Chivkeeb 40
40
Yauxej Txhais Ob Zaaj Npau Suav
1Tau ib ntus lug tom qaab nuav tug kws laub cawv hab tug thawj kws saib cov tuabneeg ua mov rua tug vaajntxwv kws kaav tebchaws Iziv noj hab haus, obtug tau ua txhum rua vaajntxwv. 2Falaus txhaj chim rua ob tug tubkhai ntawd heev, 3nwg txawm has kuas coj obtug moog kaw rua huv tug thawj kws saib cov faajxwm lub tsev, yog tuab lub tsev lojcuj kws kaw Yauxej hab ntaag. 4Tug thawj kws saib cov tuabneeg raug txim tso Yauxej lug ua tug saib obtug, hab puab nyob tau ib ntus ntev loo huv tsev lojcuj.
5Muaj ib mos tug laub cawv hab tug thawj kws saib cov ua mov rua vaajntxwv noj kws raug kaw rua huv tsev lojcuj, nyag txawm ua nyag ib zaaj npau suav, hab obtug ob zaaj npau suav ntawd nyag muaj nyag ntsab lug. 6Thaus sawv ntxuv Yauxej lug rua huv chaav kws obtug nyob, nwg pum obtug mluag kawg le. 7Yauxej nug obtug has tas, “Vim le caag nub nua meb mluag kawg le?”
8Obtug teb has tas, “Wb nyag ua nyag ib zaaj npau suav, tabsis tsi muaj leejtwg yuav txhais tau wb ob zaaj npau suav le.”
Yauxej teb has tas, “Tsuas yog Vaajtswv tuab leeg xwb txhaj le txhais tau npau suav. Qha meb ob zaaj npau suav rua kuv noog saib!”
9Ces tug laub cawv txhaj pav nwg zaaj npau suav rua Yauxej has tas, “Kuv ua npau suav pum ib tsob txiv maab nyob ntawm kuv xubndlag 10ncau ua peb ceg. Thaus hlaav nplooj lawm, taamsim ntawd txawm tawg paaj txi txiv ua tej tauv, tej txiv txawm sav taagnrho. 11Kuv tuav rawv Falaus lub khob, ces kuv cev teg moog dle cov txiv maab ntawd hab tsu kua rua huv lub khob muab cev rua Falaus haus.”
12Yauxej has tas, “Koj zaaj npau suav lub ntsab mas yog le nuav: peb tug ceg txiv maab ntawd yog peb nub. 13Peb nub sau nuav Falaus yuav tuaj tso koj tawm moog, zaam txim rua koj hab nwg yuav muab koj teg num qub rov rua koj ua. Koj yuav tau rov muab nwg lub khob cev rua nwg ib yaam le yaav thaus koj tau ua lug lawm. 14Tabsis thaus koj tau zoo lawm thov koj ncu ntsoov txug kuv, hab koj ua sab dlawb paug pav txug kuv zaaj rua Falaus noog, kuas nwg txhaj tso kuv tawm huv tsev lojcuj nuav moog. 15Qhov tseeb yog puab nyag kuv peg tebchaws Henplais lug, hab txawm yog kuv lug nyob rua huv tebchaws Iziv nuav los kuv yeej tsi tau ua ib qhov txhum kws txaus puab coj kuv tuaj kaw rua huv tsev lojcuj nuav le.”
16Thaus tug thawj kws saib cov ua mov pum has tas, tug laub cawv zaaj npau suav yog zaaj zoo lawm, nwg txhaj has rua Yauxej has tas, “Kuv ua ib zaaj npau suav hab, kuv kwv peb choo ncuav sis tshooj sau kuv taubhau. 17Nyob sau tshooj choo peb, muaj txhua yaam ncuav zoo kws coj moog rua Falaus noj, tabsis noog lug muab cov ncuav ntawd noj lawm.”
18Yauxej teb has tas, “Koj zaaj npau suav lub ntsab yog le nuav: peb choo ncuav yog peb nub. 19Peb nub sau nuav Falaus yuav tuaj coj koj moog, hab yuav muab koj txav cejdlaab! Ces nwg yuav muab koj lub cev moog dlai rua sau tug ncej, hab noog yuav lug noj koj cev nqaj.”
20Tau peb nub tom qaab kws txug Falaus nub yug nwg txawm ua tau ib rooj mov rua taagnrho nwg cov numtswv noj ua kev zoo sab, nwg txhaj tso tug kws laub cawv hab tug thawj saib ua mov lug sawv taabmeeg ntawm nwg cov numtswv. 21Falaus muab tug kws laub cawv rov moog ua nwg lub luag num laub cawv le qub, 22tabsis nwg muab tug thawj saib cov ua mov txav cejdlaab. Tej nuav tshwmsim lawv le Yauxej tau has lawm tag. 23Tabsis tug laub cawv ncu tsi txug tej lug kws Yauxej has, ces nwg txawm ca le tsi ncu qaab txug Yauxej le lawm.
ప్రస్తుతం ఎంపిక చేయబడింది:
Chivkeeb 40: HNJ2000
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2000 United Bible Societies. All rights reserved.
