Mateo 11
11
Yohane Baptisilɔ ɔ tsɔ kɛ ba Yesu ngɔ
(Luka 7.18-23)
1Nɛ e ba mi kaa, benɛ Yesu to e kaseli nyɔngma kɛ enyɔ ɔ blɔ nya ta a, e je lejɛ ɔ nɛ e ya tsɔɔ ni nɛ e fiɛ ngɛ a ma amɛ a mi. 2Jeha nɛ ɔ benɛ Yohane nu Kristo ni tsumi ɔmɛ a he ngɛ tsu ɔ mi ɔ e tsɔ e kaseli ɔmɛ ekomɛ, 3nɛ a ba bi lɛ ke: “Anɛ mo ji nɔ nɛ ma a, aloo waa hyɛ nɔ kpa ko blɔ?” 4Nɛ Yesu he nɔ nɛ e de mɛ ke: “Nyɛɛ ya nɛ nyɛ ya sɛɛ ha Yohane nɔ nɛ nyɛ ngɛ nue kɛ nɔ nɛ nyɛ ngɛ hyɛe nɔ; 5hɛyuyuili ngɛ nɔ hyɛe, nɛ ninɛmɛ nɛ a hule ɔ ngɛ nyɛɛe; tsitsɛmɛ a he ngɛ tsɔe, nɛ otokuli ngɛ nɔ nue; ni gbogboehi ngɛ si tee, nɛ ohiafo ɔmɛ ɔ, a ngɛ Sane Kpakpa a fiee kɛ ngɛ mɛ tsɔɔe? 6A gbaa nɔ tsuaa nɔ nɛ ye he sane be e nane kpatae.”
Yesu ye Yohane he odase
(Luka 7.24-35)
7Benɛ Yohane kaseli ɔmɛ yaa a, Yesu bɔni Yohane he munyu tumi kɛ ngɛ nihi babauu ɔ tsɔɔe ke: “Mɛni nyɛ ho hyemi ya ngɛ nga a nɔ ɔ? Gla nɛ kɔɔhiɔ mimiɛɛ ɔ lo? 8Aloo mɛni nyɛ ho hyɛmi ya? Nɔmlɔ nɛ woɔ tade bɔdɔɔ? Oʼɛ, nimli nɛ woɔ tade bɔdɔɔ ɔ, matsɛmɛ a wehi a mi a hii. 9Aloo mɛni nyɛ ho hyemi ya? Gbalɔ? Ee, i ngɛ nyɛ dee ke, nɔ nɛ pe gbalɔ tete. 10Ejakaa nɔ nɛ ɔ ji nɔ he nɛ a ngma ngɛ ke: ‘Oʼɛ, i ngɛ ye tsɔlɔ ɔ tsɔe kɛ sɛ o hlami, nɔ nɛ ma dla o blɔ ɔ ngɔ to mo ɔ.’ 11Niinɛ, i ngɛ nyɛ dee ke: Nihi nɛ yihi fɔ ɔmɛ a kpɛti ɔ, nɔ ko ti si hyɛ nɛ pe Yohane, Baptisilɔ ɔ; se kɛ ɔ, nɔ nɛ ji nyafii kulaa ngɛ hiɔwe matsɛ yemi ɔ mi ɔ pe lɛ. 12Se kɛ je Yohane Baptisilɔ ɔ yi nɔ kɛ ma nɛ ɔ, pani nya a ngɔɔ hiɔwe matsɛ yemi ɔ, nɛ hewali sãa lɛ he wami nya. 13Se gbali ɔmɛ tsuo kɛ Mlaa a gba kɛ ba su Yohane nɔ. 14Nɛ ke nyɛ suɔ kaa nyɛ maa hɛɛ mi ɔ, nɔ nɛ ɔ ji Elia nɛ maa ba a nɛ. 15Nɔ nɛ ngɛ tue nɛ e kɛ maa nu ɔ, e nu!
