ꠔꠃꠞꠣꠔ ১: ꠙꠄꠖꠣ ꠘꠣꠝꠣ 11
11
ꠢꠎꠞꠔ ꠁꠛ꠆ꠞꠣꠢꠤꠝ (ꠀ꠩) (১১:১—২৩:২০)
ꠛꠣꠛꠤꠟ ꠝꠤꠘꠣꠞ
1ꠢꠤ ꠎꠝꠣꠘꠣꠔ ꠀꠡ꠆ꠔꠣ ꠖꠥꠘꠤꠀꠁꠔ ꠈꠣꠟꠤ ꠄꠇ ꠜꠣꠡꠣꠄ ꠝꠣꠔꠔꠣ, ꠀꠞ ꠔꠣꠞꠣꠞ ꠛꠥꠟꠤ ꠅꠇꠟꠅ ꠄꠇꠟꠣꠈꠣꠘꠃ ꠀꠍꠤꠟ। 2ꠔꠣꠞꠣ ꠙꠥꠛꠦꠖꠤ ꠀꠉꠥꠀꠁꠀ ꠎꠣꠁꠔꠦ ꠎꠣꠁꠔꠦ ꠡꠤꠘꠣꠞ ꠖꠦꠡꠞ ꠄꠇ ꠢꠝꠣꠘ ꠎꠣꠉꠣ ꠙꠣꠁꠀ ꠢꠈꠣꠘꠅꠃ ꠛꠡꠔ ꠇꠞꠟꠣ। 3ꠔꠣꠞꠣ ꠄꠇꠦ-ꠅꠁꠘ꠆ꠘꠞꠦ ꠇꠁꠟ, “ꠀꠅ, ꠀꠝꠞꠣ ꠁꠐ ꠛꠣꠘꠣꠁꠀ ꠀꠉꠥꠁꠘꠖꠤ ꠎꠣꠟꠣꠁ।” ꠇꠁꠀꠃ ꠔꠣꠞꠣ ꠙꠣꠔ꠆ꠔꠞꠞ ꠛꠖꠟꠣ ꠁꠐ ꠀꠞ ꠌꠥꠘ-ꠡꠥꠞꠇꠤꠞ ꠛꠖꠟꠣ ꠔꠣꠞꠔꠦꠟ ꠟꠣꠉꠣꠁꠟ। 4ꠔꠣꠞꠣ ꠀꠞꠅ ꠇꠁꠟ, “ꠀꠅ, ꠀꠝꠞꠣꠞ ꠘꠤꠎꠞ ꠟꠣꠉꠤ ꠄꠇꠐꠣ ꠡꠢꠞ ꠛꠣꠘꠣꠁ, ꠀꠞ ꠅꠃꠟꠣ ꠄꠇꠐꠣ ꠊꠞꠅ ꠛꠣꠘꠣꠁ, ꠎꠦꠇꠐꠣꠞ ꠝꠤꠘꠣꠞ ꠉꠤꠀ ꠀꠍꠝꠣꠘ ꠟꠣꠉꠣꠟ ꠙꠣꠁꠛ। ꠔꠦꠃ ꠀꠝꠞꠣꠞ ꠘꠣꠝꠅ ꠅꠁꠛ ꠀꠞ ꠀꠝꠞꠣ ꠖꠥꠘꠤꠀꠁꠔ ꠍꠤꠔ꠆ꠞꠤꠔꠣꠝꠅ ꠘꠣꠄ।” 5ꠝꠣꠘꠡꠦ ꠎꠦ ꠃꠌꠣ ꠊꠞ ꠀꠞ ꠡꠢꠞ ꠛꠣꠘꠣꠁꠞꠣ ꠁꠇꠐꠣ ꠖꠦꠈꠣꠔ ꠝꠣꠛꠥꠖ ꠟꠣꠝꠤ ꠀꠁꠟꠣ। 6ꠀꠞ ꠇꠁꠟꠣ, “ꠄꠞꠣ ꠄꠇ ꠎꠣꠔꠞ ꠝꠣꠘꠥꠡ, ꠄꠞꠣꠞ ꠝꠣꠔ-ꠇꠕꠣꠅ ꠄꠇ; ꠄꠞꠟꠣꠉꠤ ꠔꠣꠞꠣ ꠅꠃ ꠇꠣꠝꠞ ꠝꠣꠎꠦ ꠀꠔ ꠖꠤꠍꠦ। ꠘꠤꠎꠞ ꠝꠔꠟꠛ ꠢꠣꠍꠤꠟꠞ ꠟꠣꠉꠤ ꠄꠞꠣ ꠀꠞ ꠇꠥꠘꠥ ꠛꠣꠗꠣꠃ ꠝꠣꠘꠔ ꠘꠣꠄ। 7ꠔꠦ ꠀꠅ, ꠀꠝꠞꠣ ꠟꠣꠝꠤꠀ ꠉꠤꠀ ꠔꠣꠞꠣꠞ ꠛꠥꠟꠤꠞ ꠝꠣꠎꠦ ꠉꠥꠟꠝꠣꠟ ꠟꠣꠉꠣꠁ ꠖꠦꠁ, ꠎꠣꠔꠦ ꠔꠣꠞꠣ ꠄꠇꠎꠘꠦ ꠀꠞꠇ ꠎꠘꠞ ꠝꠣꠔ ꠛꠥꠎꠔ ꠘꠣ ꠙꠣꠞꠦ।” 