Maqkul 14

Yeiqsul bhai heivq nail haqbhoil khoiq ge pheel jaq-a nail ganl

1Nvq n jel-ail haq neq, Bhaqsaqkhaq aqbhee khi deqtsiq maq goe dai, deqtsiq maq aol nail khaqmul jaq nail aqbhee kev lal-a nail ngaol. Aq-u phao, Philma juq khi aoldaoq kovqdaoq cavq nail cov nail juq khal hai khi mail, goiqbhaoq bhaoq nail lavqkhoel nee Yeiqsul bhai nieivq khi ya heivq dai, naoq jaoq nail ngaol. 2“Tsaol-aq nii dai nail maq ya suq saq lal dai, aqbhee niil lav sav-u phao, thaq nieivq haq lao-oq” dai, aqyu juq nail gaiqlaq bhai ge pheel jaq-a nail ngaol.

Yeiqsul bhai huqbhiq nil nail aqtseel hoel dav bhiq-a nail ganl

3Niaoqbhaoq daol daiq-a nail Sil moq dai mil-ai thaq nail teevq gaq, Bheiqtaq nil jul gu bhai jaol nail ngaol. Yeiqsul aivq nail ilkhaol bhai aoq jaoq jaoq khi aoq jaq thail thaiq-u phao, yaqmai-aq teevq gaq aol lal-a nail ngaol. Yaqmai-aq al gaq, mao ail phoiq nail huqbhiq nil nail aqtseel deq nail phulleq deel lovmav malcavq teevq cavq tsil lavq-a nail ngaol. Aivq malcavq al cavq deeq pav khi, huqbhiq nil nail aqtseel al Yeiqsul nail uqhuq bhai hoel dav bhiq-a nail ngaol.

4Thail hai ngaol-aoq, teevq pav ga nav juq neema phail phail ail khi ge nail: “Khul khi mail ganl maq tsoiq nail bhai, huqbhiq nil nail aqtseel thoil yuq ha nail-aiq. 5Huqbhiq nil nail aqtseel thoil gaoq haq neq, hail yal bavq jaiq dai, ya-ail nial#14.5 Aq-u khe teevq bavq neq, niil aq-il khe teevq n yalgaq aqphoiq dai ngaol.. Phul al oil khi haq nail aoq nail juq bhai bhoil bhiq kivq nail ngaol” dai, aqyu juq nail gaiqlaq bhai ge pheel jaq nail ngaol. Al ovqtavq, aqyu juq yaqmai-aq al gaq bhai mail ma-ail khaq bhiq-a nail ngaol.

6Thail hai ngaol-aoq, Yeiqsul ge nail: “Aivq bhai khul teevq phaq iqsanl thaq gaoq ge. Khul khi mail, nul juq aivq bhai lav tsoiq nail-aiq. Aivq ngaq bhai aqmeeq phaq nl lavq-a nail ngaol. 7Haq nail aoq nail juq neq, nul juq nee khaq mao iqsanl jaol nail ngaol. Nul juq bhiq movq haq neq, khul yanq bhai maqkhaiq, aqyu juq bhai aqmeeq phaq nl bhiq kivq nail ngaol. Thail hai ngaol-aoq, ngal neq, nul juq nee mail khaq mao iqsanl jaol nail maq ngel-ail. 8Yaqmai-aq niil gaq aivq khal khi kivq nail khe-ai nl lavq-a nail ngaol. Ngaq bhai duqpheeq nail haqbhoil, maq duqpheeq-u nee, aivq huqbhiq nil nail ulcuvq hoel dav lavq-a nail ngaol. 9Ngal nul juq bhai mal dil dai, ge lavq bhel. Lavq khiq tsail nail geeqlaoq daoq niil miltsaq doi dai, cavq bhiq ail-u phao, yu aivq bhai noeq kev dai, yaqmai-aq niil gaq-i mail nl-a nail ganl niil iqsanl ya cavq bhiq nail ngaol” dai, ge bhiq-a nail ngaol.

