Matthieu 8

Jésus yôô kôkôwéfue kun dyuédyué

(Marc 1:40-45; Luc 5:12-16)

1Ke Jésus fin ôka'n su lo dyrali'n, swran kpanngban kpa bé suu i su. 2Kôkôwéfue kun wa kôtôô i bô, o sre i ke: Ndya yatyi, yô man n kôkôwé'n wié wéiin. 3Jésus tinnge i sa'n kenniin, o sé i ke: Man ti, mon o kôkôwé'n wié wéiin. Kpekuun kôkôwé'n wa wié i wun. 4Ye Jésus sé i ke: Man sa so'n tran o klun, nanh kan klé swran fi, sannge fo o wun kô klé Nyanmien nyrun dyranfue'n, nan fo o wun asô bôle liké nga Moïse kléli'n fa man, man bé wun ke w'a yô dyuédyué

Jésus yôô sôndya ya sukpen'n i gbanflen'n i dyuédyué

(Luc 7:1-10)

5Ke Jésus dyuu Capernaüm b'oh wluh klo nun'n, sôndya ya sukpen kun bee i wun le o kan klé i aunnvue su ke: 6Ndya, n gbanflen'n wa bubu o la awlô lo, i wunnen'n yô i ya dan kpa. 7Jésus sé i ke: É wo, nh kôh yô i dyuédyué. 8Sôndya ya sukpen'n sé ke: Nannan, o ti'a bo a tu o dya ko min awlô loo, sannge kan nde kpole kunngba tye, ye n gbanflen'n yôh dyuédyué. 9Afin m bo swran'm bé sié min'n, n kusu n sié sôndya mun, se n sé kun ke o o'n, o ko, ye se n sé kun ke o bla'n o ba. Se n sé n gbanflen'n ke o yô liké wié'n, o yô. 10Ke Jésus tii nde so'n, o bôô i nuan dan kpa, ye o sé bé nga bé su i su so'n bé ke: Nanwle, Israël nvlé'n nun bobo man wu'an swran fi b'o lafi n su dan ke nga saa. 11Nh kanh klé amun ke, swran sunman bé wa fin wia afilie nin wia atolie béh bah, bé nin Abraham, nin Isaac, nin Jacob béh tranh table'n su Nyanmien men'n nun. 12Sannge bé wa fa bé nga bé ti diéwa men so'n nun'n yi bé guasu lo aôsin'n nun, kan béh sunh, béh dih bé dyé lo'n. 13I sin Jésus séé sôndya ya sukpen'n ke: Ko mon o yô ke a lafi n su dyu'n sa. Ye i ôsu kunngba'n nun i gbanflen'n yôô dyuédyuéo.

Jésus yôô Pierre sia bla'n i dyuédyué

(Marc 1:29-31; Luc 4:38-39)

14I sin Jésus wluu Pierre awlô lo, o wuun ke ayre a gue i sia bla'n wun, wa la. 15O uti i sa'n, ye ayre'n tuu i wuon. O dyaôli, nan wa kunnde liké a men.

Jésus yôô tukpatyefue kpanngban bé dyuédyué

(Marc 1:32-34; Luc 4:40-41)

16Ke alie dyoli'n, bé fa swran sunman bo asie usu a satyi bé'n blee Jésus. Ke o idyoli asie usu so mun'n, bé dyaô swran'm bé su, ye o yôô tukpatyefue'n kwlaa bé dyuédyué. 17I so'n nun nde nga Nyanmien nuan idyofue Ésaïe kenniin ke: «I bobo faa é wunnen ya'n, ye o fa é tukpatye'n suali'n,» o kpeen su.

Bé nga bé klô ke béh suh Jésus su'n

(Luc 9:57-62)

18Ke Jésus wuun swran kpanngban bo bé sin yie le'n, o sé ke: Man é sin nzué'n bué kun lo. 19Mmla kléfue kun bee i wun le, o sé i ke: Ndya, lika kwlaa bo a ko'n min nin wo éh koh. 20Jésus séé i ke: Sôlôngbi'm bé le kunman la nun, ye anunman'm bo bé tu sin'n bé le lawle, sannge m bo n katyii Swran'n n le'a lika bo n la nun dé wunmien bo kaan. 21I sonnzonfue'm bé nun kun kusu sé i ke: Ndya, man min atin man n kô sié n si ka. 22Sannge Jésus sé ke: Su n su. Yatyi bé bo bé wu'n man bé sié bé swran mun.

Jésus kpeli aunngban dan'n

(Marc 4:35-41; Luc 8:22-25)

23Jésus fuu alié'n nun, nan i sonnzonfue'm ba fu i sin. 24Kpekuun aunngban dan kpa kpee fete'n su, o man nzué'n bô tra alié'n su, sannge o su lafi. 25I sonnzonfue'm bé wunngéé i wun le bé tinngélii, bé sé i ke: Nannan, dé é ô é su wu ô! 26O usaa bé ke: ?Nzu ti ye sre kun amuon? ?An lafi'a n su tio? O dyaôli, o idyoli aunngban'n nin nzué'n, nan ba dyran diin. 27Bé nuan bôô bé wun, nan ba usa bé wiéngu ke: ?Nzu swran yele nga bo aunngban'n nin nzué'n nin nzué'n bobo bé srôé soo?

Jésus yôô swran bo asie usu'm bé satyili bé'n bé dyuédyué

(Marc 5:1-20; Luc 8:26-39)

28Ke o dyuu nzué'n i bué kun Gadarafue'm bé men'n nun'n, swran nnyon bo asie usu satyii bé'n bé fin ndia su sua'm bé wun lo bé bee i atin kpale. Bé liké yôle yô ya kpa, o man swran fi kwla si'an le. 29Bé kpan use i ke: ?Nyanmien Wa Yasua, nzu nde ye o ô é nin wo yé afieon? ?A baa ke a wa dun mmua klé é nyrennen, nan é nyrennen kléle ble'n wa dyu? 30Kokoti fi dan kpa kun bé ô mmua lo bé su didi. 31Asie usu'm bé sree Jésus kpa ke: Se a kan é bô'n man é atin man é kô wlu kokoti fa nga'm bé nun. 32O séé bé ke: Anh wo! Nan ba dyaô bé su ba kô wlu kokoti so'm bé nun. Ye kokoti akpasua wunmuan so'n bé wanndi trôô fete'n i tyéndyé'n b'o séli pia'n, nan ba gua nzué'n nun ba wu. 33Bé nga bé kankan bé'n bé wanndi oo klo lo bé bô kaan sa kwlaa ng'o yôô kokoti mun'n o nin sa ng'o yôô swran bo asie usu'm bé satyii bé'n kléé bé. 34I so'n ti, klofue'n kwlaa bé fité oo Jésus atin kpale. Ke bé nin i yiali'n, bé sree kpa ke o dyaô bé men'n nun.

ప్రస్తుతం ఎంపిక చేయబడింది:

Matthieu 8: BLNT74

హైలైట్

షేర్ చేయి

కాపీ