Chivkeeb 38
38
Yudas hab Tamaj
1Thaus lub sijhawm ntawd Yudas tso nwg cov kwvtij tseg hab tsiv moog nrug ib tug txivneej hu ua Hilaas kws yog cov tuabneeg huv lub nroog Adaulaas nyob. 2Nyob qhov ntawd Yudas ntsib cov Kana-aas ib tug ntxhais, tug ntxhais ntawd txiv hu ua Suav. Yudas txhaj yuav tug ntxhais ntawd ua quaspuj, 3hab nwg yug tau ib tug tub rua Yudas, Yudas txhaj tis tug tub ntawd npe hu ua Eles. 4Tug quaspuj ntawd rov xeeb tub dlua, nwg yug tau ib tug tub, hab nwg tis tug tub ntawd npe hu ua Aunaas. 5Nwg rov yug tau ib tug tub ntxiv hab nwg tis tug tub ntawd npe hu ua Selas. Thaus yug tug tub ntawd Yudas tseem nyob huv lub nroog Akhexis.
6Yudas tug tub hlub kws yog Eles yuav tau ib tug quaspuj npe hu ua Tamaj. 7Eles ua kev phem kev qas tsi hum tug TSWV sab, tug TSWV txhaj muab nwg tua povtseg lawm. 8Ces Yudas txhaj has rua Eles tug kwv Aunaas has tas, “Koj ca le moog yuav koj tug namtij, sawv koj tug tijlaug chaw kuas koj tug tijlaug txhaj muaj caajceg.” 9Tabsis Aunaas paub has tas, cov mivnyuas ntawd yuav tsi yog nwg le; ces thaus nwg moog nrug nwg tug namtij pw, nwg ca cov kua txuas rua huv aav, kuas muaj tsi taug mivnyuas rua nwg tug tijlaug. 10Qhov kws nwg ua le ntawd tsi hum tug TSWV sab, vim le ntawd tug TSWV txhaj le muab nwg tua povtseg lawm hab. 11Ces Yudas txhaj le has rua Tamaj kws yog nwg tug nyaab has tas, “Koj ca le rov qaab moog nrug koj nam koj txiv nyob, ua puj ntsuag tog moog txug thaus kuv tug tub yau hlub tav txiv tsaiv.” Nwg has le ntawd rua qhov nwg ntshai nyob tsaam Selas raug tua ib yaam le Selas ob tug tijlaug hab. Ces Tamaj txhaj rov qaab moog nrug nwg nam hab nwg txiv nyob lawm.
12Tau ntev loo lug tom qaab nuav Yudas tug quaspuj kws yog Suav tug ntxhais txawm tuag lawm. Thaus dlhau caij nyuaj sab quaj ntsuag lawm, Yudas hab nwg ib tug phoojywg kws nyob huv lub nroog Adaulaas txhaj moog saib nwg cov tuabneeg txav plaub yaaj kws nyob huv lub nroog Teenas. 13Muaj tuabneeg moog has qha rua Tamaj has tas, nwg tug quasyawg leej txiv taabtom sawv kev tuaj moog txav plaub yaaj rua huv lub nroog Teenas. 14Ces Tamaj txhaj hloov nwg cev rig tsho puj ntsuag kws nwg naj nub naav ntawd ca, muab ntaub lug npug nwg lub ntsejmuag, hab moog nyob ntawm ntug kev kws nyob ntawm ncauj ke moog rua huv lub zog Enayees, yog lub zog kws nyob ntawm txujkev moog rua huv lub nroog Teenas. Nwg yeej paub has tas, Yudas tug tub ntxawg Selas tub hlub tav hluas lawm, tabsis Yudas tseem pheej tsi muab Tamaj hab Selas txis ua nam txiv le.
15Thaus Yudas pum Tamaj, nwg xaav has tas Tamaj yog ib tug namndlav, rua qhov Tamaj muab ntaub npug nwg lub ntsejmuag huv tuabsi lawm. 16Yudas txhaj ncaaj nraim moog rua ntawm Tamaj hab has tas, “Koj ca le moog, kuv yuav nrug koj pw, koj yuav nqe pistsawg?” (Yudas tsi paub has tas, Tamaj yog nwg tug nyaab le lawm.)
Tamaj txhaj teb has tas, “Koj txaus sab yuav muab dlaabtsi rua kuv?” 17Yudas teb has tas, “Kuv yuav xaa ib tug mivnyuas tshis tuaj rua koj.”
