BON 27
27
Poulwn Sipai tulungv Romanwb Bool Wgnam
1Kokw so ngulv Italib wdub nyipa ku hvl goobwq kunum. Bulv Poulwn la nyuum ata go Bir abwg sipai tulungv hvl eminam Roman sipai tulug saab Juliyas alaqb gvqlwq jiknum. 2Ngulv Adramitiyam hoqgv Asiya gvdag iss jaaj joonu koob wnv wta bo iss jaajib caonv wleqnum. Tissolonika hoqgv Mesidoniya nyi ak Aristarkas ngulug lvgab wbanum. 3Loogwn so ngulv Sidon ho wc kunum. Juliyas Poulwn anya banv mwam mwwg ajin tulungam gaql kaadwb jinum, ho mwam ajin tulungv jis doonam mam jinum. 4Ngulug wga hoqgv dooiyv ngulam ywtur ko-gab ngulv hoqgv wknv dooi ywciqko cumciq daiyab Saipras diip loog gonwb wknum. 5Ngulv Silisiya sa-svlongam la Pampiliyangam jaapeql jaabo layil Lisiya gvdag Mira bopamho haanum. 6Mira ho kepten saab akv Alekjendriya hoqgv Italib wta bo iss jaaj ak kaapa tvl mwv ngulam hoq ak ho cvvsiq mvnum.
7Ngulv apo jaqg nyinyiaq nyinyiaqb jaaknum. Kokw so ngulv nyelin dors alwb vs-axaqgob nyiknv Nida bopam mam wc kunum. Dooiyv ngulam meegkam wmab mutur lalal nyigam gab Kwrit diipwb cumciqko Salmon Tuukiqb jaapeql jaalnum. 8Ngulv sugur bviywr hvnamb jaabnv vs-axaqb nyiknv Lasiya bopam hoqgv aado yooma ho doonu ko cumciq sel ngvk hvl benamb haanum.
9Ngulv oyu jaqgo hoqho sa-svlongv jaadwb nyima daqnam gob doonum, hoggab nyedar dard moodv wleq kunum. Hoqgab bulam soq sam tomswrnum, 10“Nyi tulu, ngo kaanamv ngulv soqgv wnam si almab nyitayin, sinam gobkam nyikinpa, ngulug dupum dvrabpv la jaajv kam dubnam gob nyikinpa, hoo ngulug sigvkam dooiyinpa.” 11Hvbmabde sipai saab kepten akv benam mam la jaaj at ak hoqg benam mam tvjw banv Poulwg benam mam tamanum. 12Cumciqko selho tapam poolam kvsil hingwl doodwb haajaqb al yoomanum, hoqgab nyiv jaqt yaanv sa-svlo hoqgv leng dvl Poinik gvdab wc dvb nyibaloqkam alhimpa mwwnum. Soq cumciqbo Sel si Krit diip hoqg ako bvla dou-haagab, hoqgv odum bvla dou-haagab daiyab tuunum, ho bulv tapam poolho hoqho doonam.
Sa-Svlo ho Doogum Dooi Wnam
13Dooiyv nyinyiaq nyinyiaqb ako hoqgv ywrabnum, bulv mwwnamv bulug mwwk jaqb niqtuq nyilin tayin mwwnum. Hoqgab bulv jaajam tooky haqgab banv rwwtul apnam mam toosuq layil Kwrit diip bviywr bviywrwb jaal ignum. 14Hvbmabde oyu maadab dou-caga odum hoqgv “Dou-caga odum” dooi ak diip hoqgv vc alwb ywl banv ywrabnum. 15Hoq dooiyv jaajam yidaq yukam, jaajam dooi taqcib tuurwq mvdwb nyimanum, hoqgab ngulv ham nyika tvl axianum. Kokw so jaajam sviyamb nuul wg mvknum. 16Ngulv diip anyo ko Kauda ako taqcib jaal yukam ngulv kvsil dook ata go kaapanum. Hoqho ngulv nyid-nyid kunv jaajho paqbaqnam swp tulungam poqsuqnum. 17Bulv ham poqsuq banv jaaj aoho seeca banv osongv vc alwb raqtinum. Bulam lokam Libya gvdag xuqx dookho iss bocor koob kvtin nuulin twqkam dvn mwwl bos sonum, hoqgab bulv dupum dvrab pam meeg ogum dvb seepaq tvl jaajam dooiyam nuul wg mvnum. 18Doogum dooiyv hvraqb ceceqb wdul doonum, hoqgab loogwn so bulv jaaj hoqg dupum dvrab pam tuugin issib hurlwqnum, 19hoqgv loogwn hookam bulv jaaj hoqkam mvn nyin nanam atv issib hurlwqnum. 20Ngulv apo jaqg doonyiam la takaram kaapa kumab nyiknum, hvbmabde dooiyv hvraqb vc alwb yidul doonum. Kokw so ngulv mwlwngv nyitar tukul ngulug swwgam ludum kunum.
