Maqkul 8

Tsaol-aq liq hinl gaq bhai bhi jaq-a nail ganl

1Aqn aqyanq mao ail maq maoq lal mail, tsaol-aq munl teevq munl gaoq jil lal-a nail ngaol. Tsaol-aq al juq jaq nail teevq phaq ail maq jiav-ail pevq lal-u phao, Yeiqsul yaq laol juq bhai khul khi, niail hai ge bhiq-a nail ngaol: 2“Tsaol-aq niil juq bhai ngal gaoq haq ail nial. Aqyu juq ngaq-ai nee mail jaol-a niail hail n bhee lal khi, jaq nail teevq phaq iqsanl maq jiav-aoq nail ngaol. 3Aqyu juq bhai khul teevq phaq iqsanl maq bhi jaq dai, bhi kovq-ail haq neq, gail phail lail ma bhai kovq-ail thail thaiq-u phao, gaq juq lal nail ngaol. Khul khi mail dai ngal-aq neq, teevq pav ga nav juq neq, eqyal nee lal-a nail ngaol” dai, ge bhiq-a nail ngaol.

4Yaq laol juq ge nail: “Tsaol-aq nii dai mao nail bhai bhi jaq bhi daol nail haqbhoil, niil heel nail tsaol-aq maq jaol nail haqtsoiq haqyal bhai jaqjaq daoldaol khaq sil gaq hal pov dov-ail nia heeq” dai, ge kovq bhiq-a nail ngaol.

5“Nul juq khaqmul kha dai heeq aol nail-aiq” dai, Yeiqsul nal daiq-u phao, “Khaqmul sivq heeq aol nail ngaol” dai, ge kovq bhiq-a nail ngaol.

6“Miltsaq bhai jaol deel yaoq” dai, Yeiqsul tsaol-aq munl munl ma al juq bhai daoq bivq-a nail ngaol. A bhai nee ngal-aq, khaqmul al sivq heeq oil khi, Miqyail bhai tsiq eeq gaq khi ngaoqpav-a nail ngaol. “Tsaol-aq niil juq nail sivtavq bhai tsiq thaq bhiq ail yaoq” dai, ge khi, aivq nail yaq laol juq bhai tsiq bhiq-a nail ngaol. Aqyu juq iqsanl tsaol-aq munl munl ma nail sivtavq bhai tsiq thaq bhiq-a nail ngaol. 7Aqyu juq delgil maol yaq mee nia maol gaoq aol nail ngaol. Al nail haqbhoil Miqyail bhai Yeiqsul gaoq tsiq eeq khi, tsaol-aq munl al juq bhai, delgil al gaoq bhi bhoil bhiq-a nail ngaol. 8Aqyu juq teevq bov jaq-a nail ngaol. Al ovqtavq, jaiq lal-a nail juq bhai yaq laol juq gaoq gov kovq daiq-u phao, pheeq deel nee mail sivq deel bhee nail ngaol. 9Jaq-a nail tsaol-aq juq, liq hinl gaq nii dai bhee nail ngaol. A bhai nee ngal-aq, Yeiqsul tsaol-aq al juq bhai bhi kovq ail-a nail ngaol. 10Aq-u phao, aivq nail yaq laol juq nee mail teevq pov taivq-ail laovq lavqkhoel bhai aol ail khi, Daq maq nuldaq milkhaoq bhai ail-a nail ngaol.

Bhi heeq bhi moel nail phaq nl daiq lavq yaoq dai, Phaq liq sail juq hal nail ganl

11Aq-u phao, Phaq liq sail teevq gaq ga nav juq Yeiqsul nee jil pheel jil lul jaq lal-a nail ngaol. Aivq bhai laonq daiq movq nail ngel-i mail, “Nq taq kovtavq khe bhiq heeq bhi moel nail phaq nl daiq lavq yaoq” dai, hal nail ngaol. 12Aivq aqhaq haq ma gaol kha khi ge nail: “Yeel niil yeel khe tsaol-aq neq, khul khi mail bhi heeq bhi moel nail phaq hal daiq nail ngel-ail. Ngal nul juq bhai mal dil dai, ge lavq bhel. Yeel niil yeel khe tsaol-aq bhai, bhi heeq bhi moel nail phaq teevq phaq iqsanl maq nl daiq bhiq ail” dai, ge bhiq-a nail ngaol. 13A bhai nee ngal-aq, Yeiqsul aqyu juq nee mail pav ail khi, laovq jeeq khi mail, ngaqkha a phao lel khel bha ceiv ail-a nail ngaol.