Yuldav-i mail Yeiqsul bhai gaoq jaq-a nail ganl

10Aq-u phao, yaq laol tsel-nvq gaq nail lavqkhoel bhai aol nail Yuldav Ilsaqgaq liqoq dai mil-ai thaq nail gaq, Yeiqsul bhai aqyu juq nail aqlavq lavqkhoel bhai av bhiq nail haqbhoil, Philma juq jaol nail bha lai-a nail ngaol. 11Philma aqivq juq daoq al daoq ya gaiq-u phao, lavqkhiq tsail dee dee khi, “Naoq bhai phul bivq naol” dai, ge ceiv-a nail ngaol. Al heel ngel-i mail, Yeiqsul bhai Philma juq nail aqlavq lavqkhoel bhai av bhiq nail khaq mao eivq lal ail dai, Yuldav hal pov-a nail ngaol.

Yeiqsul yaq laol juq nee mail Bhaqsaqkhaq aqbhee jaq-a nail ganl

12Deqtsiq maq aol nail khaqmul jaq nail aqbhee iqmoeq-u n-gaol, Bhaqsaqkhaq yaol yaol yaq laol bhiq nail ngaol. Aq-u n-gaol, aivq nail yaq laol juq, Yeiqsul jaol nail bha lal khi, “Bhaqsaqkhaq aqbhee jaq kivq dai, naoq nail haqbhoil khul dao bhai bhi lav sav thaq ail movq nail-aiq” dai, nal daiq bhiq-a nail ngaol.

13Aq-u phao, Yeiqsul aivq nail yaq laol nvq gaq bhai ge bhiq-a nail: “Nul nq nvq gaq meenq lavqkhoel bhai aol ail yaoq. A bhai meldel bavq-nvq thaq nail yaqyov-aq teevq gaq bhai ya thaoq phuq nail ngaol. Aivq nail haoqnao tsao thel aivq yaoq. 14Aivq khul il bhai aol ail khi ngaol-aoq, nul nq nvq gaq ilheel gaq bhai niail hai ge bhiq yaoq: ‘Saq laq ge nail: Ngal ngaq nail yaq laol juq nee Bhaqsaqkhaq aqbhee jaq kivq dai, ngaq nail haqbhoil lav sav-ai thaq nail daq-i naq duq, khaq bha jiav nail geiq’ dai, nal daiq-ail dei-eiq. 15Aq-u phao, pultavq teiv-nvq bhai jiav nail aqmeeq-ai lav sav-ai thaq nail daq-i naq duq teevq dao, aivq nul nq nvq gaq bhai hevq daiq lavq nail ngaol. A bhai ngadao juq nail haqbhoil lav sav thaq ail yaoq” dai, aqyu nvq gaq bhai ge bhiq khi khoel gai aivq-a nail ngaol.

16Yaq laol al nvq gaq dov-ail khi, meenq bhai aol ail-a nail ngaol. Aqyu nvq gaq Yeiqsul-i mail ge nail khe-ai ya moel khi, Bhaqsaqkhaq aqbhee jaq nail haqbhoil lav sav ail-a nail ngaol.

17Nqkivq kivq lee-u phao, Yeiqsul yaq laol tsel-nvq gaq nee mail lee-a nail ngaol. 18Aqyu juq aoq kivq jaq thail thaiq-u phao, Yeiqsul ge nail: “Ngal nul juq bhai mal dil dai, ge lavq bhel. Nul juq nail lavqkhoel khe, ngaq-ai nee teevq dao bhai taivq-ail jaq nail gaq, ngaq bhai yu nail aqlavq lavqkhoel bhai av bhiq nail ngaol” dai, ge bhiq-a nail ngaol.

19Aqyu juq noeq haq lal bhiq khi, “Ngal laiq, ngal laiq” dai, teevq gaq khai-aq teevq gaq, Yeiqsul bhai nal daiq bhiq-a nail ngaol.

20Yeiqsul ge nail: “Nul juq tsel-nvq gaq nail lavqkhoel khe, ngaq-ai nee mail teevq gaoq bhai taivq-ail jaq nail gaq ngaol. 21Tsaol-aq nail Yaqyov neq, aivq nail ganl gevq-ai thaq nail khe-ai, ya sil nail ngaol. Thail hai ngaol-aoq, tsaol-aq nail Yaqyov bhai yu nail aqlavq lavqkhoel bhai av bhiq-a nail gaq neq, geeqlaoq aqdoil ya nail ngaol. Tsaol-aq al gaq maq doevq lee-a nail kheel nul neq, aivq nail haqbhoil meeq jaiq nail ngaol” dai, ge bhiq-a nail ngaol.

