Maqtaeq 8
8
Yeqsur, Coiqdoi Bi Shawrlar-euq
Mk 1:40-45; Lk 5:12-16
1Yeqsur, gawqjawq-anr nae zafkale ngae, tsawrhaq armaf mafma, aqyawf-euq maeqnan cantae luf-eu mae. 2Khoerngae, coiqdoi nar-eu tiq ghaq, aqyawf jawr-eu gar lar-awr, aqyawf-anr uqduq tanqtanq-aer aer-eu, “Sanqpaq-or! Nawr janrmawf nar-aq, ngar shawrlarni nawr janrnya mae.” 3Yeqsur, aqlaf cawqja-awr, khoerghaq-anr toeqciv-awr aer-eu, “Ngar janrmawf mir-a. Nawr shawrlar-awq.” Khoerngae, tiqpov taef-aer khoerghaq-euq coiqdoi nargawr shawrlar-euq mae. 4Yeqsur, aqyawf-anr aernaeq-eu, “Nawr, tiqghaq-anr-iq taq ja’naeq de-eq. Pirma jawr-eu gar le-awr, nawq-euq mawrdo-anr bi tsermr hawler-awq. Khoeruqtaf, nawr taqler-euq gar aqcawq yasiqni, Morseq nae dawq biftaq-euq lof-aer lawrnaeq-eu jeq lawrler-awq.”
Yeqsur, Guirzaq-anr Bi Taqler-euq
Lk 7:1-10
5Yeqsur, Gaqbeqneqoq-anr urler ngae, yardzoeq guirhuq tiq ghaq, aqyawf jawr-eu gar lar-awr tanqshar-eu lafkhoer 6aer-eu, “Sanqpaq-or! Ngaq-euq kuirlaf zaqkhav tiq ghaq kuirshir lafshir shir-awr, nar duidui-eu lafkhoer irkanr galuf-eu mae.” 7Khoerngae, Yeqsur, aqyawf-anr aernaeq-eu, “Ngar, aqyawf-anr lavtaq naeqle ma.” 8Khoer-anr, yardzoeq guirhuq khoerghaq heulof-aer aerkhof naeq-euq mae: “Sanqpaq-or! Nawr, ngaq-euq irkanr urle-eu gar, ngar maqgeux nya. Nawr dawq tiq dawq taef-aer ngaeq-eu khawf, ngaq-euq kuirlaf zaqkhav taqler taef-a. 9Aqjeq mirnae aernar-aq, ngar, aqcawq-euq aryaq-euq lafov jawr-awr, ngaq-euq lafov khawf guirzaq deuq jawr-eu ma. Heughaq-anr ‘Ir-awq’ laer aer ngae, aqyawf ir-awr, khoerghaq-anr ‘Lar-awq’ laer kur nar-aq, aqyawf lar-eu mae. ‘Nawr heujeq mr-awq’ laer ngaq-euq kuirlaf zaqkhav-anr aernaeq ngae, aqyawf mr-eu mae.”
10Yeqsur khoerlof-aer aer-eu gar yagaq ngae, zanq duidui ler-awr aqyawf-euq maeqnan cantae luf-eu deuq-anr heulof-aer aernaeq-euq mae: “Ngar, nawmaf-anr aqdirma-aer aernaeq nyar, Irsaqleqlav tsawrhaq-euq lafkhoer, ngar heunav nav-aer jan-eu tsawrhaq maq mawrhaw-aq. 11Ngar, nawmaf-anr par aernaeq nyar. Nanrma dovkhaeq, gakhaeq paw jawr-eu tsawrhaq ghawqmya’ni lar-awr, mqtav mirkhanq-euq lafkhoer, Aqbyaqhaq, Irtsav hawr-eu Yaqkov naeq-aer hawqjawq ya jawqtaf taef-a. 12Aerkhawf, Irsaqleqlav mirkhanq-euq zaqdeuq-aq, lafnyir paw zanrtsuini ghae-eu gar bi taedzae taq-awr, khoergar jawr-awr noeqshaq duidui-eu lafkhoer ngoerngoer-aer seuq yateuf taef-a.”
13Khoernar-aq, Yeqsur, yardzoeq guirhuq khoerghaq-anr aernaeq-eu, “Nawr ghof-ir-awq, nawr jan-eu lof-aer nawq-euq gharduq pyeuflar-euq mae.” Khoerngae, kuirlaf zaqkhav khoerghaq taqler-euq mae.
Yeqsur, Nargawr Lavtaq Naeq-euq
Mk 1:29-34; Lk 4:38-41
14Yeqsur, Beqtuvluv-euq irkanr ur-ir ngae, Beqtuvluv-euq tsawrmawq aqbur ghaq pyaqpyaq-aer galuf-eu gar ya’mawr-euq mae. 15Yeqsur, aqyawf-euq aqlaf-anr toeqciv ngae, pyaq-eu khoer lawq-ir-euq mae. Khoernar-aq, aqyawf tsawqtur-awr, Yeqsur-anr hawqbyawr lavdawv naeq-euq mae.
