Ubwandilo 12
12
Kyala ikummbilikila Abụlamụ
1Po papo Kyala alinkummbūla Abụlamụ alinkuti: Usōkemo nkị̄su kyako, na mmbakamụgo na nnyụ̄mba ja gūso, ubūkege kukị̄su iki nịkukunāngisyaga. 2Nịsakukupelaga ukuja kikolo ikikulūmba, kangi nịsakukusajaga ugwe nukujīmika īngamụ jāko; kwịsakujaga lusajo. 3Nịsakubasajaga aba bịkukusaja ugwe nukubagụna aba bịkukugụna ugwe; ifịkolo fyosa ifya nkị̄su bịsakusajilịgwaga mụmmyako.
4Buno Buno Abụlamụ alinkusụmụka ukubūka bo mụmo UNTWA ālimmbūlị̄le; Lotị jōpe alinkubūka nagwe, Umwene Abụlamụ bo ịkusōkamo mụ Halanị, āli gwa fyinja amalōngo mahāno na mabili ni fyinja fịhāno (75). 5Abụlamụ alinkusụmụka na Salai unkasị, kangi na Lotị umwana gwa nnụgụna, ni fyuma fyabo fyosa ifị bākabịle; kangi na babōmbị bāke aba āli nabo nkị̄su kya Halanị; balinkusụmụka ukubūka kukị̄su kya Kanānị. 6Abụlamụ alinkwenda nkị̄su kyosa kila alinkwakufịka pabujo ubwịkemo bwa mụ Sekemu pa mpịkị, umpāndapānda ugu gwali mụ Mole. 7UNTWA alinkunsetukila Abụlamụ alinkuti: Ndupēle ulujụ̄ngụ lwako ikị̄su iki. Po lelo pabujo bulabula Abụlamụ alinkunnjēngela UNTWA, uju ālinsetukị̄le, ikigemo kya kwịkemēkesyapo. 8Ukufụma palapala Abụlamụ alinkusāma ukubūka nkị̄su kya mfyamba iki kili kubusōkelo ku Betelị, ko alinkukoma īhēma jāke, pakati pa Betelị na Ai, ājīla kulubafụ lwa kubujōngelo ilịsuba, Ai kubusōkelo. Pala pala pōpe alinkujenga ikigemo kya kwịkemēkesyapo, alinkwịpụ̄ta ku Malafyale. 9Umwene Abụlamụ alinkōngelapo ukwenda ukubūka kwịtōngo.
Abụlamụ nkị̄su kya Mwegịpịtị
10Injala ingulūmba jilinkugwa nkị̄su kila kila, mụ Kanānị, po Abụlamụ alinkusụlụka ukubūka nkị̄su kya Mwegịpịtị, namānga injala jāli ngali fị̄jo. 11Lelo bo ịkuja pakwịngila nkị̄su kya Egịpịtị, alinkummbūla unkasị Salai alinkuti: Mmēnye ukuti ugwe uli nkị̄kulu nnụnụ pakukukēta. 12Lelo linga abāndu ba nkị̄su kya Egịpịtị bakubwene bịsakutigi; uju jo nkasị gwake; buno buno bịsakūngogaga une, lolị bịsakukulekaga ugwe ukuti bakwegege. 13Lolị ugwe ukatigi uli ịlūmbu gwangu, ko kuti bakānyāmbililege kanụnụ pa nōngwa jāko ugwe; nukuti ngapone ukugogịgwa pa panōngwa jāko. 14Bo Abụlamụ afịkịle Mwegịpịtị, ab'Egịpịtị, balinkwaga ukuti unkị̄kulu jula nnụnụ nalolị. 15Abēne abankitāngalala ba Falao bo bammbwene Salai balinkwakumpāngila Falao ubunụnụ bwa Salai. Po balinkuntwala Salai kunyụ̄mba ja Falao. 16Alinkummbōmbela inụnụ Abụlamụ pa nōngwa ja Salai. Alinkumpa ing'ōsị ni ng'ōmbe ni mbụ̄nda īnyāmbala ni ngị̄kulu na babōmbị abanyambala na bakị̄kulu, kangi ni ngamịla.
17Lolị UNTWA alinkumfụ̄nda Falao ni mbūngo imbị̄bị fị̄jo pamopēne na bannyụ̄mba jāke pa nōngwa ja Salai, unkasị gwa Abụlamụ. 18Po papo Falao alinkummbilikila Abụlamụ alinkunndālūsya alinkuti: Fịkị umbōmbị̄le sịsịsị? Nōngwa ja fịkị ukāmbūlaga ukuti uju nkasịgo? 19Nōngwa ja fịkị gwajobaga ukuti ịlūmbugo? Linga gwajobịle ukuti nkasịgo angali ngammwega ukuja nkasị gwangu. Ele unkasịgo ujo mmwege sōkapo nagwe. 20Po papo Falao alinkunsōsyamo nkị̄su alinkubatuma abāndu bāke ukwakunsịndikila ku njila jūjo pamopēne nu nkasị nifị̄ngị fyosa ifị āli nafyo.
ప్రస్తుతం ఎంపిక చేయబడింది:
Ubwandilo 12: NYB96
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Nyakyusa Bible © Bible Society of Tanzania, 1996.
