GENESIS 9
9
Ang Katipan sang Dios kay Noe
1Kag ginpakamaayo sang Dios si Noe kag ang iya mga anak, kag nagsiling sa ila, “Magmabungahon kag magbuad, kag magtugub sang duta.#Gen. 1:28. 2Ang kahadluk sa inyo kag ang kakugmat sa inyo manginsa sapat sang duta, kag sa tagsa ka pispis sang kahanginan, sa tagsa ka butang nga nagasaug sa duta kag sa tanan nga kaisdaan sang dagat; ginatugyan sila sa inyo kamut. 3Tagsa ka butang nga nagagiho nga nagakabuhi manginkalan-on ninyo; kag subong nga ginhatag ko ang gamhon nga hilaw, ginahatag ko ang tanan sa inyo. 4Apang ang unud nga may kabuhi, nga amo ang iya dugo, dili ninyo pagkaonon.#Lev. 7:26-27; 17:10-14; 19:26; Deut. 12:16, 23; 15:23. 5Kay sa pagkamatuud kinahanglanon ko ang dugo sang inyo kabuhi; sa tagsa ka sapat kinahanglanon ko ini kag sa tawo; sa tagsa ka utud sang tawo kinahanglanon ko ang kabuhi sang tawo. 6Ang bisan sin-o nga magpaagay sang dugo sang tawo,#Ex. 20:13. tungud sa tawo ang iya dugo paagayon; kay ang Dios naghimo sang tawo sa iya dagway.#Gen. 1:26. 7Kag kamo, magmabungahon kag magbuad,#Gen. 1:28. magbuad sing bugana sa duta kag magdamu sa iya.”
8Niyan ang Dios nagsiling kay Noe kag sa iya mga anak upud sa iya, 9“Yari karon, nagapakigkatipan ako sa inyo kag sa inyo mga kaliwatan sa olihi ninyo, 10kag sa tagsa ka tinuga nga nagakabuhi nga yara upud sa inyo, sa kapispisan, sa kahayupan, kag sa tagsa ka sapat sang duta upud ninyo, sa tanan nga naggowa sa arca, sa tagsa ka sapat sang duta. 11Ako magapakigkatipan sa inyo, nga indi na pagpapason ang tanan nga unud sang mga tubig sang anaw, kag wala na sing anaw nga maglaglag sang duta.” 12Kag ang Dios nagsiling, “Amo ini ang tanda sang katipan nga ginahimo ko sa tunga nakon kag ninyo kag sang tagsa ka tinuga nga buhi nga upud sa inyo, sa tanan nga palaabuton nga mga kaliwatan: 13ang akon balangaw ginabutang ko sa gal-um, kag ini mangintanda sang katipan sa tunga nakon kag sang duta. 14Kon magdala ako sing mga gal-um sa ibabaw sang duta nga ang balangaw makita sa gal-um, 15dumdumon ko ang akon katipan nga sa tunga nakon kag ninyo kag sang tagsa ka tinuga nga buhi sang tanan nga unud; kag indi na mangin-anaw ang mga tubig sa paglaglag sang tanan nga unud. 16Kon ang balangaw manginsa gal-um, magatolok ako sini kag dumdumon ko ang katipan nga dayon sa tunga sang Dios kag sang tagsa ka tinuga nga buhi sang tanan nga unud nga yara sa duta.” 17Ang Dios nagsiling kay Noe, “Amo ini ang tanda sang katipan nga natukud ko sa tunga nakon kag sang tanan nga unud nga yara sa duta.”
Ang Pagkahobog ni Noe
18Ang mga anak nga lalaki ni Noe nga naggowa sa arca amo si Sem, si Ham, kag si Jafet. Si Ham amay ni Canaan. 19Ini sila nga tatlo amo ang mga anak ni Noe; kag sa ila sini nahil-ub ang bug-os nga duta.
20Si Noe nahauna nga mangunguma. Naghimo sia sing ulubasan; 21kag nag-inum sia sing alak, kag nahobog, kag hubo sia sa sulud sang iya layanglayang. 22Kag si Ham, ang amay ni Canaan, nakakita sang kahubo sang iya amay, kag nagsugid sa iya duha ka utud sa gowa. 23Niyan nagkuha si Sem kag si Jafet sing panapton, gin-ambilay nila ini, kag nag-isol sila kag gintabonan ang kahubo sang ila amay; naliso ang ila mga nawung, kag wala nila makita ang kahubo sang ila amay. 24Sang nagmata si Noe gikan sa iya alak kag nakahibalo sang ginhimo sa iya sang iya anak nga manghud, 25nagsiling sia,
“Pinakamalaut si Canaan;
mangin-alagad sia sang mga alagad sang iya mga utud.”
26Nagsiling man sia,
“Bulahan ang Ginoo, ang Dios ni Sem;
kag mangin-alagad nila si Canaan.
27Ang Dios magpadaku kay Jafet,
kag magpuyo sia sa mga layanglayang ni Sem;
kag mangin-alagad nila si Canaan.”
28Sa tapus ang anaw nagkabuhi si Noe sing tatlo ka gatus kag kalim-an ka tuig.
29Ang bug-os nga kaadlawan ni Noe siam ka gatus kag kalim-an ka tuig; kag napatay sia.
ప్రస్తుతం ఎంపిక చేయబడింది:
GENESIS 9: ABHIL82
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Ang Biblia ©1982 Philippine Bible Society
