Génesis 43
43
Benjaminta Egiptoman pusanku
1Chaywanpis Canaanpi yarqhayqa mana awantay atina jinaña karqa. 2Chayrayku Jacobpa churinkuna Egiptomanta trigota apasqanku tukukapojtinña, Jacob paykunata nerqa: Ujtawan Egiptoman rispa, mikhunanchejpaj trigota rantimullaychejtaj ari, nispa.
3Judatajrí nerqa: Ña niykuña, chay wiraqocheqa sut'ita niwasqaykuta. Pay niwarqayku: Sichus sullk'aykichejta mana pusamuwankichejchu chayqa, ama kutimuwankichejchu, nispa. 4Sichus Benjaminta pusajta saqewasqayku chayqa, rispa, trigota rantimusqayku. 5Manapunichus munanki chayqa, mana riykumanchu, imaraykuchus chay runa sut'ita niwarqayku: Manachus sullk'aykichejta pusamuwankichej chayqa, ama kutimuwankichejchu, nispa.
6Chantá Jacob, pichus Israel sutiyojllataj karqa, chay nerqa: Imaraykutaj kay jinata llakichiwankichejri? Imapajtaj chay runaman sullk'aykichej kasqantaraj willarqankichejri? nispa.
7Paykunataj kuticherqanku: Chay runa noqaykumanta chantá ayllunchejmanta anchata tapuwarqayku: Tataykichej kawsashanrajchu? Wawqeykichej ujwanpis kanrajchu? nispa. Noqaykurí tapuwasqaykuman jina kuticherqayku ari. Imaynatataj yachaykuman karqa ninawaykuta: Sullk'aykichejta pusamuychej, nispari?
8Chantá Judañataj tatan Israelta nerqa: Noqa Benjaminmanta cuentayoj kasaj, kachallay ari. Kunanpacha mikhunata rantej puririsqayku, ama qan, ni noqayku, nitaj wawaykukunapis yarqhaymanta wañunanchejpaj. 9Noqa paymanta cuentallikusaj. Imapis kajtenqa, noqamanta cuentata mañawanki. Manachus pachanta chayachimpusqayki chayqa, noqata wiñaypaj juchachawanki. 10Sichus qan mana jinata jark'akuwaj karqa chayqa, rispa jamuspa, iskay kutitaña chayamuykuman karqa, nispa.
11Chaymanta tatanku Jacob nerqa: Imanasuntaj. Jina kanan kajtenqa, kayta ruwaychej: Kaypi sumajnin kajmanta costalman churaspa, chay runaman jaywarinaykichejpaj apaychej: Uj chhika balsamota, uj chhika abeja misk'ita, sumaj q'apashaj jawinata, mirrata, nuezta, chantá almendrata ima. 12Qolqetapis uj jinatawan apaspa, chantá costalniykichejpi tarisqaykichej chay qolqeta ima, pay kikinmanpuni jaywankichej. Ichapis pantaspa churaykunkuman karqa. 13Benjamintapis pusallaychejtaj. Chantá usqhayta rispa, chay runawan tinkumuychej. 14Tukuy Atiyniyoj Diostaj chay runaj sonqonta llamp'uyachichun, qankunamanta khuyarikunanpaj. Ajinamanta qhepakoj wawqeykichejta, chantá Benjaminta ima kacharimponqa. Noqarí, sichus mana wawayoj qhepakunay kashan chayqa, jina mana wawayoj qhepakusaj, nispa.
15Chantá Jacobpa churinkuna waqeta apariykukuspa, qolqetapis uj jinatawan aparqanku. Benjamintawan pusariykukuspataj, Egiptoman purirerqanku. Chayman chayaspataj, Josejpaman rerqanku. 16Joserí sullk'an Benjamín paykunawan kashasqanta rikuspa, mayordomonta nerqa: Kay runakunata wasiyman pusay, chantá uj wakata ñak'aspa wayk'uchiy, imaraykuchus paykunaqa kunan chawpi p'unchayta noqawan mikhonqanku, nispa.
