Yela 18
18
Dɔma nɛɛ pɔe yel
Kooro Devid yel
1N Naa Korowii, mɛɛ ta tea tɛɛ
dɛ́ nyin he wa,
henee n Kpeɡnɛn.#2Sa 22:2-51
2N Naa Korowii,
he do kɛŋɔ Bwetal,
maa chwaa kaa marɛ,
ne danjwɛkpeɡ hɛɛ lɛɛ mɛ.
Korowii maa dɛ tomɛ,
he do kɛŋɔ Bwetal,
maa chwaa kaa marɛ.
Henee dɛɛ tɔ mɛ ɡbemɡbe,
dɛ ɛ n kpeɡnɛn.#Mma 33:27
3N wio no hen Korowii
waa chɛ kpɛɛra la,
asɛ he lɛɛ mɛ
le n dɔma nɔn ta.
4Seo vɔɡ mɛ bil,
asɛ nehɛma aa kpeɡa lɔ
dɛɛ kpɔ n nɛ.
5Seo bela bar mɛ cheme,
lalbɔɔ hah nyoa
dɛɛ kpaa mɛ.
6N wahala bini n wio no
hen Korowii ŋɔ hé lɛɛ mɛ,
n wio no hen Korowii
maa dɛ tomɛ ŋɔ,
hé cha mɛ,
he no n taa he Dea la bini,
n wii la tel he be,
asɛ he no.
7Harɛ jiɡro dɛ yiiɡi,
asɛ bwejena mune jiɡri.
Korowii bandia waa
a bwa ɛ ɡɛ.
8Ninchuu le o mebɔɔne bini,
ninlao aa dɛ chɔɡ kwaa
le o nyoa,
ninhɔla aa dɛ fuh kwaa
ɡe ɛɛ le o nyoa.
9O forɔ le nyundua ba harɛ,
baama aa bira kpirkpir
do o nakpale lɔɡa.
10Kerobim taa o so dɛɛ ɡah,
peu kena taa o kpɔ ba.
11O kpɔ biro bɔle o bwa,
baama aa bira kpirkpir,
tenɛ bwaala,
dɛ baro cheme.
12Bɔr nyɛɡlɔ le baama la bini
tɔ o sie,
asɛ dombwea ne ninlao,
ɛɛ le bela aa dɛ nyɛɡle la ta.
13Nemenɛ Korowii bol waa
nyundua, a do kɛŋɔ bwaala
aa kɔra ken,
asɛ ba no o taa bobɛlbwa.
14O ta o hɛma, o dɔma peɡre,
o ɡelɔ bwaala nyɛɡle
kohona, ba chwa kaa.
15N Naa Korowii,
nyɛɡa haa nyɛɡ he dɔma nɛ,
ne he bandia kohona
nomanta,
a ɡelɔ mpo vile bwa hweeh
dɛ chɔ pɛɛ,
harɛ mumpar ɡe chɔ pɛɛ.
16He ha nɔn le nyundua
dɛ laɡ mɛ,
dɛ tɛr mɛ le vile bini.
17He laɡ mɛ le n dɔma
baa kpeɡa nɔn ta,
nɛra baa hah mɛ,
dɛ do kpeɡri ɡwaa mɛ.
18Ba cheɡɛ n nɛɛ kɛ bá chɔɡ mɛ,
ɡɛ saŋ maa lɔ wahala ta,
kɛ hen Korowii,
he cheɡɛ n habɔɔ.
19He cha mɛ
dɛ le n ne wekpeɡa ta,
he lɛɛ mɛ,
dɛkalkɛ he sie lɛ n nɛ.
20Korowii bɔ mɛ kem
ɡɛ n wa aa toɡra,
o swee andɛɛɡa tɛ mɛ,
dɛkalkɛ wechɔɡa bɛlbwa
toole n nɛ.
21N teŋɛ Korowii waa ta,
n ta wechɔɡa ɛɛ dɛ vɛoh.
22N teŋɛ o Mmarare bwa ta,
n ta waa waa do mɛ a ta la
ta leɛ.
23O ta n bwara waa dɔe
dɛ bol bwa, n laa n te
kpɔ wechɔɡa ɛɛ ta.
24Korowii bɔ mɛ kem
ɡɛ n wa aa toɡra,
dɛkalkɛ wechɔɡa bɛlbwa
toole n nɛɛ o be.
25N Naa Korowii, he waa dɔ
kasinteŋ tɛ nɛn o tea aa toa,
he waa wer kɛrɛdɛ dɛ tɛ nɛn,
wechɔɡa bɛlbwa
aa wola toole o nɛ.