Yeiqsul bhai noeq kev khi, iqmoeq ilmoeq khaqmul jaq tavq-a nail aqbhee

22Aqyu juq aoq kivq jaq thail thaiq-u phao, Yeiqsul khaqmul oil khi, Miqyail bhai tsiq eeq-a nail ngaol. A bhai nee ngal-aq, khaqmul al ngaoqpav khi, “Oil jaq yaoq. Niil neq, ngaq nail aqmaol ngaol” dai, ge khi, yaq laol juq bhai tsiq bhiq-a nail ngaol.

23Aq heeq tsil ju nail ullul deq nail khaoqanq tsiq khi, Miqyail bhai gaoq tsiq eeq-a nail ngaol. A bhai nee ngal-aq, aivq aqyu juq bhai tsiq bhiq khi, aqyu juq yaoq gaq yaoq-ao nee daol-a nail ngaol.

24A bhai nee ngal-aq, aivq ge nail: “Niil neq, daoqma saljial aqsivq bhai tavq nail, ngaq nail aqsivq ngaol. Aqsivq niil, tsaol-aq mao dai nail haqbhoil bhi il lee nail ngaol. 25Ngal nul juq bhai mal dil dai, ge lavq bhel. Miqyail Milkhaoq lavqkhoel aqheeq tsilju nail ullul aqsivq ngal maq ya daol-u n-gaol kev dai, ngal aqheeq tsilju nail ullul maq daol yaoq-aol” dai, ge bhiq-a nail ngaol.

Yeiqsul bhai maq heeq kivq dai, Bheiqtuvluv jil nail ganl

26A bhai nee ngal-aq, aqyu juq tsiq eeq nail daoqsel gul nail daoq gul khi, Saqloq gaoqjaoq bha dav lai-a nail ngaol. 27Aq-u phao, Yeiqsul aqyu juq bhai ge bhiq-a nail: “Nul juq iqsanl mail ngaq bhai khaonq ha ail ceevq nail ngaol. Khul khi mail dai ngal-aq neq,

‘Yaol lovq nail gaq bhai

ngal deeq heivq khi,

yaol juq peiv ail

leiv ail nail ngaol’ dai,

Jal liq lavqkhoel bhai gevq-ai thaq nail ngaol.

28Thail hai ngaol-aoq, ngal doevq kovq lal gaq haq neq, nul juq nail iqmoeq nee Gaq liq lail milkhaoq bhai ail naol” dai, ge bhiq-a nail ngaol.

29“Yu iqsanl neema cov khi ngaol-aoq, ngal neema maq cov ail” dai, Bheiqtuvluv ge bhiq-a nail ngaol.

30Yeiqsul ge bhiq-a nail: “Ngal naoq bhai mal dil dai, ge lavq bhel. Yanq-nl kiv yavphoil nvq pov maq doil lal nail gaiqlaq bhai, naol ngaq bhai maq heeq kivq ail dai, hail pov kev dai, jil nail ngaol” dai, Bheiqtuvluv bhai ge bhiq-a nail ngaol.

31“Ngal naoq-ai nee teevq gaq khe-ai ya sil khi ngaol-aoq, ngal naoq bhai maq heeq kivq ail dai, maq jil ail” dai, Bheiqtuvluv Yeiqsul bhai mail ma-ail ge bhiq-a nail ngaol. Aqyu juq iqsanl mail, al hai ge nail ngaol.

Yeiqsul Geiqseiqmaq nil gaoqkhail bhai geeqlaoq hal-a nail ganl

32A bhai nee ngal-aq, aqyu juq Geiqseiqmaq nil dai, khul nail dao bhai ail kev-a nail ngaol. “Ngal geeqlaoq hal ail thail thaiq-u phao, nul juq niai daonq dei-eiq” dai, Yeiqsul aivq nail yaq laol juq bhai ge bhiq-a nail ngaol. 33Aq-u phao, aivq Bheiqtuvluv, Yaqkov, Yaol haq aqyu juq bhai taivq-ail hel aivq-a nail ngaol. Aivq gee sil dee dee khi, neema lavqkhoel bhai haq aoq nl dee dee nail ngaol. 34Aqyu juq hail gaq bhai ge bhiq-a nail: “Ngal noeq haq nail sil lee aiq nial. Niilniai aqgeel geel dai, daonq dei-eiq” dai, ge bhiq-a nail ngaol.