17Mayordomoqa Joséj nisqanman jina kikinta ruwarqa, jinataj Joséj wawqenkunata Josejpa wasinman pusarqa. 18Mayordomo paykunata Joséj wasinman pusashajtin, paykuna mancharikorqanku, ninakorqankutaj: Kay runaqa kutichipuwasqanchej qolqenmanta wasinman pusashawanchej. Kunantaj wata runanta jina jap'iwasunchej, burronchejkunatapis jap'ikapullanqataj, nispa.
19Jinapi wasi punkuman qayllaykushaspa, Joséj mayordomonta parlapayarqanku: 20Wiraqochíy, unayña trigota rantikoj jamorqayku. 21Kutipushaspataj, tambopi uj ch'isita puñorqayku. Chantá costalniykuta qhawaykuspa, sapa uj trigomanta pagasqayku qolqeta tarikaporqayku. Chayta kunan apamporqayku. 22Kunan trigota rantikunaykupajqa waj qolqetapis apamullaykutaj. Noqayku mana yachaykuchu pichus chay qolqeta costalniykuman churaykusqanta, nispa.
23Mayordomotajrí kuticherqa: Ama manchachikuychejchu. Diosniykichej, tataykichejpa Diosninchari chay qolqeta costalniykichejman churaykorqa. Noqarí pagasqaykichej qolqetaqa jap'erqani, nispa. Chayta niytawantaj, mayordomoqa Simeonta carcelmanta orqhomuspa, paykunaman pusamorqa. 24Jinaspataj, tukuyninkuta Josejpa wasinman pusaykorqa. Chantá chakinkuta mayllakunankupaj yakuta jaywarqa, burronkukunamanpis qarallarqataj. 25Josejpa wawqenkunataj waqeta apasqankuta wakicherqanku, chawpi p'unchayta José chayamojtin, jaywanankupaj, imaraykuchus yacharqanku chaypi paykunawan mikhunanta.
26José chayamojtin, paykuna pampakama k'umuykuspa, napaykorqanku, chantá waqe apasqankuta jaywarqanku. 27Josetaj paykunata taporqa: Imaynataj kashankichej, walejllachu? nispa. Chaymanta tapullarqataj: Machituña niwarqankichej chay tataykichejrí, imaynataj kashanri? Kawsakushanrajchu? nispa. 28Paykunataj k'umuykuspa, nerqanku: Tataykoqa walejlla kakushan. Kawsakushanraj, nispa.
29Chantá José muyuyninta qhawarispa, Benjaminta rikorqa, piwanchus uj mamayoj, uj tatayojlla karqanku, chayta. Chantá nerqa: Kaychu sullk'aykichejqa, pimantachus willawarqankichej, chay? Wawáy, Tata Dios yanapasuchun, nispa. 30José sullk'anta rikukapuspa, yaqhapuni waqaywan atipachikorqa, imaraykuchus kusiymanta sonqon wawayarqa. Chayrayku usqhayllata puñunan cuartoman yaykuspa, waqarikorqa. 31Sonqon tiyaykojtintaj, uyanta mayllarqokuytawan, llojsimorqa. Chantá kamachinkunata nerqa: Mikhunata qarallaychejña, nispa.
32Josepaj waj mesapi mikhunata churarqanku, wawqenkunapajtaj waj mesapi. Egipto llajtayojkunapajrí mikhunata waj mesaman churapullarqankutaj, imaraykuchus paykunaqa hebreokunawan khuska mana mikhuyta munajchu kanku. Egipto llajtayojkunapaj hebreokunawan khuska mikhoyqa mana allinpajchu qhawasqa karqa. 33Josetajrí wawqenkunata kurajmanta sullk'aman jina tiyaracherqa. Paykunataj ujkuna ujkuna qhawanakuspa, mancharisqa t'ukusharqanku. 34Josetaj mikhunata jaywasqankumanta tukuyninkuman jaywacherqa. Benjaminmanrí uj phishqa jinatawan astawan yapasqata jaywarqa. Jinata José wawqenkunawan khuska manchay kusisqa mikhorqa, ujyarqa ima.
ప్రస్తుతం ఎంపిక చేయబడింది:
Génesis 43: DQPC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Revisión Biblia Quechua Boliviano © Sociedad Bíblica Boliviana, 2017.