26Nɛn o tea aa toa la,
onee he dɔ tepoŋ tɛ,
kɛ he dɔ wejema ɡwaa
nɛn waa dɔ baradeɛre.
27He dɛ lɛ nɛra baa pwɛra,
kɛ mbarafo tena te,
he dɛ ba ba ne harɛ.
28N Naa Korowii, henee ɡela
bɔr chaah n sie mɛɛ na,
he ɡelɔ n le biro ta ba
bochaah ta.
29He tɛ mɛ kpeɡri
n won yo n dɔma,
dɛ cha mɛ n jah
ɡale ba danjwɛjen
baa maa bar ba bwɛ.
30Korowii te,
o ŋwɛnɛre bwa wer,
o waa bwa toɡrɔ.
O do kɛŋɔ ɡbemɡbe,
dɛɛ tɛ nɛn waa chwaa
baa marɔ.
31Ya Naa Korowii habɔɔ,
bɛlbwa toole.
O ɡboo ɛ Bwetal
dɛ́ won tɔ ya nɛ.
32Korowii tɛ mɛ bokpeɡa,
dɛ ɡel n ŋwɛnɛ
do wer mɛɛ kpɔ o ta.
33O ɡelɔ n nakpala do
kɛŋɔ welo kwaa ken,
dɛ ɡel n won bwejena dor
cheɡa.
34O baɡ mɛ n won laa yoi,
asɛ n won to
waa do kpeɡri tae.
35N Naa Korowii, he tɔ mɛ
ɡbemɡbe dɛ lɛɛ mɛ,
nyiŋa haa dɛ nyiŋi
n nɛɛ la
ɡelɔ n do kpeɡri,
asɛ he kpeɡri ɡel n dɔ n te.
36He kwaa ŋwɛnɛ o do paɡri
tɛ mɛ, ásɛ n bɛ naa lɔ.
37N ti n dɔma dɛ ka puu ba,
n kpoo ba mɔɔ dɛ laa berɛ.
38N lɔ ba bil,
baa wola won ir kpa
ba serewe chɔ n sie.
39He tɛ mɛ bokpeɡa
n won laa yoi,
dɛ sɔɔh n dɔma nyoa
n pɔ ba nɛ.
40He ɡelɔ n dɔma berɛ habɔɔ,
dɛ chwa le n sie,
asɛ nɛra baa hah mɛ la,
n kpoo ba.
41Ba wio dɛɛ nyin lɛɛ,
kɛ nomɛlbwa toole,
ba wio no hen Korowii,
he ta ban chaŋɛ.
42N nam ba, ba ɛ kɛŋɔ tutuɡ
peu aa taa dɛɛ kaa
ane ken, dɛ sa ba nɛɛ
kɛŋɔ, fɔɡbaah kpechɛɡre.
43He lɛɛ mɛ le nɛra baa
cheɡɛ n nɛɛ bini,
dɛ ɡel mɛɛ di kora
harɛre nɛra nɛ,
nɛra maa wola ban jemɛ
laanee dɛɛ tom mɛ.
44Baa dena no n waa
ba no n be,
nɛŋhɔɔhra pwɛr ba te
dɛ baa ɡuŋi n sie.
45Ba hwɛɡa bwa tonɔ,
ba kpɔ bochela le
ba dekpeɡa bini dɛɛ ba.
46Korowii lole kɛrɛdɛ!
Korowii waa do kɛ
Bwetal la, hé kpɛɛro!
Onee n chwa kaa marɛ.
Hé ɡel Korowii
waa dɛ lɛɛ mɛ la sɔn le.
47Korowiirii tɔ n wel tɛ mɛ,
o kpɔ harɛre nɛra
do n nɔn ta.
48N Naa Korowii,
he lɛɛ mɛ le n dɔma bini.
He laɡ mɛ le nɛra baa cheɡɛ
n nɛɛ bini,
he lɛɛ mɛ le nɛnchɔɡa
nɔn ta.
49Anomanta, mɛɛ kpɛɛre
harɛre nɛra bwa bee,
mɛɛ yerɛ he sɔnee,
dɛ́ ɡo yela kpɛɛre.#Rom 15:9
50Kɛŋɔ haa tɛ he kooro
kpeɡri kohona,
o pɔ o dɔma nɛ,
dɛ teŋɛ dɛɛ nyin
nɛn haa leo,
ó ɛ Devid ne o naanar kon,
saŋ bɛlbwa dɛɛ la la.
ప్రస్తుతం ఎంపిక చేయబడింది:
Yela 18: mzw
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.