GENESIS 13
13
Si Abram kag si Lot Nagabulagay
1Gani si Abram nagtaklad pagowa sa Egipto pa Bagatnan, sia kag ang iya asawa, kag ang tanan nga iya, kag si Lot upud niya.
2Karon si Abram manggaranon gid sa kahayupan, sa pilak, kag sa bulawan. 3Kag nagpanlakatan sia kutub sa Bagatnan tubtub sa Bet-el, sa duug nga didto anay ang iya layanglayang, sa ulut sang Bet-el kag Ai, 4sa duug sang halaran nga ginhimo niya anay didto; kag didto si Abram nagtawag sa ngalan sang Ginoo. 5Kag si Lot man, nga nag-upud kay Abram, may mga panong kag kabakahan kag mga layanglayang, 6sa bagay nga ang duta indi makaigo sa ila nga magpuyo sila sing tingub; kay ang ila pagkabutang tama kadaku sa bagay nga indi sila makapuyo sing tingub, 7kag may kasuayon sa tunga sang mga manugbantay sang kahayupan ni Abram kag sang mga manugbantay sang kahayupan ni Lot. Ang mga Canaanhon kag ang mga Pereznon nagpuyo pa niyan sa duta.
8Niyan si Abram nagsiling kay Lot, “Magwala sing kasuayon sa tunga nimo kag nakon, kag sa tunga sang imo mga manugbantay kag sang akon mga manugbantay; kay mag-utud kita. 9Indi bala ang bug-os nga duta sa atubangan mo? Bulag ka sa akon. Kon mapawala ka, niyan ako mapatoo; kon mapatoo ka, niyan ako mapawala.” 10Kag ginbayaw ni Lot ang iya mga mata, kag nakita niya ang kapatagan sang Jordan nga nahunub sing hil-ob sang tubig, sa wala pa malaglag sang Ginoo ang Sodoma kag ang Gomorra, kaanggid sang katamnan sang Ginoo,#Gen. 2:10. kaanggid sang duta sang Egipto sa nagapakadto ka sa Zoar. 11Gani ginpili ni Lot nga sa iya ang bug-os nga kapatagan sang Jordan, kag nagpanlakatan si Lot pasidlangan; sa amo nagbulagay sila. 12Si Abram nagpuyo sa duta sang Canaan, samtang si Lot nagpuyo sa mga banwa sang kapatagan kag ginhalin niya ang iya layanglayang tubtub sa Sodoma. 13Karon ang mga tawo sa Sodoma malaut, makasasala sing lakas batok sa Ginoo.
14Ang Ginoo nagsiling kay Abram, sa tapus nga si Lot nakabulag sa iya, “Bayawa ang imo mga mata, kag lantaw gikan sa duug diin ka, paaminhan kag pabagatnan kag pasidlangan kag pakatundan; 15kay ang bug-os nga duta nga imo ginatan-aw ihatag ko sa imo kag sa imo mga kaliwatan sing dayon.#Binu. 7:5. 16Himoon ko ang imo mga kaliwatan subong sang yab-ok sang duta; sa bagay nga kon may makaisip sang yab-ok sang duta, ang imo mga kaliwatan maisip man. 17Tindug ka, latasa ang duta sa iya kalabaon kag sa iya kasangkaron, kay ihatag ko ini sa imo.” 18Gani ginhalin ni Abram ang iya layanglayang, kag nag-abut kag nagpuyo sa luyo sang terebinto sang Mamre, nga yara sa Hebron; kag sia nagtukud didto sing halaran nga sa Ginoo.
ప్రస్తుతం ఎంపిక చేయబడింది:
GENESIS 13: ABHIL82
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Ang Biblia ©1982 Philippine Bible Society
