BON 15
15
Jerusalem Dookum
1Nyi ata go Judiya hoqgv Antiokwb ibnv mwwjwbo nyi tulungam tomswr banv benum, “Nulv Mojesg pvvb beknum mux mvmalo nulam ywwram.” 2Hvbmabde Poul la Barnabas bunyiv bulug lvgab ceceq alwb haqyaq minsnum, ho soq pagoq sam yolu bemin sunum. Hoqgab Poul la Barnabas bunyi Antiok hoqgv nyi tuugin Jerusalem wggol wl soq pagoq sam hvvky tulungam bekin gvdwl goobwq dvb hvl benum.
3Bulam Antiok dvrwq namlo hoqgv nyi tulungv svka tvl bulam Jerusalem kanamnum. Bulv lamta ho Poinisiyab la Samariyab wpeq banv Nyoodo nyi tulungv hoggub nyil Pwnboam mwwjwnum ham mwwjwbo nyi tulungam bekinnum. Ham tapa tvl mwwjwbo nyi tulungv hemp pomanam mam ponum. 4Bulv Jerusalem mam wc yukam bulam dvrwq namlo hoq nyi tulungv, hvvky tulungv ho nyi tulungv bulam hoopu-haabial svgagvrwqnum. Ho Pwnbov bulug lvgab doobal hog mwlw nyinam wnam mam bulam bekinnum. 5Hvbmabde Parisi dvpar hoqgv mwwjwbo tulu gon daqrab banv benum, “Bulam mux mvdwb nyitayin, hoqgv bulam Mojesg pvvbam bugil swwtwk hvl tomswr dvb nyitayin.”
6Kokw so hvvky tulungv la nyig wgbo nyiixa tulungv lokub dookum doopa banv soq bvrwq sam hindib hwwl goobwq tanum. 7Good goodwl gootar kokw so Pitor daqrab banv benum, “Ngoqg vbw-bor tulu, nulv cengdwn Pwnbov oyungam nulug pengko hoqgv Nyoodo nyi tulug dook agaho Tugu Puiyam bekin tvl bulam tatwl ham mwwjw mvdwb ngam xuqnum. 8Ho nyi mwlwg hangam cengnbo Pwnbov Nyoodo nyiingam Dvrwqbo Yalv ngulam jinam hvbkalam jibnv mwv bulam loonam mam kaakinum. 9Mwv ngulug la bulug pengko ho hiyv nvkam xibin yaama dvn; mwv bulug hangam mwwjw ko-gab nyedar darxaq paku. 10Hvnyiloqkam, nulv hoggub nyil ngulv Pwnboam pooka-yirka dvb hvl mwwjwbo nyi tulug langk ho ngulug at ab tulu ngvkam ho ngulvkam baqnyi maanam viyam joobaq jitayin? 11Hvbmabde ngulv mwwjw ko-gab At Sw Jisug anyangv ywwnam hvbkalam bulam ywwpa kun.”
12Nyi acamv Poul la Barnabaswg Pwnbov bulug lvgab hoggub nyil doobal Nyoodo nyi tulug pengko ho swrdorxeqb deedy luuxib nyil kaakinum hoq puiyam tatwl bulv cooikab tal doonum. 13Kokw so bulam gootar mvtkul, Jems benum, “Ngoqg benam sam vbw-bor tulu tagabto. 14Simon kajo Pwnbov hoggub nyil oyu hoqgv Nyoodo nyi tulu gab mwwdwq dvn ham nulam bekin gvnba, ho hoggub nyil bulug pengko hoqgv bul mwlwngam mwwg nyiib nyim dvb mwwnum ham tagnvba. 15Nyiqry benbo tulug benamv jvqtw jaqb, dvrwqbo potag benam lvgab jubdo.
16“At bedwn, ngo soq kokwb hookur tayin,
hoo ngo Debidg nam tabto kunboam mvdar tayin;
Ho ngo yvqmwq kunbo nammam mvdar tayin,
hoo ham lokta ator dvb mvtayin.
17Ho nyi mwlwngv Atwn meegaq tayin,
hoo Nyoodo nyi tulungv ngoqg nyiib bulv nyitayin.
18At bedwn, ngo soq sam kol otuq hoqgv cengpakun.’
19Jems hvraqb bel wnum, “soq si ngoqg mwwnamv, ngulv Pwnbog dookub haanbo Nyoodo nyi tulungam nyitub wtub dvb nyiyo ju. 20Hvbmabde ngulv pota xeqg dvl bulam ui pan nan dvrwq maanbo dvnam gotwq bolo dvmabvk hvl, ho nyiig nywxw-nyolam bwwxin jimabv, ui tosar maanbo vdinam dvmabvk hvl ho uiyam dvmabvk hvl tomswr tuj. 21Hoggab Mojesg pvvbam kol galoqkv Doonu dvk aal looxiam Sinagog ho poory ridul doodwn ho bopam vx ho mwwg agam mam bekin kindul doodu gvdo.”
