Matayu 6
6
Kine Kine Sola Mawa Mawa Waneka Mi Okangei
1“Ŋine kisi maep urata kine kine maine eya ŋei ŋerep eŋane deeno mau, edo ŋune more, solaŋine mawakei wane, ŋine misuk maikei. Ŋine urata kine kine korop iwa ŋei ŋerep eŋane deeno mau, solaŋine mawakeiwo, yemo ŋine baŋ eya wane lewine Magaŋine qeliwo gemaike, eŋano ŋine mane mi makei.
2“Eya wane ŋine kine kine mane ŋei mane wanap aboŋine midaine manbe ra, yemoŋine ukat suwa didiwo, yale misuk okangei. Kisi maep ŋei isisine edo lewa lewaŋ urumgo so numa suwaino okanmami, eŋe ŋei ŋerep edo one more mawa ongei wane, yale okan okanmami. Ŋine yalewa mi okangei! Eŋe eya okanmami eya wane lewine mo korop qoleon wareke. 3Ŋo ŋine yemo wet maep, qom menaŋ qom borik urata maikei, eya mo yalewa ŋei mane wanap aboŋine midaine qesiŋkawe ra, yemo ŋine sanka siu siuko qesiŋkau, kimaŋine oso ŋino gemaike, eŋe eya wane kine misuk desiyake. 4Eya yemo baŋ geŋone bonepŋone okaniyake, paki Magaŋone qeliwo gemaike, eŋe kine kine onokaka bonepŋoneka okanmaine, eya oŋoka kaki paki lewine baŋ naso qoi qoino qoleganiyake.”
Meŋe Meŋen Wane Kine Kito Edange
5“Ŋine meŋenkawe ra, kisi maep ŋei isisine eŋe yale misuk okangei! Eŋe lewa lewaŋ urumgo ŋei ŋerep eŋane kaitko wiye okorau paki, meŋenkakei wane, so numa qesi qesikino ŋei ŋerep edo one more mawa onikei wane on okanmaike. Iwa yale desikei! ŋei ŋerep eŋe one mawaon okanbi, eyaŋo lewine ene okangi, mo korop qoemaike, Kaisaleŋo baŋ lewineene mane mi qole-oniyake. 6Ŋo ge meŋen-kakenane okannom paki, urumŋone koto waket more, madetŋone kitokene, paki Magaŋone deŋo mi kakaine, eŋe meŋenkakene. Eso Magaŋone eŋe onokaka bonep okanmaine, eya kaki paki, lewine baŋ ukude naso iwao me qeliwo baŋ qoleganiyake.
7“Meŋe meŋen ŋino don loutne wele midaine misuk dapore meŋenkakei, me ŋei edo dere mawaŋunikei yalewa dere wet yalewao more misuk meŋenkakei. Yalewa eyamo ŋei kisi maep midaine, qelaŋ Waom don mane kotoeno mi pamaike, edo meŋenka okanmami. Eŋe iwa yale wetkeu paki meŋenka okanmami, maine na Kaisale meŋenkawe eŋe noŋom meŋenkamaile eya wane detnaniyake. 8Eya midakaka, ŋine yalewa dere meŋe meŋen kiroine ra kirowone mi meŋenkaikei, Magaŋine eŋe onokaka mikepka ziyage meŋen-kamami, eŋe mo detmaike. 9Eya wane ŋine iwa yale ra meŋen-kakei,
‘Ŋenane Magaze ge qeliwo metmaine, geŋane eŋetŋone eya ŋenano koboboine payake. 10Ge koto baŋem kepe baŋem Waom okan-ŋonnom, qeliwo geŋane aŋa tewe tewek pamaike, yale waka iwa kepeo ŋenano wakoniyake. 11Ge ukude ŋaraze rokopzo ŋebonikene, 12ge borikineze eya korop qeliŋ warekene, ŋene yaleka matali ŋonmami, ŋei yewa eŋane borikine ene qeliŋ waremaine. 13Ge liwe liweko misuk bira-ŋonikene, ge siluŋ borikino ŋine makok-ŋonikene.’
14“Ŋine ŋei ŋerep borikine okanŋunbi, eŋane sot turuŋ qeliŋgeiwo, yemo Magaŋine qeliwo gemaike, eŋe yaleka ŋinane sot turuŋine naso iwa so baŋ naso qoiqoino qelige ŋiboniyake. 15Ŋo ŋine natne eŋane sot turuŋ mi qeliŋgeiwo, yemo Magaŋine qeliwo gemaike, eŋe baŋ naso iwa me naso suwaino yaleka eŋe ŋinane sot turuŋŋine okanmami, eya baŋ mi qeligeyake.”
Kisi Maep Wane Sawe Gege Wane Kine Edange
16“So ŋine kisi maep wane sawe gekei, naso yewao kaitŋine zoileki kisi maep ŋei isisine eŋane masi misuk okangei. Eŋe lolike ariu, ŋara wane seukmami yale kaitene onbi paki, ŋei ŋerep eŋe sawe gemami, yale dere ebongei wane yale okanmami, ŋine iwa yale desikei! Eya wane lewine eŋe mo korop mau qoeke. 17Ge kisi maep wane sawe gege wane ŋara midaine ge arikene, naso yewao kaitŋone sauke, so leweŋone yasokene. 18Yale okannom, ŋei ŋerep natne eŋe ge sawe gemaine, eya wane kine maine mi detkei. Geŋane Magaŋone deŋo mi kakaine, eŋe wekuŋo baŋ desiyake. So Magaŋone eŋe ge bonepŋone kine kine daleo mamaine, eya kaki paki, lewine baŋ qoleganiyake.”