8ꠄꠞꠛꠣꠖꠦ ꠝꠣꠛꠥꠖꠦ ꠢꠃ ꠎꠣꠉꠣ ꠕꠣꠇꠤ ꠔꠣꠞꠣꠞꠦ ꠀꠡ꠆ꠔꠣ ꠖꠥꠘꠤꠀꠁꠔ ꠍꠤꠔ꠆ꠞꠣꠁ ꠖꠤꠟꠣ। ꠀꠞ ꠔꠣꠞꠣꠞ ꠢꠃ ꠡꠢꠞ ꠛꠣꠘꠣꠘꠤꠞ ꠇꠣꠝꠅ ꠛꠘ꠆ꠖ ꠅꠁꠉꠦꠟ। 9ꠅꠃ ꠇꠣꠞꠘꠦ ꠢꠃ ꠎꠣꠉꠣꠞ ꠘꠣꠝ ꠅꠁꠟ ꠛꠣꠛꠤꠟ [ꠝꠣꠘꠤ, ꠉꠥꠟꠝꠣꠟ], ꠢꠈꠣꠘꠅꠃ ꠝꠣꠛꠥꠖꠦ ꠢꠣꠞꠣ ꠖꠥꠘꠤꠀꠁꠞ ꠛꠥꠟꠤꠞ ꠝꠣꠎꠦ ꠉꠥꠟꠝꠣꠟ ꠟꠣꠉꠣꠁ ꠖꠤꠍꠟꠣ। ꠢꠈꠣꠘ ꠕꠣꠇꠤꠃ ꠔꠣꠁꠘ ꠔꠣꠞꠣꠞꠦ ꠀꠡ꠆ꠔꠣ ꠖꠥꠘꠤꠀꠁꠔ ꠍꠤꠔ꠆ꠞꠣꠁꠟꠤꠟꠣ।
ꠢꠎꠞꠔ ꠁꠛ꠆ꠞꠣꠢꠤꠝ (ꠀ꠩) ꠅꠞ ꠛꠣꠚ-ꠖꠣꠖꠣꠁꠘ
10ꠅꠃ ꠅꠁꠟ ꠡꠣꠝꠞ ꠈꠣꠘ꠆ꠖꠣꠘꠞ ꠛꠄꠀꠘ। ꠛꠣꠘꠞ ꠖꠥꠁ ꠛꠞꠍ ꠛꠣꠖꠦ ꠡꠣꠝꠞ ꠛꠄꠅꠡ ꠎꠦꠛꠟꠣ ꠄꠇ-ꠡ ꠛꠞꠍ, ꠅꠃ ꠡꠝꠄ ꠔꠣꠘ ꠙꠥꠀ ꠀꠞ꠆ꠚꠣꠇꠍꠣꠖꠞ ꠎꠘꠝ ꠅꠁꠟ। 11ꠀꠞ꠆ꠚꠣꠇꠍꠣꠖꠞ ꠎꠘꠝꠞ ꠛꠣꠖꠦ ꠡꠣꠝ ꠀꠞꠅ ꠙꠣꠌ-ꠡ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤꠘ ꠅꠁꠍꠟꠣ।
12ꠀꠞ꠆ꠚꠣꠇꠍꠣꠖꠞ ꠙꠣꠄꠔꠤꠡ ꠛꠍꠞꠞ ꠡꠝꠄ ꠔꠣꠘ ꠙꠥꠀ ꠡꠣꠟꠦꠈꠞ ꠎꠘꠝ ꠅꠁꠟ। 13ꠡꠣꠟꠦꠈꠞ ꠎꠘꠝꠞ ꠛꠣꠖꠦ ꠔꠣꠁꠘ ꠀꠞꠅ ꠌꠣꠁꠞ-ꠡ ꠔꠤꠘ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
14ꠡꠣꠟꠦꠈꠞ ꠔꠤꠡ ꠛꠞꠍ ꠛꠄꠅꠡꠞ ꠡꠝꠄ ꠔꠣꠘ ꠙꠥꠀ ꠀꠛꠦꠞꠞ ꠎꠘꠝ ꠅꠁꠟ। 15ꠀꠛꠦꠞꠞ ꠎꠘꠝꠞ ꠛꠣꠖꠦ ꠡꠣꠟꠦꠈ ꠀꠞꠅ ꠌꠣꠁꠞ-ꠡ ꠔꠤꠘ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
