Матфейица бицараб Рохалил хабар 1

1 бетӏер

Гӏиса Масихӏил цӏаразул рахас

1Ибрагьимил наслуялъул Давудил кьибилалъул вас Гӏиса Масихӏил умумузул цӏаразул рахас гьадинаб буго:

2Ибрагьимие гьавуна Исхӏакъ, Исхӏакъие гьавуна Якъуб, Якъубие гьаруна Ягьуда ва гьесул вацал. 3Ягьудае Тамарица гьаруна Перецги Зараги, Перецие гьавуна Хӏецрон, Хӏецроние гьавуна Рам, 4Рамие гьавуна Гӏаминадаб, Гӏаминадабие гьавуна Нахӏшон, Нахӏшоние гьавуна Шалмон, 5Шалмоние Рагьабица гьавуна Богӏаз, Богӏазие Рутица гьавуна Йобед, Йобедие гьавуна Йишай, 6Йишаие гьавуна парччахӏ Давуд.

Уриял йикӏарай чӏужуялъ парччахӏ Давудие гьавуна Сулайман; 7Сулаймание гьавуна Регьобоам, Регьобоамие гьавуна Абиягь, Абиягьие гьавуна Аса; 8Асае гьавуна Иегьошапат, Иегьошапатие гьавуна Иегьорам, Иегьорамие гьавуна Уззия; 9Уззияе гьавуна Иотам, Иотамие гьавуна Агьаз, Агьазие гьавуна Гьезекиягь; 10Гьезекиягьие гьавуна Манассегь, Манассегьие гьавуна Амос, Амосие гьавуна Иосиягь; 11жугьутӏал Вавилоналде гочинарилалде Иосиягьие гьаруна Йехониягь ва гьесул вацал;

12Вавилоналде гочун хадув Йехониягьие гьавуна Шеалтиэл, Шеалтиэлие гьавуна Зеруббабел, 13Зеруббабелие гьавуна Абиуд, Абиудие гьавуна Элиаким; Элиакимие гьавуна Азор; 14Азорие гьавуна Садок, Садокие гьавуна Ахим, Ахимие гьавуна Элиуд; 15Элиудие гьавуна Элиазар, Элиазарие гьавуна Маттан, Маттание гьавуна Якъуб; 16Якъубие гьавуна жинда Масихӏилан цӏар лъурав Гӏисал эбелалъул – Марямил – рос Юсуп.

17Гьедин Ибрагьимидасан Давудиде щвезегӏан анцӏила ункъо наслу лъугьана; Давудидасан байбихьун жугьутӏал Вавилоналде гочинаризегӏанги лъугьана анцӏила ункъо наслу; Вавилоналде гочараб заманалдаса Масихӏиде щвезегӏанги лъугьана гьебго анцӏила ункъо наслу.

Гӏиса Масихӏ дуниялалде вачӏин

18Гӏиса Масихӏ дуниялалде вачӏин гьадин ккана: гьесул эбел Марям йикӏана Юсупие абурай яс; амма гьес гьей ячиналдего Аллагьасул Илагьияб Рухӏалдалъун гьелъул ургьибе лъимер ккун букӏин лъана. 19Гьелъул абурав Юсупица, яхӏ-намус бугев чи вукӏиндал, хӏукму гьабуна гьей халкъалда суризе бокьичӏого, балъгого гьелъулгун ригьин хвезабизе. 20Гьединаб пикруялда гьев вукӏаго, макьилъ тӏаде вачӏун Бичасул малаикас абуна:

– Я, Давудил наслуялъул вас Юсуп! Марям лъадилъун ячине мун хӏинкъуге. Гьелъул ургьибе ккараб лъимер Аллагьасул Илагьияб Рухӏалдалъун букӏин лъай дуда. 21Гьелъ дуе вас гьавила; Гӏисаян цӏарги лъезе ккола дуца гьесда, гьес жиндирго халкъ мунагьаздаса хвасар гьабизе бугелъул#1:21 Гӏиса (Йешуагӏ) абураб рагӏулъ жугьутӏ мацӏалда «Бичас хвасар гьарула» абураб магӏнаги буго. .

22Гьеб кинабго ккана цо аварагасда Аллагьас абураб гьадинаб калима ритӏухълъизе: 23«Гьале ясгӏаданалъул ургьибе лъимер ккела ва гьелъ вас гьавила. Гьесда цӏарги лъела Имануэл». (Гьелъул магӏна ккола «Аллагь нилъгун вуго» абураб.)

24Гьале Юсуп макьидаса вигьана, Бичасул малаикас абураб гьабун, жиндирго бахӏарайги рокъое ячана. 25Амма гьелъ вас гьавизегӏан, аскӏов вегун, гьелда квер хъвачӏо Юсупица. Васасда цӏарги Гӏиса абун лъуна.

ప్రస్తుతం ఎంపిక చేయబడింది:

Матфейица бицараб Рохалил хабар 1: AvrNT

హైలైట్

షేర్ చేయి

కాపీ