Yeiqsul nail daoq bhai yaq laol juq maq gov heeq nia nail ganl

14Yaq laol juq khaqmul nioil peivq ail ceevq-a nail ngel-i mail, laovq lavqkhoel bhai khaqmul teevq heeq taivq-ail aol nail ngaol. 15Aq-u phao, Yeiqsul Yaq laol juq bhai ge bhiq-a nail: “Phaq liq sail juq nail deqtsiq khi mail heeqphaq Heiq lol nail deqtsiq bhai, nul juq aqmeeq-ai hel daiq khi yaol phaol yaoq” dai, ge bhiq-a nail ngaol.

16Thail hai ngaol-aoq, yaq laol juq neq, aqyu juq nail gaiqlaq bhai khaqmul maq oil leevq thaq nail ganl taivq-ail, ge nail ngaol.

17Aqyu juq al hai ge thail thaiq nail bhai, Yeiqsul heeq nia khi, niail hai ge bhiq-a nail ngaol: “Khul khi mail, khaqmul maq oil leevq thaq nail ganl taivq-ail, nul juq ge thail thaiq nail-aiq. Niil aq-il kev dai, nul juq maq gov heeq dai, jaol nail laiq. Nul juq thoi dai dai ail neema gaol nail laiq. 18Nul juq maivneev covq nail, maq moel nia dai, naq khaol covq nail, maq gaiq lal ail laiq. Maq noeq dai, nioil peivq gil-aoq nail laiq. 19Ngal khaqmul ngaq heeq ngaoqpav khi tsaol-aq ngaq hinl gaq bhai bhi jaq-u phao, nul juq jaiq lal-a nail kha dai deel gov bhee-a nail-aiq” dai, nal daiq-u phao, “Tsel-nvq deel gov bhee-a nail ngaol” dai, aqyu juq Yeiqsul bhai ge kovq bhiq-a nail ngaol. 20“Ngal khaqmul sivq heeq ngaoqpav khi tsaol-aq liq hinl gaq bhai bhi jaq-u phao, nul juq jaiq lal-a nail kha dai deel gov bhee-a nail-aiq” dai, gaoq nal daiq-u phao, “Sivq deel gov bhee-a naol” dai, ge kovq bhiq-a nail ngaol.

21“Thail hai ngaol-aoq, niil aq-il kev dai, nul juq maq noeq heeq haq-al laiq” dai, Yeiqsul aqyu juq bhai ge bhiq-a nail ngaol.

Bheiqjeildaq meenq bhai jaol nail maiv peivq teevq gaq bhai lav meeq bhiq-a nail ganl

22A bhai nee ngal-aq, Bheiqjeildaq meenq bhai aqyu juq ail kev-a nail ngaol. Tsaol-aq teevq juq Yeiqsul jaol nail bha maiv peivq teevq gaq hel lavq khi, teevq pov bhi thoiq tsi nail haqbhoil, Yeiqsul bhai hal-a nail ngaol. 23Yeiqsul maiv peivq peivq nail al gaq nail aqlavq bhai nieivq thaiq khi, meenq meenq jail bhai hel aivq-a nail ngaol. Aq-u phao, aivq nail maivneev bhai thaiqkhaq thaiqbav bhiq khi, aivq nail kovtavq bhai aqlavq bavq dav bhiq khi mail: “Naoq bhai teevq phaq ga nav moel lal ail laiq” dai, nal daiq bhiq-a nail ngaol.

24Tsaol-aq al gaq bavq lel daiq khi ge nail: “Ngal tsaol-aq bhai moel lal-aoq naol. Aqyu juq neq, aqbhaol khe-ai dul khi ngaol-aoq, gailkhaol tsao-il” dai, ge kovq bhiq-a nail ngaol.

25Yeiqsul aivq nail maivneev bhai teevq pov gaoq thoiq tsi bhiq-a nail ngaol. Tsaol-aq al gaq aqmeeq-ai teevq pov gaoq hel daiq-u phao, maivneev moel haol nia lal khi, yaoq phaq yaoq-ao nee mail, moel haol nia lal-a nail ngaol. 26A bhai nee ngal-aq, tsaol-aq al gaq bhai, “Meenq lavqkhoel bhai thaq aol lai dei-eiq” dai, Yeiqsul aivq bhai ge bhiq khi, ilkhaol bhai bhi kovq ail-a nail ngaol.

“Yeiqsul neq, Khali ngaol” dai, Bheiqtuvluv ge nail ganl

27A bhai nee ngal-aq, Yeiqsul khi mail aivq nail yaq laol juq Pillilpuv-i#8.27Pillilpuv niil gaq neq, Heiq lol Aqgilpav nail jaqbheq ngaol. mail cov-a nail Gailsaq lil meenq aqjail bhai jiav nail jul gu juq bhai ail-a nail ngaol. Gailphail lail ma bhai ail thail thaiq-u phao, “Yu ngaq bhai khaq sil gaq niil dai, ge thail thaiq nail-aiq” dai, Yeiqsul aqyu juq bhai nal daiq bhiq-a nail ngaol.