16ꠀꠛꠦꠞꠞ ꠌꠃꠔꠤꠡ ꠛꠍꠞꠞ ꠡꠝꠄ ꠔꠣꠘ ꠙꠥꠀ ꠚꠣꠟꠦꠎꠞ ꠎꠘꠝ ꠅꠁꠟ। 17ꠚꠣꠟꠦꠎꠞ ꠎꠘꠝꠞ ꠛꠣꠖꠦ ꠀꠛꠦꠞ ꠀꠞꠅ ꠌꠣꠁꠞ-ꠡ ꠔꠤꠡ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
18ꠚꠣꠟꠦꠎꠞ ꠔꠤꠡ ꠛꠞꠍ ꠛꠄꠅꠡꠞ ꠡꠝꠄ ꠔꠣꠘ ꠙꠥꠀ ꠞꠣꠃꠞ ꠎꠘꠝ ꠅꠁꠟ। 19ꠞꠣꠃꠞ ꠎꠘꠝꠞ ꠛꠣꠖꠦ ꠚꠣꠟꠦꠎ ꠀꠞꠅ ꠖꠥꠁ-ꠡ ꠘꠄ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
20ꠞꠣꠃꠞ ꠛꠔ꠆ꠔꠤꠡ ꠛꠍꠞꠞ ꠡꠝꠄ ꠔꠣꠘ ꠙꠥꠀ ꠍꠣꠞꠥꠎꠞ ꠎꠘꠝ ꠅꠁꠟ। 21ꠍꠣꠞꠥꠎꠞ ꠎꠘꠝꠞ ꠛꠣꠖꠦ ꠞꠣꠃ ꠀꠞꠅ ꠖꠥꠁ-ꠡ ꠡꠣꠔ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
22ꠍꠣꠞꠥꠎꠞ ꠔꠤꠡ ꠛꠍꠞꠞ ꠡꠝꠄ ꠔꠣꠘ ꠙꠥꠀ ꠘꠣꠢꠥꠞꠞ ꠎꠘꠝ ꠅꠁꠟ। 23ꠘꠣꠢꠥꠞꠞ ꠎꠘꠝꠞ ꠛꠣꠖꠦ ꠍꠣꠞꠥꠎ ꠀꠞꠅ ꠖꠥꠁ-ꠡ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
24ꠘꠣꠢꠥꠞꠞ ꠃꠘꠔꠤꠡ ꠛꠍꠞꠞ ꠡꠝꠄ ꠔꠣꠘ ꠙꠥꠀ ꠔꠣꠞꠦꠈꠞ ꠎꠘꠝ ꠅꠁꠟ। 25ꠔꠣꠞꠦꠈꠞ ꠎꠘꠝꠞ ꠛꠣꠖꠦ ꠘꠣꠢꠥꠞ ꠀꠞꠅ ꠄꠇ-ꠡ ꠃꠘ꠆ꠘꠤꠡ ꠛꠞꠍ ꠛꠣꠌꠤꠀ ꠀꠍꠟꠣ। ꠄꠞ ꠝꠣꠎꠦ ꠔꠣꠘ ꠀꠞꠅ ꠙꠥꠀ-ꠙꠥꠠꠤ ꠅꠁꠍꠟꠣ।
26ꠔꠣꠞꠦꠈꠞ ꠡꠔ꠆ꠔꠁꠞ ꠛꠍꠞꠞ ꠡꠝꠄ ꠔꠣꠘ ꠙꠥꠀꠂꠘ ꠀꠛ꠆ꠞꠣꠝ (ꠔꠣꠘ ꠛꠣꠖꠞ ꠘꠣꠝ ꠁꠛ꠆ꠞꠣꠢꠤꠝ), ꠘꠣꠢꠥꠞ ꠀꠞ ꠢꠣꠞꠘꠞ ꠎꠘꠝ ꠅꠁꠍꠤꠟ।
