Lukéstar 13
13
1Othé alé džené, phenén: O Pilátos čhordjás o rat e Galilejéngoro, odolká kána čhinénas zvérovja, e Devléske armagáni.
2Vakerél lénge o Ísus: Pakjén‐li tumé kai odolká Galileídes e averéndar pó‐but kerdé bezexá, sóske edekí džezáva thovén lénge?
3Tuménge phenáv: Nanái, amí te na kerén raskáivane, sáoŗe kamerén‐da.
4Ili odolká deš‐u‐óxto manúš, kai peló o kher uprál len ándi Síloe, thai mudardjás len, odolká pó‐but‐li siné dlŭžniki, ili pó‐but odolká kai bešén ándo Jerusalím?
5Amí tuménge phenáv: Nanái; te na kerén raskáivane, čoká kamerén sáoŗe.
6Phenél‐da adiká paramísi: Siné jek manúš, isí‐da les jek xelín — bárjol maškár e rezénde. Avél, plódos ródel uprál léste, nan’ arakhjél.
7Phenél e rezengeréske: Áke, isí trin berš aváv, adalké kaštéste plódos ródav, nan’ arakháv. Čhin‐ta les. Sóstar mukjés te bárjol ándo rezá?
8Amí vakerél adavká: Góspodi, muk‐ta pánda akavká berš dži kai xranljaráv thai sa gošnjá dav turjál les.
9Thai mošte del plódos, amí te na del, pále kačhinés.
10Thai sikljarélas ándi kangerí sabatoné.
11Othé isí jek džuvél, isí deš‐u‐óxto berš uló láke nasfalipé — o bizoralipé, sa bangí isí, naští vŭ́zdel po šeró.
12O Ísus, kána dikhél la, paš pes vikínel‐la, vakerél: Džuvlíje, nakló to nasfalipé.
13Thovél kai thovél pe vastá dži láte, andékhora právo ulí adiká, ašarél e Devlés.
14Rušél e Isúske e kangerjákoro načálnikos, sostár e sabatoné sastjardjás, phenél e narodóske: Šov diés isí, te butjarés, odolké diesénde an‐ta te sástjoves, amí sabatoné nanái.
15Phenél o Ísus: Tumé litsemértsi. Jek murš sabatoné e jemlikjátar nanái‐li te phuterél pe guruvés, thai pe xerés, tha t’anél len panjé?
16Adiká‐da, Ibrahiméskeri čhai kai isí, kai isí deš‐u‐óxto berš phándel‐la o Bengk, sabatoné ne‐li kaphutérdjovel?
17Adalká alavá kána šunén o protívniki, sáoŗe ladžán, thai lošánel o naródos e čudipnánge.
18Phenél o Ísus: Sar isí o thagaribé e Devléskoro? Sar te phenáv les tuménge?
19Isí jek kotoroŗó xardálos, lel les o murš, čhivél ándi phuv, bárjol o xardálos, jek baró kašt ovél, avén o čiriklé, bešén ándo šúmes.
20Pále phenél: Sar te phenáv tuménge so si e Devléskoro thagaribé?
21Isí sar i majá, lel la jek džuvlí, lel trin kutía aró, ándo aró garavél i majá dži kai ovél šutló.
22Geló kai geló, dis dizjáte sikljarindós, lel o drom ta te džal e Jerusaliméste.
23Phenél léske dek dženó: Ábe Baréja, xaŗí‐li isí kortárdjoven? Phenél:
24Ker‐ta te des andré ko tsíkno vudár, sostár tuménge phenáv, but kamangén andré te den, amí but naští kadén andré.
25Amí o Góspodos kána uxtjél, andré del, phándel o vudará, togái kalén, katérdjon avrjál, o vudará kačalavén, kaphenén: Góspodi, Góspodi, phúter aménge. Ov‐da kavakerél: Nána pendžaráv tumén, katár sinjén.
26Kalén, kaphenén tumé: Amé mamúi túte xaljám, piljám, e droméste sikljardján amén.
27Ov‐da kaphenél: Phenáv tuménge: Nána pendžaráv tumén, katár avén, džan‐ta mándar, gorkálen‐be!
28Othé roibé k’ovél, lisdraibé k’ovél, tumé kána e Ibrahimés, e Isakós, e Jakovés‐da kadikhén, e prorokén‐dani, ándo thagaribé e Devléskoro kai bešén, amí tumé na‐avrí čhíftjoven.
29Thai kamavén katár o istókos thai katár o západos (o báti), katár o jepkáš diés thai katár o jepkáš arát, ta te bešén ki mása ándo thagaripé e Devléskoro.
30Áke k’oovén o palalutné anglalutné, thai o anglalutné palalutné.
31Odolká óra alé džené rašajá, phenén léske: Čhif‐tut athár, thai dža‐túke, sostár mangél te mudarél tut o Heródes.
32Phenél o Ísus: Džan‐ta, vakerén‐ta adalké lisitsáke: Áke bičhaláv andrál e manušénde e bengén thai sastjaráv e manušén avdiés, tasjá, amí ko tréto diés kakérdjovel.
33Amí avdiés, tasjá, thai tó‐tasjá trébe te phiráv, sostár naští ovél, kai perél thai merél jek prorókos andár i Jerusalím.
34Ái Jerusalím, Jerusalím, marés e prorokén, lénge baŗén čhivés kai túke bičháldjoven; kití drom mangávas te kídav e čhavén tiŗé, sar kídel pe čhavrjén i kaxní telál pe phakjénde, amí tu nána mangésas.
35Áke kamačhól pústo tumaró kher, thai phenáv tuménge: Nána kadikhén man dži kai avél o diés kána kavakerén: T’oovél ašardó ková avél ándo aláv e Gospódskoro (ándo nav e Raiéskoro).
ప్రస్తుతం ఎంపిక చేయబడింది:
Lukéstar 13: ARL1912
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
