BON 19
19
Poul Ipisib Wnam
1Apollos Korinti ho doodwkho Poul ked aob wbnv Ipisi ho wcnum. Mwv mwwjwbo nyi tulu ata go kaapanum. 2bulam toxnum, “Nulv mwwjw dvk kokw so Dvrwqbo Yalam kaapa pa i?” Bulv birwqnum, “Ngulv Dvrwqbo Yalv doodnvk hvl, ngulv tapa kama.” 3Poul bulam toxnum, “Hvnyiloqkam nulv hoggub nyil baptijum naanum?” Bulv birwqnum, Jonwg baptijum.
4Poul benum, “Jonwg baptijum hv hvbaloqkam nyic nyia hoqgv wkur kunbo nyi tulu gab sulak, hoo Israel nyi tulungam bulam mwwg kokwb hoodul doonbo akam, Jisun mwwjw tvk hvl benum.”
5Bulv sam tapa tvl At Sw Jisug eminb baptijum naanum. 6Poul mwwg alaqkv bulug dumpo ho idaq yvkam Dvrwqbo Yalv bulug aoho ipoqnum, ho bulv agam oksub benum, ho bulv Pwnbog agam mam bekinnum. 7Bulv nyiv wyw leq vnyi gob nyinum.
8Poul Sinagog nam urab haabnv mwv pool borum paqta go haakam alwb nyi tulungam benum, ho bulam mwwjw mvdwb bid lalal Pwnbog lvpw hatig pagoqkam bekinnum. 9Hvbmabde bulug pengko ho hang vdwbo nyi tulu go doonum, bulv mwwjw maanum, hvbmabde bulv bec-beyal Atwg lamta pagoqkam nyi maqpar aga hv benum. Hoqgab Poul bulam apaqpel buu tulungam mwwg lvgab boolayil Tairannaswg tomswrko nam hv aal looxiam goodul doonum. 10Soq sib akin vnyw nywnyi go nyidul doogam gab Asiya gvdaho doonbo Juhudi tulungv la Nyoodo nyi tulungv At Swg agam mam tapanum.
11Pwnbov swrdorxeqb nyimanam hog mwlwngam bonam Poulwn jitwl nyim dvb jinum. 12Mwwg haaxor tixaq naadwb bvvnam vjam la gv koonam vjam nyi vcbo dookub bwa yukam bulug vcv bulam wleqnum hoo alman yalv kam agab lengknum. 13Juhudi tulu go wkar banv yal alman boam ruqlin bo nyi tulu ngvkam At Sw Jisug eminb soq sam nyitamnum. Bulv yal alman boam benum, “Ngo Poulwg bekar yvnam Jisug eminb gaml jidwn.” 14Bulv Juhudi tulug Nyub Buda akwg Iskeba ngvk hvl eminam ko tuup kvn go soq sib nyil yidunum.
15Hvbmabde yal almanbov bulam benum, “Ngo Jisun cengdwn, ho ngo Poulwg pagoqkam cengdwn; hvbmabde nulv hiyv?”
16Almanbo yalam doogbo nyi akv bulam ruqmin gvbnv yolu paiyaq minsnum, hoo bulam mwv mviyanum, bulug vjam twqjornum, hoo bulam mwv un mvg yukam mwwg nam hoqgv keleqnum. 17Ipisi ho doonbo Juhudi tulungv la Nyoodo nyi tulungv soq pui sam tapanum. Bulv bosnum, ho kokw so At Sw Jisug eminam meeg vi yaiyab yuunum. 18Mwwjw kunbo nyi tulungv haabnv bulug tadwb bulug at atwg nyiknam mam nyi tulug aga hv xaqlin nyiaknum. 19Nyioky mvkybo nyi tulungv vigo bulug potangam bwwkum banv hoq pota torabpam mwlwg kaagaho wm parknum, hoo ham xikum xipal xika kunamv twngkwb lwwyw camg gob nyiknum. 20Soq sib alwb nyiknv At Swg agamv meeg yaiya goopor banv ator yaiyab swwrabnum.
Ipisiho Yolu Paiyaqnam
21Soq mwlw sam nyixo kokw so Mesidoniya la Akaiyab wpeq layil Jerusalemb Poul wdkub mwwnum. Mwv benum, “Ngo alo wxo kokwngam, ngo Roman bopam ngamkam kaadwb nyiky tayin.” 22Hoqgab mwam svka bo Timoti nvla Irastusnvn vnyiam Mesidoniyab kanam tvl, mwv apo go Asiya gvdaho doonum.