16“Se mɛni he ma ngɔ kikɛmɛ a yi nɔ bi nɛ ɔmɛ ngɔ to? A ngɛ kaa jokuɛwi nɛ hii si ngɛ jua nɔ nɛ a tsɛɛ a huɛmɛ ke: 17‘Wa kpã bɛ ha nyɛ, nɛ nyɛ dui; wa je ya ha nyɛ, nɛ nyɛ fo we.’ 18Ejakaa Yohane ba nɛz e yi ni nɛ pohu e nui nɔ́ ko, nɛ a de ke: ‘Mumi yayami ngɛ e mi.’ 19Nɔmlɔ Bi ɔ ba nɛ e yeɔ ni nɛ jeha nɛ e nuu nɔ ko ɔ, a de ke: ‘Oʼɛ, nyumu jiklɔɔtsɛ kɛ da nulɔ onia tsuli kɛ yayami peeli a huɛ ɔ ji nɛ ɔ nɛ!’ Nɛ a bu Nawu ni lemi ɔ bemi ngɛ e ni tsumi ɔmɛ a nya.”
Mahi nɛ he we yi ɔ
(Luka 10.13-15)
20Kɛkɛ nɛ e bɔni mahi, hehi nɛ e tsu e he wami ni tsumihi babauu titli ngɛ ɔ a hɛ mi kami akɛnɛ a tsakee we a tsui ɔ, nɛ e ke: 21“Musu tloo mo, Korazin! Musu tloo mo, Betsaida! Ejakaa he wami ni tsumihi nɛ a tsu ngɛ nyɛ mi ɔ, a na nɛ a tsu ngɛ Tiro kɛ Zidon jinɛ a tsake a tsui ngɛ kpekpe kɛ lazu mi momoomo. 22Se i ngɛ nyɛ dee ke, e be wae ha Tiro kɛ Zidon ngɛ kojomi ligbi ɔ nɔ kaa nyɛ. 23Nɛ mo Kapernaum, pi hiɔwe lokoo nɛ a wo o nɔ kɛ su? Gbeje lokoo a maa ba mo si kɛ maa ya; ejakaa he wami ni tsumihi nɛ a tsu ngɛ o mi ɔ, a na nɛ a tsu ngɛ Sodom jinɛ e maa si kɛ ba su mwɔ nɛ ɔ. 24Se i ngɛ nyɛ dee ke, e be wae ha Sodom zugba a ngɛ kojomi ligbi ɔ nɔ kaa mo Kapernaum.”
Nyɛɛ ba ye ngɔ nɛ ma ha nyɛɛ jɔɔ hyɛ he
(Luka 10.21-22)
25Jamɛ a be ɔ mi ɔ, Yesu he nɔ nɛ e de ke: “I ngɛ o yi jee, Tsaatsɛ, hiɔwe kɛ zugba nyɔmtsɛ, kaa o ngɔ ni nɛ ɔmɛ ngɔ laa ga leli kɛ ni leli, nɛ o je tsɔɔ bimwɔwi; 26Ee, Tsaatsɛ, bɔ nɛ sa o hɛ mi ji ja.
27“Tsaatsɛ tu nihi kulaa ngɔ wo ye dɛ mi; nɛ nɔ ko nɔ ko li Bi ɔ, kaa ja Tsɛ ɔ kɛkɛ; jeha nɛ ɔ, nɔ ko nɔ ko li Tsɛ ɔ, kaa ja Bi ɔ, kɛ nɔ nɛ Bi ɔ suɔ kaa e je lɛ kpo ngɔ tsɔɔ ɔ.
28“Nyɛɛ ba ye ngɔ, nyɛ nihi tsuo nɛ pɔ tɔ nyɛ nɛ nyɛ tlomihi pã nyɛ ɔ, nɛ ma ha nyɛ he jɔmi? 29Nyɛ wo ye kuɛpã tso ɔ ngɔ fɔ nyɛ nɔ, nɛ nyɛɛ kase mi; se ye he jɔ, nɛ i baa ye he si kɛ jee ye tsui mi; nɛ nyɛ ma na he jɔmi ngɔ ha nyɛ klaa amɛ. 30Ejakaa ye kuɛpa tso ɔ tloomi wɛ, nɛ ye tlomi ɔ hu jii we.”
ప్రస్తుతం ఎంపిక చేయబడింది:
Mateo 11: DAN77
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Dangme New Testament © United Bible Societies, 1977.
