BON 12
12
Vigo Nyob-nyet Panam
1Herod Lvpw abwb hoq apo ho swwtwl dvrwq namlo hoq mwwjwbo nyi tulungam mvnyi-mviyal mvrabnum. 2Mwv Jonwg bor Jemsnvn lyoqr orioq lvgab mengnum. 3Mwwg soq sib nyinam mam Juhudi nyi tulungv mwam alwb nyipa hvl bulug hangho xumnam mam kaatwl mwv ceceq yaab nyirabnum hoqgab mwv Pitornvn nootul mengnum. (Soq si opap ciqlwq maanam wtw Durum dvk moodho nyinum.) 4Pitornvn nootu banv mwam pvtwq hv lwqtwl sipai vpy gogaqb tompy gob rvkil daqg mvdwb bulug alaqho gvqlwqnum. Herod Nyedarko Durum dvxo kokw so mwam nyi tulug agaho boolin gvdwl mwwg yolungam meeka dvb mwwnum. 5Hoqgab Pitornvn pvtwq lwqnum, hvbmabde dvrwq namlo ho mwwjwbo nyi tulungv mwwg gab xabl ril Pwnboam swgw gwwdul doonum.
Pitor Pvtwq Hoqgv Lengknam
6Pitornvn pvtwq hoqgv Herod Juhudi nyi tulug agab boolin tadwk aalwg aiho Pitornvn rvkil daqg bo Sipai vnyig pengko ho yubdul doonum. Ho Pitornvn tag soonyig korcup tvl tag soonyiam rvkil daqgbo Sipai vnyig alaqho tuurgon soosaq sub gagab tvl daqgnum; hoo pvtwq haaga viyapho rvky bongv hvraqb rvkil daqnum. 7Cengma paq golo At Swg gumtw ak hoq ditaqho daqanum, hoo bulug dook cwwrwngv hutonum. Kokw so ao gumtwngv Pitorg gorbwngam nwwdin banv mwam muul benum, “Coxub gorabtuk!” Ho dara mwwg alaq hoqgv tagv yusuq-yuraql yuuxia kunum. 8Hoo ao gumtwngv mwam benum, “Noqg pusam la samtaqnan tulu ham mwx-mvaqto.” Pitor hoqhvb nyixo kokw so ao gumtwngv mwam benum, noqg kamtam kootwl no ngoqg lvgab wmin gvto. 9Hoo Pitor mwwg lvgab pvtwq ura hoqgv lengbanum. Hvbsujaqkam mwv hoq nyinam ham jvqtw jaqb nyima nago, hvbmabde nyiqry ak kaadnag mwwnum. 10Bunyiv otuqjaqb rvkil daqnbo sipaiyam wleq sugyuku, hoqgv tomnyi deenam wleq sugyuku, ho kokw jaqb bopam haaga hoq yoqdwr viyap pam wc kunum. Hoqgv viyapv atv atv bunyi gab kuqko sunum, hoo bunyiv agab lengknum. Bunyi vly golo wc yukam, cengma lvpab ao gumtw akv Pitornvn apaqpel wleqnum. 11Kokw so Pitor hog bvxeq nyiknum ham mwwdil hendar kunv benum, “Ngo sija cengpaku, soq si jvqtwjaq goknyi At Sw ngoqgab mwwg gumtwngam kanam tukul ngam Herod alaq hoqkam naalin paku, ho Juhudi nyi tulug ngam mengta-puqtanam hoqgv ywwt ywwpa ku.”
12Mwwg gab mood almanam mam hencin peel, mwv Jon Markwg ann Meerig nammwb wnum. Nyiv vijaqg hoq namho hookum banv Pitor gab xumdul doodunum. 13Pitor nam haagag viyap pam cedin yukam Roda ngvk hvl eminam nyem ko paqn akv kaatab lingrwqnum. 14Roda Pitor agam goonam mam tacin tvl hemp poknv viyap gokam ciqko maab nam urab xara banv Pitor loog vv daqdwk hvl bulam bekinnum. 15Bulv mwam benum, “Roda, no rugaqdo! Hvbmabde mwn hvraqb bulam jvqtw jaqb daqdwk hvl benum. Kokw so bulv birwqnum, “Hoqhv mwwg yalv suco.”
16Hoqhvb nyil doodu dvkho Pitor hvraqb viyap pam padin dindul doonum. Kokw so bulv viyap pam mvkol kaanv Pitornvn kaapa tvl bulv lomnum. 17Ho Pitor alaqngv mutur banv bulam goomab ody maab dootwk hvl benum, ho kokw so At Sw hoggub nyil mwam pvtwq hoqgv boolin kunum ham bulam bekinnum. “Soq pui sam Jems nvla mwwjwbo vbw-bor tulu mwlwngam bekinnum.” Ho mwv hvl bepel bulam apaqpel nampam pamsaq golo wleq kunum.
18Ar huto yukho rvkybo tulungv Pitor hoggub nyin kun yu bulug pengko ho hur-marab gob nyinum. 19Hoqgab Herod Pitornvn meekar mvdwb gaml jinum, hvbmabde bulv mwam meepa nyok maanum. Hoqgab mwv rvkybo tulungam hwwtinl bulam mengta hvl gaml jinum.
Soq kokw so Herod Judiyab ibnv apo go Sijariya ho doonum.
Herodg Sinam
20Herod Taiyar gvla Sidonwg nyi tulungam hang lingtwr banv doonum; hoqgab bulug pengko hoqgv nyi pvtw go Herodg dookub wnum. Otuqjaqb bulv lvpw at nammam kaaya bo Blastaswn bulug nyemaqb twqconum. Hoq kokw so bulv Herodg dookub haanya banv mwam swrsomalob swwla juk hvl mwam benum, hoqgab bulv lvpw atwg gvda hoqgv dvsam baqal dvnum.
21Xuql apnam aal golo Herod mwwg lvpw vjam kootwl mwwg lvpw atwg dootam ho dootwl mwv nyi tulungam benum. 22“Soq nyi si nyi goonam hvb gooma, hvbmabde pwnbog goonam hvb goodo!” hvl nyi tulungv mwam benum. 23Ho dara At Swg ao gumtwngv Herodnvn xitabnum, hoggab mwv Pwnboam ximanum. Kokw so mwam tadorv piixin dvgam gab mwv siknum.
24Pwnbog agam mam hvraqb nyiv vigo mwwjw kunum, hoo nyi mvqlw yaiyab nyiknum,
25Hoo Barnabas la Soul bunyig bonam nyinya peekul Jerusalem hoqgv Jon Marknvn boolayil wkur kunum.
ప్రస్తుతం ఎంపిక చేయబడింది:
BON 12: NISS
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Nyishi, DVRWQ PVVB @ Bible society of India 2016