23Hoq apo ho Ipisi ho Atwg swwg lamtangam bebnv yolu swcin rooxonum. 24Rup yip pwnbo Demetrias hvl eminam nyem pwnbo Artemis xumkumko nam hoqg murtiam pwbnv mwv twngk vigo bon nyinbo nyi tulu gab paanum. 25Hoqgab bulug hvb bonam nyinbo nyi tulungam goqkum banv mwv bulam benum, “Nulv cengdwn, ngulv soq bonam sam nyibnv nyet tvdwn. 26Nulv atv kaas tas gvdo, soq Poulvk hvl benam nyi aksi hognvkam nyidul doodwn; Mwv begamv nyiig mvnam pwnbo hv jvqtw pwnbo ma, hoqgab mwv Ipisi so la Asiya gvda tvqpwg nyi tulungam vi yannam bigum paku. 27Hoqgab ngulug kor-pam mvnam mvkam nyiita yuku, hoq aoho ngulug kor mvnam sam tanyi-taiya dvb nyita yi, hoq hvvtwqma, xumk nam hoqg koibo nyem pwnbo Artemis nvkam hog xidwb nyikram, ho mwwg ywwnamv la vxig xumnamv Asiya gvda so gvda gvt mwlw so nyiita yukun!”
28Nyi acamv soq benam sam tatwl bulv hang lingtwr twrya nyiabnv sogoq goqrabnum, “Ipisig koibov Artemis!” 29Bopam bumpwngv hur-marab durabnum, yolu dunbo nyi tulungv Poulwg wgnam Mesidoniya nyi vnyiam, Gaius nvla Aristarkasnvn nootu banv bulug lvgab bopam hoqg nyi soomin nam urab boal haagnum. 30Poul mwv nyi nyiitw mvqlw ko dookub haatanum, hvbmabde mwwjwbo nyi tulungv mwam wdub jimanum. 31Hoo hoq gvda hoqg mwwg ajin saab swwnbo nyi tulu ngvkam mwam dookum namho nyi tulug kaagaho mwwg gv vpam kaakin maabwk hvl pui bilwqnum. 32Hoq ditaq jaqho dookum ho nyi tulu go hur-marab gob dubnv: nyi tulu gon asaq asaq pagoqkam goqdunam, ho tuugin pagoq goqsaqkam sogoq goqmin sunum; bulug pengko ho vi yaagwn bulv hoggab hookumnum hamkam cengmanum. 33Nyi tulu gon benum, soq yolu annv Alekjendar, hoggab mwam Juhudi tulungv nyi tulug aga hv daqrab mvnum. Alekjendar daqrab banv mwwg alaqngv meeyabl nyi tulug agaho ngo yolu nyipabo nyi ak hvvmak hvl betornum. 34Hvbmabde nyi tulungv mwam Juhudi nyi goknyi hvl kaacin tukul bulv gamkin gob mwlwngv sogoq goqyin akin gob sogoq goqnam akinam wm swlw duur vnyi paqta go “Ipisig koibov Artemis hvl sogoqnum!”
35Kokw so bopam hoqg dookum hoq xeqn bo nyi akv nyi tulungam binyub kunum. Mwv benum, “Ipisig nyi tulu, mwlwngv cengdwn Ipisig bopamsi Artemisin xumkv doodwn, ho ao gvda toloqgv yoql bo dvrwqbo wlwngam doogdvn. 36Hiyvkam sam cengma hvl benyiram. Hoqgab nulug hangv sija nyinyiaq tuku, ho hog mwwkub saqxeq maab hog akukam nyimur nyial nyimabv. 37Soq nyi tulu si bulv ngulug xumk hoqgv hog gokam dvco twwla jikam ma ho bulv ngulug pwnboam bec-beya lakam bij maasjaqkam bulam nulv si boa paku. 38Hvbmabde Demetrias la mwwg bon nyibam nyi tulungv hiyv akgon yolu bes dood nyiloqkam lood aalv doodo, ho saab tulu ngvkam doodo, hoq aalam nulv akwn akwnwg yolu doonam mam bemin suto. 39Hvbmabde sam koi yaanbo hog ak bes dood nyiloqkam, ham bopam soq gorangv dookum gvdwl ham bvrwq bicwb bel pvvbam padwb nyitayin. 40Soolog nyipan sib nyibaloqkam ngulam yolu dunbo gob beta yi, hiyvkam soolog yolu dunam sam pagoq dootwl dupan benyiram, ho ngulv soq yolu sam dudin dootwl dupan hvl ngulug bek dooram.” 41Soq sam bexo kokw so mwv nyi tulungam dookum hoqgv bulug nammwb wwm kunum.
ప్రస్తుతం ఎంపిక చేయబడింది:
BON 19: NISS
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Nyishi, DVRWQ PVVB @ Bible society of India 2016
