Génesis 46
46
Jacobwan ayllunwan ima Egiptoman ripunku
1Jinamanta Jacobqa tukuy imanta apariykukuspa, purirerqa. Bersebaman chayaspataj, uywa ñak'asqata q'olacherqa tatan Isaacpa Diosninman jaywananpaj. 2Chantá chay ch'isi Dios mosqoypi jina sutinmanta wajyaspa, Israelwan parlarqa: Jacob, Jacob, nispa. Paytaj kuticherqa: Kaypi kashani, nispa.
3Chantá Dios payta nerqa: Noqa Dios kani, tataykej Diosnin. Egiptoman riyta ama manchachikuychu. Chaypi mirayniykita mirachispa, noqa ashkha runayoj jatun suyuman tukuchisqayki. 4Noqamin qanwan Egiptoman risaj, noqallataj mirayniykita orqhospa, paykunata kayman kutichimusaj. Chantá Egiptopi wañupojtiyki, Joseqa qayllaykipi kanqa ñawiykita wisq'ananpaj, nispa.
5Chaymanta Jacobqa Bersebamanta purirerqa. Paypa churinkuna tatankuta, wawankukunata, warminkukunata ima faraonpa apachimusqan carretakunaman wicharicherqanku, paykunata Egiptoman pusakapunankupaj. 6Ajinata Jacob, chantá tukuy ayllunwan Egiptoman riporqanku. Jinallataj wakankukunata, ovejankukunata, Canaanpi kashajtinku imankuchá tiyaporqa, chaykunatawan apakaporqanku. 7Jinallataj tukuy churinkukuna, ususinkukuna, tukuy allchhinkukuna ima paywan Egiptoman riporqanku.
8Israelpa churinkuna Egiptoman ripojkunamanta kaykuna karqanku: Jacobpa kuraj kaj churin Rubén, 9Rubenpa churinkunataj karqanku: Janoc, Falú, Jesrón, Carmi ima.
10Simeonpa churinkuna karqanku: Jemuel, Jamín, Oad, Jaquín, Sojar, Saúl ima. Saultajrí Canaán llajtayoj warmej churin karqa.
11Levijpata churinkuna karqanku: Gersón, Coat, Merari ima.
12Judáj churinkunataj karqanku: Er, Onán, Sela, Fares, Seraj ima. Erwan, Onanwanqa Canaanpi wañorqanku. Farespa churinkunatajrí karqanku: Jesrón, Jamul ima.
13Isacarpa churinkuna karqanku: Tola, Fuvá, Job, Simerón ima.
14Zabulonpa churinkunataj karqanku: Sered, Elón, Yajelel ima.
15Chaykuna karqanku Padán Arampi kashaspa, Jacobqa warmin Leawan rejsisqan churinkuna, Dina ususinwan ima. Tukuyninpi kinsa chunka kinsayoj qharikuna, chantá warmikuna ima karqanku.
16Gadpa churinkuna karqanku: Zefón, Jaguí, Ezbón, Suni, Eri, Arodi, Areli ima.
17Aserpa churinkunataj karqanku: Imna, Isúa, Isúi, Beria ima, chaykunaj panankutaj Seraj karqa. Beriaj churinkunarí karqanku: Jéber, Malquiel ima. 18Chaykuna Zilpaj wawankuna Jacobpaj karqanku. Zilpaqa Leajta warmi kamachin karqa. Labanqa Zilpata ususin Leaman qosqa. Tukuyninpi chunka sojtayoj karqanku.
19Jacobpa warmin Raquelpi churinkuna iskaylla karqanku: Josewan, Benjaminwan ima. 20Josejta warmin Asenatpi rejsisqan churinkuna iskayllataj karqanku: Manaseswan, Efrainwan ima. Paykuna Egiptopi paqarerqanku. Joséj warmin Asenatqa Onmanta sacerdote Potiferaj ususin karqa. 21Benjaminpa churinkunarí karqanku: Bela, Bequer, Asbel, Gera, Namán, Ehí, Ros, Mupín, Jupín, Ard ima. 22Chaykuna Jacobpa warmin Raquelpa churinkunamanta mirajkuna karqanku. Tukuyninpi chunka tawayoj karqanku.
23Danpa churenqa Jusín karqa.
24Neftalijpata churinkunataj karqanku: Yajesel, Guni, Yézer, Silén ima. 25Chaykuna Bilajta Jacobpaj rejsisqan wawankuna karqanku. Bilaqa Raquelpa kamachin karqa, payta tatan Labán kamachin kananpaj qosqanrayku. Tukuyninkupi qanchis karqanku.
26Jacobwan Egipto suyuman rejkuna sojta chunka sojtayoj karqanku, chay karqa churinkunaj warminkuta mana yupaspa. 27Josejpa churinkuna Egiptopi paqarejkunataj iskay karqanku. Ajinamanta Jacobpa ayllun Egiptoman yaykojkuna tukuyninpi qanchis chunka karqanku.
28Ñanllapiraj kashajtinku, Jacobqa churin Judata ñawpacherqa Joseman willamunanpaj Gosén chaynejman taripaj jamunanpaj. Gosén chaynejman chayajtinkutaj, 29Joseqa Gosenman tatanta taripaj rinanpaj carretanta wakichipunankuta kamacherqa. Chantá José tatanwan tinkuspa, ojllaykorqa, tatan ojllarisqataj unayta waqarqa. 30Chantá Israelqa Joseta nerqa: Kikin ñawiywan rikukapuyki, kawsashajtataj tarikapuyki. Kunanqa sonqo junt'asqa wañupuyta atini, nispa.
31Chaymanta José wawqenkunata, chantá tatanpa ayllunta ima nerqa: Faraonman rispa, willamusaj: Canaanmanta wawqeykuna, tataypa ayllun ima noqawan tiyakoj jamunku. 32Paykunataj wakankuta, ovejankuta, tukuy imankutawan apamunku, imaraykuchus uywata uywaspa kawsaj kanku, nispa. 33Maypachachus faraón wajyaspa, tapusonqachej: Imatataj ruwayta yachankichejri? nispa, chaypacha 34qankuna ninkichej: Noqaykoqa ñawpa tataykukuna jina uywata uywaspa kawsayku, nispa. Ajinamanta qankuna Gosenpi tiyakunkichej, imaraykuchus Egipto llajtayojkunaqa ovejata michejkunata chejnikunku.
ప్రస్తుతం ఎంపిక చేయబడింది:
Génesis 46: DQPC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Revisión Biblia Quechua Boliviano © Sociedad Bíblica Boliviana, 2017.