16Mq cifle ngae, aqcawq, Yeqsur jawr-eu gar naef ur-eu tsawrhaq ghawqmya ni-anr sheuqlaf-euq mae. Aqyawf dawq tiq dawq nae taef-aer, naef khoerdeuq-anr taedov jir-euq mae. Khoeruqtaf, nar-eu tsawrhaq dawqtawv luf-anr khawf bi taqler-euq mae. 17Aqyawf khoerlof-aer janr-eu-aq, Miqyaer gharduq ngaeqdan-eu Irsaqyar nae aertaq-euq dawq heudawq byanlar-euq mae,
“Aqyawf, aqyawf-euq mawrdo nae aqdui-euq nargawr deuq-anr yurdzae-awr, aqdui nar-awr gawr-eu jeq pidzae-euq mae.” (Isy 53:4)
Yeqsur-euq Maeqnan Cantae-eu Arpoeq
Lk 9:57-62
18Tsawrhaq armaf mafma, aqyawf-euq tiqjawq jawrluf-eu gar Yeqsur ya’mawr ngae, lan-euq khoerpaw baq-anr tsaev-ir-awq laer khaer-euq mae. 19Khoerngae, zanr maeq-eu tiq ghaq lar-awr aer-eu, “Saqlaq-or! Nawr aqgeugar ir-eu maqkaq, ngar, nawq-euq maeqnan cantaele ma.” 20Khoer-anr Yeqsur aernaeq-eu, “Byaqhir-aq, khaeqbanq baw-awr, mqtav zaw-eu arjir khawf banq jav-eu mae. Aerkhawf, Tsawrhaq-euq Zaqyo-aq, uqduq bafdarduq khawf maqjav.” 21Khoerngae, zaqlanr yawqghaqyawq, Yeqsur-anr aernaeq-eu, “Sanqpaq-or! Ngar ghof-ir-awr ngaqda-anr jeqhu bi bafpanq-ir laf.” 22Khoerngae, Yeqsur, aqyawf-anr aernaeq-eu, “Shir-euq tsawrhaq-anr-aq, shir-euq tsawrhaq nae bi bafpanq-awq. Nawr-aq, ngaq-euq maeqnan cantae lar-awq.”
Jaqlaer Laerma-anr Bi Naqler-euq
Mk 4:35-41; Lk 8:22-25
23Yeqsur, lawq-anr urler-awr irluf ngae, aqyawf-euq zaqlanr deuq khawf, aqyawf naeq-aer irluf-eu mae. 24Khoerngae, tiqpov taef-aer iqmalavshav-euq khoertav jaqlaer laerma bawlar-awr, irluv dzae duidui lar-awr, lawq-anr ircuf dzaepymqlar luf-eu mae. Aerkhawf, Yeqsur-aq, yufkhav taq-euq mae. 25Khoerngae, zaqlanr deuq, aqyawf-anr lavnoeq-ir-awr aer-eu, “Sanqpaq-or! Nga’maf shirjir shaw-iq mir-a. Nga’maf-anr bibuq-ir naeqlaf-awq.”
26Khoerngae, Yeqsur, aqyawf maf-anr aernaeq-eu, “Jan-eu ghaq baq-eu tsawrhaq-or! Nawmaf aqjeq mirnae guv-eu le?” Khoernar-aq, aqyawf tur-awr, jaqlaer hawr-eu iqmalavshav-anr daeq ngae, jaqlaer hawr-eu iqmalavshav ciqcur savni pyeuf-ir-euq mae. 27Khoermirnae, tsawrhaq khoerdeuq zanq duidui ler-awr aer-eu, “Tsawrhaq heughaq aqsur ghaq nga? Jaqlaer hawr-eu lan khawf aqyawf-euq dawq narhaq-eu nga.”
Naef Ur-eu Gaqdaqlar Tsawrhaq
Mk 5:1-20; Lk 8:26-39
28Yeqsur, lan-euq nuibaq-anr jav-eu Gaqdaqlar mirkhanq-anr irkeuv ngae, naef ur-eu tsawrhaq nyiq ghaq lmqbymr-anr nae dovle-awr, Yeqsur jawr-eu gar oe-euq mae. Aqyawfnyaf ardzaeq-aer ghae-eu mirnae, garma khoerkanr-anr tiqghaq-iq maq cantsaev peuq-a. 29Khoerngae, tiqpov taef-aer aqyawfnyaf gurgur-aer aer-eu, “Miqyaer-euq Zaqyo Yeqsur-or! Nawr, nga’nyaf-anr aqjeq mirnae lavtsoeq le-euq le? Aryamq maq keuvlar-euq minav-aer, nawr heugar oe-awr nga’nyaf-anr khaeqnaeq le-euq le lor?”
30Aqyawfmaf jawr-eu gar nae ardzaeq-aer maqkaq-eu gar aqzaf ghawqmya’ni gavdzaq luf-eu mae. 31Naef khoerdeuq, Yeqsur-anr sharshar-aer aer-eu, “Nga’maf-anr taedov ma laer ngeur nar-aq, nga’maf-anr bidov-ir-awr, aqzaf teumaf-euq lafkhoer biur-ir naeqlaf-awq.”
32Yeqsur, naef khoerdeuq-anr, “Ir-awq” laer aernaeq ngae, naef khoerdeuq dov-ir-awr, aqzaf khoermaf-euq lafkhoer ur-ir-euq mae. Khoerngae, tiqpov taef-aer aqzaf khoermaf maflanni, baqghashaq-anr nae lan-anr saerka ghae-awr, ircuf-euq lafkhoer gapufsaef jir-euq mae. 33Aqzaf bo-eu deuq, meuq-euq lafkhoer caevghof ghae-awr, khar pyeuflar-euq yawqjeq navluf hawr-eu naef ur-eu khoer nyiq ghaq-euq garkawv dzawr-ir-euq mae.
34Khoerngae, meuq-euq lafkhoer jawr-eu tsawrhaq dawqtawvluf dovle-awr, Yeqsur-anr hawle-euq mae. Aqyawfmaf, aqyawf-anr ya’mawr ngae, aqyawf maf-euq mirkhanq-anr nae dov-ir naeqlaf laer shar-euq mae.
ప్రస్తుతం ఎంపిక చేయబడింది:
Maqtaeq 8: AKA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
2018 ©
Bibles International ®
The Bible Society of Baptist Mid-Missions