Mwwjwbo Nyoodo Nyi Tulungam Pota Jinam
22Kokw so hvvky tulungv la nyig wgbo nyiixa tulungv dvrwq namlo lvgab goobwq tukul, bulug pengko hoqgv nyi tulu go xuqg dvl Antiok gvdab Poul gvla Barnabaswg lvgab kanam nvmlwq dvb hvl benum. Bulv Barnabasvk hvl benam, Judas nvla Silasnvn xuqbnv kanamnum. Soq nyi vnyi sam mwwjwbo nyi tulungv xinum, 23bulv soq pota sam xeqbnv bulug alaqb jilwqnum:
“Ngulv, xuqnam tulungv la nyiixa tulungv ho nulug vbw-bor tulungv ngul mwlwngv Siriya gvla Silisiya gvdag Antiok bopamho doonbo Nyoodo nyi tulug dvparho ko bwwnam mwwjwbo nyi tulu mwlwngam salam jilwq dvn. 24Ngulv ngulug dvpar soqgv nyi tuugin nulug dookub wbnv nulam nyitub wtub dvb bel nulug hangam mwwdwq saqk dvb bepak hvl tapa do; bulv ngulug galoqkv hog gokam hoqhvb nyidwb tomswr komanum. 25Hoqgab ngulv dookum doopa banv mwlwngv gamkin gob loobnv nyi ak-vnyi go xuqnv nulug dookub pui baql wwmdvb bepakun. Bulv ngulug tumanam ajinv, 26hiyv ngulug At Sw Jisu Kristo gab atwg sig-dorg mwlwngam ludumpel mwwg gab bon nyinbo Barnabas gvla Poulwg lvgab wtayin. 27Hoqgab ngulv Judas nvla Silasnvn nulug dookub kanam gviyin, bulv nulam nyip vpv ngulug xeqnam gamkin sam nulam bekin tayin. 28Hoggab Dvrwqbo Yalv la ngulv gamkin gob goomin subnv nulug aoho soq nyidynam loodag aoso hog asaq igin viyam baqm maadvb hvl bir pakun. 29Ui panan dvnam mam dvmab, uiyam dvmab, ui tosar maanbo vdin dvmab ho yocu-yabio nyimabv, hoqgv aado ho dooto. Hoqgab soq mwlw sam nyinam hoqgv nulv aado ho doob nyiloqkam nulug atgab altayin. Alwb nyigdvl swwnyia laka!”
30Pui baqnbo nyi tulungam kanam nvmlwq tukul, bulv Antiok gvdab wknv mwwjwbo nyi tulungam olum gob goqkum banv bulam potangam jinum. 31Nyi tulungv potangam poory ril kaatwl, bulam tomswrnam mam tatwl bulv hemp al mwwpanum. 32Judas la Silas bunyi atv nyiqry benbo tulu gob nyiba sunum. Bunyiv bulug lvgab oyu jaqg goobnv bulam haakam bvla atorb nyigdvl swwtwk hvl tomswrnum. 33Bulv meeg dooxo kokw so mwwjwbo vbw-bor tulungv bunyiam swrsomalob wwm kunum, ho bulv bulam kanambo nyi tulug dookub wkur kunum. 34Hvbmabde Silas bulug lvgab dookur nukun.
35Poul la Barnabas apo go Antiok ho doonum. Bulug lvgab nyi asaqkv vigo At Swg agam mam tomswr banv la bekin banv lvkin gob doonum.
Poul la Barnabas Bunyi Wpin Sunam
36Oyu yoomab kokw so Poul Barnabasnvn benum, “Kuj ngulv wkur gvdkul bopam vx ho ngulug At Swg puiyam bekinam nyi tulungv hoggub nyil doonyia dvba dw bulam kaatuj.” 37Barnabas Jon Marknvn bulug lvgab bool wg dvb mwwnum, 38hvbmabde Poul mwam bulug lvgab bool wg bvnyiloqkam alram mwwnum; hoggab mwv bulug lvgab bulug bonam niqtuq nyilinam gob bulug lvgab dooba maanum, hvbmabde mwv bulam apaqpel Pampiliya hoqgv wkur kunum. 39Kokw so bulv ceceq alwb gooiyaq minskunv wpin wra mins kunum. Barnabas Jon Marknvn boolayil Saipraswb iss jaajib jaal wleqnum, 40ho Poul Silasnvn xuqbnv, mwwjwbo nyi tulungam At Swg anya ko alaqb gvqlwqpel wleq kunum. 41Mwv Siriya bvla Silisiyab wpeq banv dvrwq namlo hoq mwwjwbo nyi tulungam atorb hindib dootwk hvl bepel wnum.
ప్రస్తుతం ఎంపిక చేయబడింది:
BON 15: NISS
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Nyishi, DVRWQ PVVB @ Bible society of India 2016