Tamaj has tas, “Ua le ntawd los tau, tabsis koj muab ib yaam dlaabtsi rua kuv khaws tseg ua puavpheej moog txug thaus koj coj tug mivnyuas tshis tuaj rua kuv tsaiv.”
18Yudas nug has tas, “Koj xaav kuas kuv muab dlaabtsi rua koj khaws ua puavpheej tseg?”
Tamaj teb has tas, “Muab koj lub homthawj kws muaj txuj hlua hab koj tug paas nreg rua kuv.” Yudas txhaj muab tej ntawd rua Tamaj. Ces obtug txawm moog pw, ces Tamaj txawm ca le xeeb tub. 19Tamaj rov qaab moog tsev, tshem nwg dlaim ntaub npug ntsejmuag, hab rov qaab muab nwg cev rig tsho puj ntsuag lug naav dlua.
20Yudas tso nwg tug phoojywg Hilaas xaa tug mivnyuas tshis moog txhwv tej khoom coglug kws nwg muab rua tug quaspuj ntawd khaws tseg lawm rov qaab lug, tabsis Hilaas nrhav tsi tau nwg le lawm. 21Hilaas nug cov txivneej kws nyob huv lub nroog Enayees has tas, “Tug namndlav kws pheej moog nyob ntawm ntug kev moog rua qhov twg lawm?”
Cov txivneej ntawd teb has tas, “Nyob huv lub zog nuav yeej ibtxwm tsi muaj namndlav.”
22Hilaas rov qaab moog cuag Yudas hab has tas, “Kuv nrhav tsi tau tug quaspuj ntawd le lawm. Cov txivneej kws nyob huv lub zog ntawd has rua kuv tas, yeej tsi muaj ib tug namndlav nyob huv lub zog nuav hlo le.”
23Yudas has tas, “Ca nwg yuav kuv cov khoom ntawd moog le. Peb tsi xaav pub kuas muaj tuabneeg luag peb plig. Kuv tub muab tug mivnyuas tshis nuav rua koj coj moog them nwg ntaag, tabsis koj moog nrhav tsi tau nwg lawm xwb.” 24Tau peb hlis tom qaab muaj tuabneeg moog qha rua Yudas has tas, “Tamaj kws yog koj tug nyaab tau moog ua namndlav, hab nwgnuav nwg xeeb tub lawm.”
Yudas has tas, “Ca Le coj Tamaj tawm moog lawm nrau ntug nroog hab muab suavtawg hlawv kuas tuag.”
25Thaus puab taabtom coj Tamaj tawm moog, Tamaj tso tuabneeg nqaa cov khoom ntawd hab moog has rua nwg txiv yawm has tas, “Kuv muaj mivnyuas lug ntawm tug txivneej kws yog tug tswv cov khoom nuav. Mej nrug saib lub homthawj kws muaj hlua hab tug paas nreg nuav tuab zoo saib yog leejtwg le.”
26Yudas ncu tau cov khoom ntawd hab has tas, “Tamaj ua yog cai lawm. Kuv tsi ua lawv le kuv tau coglug tseg rua nwg, tsimnyog kuv yuavtsum muab nwg txis rua kuv tug tub Selas.” Ces Yudas tsi moog nrug Tamaj pw ib zag ntxiv le lawm.
27Thaus yuav txug caij Tamaj tu tub, nwg paub has tas nwg muaj mivnyuas ntxaib nyob huv nwg plaab. 28Thaus nwg taabtom mob plaab yuav yug ob tug mivnyuas, muaj ib tug mivnyuas txhais teg txawm tawm tuaj ua ntej, tug quaspuj kws paab dlaws cev ntawd tuav nkaus txhais teg ntawd, hab muab tau ib txuj xuv paaj lab lug khi txhais teg ntawd hab has tas, “Tug nuav yog tug xub yug.” 29Tabsis nwg nkaum nwg txhais teg rov qaab lawm, nwg tug kwv txawm yug lug ua ntej. Ces tug quaspuj kws tuaj paab dlaws cev ntawd has tas, “Yog ua le caag koj yuav txeeb tau kev lug ua ntej!” Yog le ntawd, txhaj muab nwg tis npe hu ua Peles.#38.29 Pelej: Lub npe nuav lug Henplais txhais has tas, “txeeb tawm ua ntej lug.” 30Ces nwg tug tijlaug maam yug lug txhais teg khi rawv ib txuj xuv paaj lab hab muab nwg tis npe hu ua Zelas.
ప్రస్తుతం ఎంపిక చేయబడింది:
Chivkeeb 38: HNJ2000
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2000 United Bible Societies. All rights reserved.
