Máciya 28

Yéesu li ayitowul li kaketumuu

(Maak 16:1-10; Lík 24:1-12; Saŋ 20:1-10)

1Hunak hukaten húyiiyaayahu hata Kusuwifaku, li hunakahu hútinaalahu hata esimenayi, Mali ata ésukayi yata Madala li Mali aahu li kujow li bújom bíb bajuk huyaakahu. 2Muñeˈe etaamayi li eyaan egoloo ŋáa’. Amalaka ata Amaaŋenawu li áwalowumul li emitayi áŋejul, li abakken hugisaahu akaan li kakaŋ ban li abah li ho. 3Kambuwaku kata amalakaawu li kuleñ loon kawiwijen emit. Wañawu woola li uhiit falala’ loon búbil. 4Kusollaaliyaku kalakomuu kafooyaku kata huyaakahu li kúkoli bil gay li kunaak kuteelen ban li kunokoo loon bukan kakete. 5Bale amalakaawu li aan kanaalaabuku:

— Sákoluul, mata li haase een Yéesu an kubaaŋumuu li ekuluwaayi jiŋese li akila. 6Alet taate. Layitowuuyitowul li eketayi loon alob momuu. Jibil jijuk tan kuhintenoolumuu. 7Jijow cab joon kúgoomaku koola: «Layitowuuyitowul li eketayi, ban lajowe ló ajow akobuul Gálile. Bo jommuu li jijukool.» Wahawu unwe libajumuu ilobuul.

8Mal̥egen kanaalaabuku li kúfulul li huyaakahu li esommen li ekole ló, bale foof li ésuumahukow yáamak, kutey kujow kulob kúhebenaku kúgoomaku kata Yéesu. 9Yéesu li ayaan abil kufam ban li aaniil:

— Lisaafuul!

Kanaalaabuku li kúlohulool ban li kujok kootaku koola min kumanenool. 10Muñeˈe Yéesu li aaniil:

— Sákoluul! Jijow joon kutuyom kujow boot li etaamayi yata Gálile. Bo kommuu li kujukom.

Kulimaku kan kusollaaliyaku kulobumuu

11Nan kanaalaabuku kulakomuu ejowayi, kukee li kusollaaliyaku kalakomuu kafooyaku kata huyaakahu li kujow boot li ésukayi, kujow kukitten huhaanaahu hata élambaayi wahawu feh wabajumuu. 12Huhaanaahu hata élambaayi li hujoj li kunahaanaku kata ésukayi. Li kujamoo min kusen kusollaaliyaku sídalam sáamak. 13Nan kuseniilumuu sídalamasu kuban li kooniil:

— Fan joon ésukayi kúgoomaku kata Yéesu kubiibil li huk kúkuwet ehuluŋayi yoola bukuluul li kámooli. 14Li bil nokoo loon águubelunaalawu Filat ajame mabajumuu, áloli fan jihaas min jommuu li jilobool jakum bil ayokenuul.

15Mal̥egen kusollaaliyaku li kuŋa’ sídalamasu ban li kukaan loon kulobiilumuu. Mó lí múji wahawu wan kusollaaliyaku kulobumuu ésukayi li uloŋ li ujamo li Kusuwifaku boot síyaat.

Yéesu li áfu’ kúgoomaku koola

(Maak 16:14-18; Lík 24:36-49; Saŋ 20:19-23; Bakaanelabu 1:6-8)

16Fúlum tó, kúgoomaku kata Yéesu kuŋen li ano, li kujow boot li etaamayi yata Gálile li huyuuyahu, tan Yéesu aaniilumuu kujow. 17Nan kujukumuu Yéesu li kúkuntuŋ hákilool min kumanenool. Bale kukee li buko li kúwettoo. 18Yéesu li ákoojuliil min aaniil:

— Ateemit lasenonsen kayile kanookan li emitayi li etaamayi. 19Jijow boot bata bukanabuku feh kammuu tanootan li etaamayi, min jikaaniil kulako kúgoom kúmbaam. Ban li jíbatiiseyiil li kajawaku kata Atuubaawu, li kata Añiilawu, li kata Buyinumabu Banabaabu. 20Jiliikeniil kátuul kulimaku feh kan ilobuulumuu. Jihaas joon ínje humumom ummu li bukuluul nanoonan boot yok nan adunaayi yommuu li eban.

ప్రస్తుతం ఎంపిక చేయబడింది:

Máciya 28: cskDBL

హైలైట్

షేర్ చేయి

కాపీ