27ꠅꠃ ꠅꠁꠟ ꠔꠣꠞꠦꠈꠞ ꠈꠣꠘ꠆ꠖꠣꠘꠞ ꠛꠄꠀꠘ। ꠔꠣꠞꠦꠈꠞ ꠙꠥꠀꠞ ꠘꠣꠝ ꠀꠍꠤꠟ ꠀꠛ꠆ꠞꠣꠝ, ꠘꠣꠢꠥꠞ ꠀꠞ ꠢꠣꠞꠘ। ꠀꠞ ꠢꠣꠞꠘꠞ ꠙꠥꠀꠞ ꠘꠣꠝ ꠟꠥꠔ। 28ꠢꠣꠞꠘ ꠔꠣꠘ ꠛꠣꠛꠣ ꠎꠤꠘ꠆ꠖꠣ ꠕꠣꠇꠔꠦꠃ, ꠔꠣꠘ ꠎꠘꠝ-ꠝꠣꠐꠤ ꠛꠣꠛꠤꠟ ꠖꠦꠡꠞ ꠃꠞ ꠐꠣꠃꠘꠅ ꠝꠣꠞꠣ ꠉꠦꠍꠟꠣ। 29ꠀꠛ꠆ꠞꠣꠝ ꠀꠞ ꠘꠣꠢꠥꠞ ꠖꠥꠁꠎꠘꠦ ꠛꠤꠀ ꠇꠞꠍꠟꠣ। ꠀꠛ꠆ꠞꠣꠝꠞ ꠛꠃꠞ ꠘꠣꠝ ꠀꠍꠤꠟ ꠍꠣꠞꠣ। ꠀꠞ ꠘꠣꠢꠥꠞꠞ ꠛꠃꠞ ꠘꠣꠝ ꠝꠤꠟꠇꠣ। ꠝꠤꠟꠇꠣ ꠀꠞ ꠁꠍꠇꠣ ꠀꠍꠟꠣ ꠢꠣꠞꠘꠞ ꠙꠥꠠꠤꠘ। 30ꠅꠁꠟꠦ ꠍꠣꠞꠣꠞ ꠇꠥꠘꠥ ꠙꠥꠀ-ꠙꠥꠠꠤ ꠀꠍꠤꠟ ꠘꠣ, ꠔꠣꠁꠘ ꠘꠤꠀꠅꠟꠣꠖꠤ ꠀꠍꠟꠣ।
31ꠔꠣꠞꠦꠈꠦ ꠀꠛ꠆ꠞꠣꠝ, ꠟꠥꠔ ꠀꠞ ꠍꠣꠞꠣꠞꠦ ꠟꠁꠀ ꠇꠦꠘꠣꠘ ꠖꠦꠡꠅ ꠎꠣꠅꠀꠞ ꠟꠣꠉꠤ ꠛꠣꠛꠤꠟ ꠖꠦꠡꠞ ꠃꠞ ꠐꠣꠃꠘ ꠕꠣꠇꠤ ꠞꠅꠀꠘꠣ ꠅꠁꠟꠣ। ꠀꠛ꠆ꠞꠣꠝ ꠅꠁꠟꠣ ꠔꠣꠞꠦꠈꠞ ꠙꠥꠀ, ꠢꠣꠞꠘꠞ ꠙꠥꠀ ꠟꠥꠔ ꠅꠁꠟꠣ ꠔꠣꠞꠦꠈꠞ ꠘꠣꠔꠤ, ꠀꠞ ꠍꠣꠞꠣ ꠅꠁꠟꠣ ꠔꠣꠞꠦꠈꠞ ꠙꠥꠀ ꠀꠛ꠆ꠞꠣꠝꠞ ꠛꠃ। ꠙꠄꠟꠣ ꠔꠣꠞꠣ ꠢꠣꠞꠣꠘ ꠘꠣꠝꠦ ꠄꠇ ꠐꠣꠃꠘꠅ ꠉꠦꠟꠣ ꠀꠞ ꠢꠈꠣꠘꠅ ꠛꠡꠔ ꠇꠞꠟꠣ। 32ꠔꠣꠞꠦꠈ ꠖꠥꠁ-ꠡ ꠙꠣꠌ ꠛꠞꠍ ꠛꠄꠅꠡꠅ ꠢꠣꠞꠣꠘ ꠐꠣꠃꠘꠅ ꠝꠣꠞꠣ ꠉꠦꠟꠣ।
ప్రస్తుతం ఎంపిక చేయబడింది:
ꠔꠃꠞꠣꠔ ১: ꠙꠄꠖꠣ ꠘꠣꠝꠣ 11: sylN
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Ahle Kitab Society. All rights reserved.
