MATHAI 12
12
Khawlni thu a dokna
(Mrk. 2.23-28; Luk. 6.1-5)
1Tuahun in, Jesu khawlni in buhleilai kan in apai a, tualeh a nungjuite agil uh akial a, buhvuite asiktan ua aneta uhi. 2Hinanleh Pharisaite`n hua amuhtak un a kiangah, “En in, na nungjuite`n khawlni a bawl ding a sianglou abawl uh!” achi ua.
3Hinanleh aman a kiang uah, “David in agilkiallai ua alawite tawh abawl uh simkhalou nahi uhiam? #1 Sam. 21.1-6. 4Tuachia Pasian inn a lut a, amah leh alawite`n nek sianglou, siampute guak neksiang tanghou koih anek thu uh. #Lev. 24.9. 5Ahihkeileh, khawlni in tempul sung a siampu omten khawlni azahlouh ua zong siamtan in a omjel uh chih da`nthu ah simkhalou nahi uhiam? #Num. 28.9,10. 6Hinanleh hihsan ah Pasian tempul sang a thupijaw khat aom chih na kiang uah kung hilh ahi. 7Ahihhang in nou, kithoihna deihlou in zahngaihna ka deih chih a omdan na theikhinta hile uchin, mawhna neiloute mawhpaihlou ding hi uchin a; #Mat. 9.13; Hos. 6.6. 8Mihing Tapa jaw khawlni Toupa ahi,” achi hi.
Khut jeng damsakna
(Mrk. 3.1-6; Luk. 6.6-11)
9Tualeh huasan a pan apaikhiat khit takin, a kikhopna inn uah ava lut a, 10ngaiin, huasan ah khutjeng mi khat ana om a. Amah amohmat theihna ding un, “khawlni a sukdam asiang diam?” chi`n adong ua.
11Tuachi`n aman a kiang uah, “Noute lak ah kuahiam in belam khat nei unla, khawlni in kuakhuk ah kiataleh, kua ahia tu a kaikhialou ding? 12Belam khat sang in mihing khat bangzahta a manphajaw ahiam! Tuajiakin, khawlni a silhoih bawl asiang hi,” achi hi. 13Tuachi`n aman hua mipa kiangah, “Na khut jankhia in,” achi a.
Tuachi`n ajan a, akhut langkhat bangin a damsiangta hi. 14Tuachi`n Pharisaite apawt khia ua amah a thahtheih nang dan ding uh ngaihsun in a kihou ua.
Pasian tel sila
15Hinanleh Jesu`n hih atheihtak in, hua a kipan in aki hemmangta a; tualeh mi tampi`n amah ajui ua, ana damsak siang a, 16aman a tanchin athansak louhna ding un ataihilh hi. 17Tuapen Jawlnei Isaiah in:
18“En in, ka sila, katel,
ka ittak, ka lungsim in apahtat mahmah,
ka kha a tungah ka koih ding a,
tualeh aman Jentelte kiangah thudik a vaihawmna thu a phuangkhia ding.
19A selkei ding a, a kikou kei ding,
khualai kongjing lak ah kuaman a aw ajakei ding.
20Thudik a vaihawmna a gualzoh sak mateng,
pumpeng gaw ahihtan kei ding.
Meivak kuang leplep ahihmit kei ding,
21tualeh amah ah Jentelte`n kinepna anei ding uh,
chia anagente ahung tangtun theihna ding in.”
Jesu leh Beelzebul
(Mrk. 3.20-30; Luk. 11.14-23)
22Tuachi`n dawimat mittaw leh hamtheilou khat a kiangah ahung paipih ua, aman ana damsak a, tuachi`n mittaw leh hamtheilou mipa`n hung mutheiin ahung hamtheita hi. 23Tuachi`n mipi tengteng in lamdang asa mahmah ua; “Hihpa David tapa hilou amaw?” achi ua.
24Hinanleh Pharisaite`n ajaktak un, “Hihpa dawite vaihawmpa Beelzebul jiak louin dawite a hawlkhiathei kei ding,” achi uhi. #Mat. 9.34; 10.25.
25Hinanleh Jesu`n a ngaihsut uh athei a akiang uah, “Gam khatpeuh kikhen a kidou pen a kisiagawp ding a, tualeh khuapi ahihkeileh innkuan khat kikhen a kidou pen a khuasuak kei ding. 26Tualeh setan in setanmah a hawlkhiat leh amah leh amah kidou asuak ding a, agam bangchi`n ading tadiai! 27Tualeh Kei Beelzebul jiak a dawite hawlkhia kahihleh na tate un kuajiak a ahawlkhiat ata diai le? Tuajiakin amauhte noute tung a thukhenmite ahi ding uhi! 28Hinanleh Kei Pasian kha jiak a dawite hawlkhia kahihleh, Pasian gam na kiang uah hungtung ahita hi.
