Ягья 2

Кана шегьерда мехъер

1Пуд лагьай юкъуз Галилейда авай Кана лугьудай шегьерда мехъер авай, мехъерик Исадин дидени квай. 2Мехъерик Исадиз ва Адан тилмизризни эвернавай. 3Чехир куьтягь хьайила, Исадин дидеди Адаз лагьана:

– Мехъерин иесийрихъ мад чехир амач.

4– Я диде! – лагьана Исади. – Вуна За́з вучиз лугьузва? Зи вахт гьеле атанвач.

5Адан дидеди кьилел-кӀвачел элкъведайбуруз лагьана:

– Ада квез вуч лагьайтӀани, гьам кьилиз акъуд.

6Анал чувудри чпин михьивилер авун патал яд цадай къванцин ругуд каркун алай. Абурукай гьар сад кьвед-пуд метратӀас кьван яд гьакьдайбур тир. 7Исади кьилел-кӀвачел элкъведайбуруз лагьана:

– Къванцин къапар цяй ацӀура.

Абуруни каркунар сиве-сивди ацӀурна.

8– Гила са тӀимил кьван цана, тамададин патав твах, – лагьана Ада.

Абуру тухвана. 9Тамададиз чехир цикай хьанвайди чизвачир, адаз и чехир гьинай гъайиди ятӀани чизвачир, а кар чизвайбур анжах яд къапариз цайибур тир. Чехирдин дад акуна, тамадади чамраз эверна, са патахъ тухвана.

10– Гьар са инсанди сифте хъсан чехир эцигда, – лагьана ада, – межлисдик квайбур хъвана кефина гьатайла, усал чехир гъида; амма вуна хъсан чехир икьван гагьда тунва.

11Гьа икӀ Исади Галилейда авай Кана шегьерда сифтегьан керемат-ишара къалурна ва инсанриз Вичин баркалла чирна. Адан тилмизрини Адахъ иман авуна. 12Адалай кьулухъ Иса, Адан диде, стхаяр ва Адан тилмизар Кефернагьум шегьер галайвал эвичӀна. Ана абур акьван яргъалди амукьнач.

Гуз-къачузвайбур чукурун

(МатӀай 21:12-13; Мрк. 11:15-17; ЛукӀа 19:45-46)

13Чувудрин Песагь сувар мукьва жезвай, Иса Ярусалимдиз фена. 14Ана Адаз Аллагьдин КӀвалин гьаятда яцар, хипер ва лифер маса гузвайбурни пулар дегишарзавайбур акуна. 15Исади еперикай къамчи храна, вирибур Аллагьдин КӀвалин гьаятдай чукурна – гьакӀни яцарни хипер, пул дегишарзавайбурун дезгеяр алабарна, абурун пулар чукӀурна. 16Лифер гузвайбурузни лагьана:

– Квадара абур инай, Зи Бубадин кӀвал базардиз элкъуьрмир.

17Инал Адан тилмизрин рикӀел Каламда кхьенвай ихьтин гафар хтана: «Ви кӀвалин къайгъу чӀугваз кӀанз Зи рикӀи рикӀ незва»#Забур 68:10..

18И крариз жаваб яз, чувудрин кьиле авайбуру Адаз лагьана:

– Ваз икӀ ийидай ихтияр авайди субут авун патал, чаз са керемат-ишара къалура.

19– Куьне и Аллагьдин КӀвал чукӀурайтӀа, За ам пуд йикъан къене эхциг хъийида, – жаваб гана Исади.

20Инал чувудри лагьана:

– И Аллагьдин КӀвал яхцӀурни ругуд йисуз эцигайди я, Вуна ам пуд йикъан къене гьикӀ эхцигда?

21Амма Ам Аллагьдин КӀваликай рахазвайла, Адан фикирда Вичин Беден авай. 22Ам кьена чан хтайдалай кьулухъ, Адан тилмизрин рикӀел гьа и гафар хтанай. Абур Каламдин ва Исади лугьузвай гафарин чӀалахъ хьана.

23Иса Песагь суварик Ярусалимда авайла, Ада къалурзавай керемат-ишараяр акур вирибуру Адахъ иман авуна. 24Амма Исади абурал ихтибар ийизвачир: Адаз инсанар хъсандиз чидай. 25Адаз гьар са касдин рикӀе вуч аватӀа аквазвай, Адаз масадбуру ийидай ихтилатар герек тушир.

ప్రస్తుతం ఎంపిక చేయబడింది:

Ягья 2: ЛезПК

హైలైట్

షేర్ చేయి

కాపీ