21Kokw so nyi tulungv apo jaqg dvma twwma jaqb wxo kokw so, Poul bulug agaho daqrab banv benum, “Nyi tulu nulv ngoqg benam mam tatwl Krit diip aloqgv wmab axia nyiloqkam ngulv soq mwlw hentwr sam hemab hoo yuupaqnam mamkam kaaparam. 22Hvbmabde ngo sija nulam bedwn, haakam alwb mwwto! Nulug pengko hoqgv hiyv akgon jijaqkam yuupaqram, hvbmabde jaaj arongv yuupaq tai. 23Hoggab soi ngoqg xumnam At Pwnbog gumtw ak ngoqg dookub haabnv, 24ngam benum, ‘Bos somabv, Poul! No Bir abwg dook agaho daqky dvb nyitayin, hoo Pwnbog anyangv noqg lvgab wba bo nyi tulu mwlwngam swwm dvb jitayin.’ 25Hoqgab nyi tulu, nulv haakam alwb mwwto hoggab ngo Pwnboam mwwjwdvn, ho soq si ngam bekinam hvbkalam hvraqb nyitayin. 26Hvbmabde ngulam diip golo nuulin tayin.”
27Ai yubyw leq yupy kokw so ngulam dooiyv nwwknv Mediterian sa-svlo ho nuulinum. Ai nywywra ho jaaj mvnbo nyi tulungv, bulv kvtinam jvvnwq gvikun mwwnum. 28Hoqgab bulv issam toolongv nwql xikanum, xikanamv iss urangv loqd lwwg la camnyi gob nyinum, meeg wxo kokw so lokta issam toolongv nwql xikanum, xikanamv iss urangv loqd cam kiya gob nyinum. 29Ngulug jaajv wlw ho tubdaq tai mwwl bulv bos sonum, hoqgab bulv jaaj hoqtul apnan tooky hoq kopy go jaaj kooyu tuur hoqgv hurpoqnum, ho huto namgub xuml kaayal doonum. 30Jaaj mvl wgbo tulungv swpngam issib xwrpoqtvl jaaj wga niqtuq hoqgv tooky hurpoq tadwn hvb nyik-nyipaql keleq tanum. 31Hvbmabde Poul sipai saabam la sipai tulungam benum, “Soq jaaj mvl wgbo tulu si jaaj aoso dooma bvnyiloqkam, nulv swwnyiram.” 32Hoqgab sipai tulungv swp rwwtunan osongam pvpwqtvl swpngam issib paqgeql pvqlwqnum.
33Huto svqtwqb nyid kukho Poul bul mwlwngam mvnyi-moiyul dvs lo meeg dvtwk hvl benum, “Nulv soolo godab aal looyw leq loopy dvb kaaya yoodul dood ku, hoo soq apo bumpw so nulv hog vcwr gokam dvma. 34Hoqgab ngo nulam dvs lo meeg dvtwk hvl mvnyi-moiyul bedwn, hoggab nulv sam sima dvb dvdwb sam nyidwn. Nulug dumpo dum sookin gokam yuupaqram.” 35Soq sam bexo kokw so Poul wtw ata go naabnv bul mwlwg agaho Pwnboam paqtwl pintu banv dvrabnum. 36Kokw so bulv haakam mwwpanv bulv rub vx cirv dvs hoq meeg meegaql dvnum. 37Okum apal jaajho ngulv nyiv lwwnyi gola cam kvn leq ax go doonum. 38Vcw atv dvtar namgob dvxo kokw so bulv jaajam hvrab mvdwb wtw am mam sa-svlob hurlwqnum.
Jaajam Iss Nuudubnam
39Kokw so huto yukho, jaaj mvnbo tulungv kvtinam kaacin maab, bulv Sel hoqgv sugur ak kaapa tvl, aloq kvtinb jaalinl hoqho ap dvb mwwnum. 40Hoqgab bulv tookiam hoqsuqtvl iss hv apaqtvl pwrkubnam osongam toosuqtvl paalam jaaj dumpo toorib torca tvl dooiyam nuul sugurho nuulin mvdwb mvnum. 41Hvbmabde jaajv iss bocorko xuqx dook yaab jaabnv ked hv jaapnum. Jaaj dumpo tuurv kedho xudaq tukul biikmab doonum, hoo kokw so tooriam issiv ator alwb hwqnv tuunyi gob hwqdub kunum. 42Sipai tulungv nyuum tulu mwlwngam hiyv nvkam kvtin jaarab gvdwl keleq mvma dvb mengdwb hvl ywrsnum. 43Hvbmabde sipai saab akv Poulwn mengm dvb mwwmanum, hoqgab mwv bulam soq sam nyim mvma dvb biturnum. Hvbmabde mwv nyi tulungam iss jaalaqbo mwlwngam jaaj hoqgv issib poqlwq gvdwl sugurb otuqb jaalin cootwk hvl gaml jinum, 44nyi tulungv jaaj hoqg svvtaq durtu boam la totu-yoyungam gvbw tvl wmin gvnum. Soq sib nyiknv ngul mwlwngv simab kvtinho lengknum.
ప్రస్తుతం ఎంపిక చేయబడింది:
BON 27: NISS
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Nyishi, DVRWQ PVVB @ Bible society of India 2016
