya joñe'me. Nach'e eta't auenache'talo gaa'me qayoĝode' 'lonataqa jo'ne ami yaloĝonalo. 25Qalaĝaja qom jetaque aueñi da'me ja no'en auauoyi, qama'le da'me ami choqoñe'me adejaliaĝanequi ami qoyolaĝachiguilo qomle.»
ప్రస్తుతం ఎంపిక చేయబడింది:
1 Samuel 12: TDO
హైలైట్
షేర్ చేయి
కాపీ
Want to have your highlights saved across all your devices? Sign up or sign in
Biblia en Toba del Oeste © Sociedad Bíblica Argentina, 2014, 2019.
