RAPHA HIQWA LAK 7
7
Rathup Jüjang
1 Tatiwe raq Nowaq ma nguto, “Ümjamtitiim tarü nong nong maq lai na düwakiq. Ngi raq mangjong tlot li na ümniili riikhaqli kloti mitting maiqse humkang. 2Ümniirai pii mak phan asii nyamse phantek kiiwa phan miishi akaü ashi ali ashi anai nai kra shea wanlaq. Shatmaq siimak phan nyamse phan kiiwiika phan shi wa akaü ashi ali ashi jura shishi kli lam wanlaq. 3Kiimahali wushi phan kiiwa phanshi wa akaü ashi ali ashi anai nai miishishi lam wanlaq. Arka phanrap nyamse phan sitlaq nai wushi phan sitlaq kra mangjong hiq na alai tiipu wan nong miitu ratlo. 4Ümchaü ranaiq armaq ra miishi sijai na, Ngi raq ra mitiijunha. Kra rajun ka raroq blai ranaiq rawa tinkhit mijun. Lata Ngi raq atra wiitsitsü phan ümchuwa klo kang kra wiita miqchup mitiithen baiqha.” 5Kiimaq Nowaq raq phanrap ka Tatiwe raq aming kuqtaq kra phan phan kloto.
6Kra mangjong hiq na rathup jüjang wantaq akhing na Nowaq ka rawii shitrok maiq riito. 7Apaiq nai achak, kiimaq asetiim maiqwe sere kiimaq tsang-nyung tiim thun ka rathup jüjang wantlaq kiiwa tiichhii miitu lai mong na nyap wanto. 8Kiimaq ali ashi kiimaq akaü ashi, phanrap phanrii nyamse phan wa nai wushi phan wa, piimak asii phan wa lo riimakla, siimak phan wa lo jiimin, ali ashi akaü ashi kriithun ka, 9Shiikeawe raq aming kuqtaq kra phan phan Nowaq rai lai mong na düwan damto. 10Kra jai maq ramiishi siraüta rathup jüjang ka saü wanto.
11Riita Nowaq ka rawii shitrok maiq she angu na, kra rawii wa jipi lünai she angu na kra jipi wa jikham ra miishi ranaiq na, hiq mong nyang wa kham jong hea sitlaq kra khamkuk thun ka wiita she blun phok wanto. Kiimaq ra wa jü lüm wan chang kilü thun ka wiita she dibaiqto. 12Kiimaq rajun düthaü dülii she raroqblai ranaiq rawa she pükhaü kham raü ikha jun wanto. 13Kra ranaiqsii hali Nowaq nai tsang-nyung ka tsangsetiim wetsam Shem, Ham, kiimaq Japheth, kiimaq tsang-nyungtiim rai lai mong na düwanto. 14Tsangshiq rai nong nong phanrap phanrii ngamsaü ngiqse, jam nyamse kiimaq rum-nyamse, ajong kiimaq aran, kiimaq phanrap phanrii wushi phan wiita düwanto. 15Ali ashi kiimaq akaü ashi, atra wiitsi tsü phan wa Nowaq rai lai mong na düwanto. 16Shiikeawe raq aming kuqtaq kra phan phan düwanto. Kiijiishe Tatiwe raq Nowaq düwan jai na kilü ka shaq baiqto.
17Kra rathup jüjang ka raroqblai na saüli mawanto. Kiimaq kham ka tsaühea she mawanto, kiimaq lai ka kham thaq niishe phü wanto. 18Kham ka tsaühea she riiwanto. Kiimaq lai ka kham thaq niishe mophü phüli she khamthaq na phü wanto. 19Kham ka tsaühea langlang she mawanto. Raüta pum thun chohea pinthum kiimin wiita kham raq lambaiqto. 20Kham ka mawan ruqli mawanto. Raüta diilu pinthum pum thun kra lamwan raüta pum khuthaq na kham ka mitar miishi ra na saüli she mawanto. 21Hiqraikhü na siti atra phan kunli jiimto, maiqse angu, ngamsaü ngiqse angu, kiimaq wushi phan angu kunli jiimto. Atra tiichongtaq kriika Nowaq nai apaiq rai laimong na sitlaq thun kriili tiichongto. 22Hiqraikhü na sitlaq wiitsitsü phan kunli jiimto. 23Tatiwe raq hiqraikhü wa atra phan wiita tiithen baiqto, maiq phan ngusaq, ngam phan ngusaq, kiimaq wushi phan ngusaq wiita tiithen baiqto. Atra tiichongkitaq kriika Nowaq nai apaiq rai ümchuwa lai mong na siti thun kriili tiichongto. 24Kham ka raroq shishi ri raroqbiingi ranaiq na saüli rüphaho mak dea riito.
ప్రస్తుతం ఎంపిక చేయబడింది:
RAPHA HIQWA LAK 7: TANGSBSI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