29“Ahihkeileh, min mihatpa ka`n masa loupi`n bangchi`n mihatpa inn a lut in avante alathei dia? Ka`n masa in tuazoh chiangin a inn asuksiat sak pan ding hi.
30“Kuapeuh kei lam a pangloute, kei hungdou ahi ua, kuapeuh ahung lakkhawmpih loute athehjak ahi uhi. #Mrk. 9.40. 31Tuajiakin na kiang uah kung hilh ahi: mi akhialhna jousiah uh leh Pasian a gensiatna jousiah uh ngaihdam ahi ding a; hinanleh kha hilhial gensiatna pen ngaihdam ahikei ding. 32Kuapeuh Mihing Tapa kalh a thu gen pen, ngaihdam ahi ding a; hinanleh khasiangthou kalha thu gen pen, tuin zong, hun hungtung ding ah zong ngaihdam ahikei ding hi. #Luk. 12.10.
Singkung leh agah
(Luk. 6.43-45)
33“Singkung ahoih agah zong ahoih; nachih kei ding uleh, singkung asia, agah zong asia, chivanglak un, singkung agah a kithei ahihjiak in. 34Nou gulsuante aw! Gilou napi`n nou bangchi`n thuhoih na genthei ding ua? Lungsim a dimlet kam in agen jel hi. 35Mihoih in agoubawm hoih sung a kipan silhoihte ahung lakhia a; migilou in a goubawm hoihlou sung a kipan silhoihloute ahung lakhia jel hi.
36“Hinanleh na kiang uah kung hilh ahi, mi`n akam ua thuginalou agen jousiah uh, tuathu pen vaihawmni chiangin agen ding. 37Na thuin siam ahung tangsak ding a, na thu mah in siamlouh ahung tangsak ding hi.”
Chiamtehna a ngen uh
38Tuachi`n Pharisaite leh Laigelhmite`n akiang ah adong ua, “Siapa, na kiang a pan chiamtehna kamu ut uh,” achi ua. #Mat. 16.1; Mrk. 8.11; Luk. 11.16.
39Hinanleh aman adawng a akiang uah, “Khangthak giloutak leh angkawm hatte`n chiamtehna azong ua, hinanleh Jawlnei Jona chiamtehna chihlouh akiang uah chiamtehna dang mawng mawng piak ahikei ding,” achi hi. #Mat. 16.4; Mrk. 8.12. 40Jona nithum leh ja`nthum ngapi gilsung a aom bangin; Mihing Tapa zong nithum leh ja`nthum leigil sungah aom ding hi. 41Ninevi khua mite thukhenni chiangin tulai khangthakte tawh ahung ding ding ua, siamlouh atangsak ding uh; Jona thugenna a akisiktak jiak un. Ataktak in Jona sang a lianjaw hihsan ah a om hi! #Jon. 3.5. 42Simlam kumpinu thukhenni chiangin tulai khangthakte toh ahung thoukhawm ding ua, siamlouh atangsak ding, Solomon pilna ngaikhia dingin bawn leitawp a kipan a a hungpai jiakin. Ataktak in Solomon sang a lianjaw hihsan ah a om hi!
Kha nin kinungleh kik
(Luk. 11.24-26)
43“Tuachi`n kha nin mihing a kipan ahung pawtdok a, omna ding zong in mun-gaw lak ah avak a, amukei hi, 44Tuachi`n aman, ‘Ka pawtkhiatna ka inn mah ah ka nungkik mai ding achi a.’ Tuachia a hungpai leh ahawm, phiatsiang leh zepsa a om in amu a. 45Tuachi`n apai a amah sang a hoihloujaw kha nin adang sagih avapui a, huasan ah lut in, atengta ua, tuachi`n hua mipa omdan nunung pen amasapen sang in ahung siajawta hi. Tuamah bangin tulai khangthak giloute tungah ahung om ding,” chi`n adawng hi.
Jesu nu leh a sanggamte
(Mrk. 3.31-35; Luk. 8.19-21)
46Mipite lak a thu agen laiin, ngaiin, anu leh a sanggamte amah houpih sawm in inn pualam ah ading uhi. 47Tuachi`n mi khat in a kiangah, “En in, nanu leh na sanggamte nang hung houpih nuam in inn pualam ah ading ding uhi,” achi hi.
48Hinanleh aman akiang a vahilhpa kiangah, “Ka nu kua ahia? Ka sanggamte zong kua ahi ua?” achi a, adawng a. 49Tuachi`n aman a nungjuite lam nga in akhut azankhia a, “Hihsan ah ka nu leh ka sanggamte a om uh! achi a, adawng a. 50Van a om ka Pa deihlam bawlte ka sanggampa, ka sanggamnu leh ka nu ahi,” achi hi.
ప్రస్తుతం ఎంపిక చేయబడింది:
MATHAI 12: THKHBSI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.