28Yaq laol juq aivq bhai ge kovq bhiq-a nail: “Tsaol-aq teevq pav ga nav juq naoq bhai ulcuvq saol bhiq nail Yaol haq niil dai, ge nail ngaol. Teevq pav ga nav juq neq, Eillilya niil dai, ge khi, teevq pav ga nav juq neq, Miqyail nail haqbhoil ge dan nail tsaol-aq teevq gaq ga nav niil dai, ge nail ngaol” dai, ge kovq bhiq-a nail ngaol.

29“Nul juq thoil, ngaq bhai khaq sil gaq niil dai ge heeq” dai, Yeiqsul aqyu juq bhai nal daiq-u phao, “Naol neq, Khali nial” dai, Bheiqtuvluv ge kovq bhiq-a nail ngaol.

30“Ngaq nail ganl teevq gaq bhai iqsanl thaq ge bhiq dei-eiq” dai, Yeiqsul aqyu juq bhai daoq bivq-a nail ngaol.

Yeiqsul aivq ya sil nail ganl, ge bhiq-a nail

31A bhai nee ngal-aq, Yeiqsul aivq nail yaq laol juq bhai niail hai cavq bhiq cov bhiq-a nail ngaol: “Tsaol-aq nail Yaqyov neq, mao dai phaq ya daq dee dee nail ngaol. Aqivq aqtsu juq, Philma juq khi mail aoldaoq kovqdaoq cavq nail cov nail juq-i mail khaonq ha nail bhai ya daq nail ngaol. Yu-i mail bhi heivq nail bhai kev dai, ya daq nail ngaol. Thail hai ngaol-aoq, hail n kev lal haq neq, gaoq doevq kovq lal naol” dai, ge bhiq-a nail ngaol. 32Ganl al iqsanl mail aivq bhaq laoq kheq dai, ge daiq bhiq-a nail ngaol. Al heel ngel-i mail, Bheiqtuvluv aivq bhai hevq dol aivq khi, khaq bhiq-a nail ngaol.

33Thail hai ngaol-aoq, Yeiqsul yaq laol juq jaol nail phao haoqnaol naol kovq kovq daiq khi, Bheiqtuvluv bhai ge bhiq-a nail: “Neivq Saq daq-ol, gailkhaol phaol yaoq. Khul khi mail dai ngal-aq neq, naoq nail nee noeq neq, Miqyail nail nee noeq maq ngel-ail. Tsaol-aq nail nee noeq teevq-eel ngaol” dai, khaq bhiq-a nail ngaol.

Yeiqsul nail haoqnao khal hai ya tsao the nail ganl

34A bhai nee ngal-aq, Yeiqsul tsaol-aq munl munl ma juq khi mail aivq nail yaq laol juq bhai khul jil khi ge bhiq-a nail: “Tsaol-aq teevq gaq, ngaq nail haoqnao tsao thel lavq movq haq neq, yovqgavq nail neekhaol ya khaonq ha ail ceevq khi, yovqgavq nail lavqyavq yovqgavq bavq khi, ngaq nail haoqnao ya tsao thel lavq nail ngaol. 35Khul khi mail dai ngal-aq neq, yovqgavq nail doevq nail phaq yovqgavq bhi jel-ail movq haq neq, yovqgavq nail doevq nail phaq sunq ail nail ngaol. Thail hai ngaol-aoq, ngaq nail haqbhoil khi mail lavqkhiq tsail nail geeqlaoq daoq nail haqbhoil, yovqgavq nail doevq nail phaq bhi sunq ail haq neq, doevq nail phaq ya nail ngaol. 36Tsaol-aq teevq gaq ga nav miltsaq niil teevq heeq heeq lao ya gil khi ngaol-aoq, aivq nail doevq nail phaq sunq ail haq neq, aivq nail haqbhoil khul nail ganl tsoiq nail-aiq. 37Tsaol-aq al gaq, aivq nail doevq nail phaq bhai khul-i mail ul kovq nia nail-aiq. 38Khaqmiq sev nail phaq khi oeqbal mao dee dee nail yeel niil yeel nail lavqkhoel, tsaol-aq teevq gaq ga nav, ngaq bhai maqkhaiq, ngaq nail daoq bhai maqkhaiq, haq sil haq neq, Tsaol-aq nail Yaqyov iqsanl, aivq nail Aqbhu nail seiqleiq khaoqsail doi khi meeq nail haol nail nqtavq gaqkhoel juq nee mail yavq kha lee-u phao, tsaol-aq al gaq bhai haq sil naol” dai, Yeiqsul aqyu juq bhai ge bhiq-a nail ngaol.

ప్రస్తుతం ఎంపిక చేయబడింది:

Maqkul 8: aeu

హైలైట్

షేర్ చేయి

కాపీ