Wetŋine Qeli Moriyan Wane Mosikei
19“Ŋine aboŋ kine kine loutne iwa kepeo misuk more maguke wakei, eya sip kine kineŋo ki barakeyake, so weŋemine zeki paki barakeyake, so kobu mama eŋe ra barake waket kobu ma arikei. 20Eya wane turuŋ, ŋine wet maep wane aboŋ kine kine, ŋine maine weti qeli kotino pamaike, eya more maguke wakei, eya yemo sip kine kineŋo mi ki barake mataliyake, so weŋemine mi zeyake, so kobu mama edo ra barake waket, kobu mi ma arikei. 21Aboŋ kine kine ŋone qeli kotino simile so bile mayakakatne, yewaoka wetŋone motnom, naso baŋem pa ariyake.”
Sola Wane Kiwa
22“Deŋo sola wane kiwa yale okanmaike. Deŋone maine payakeo, geŋane solaŋone korop qelaŋan ŋoka watke payake. 23Ŋo deŋone boriyakeo, yemo solaŋone korop eyamo baŋ panaman koto qeka maka okaniyake. Eso eya wane rokop kotoŋono qelaŋan pamaike, eya komayakeo, yemo panaman i zok manerop wakongangi, qeka maka okangene!”
Ŋei Wekuŋo Ŋei Waom Etke Erane Qelit Maine Mi Qeyake
24“Ŋei wekuŋo ŋei waom etke erane qelit maine mi mayake, eŋe baŋ mane qikkaki paki, mane wet maep okankayake, eŋe baŋ mane wano makatake more, mane ŋadek-kayake. Ŋine Kaisale wane qelit so wesi urata orodoŋka maine mi makei.”
25“Eya wane na ŋidanbe detpi, ŋine ŋara so doku kine kine me takot lap lap solaŋine qekat kekei wane ŋaŋaeu paki, onokaŋo qesiŋ-ŋongi gekene ra, gegeŋinane dere mezet mi okangei. Gege ŋine eya mo manerop wele, eyaŋo ŋara yuwankamaike. So solaŋine eya eŋe yalewaka eŋe manerop wele eyaŋo takot laplap yuwan-kamaike. 26Naŋi onbi riwe ari sari gemami, eŋe ŋara mi ebot okanmami, eŋe ŋara mau waki maune ŋara urumgo mi mot okanmami. Magaŋine qeliwo gemaike, oŋo wareongi, ge okanmami. Ŋine leweŋine zok manerop suwaine, naŋi eŋane rokop yuwan-onmami. Magak qeliwo gemaike, oŋo ware-ŋunmaike. 27Ŋinano ŋine mane maŋo koma natne koso manerop takotke geki paki, eya wane maine dere mezet okane geyake. Midakaka!
28“So onoka wane takot laplap wane zok dere mezet okanmami. Ŋine onbi, eki zubaine zuraune daleo zurak okanmami. Eŋe takot laplapenane urataine edomka mi ma okanmami. 29Ŋo na siluŋ ŋidanbe detpi, Solomon eŋe aboŋine suwaine ma geke, ŋo takotine kibi maep korop, eki zuraune iwa wane rokop mi ma geke. 30Iwa mo Kaisale oŋom touk zubaine takotene biraon okanmaike. Touk eya mo ukude iwa okoramami, wane qaekiwo yemo mida lele arikei, gerep koto qakeu waketpi ezoki siukwarekei. Wane eŋe ŋine takot manerop mi qorot-ŋuniyake me? O, mali malip nigagatneka ma gemami! Ŋine dere mezet mane misuk okane gekei! Eya mo yeine! Waom Magak, Kaisale eŋe mo detmaike, eŋe baŋ ŋiboniyake.
31“Eso yalinane, ŋine kiyeke dere mezet mi okane rakei, ‘Ŋarane diyao ŋine sariki, nekale. Me dokune diyao ŋine maratka nekale. Me takot laplapne diyao ŋine ma au gekale.’ 32Kine kine iwa yemo korop qelaŋ edo eya wane naso baŋem ra okanmami. Magaŋine qeliwo gemaike, eŋe ŋine kine kine iwa korop ŋaŋaemami, eŋe mo det waremaike. 33Eya wane turuŋine yemo, ŋine kine kine kepe wane kutno pamaike, eya wane dere mezet mi okane gekei, ŋine qeli gege togon wane aboŋ so kine kine onokaka Magakŋo wetkemaike, eya makei, pakimo eŋe kine kine natne kepe iwa wane korop, eya oŋom baŋ ŋiboniyake. 34Eso yalinane qaeki wane dere mezet mi okangei. Qaeki wane dere mazet eŋe baŋ qaeki oŋomka rokouno dere mezet okaniyake. Kaiweine kaiweine eyaŋo umatpae ma sarimaike, eyao misuk takotkekei.”
ప్రస్తుతం ఎంపిక చేయబడింది:
Matayu 6: onsNT
హైలైట్
షేర్ చేయి
కాపీ
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.