35A bhai nee ngal-aq, aivq sivtavq phao micil jiiv ail khi, miltsaq bhai peevqceevq kovdoiq doiq nail lavqkhoel nee gaol beiv khi, “Aq yanq niil ngaq bhai bhi jel-ail kivq haq neq, bhi jel-ail lavq yaoq” dai, geeqlaoq hal-a nail ngaol. 36Aq-u phao, aivq ge nail: “Aqbhu-ol, ngaq nail Aqbhu-ol, naol yaoq phaq yaoq-ao nee nl nia nail ngaol. Haq dee aoq dee dee nail khaoqanq niil ngaq bhai bhi jel-ail lavq yaoq. Thail hai ngaol-aoq, ngal neema tsaq nail khe-ai, thaq bhi pevq. Naol neema tsaq nail khe-ai, bhi pevq yaoq” dai, geeqlaoq hal-a nail ngaol.

37Aivq kovq lal-u phao, aqyu juq iq thaiq kov-ai thaq nail bhai ya moel khi, Bheiqtuvluv bhai ge bhiq-a nail: “Sil moq-ol, naol iq thaiq kov-ai thaq nail laiq. Naqli teevq lavq taivq-ail iqsanl aqgeel geel dai, maq jaol tsaol ail laiq. 38Nul juq jalmul mul nail haoqnao maq ya tsao thel aivq dai, aqgeel geel dai, jaol khi geeqlaoq hal yaoq. Nul juq nl movq nail neema aol khi ngaol-aoq, aqsivq haqjoil phao gaq bhaq nail niil” dai, ge bhiq-a nail ngaol.

39Aivq gaoq ail khi, iqmoeq khe pov hal-a nail khe-ai, geeqlaoq gaoq hal ail-a nail ngaol. 40Aivq gaoq kovq lal-u phao, aqyu juq iq thaiq nul dee dee nail ngel-i mail, iq thaiq kov-ai thaq nail bhai, gaoq ya moel-a nail ngaol. Aqyu juq Yeiqsul bhai khal hai ya ge kovq bhiq heeq dai, maq heeq nia-ail.

41Hail pov teevq pov aivq kovq lal khi ge nail: “Nul juq iq thaiq iq thaiq-ail gaq naq naq-ai haq nail laiq. Gaq-ao naol. Tsaol-aq nail Yaqyov bhai haqeiv nail tsaol-aq nail aqlavq lavqkhoel bhai av bhiq nail aqyanq kev lal-aoq nail ngaol. 42Thul yaoq. Lai bhel. Thoiq, ngaq bhai yu nail aqlavq lavqkhoel bhai av bhiq nail gaq aqjail bhai kev lee-aoq thaq nial” dai, ge bhiq-a nail ngaol.

Yeiqsul bhai nieivq-a nail ganl

43Al hai ge thail thaiq-u phao, gaqkhoel tsel-nvq gaq nail lavqkhoel bhai aol nail, Yuldav dai mil-ai thaq nail al gaq lee-a nail ngaol. Thaoma khi doiqthoi bavq-nvq thaq nail tsaol-aq munl munl ma juq iqsanl, aivq nail haoqnao tsao the jaol nail ngaol. Philma juq, aoldaoq kovqdaoq cavq nail cov nail juq khi, aqivq aqtsu juq-i mail, aqyu juq bhai khoel-ai leevq-a nail ngaol.

44Yeiqsul bhai yu nail aqlavq lavqkhoel bhai av bhiq-a nail al gaq, aqyu juq bhai niail hai ge bhiq-ai thaq nail ngaol: “Nul juq aivq bhai heeq nia dai, ngal aivq bhai moeq saol saol naol. Aq-u phao, aivq bhai nieivq khi, aqmeeq-ai tseel aivq yaoq” dai, ge bhiq-a nail ngaol. 45Aivq kev lee-u phao, teevq pov taivq-ail, Yeiqsul jaol nail bha lee khi, “Saq laq-ol” dai, ge khi mail, moeq saol saol bhiq-a nail ngaol. 46Aq-u phao, aqyu juq Yeiqsul bhai nieivq thaiq-ai thaq nail ngaol. 47Aq jail bhai thul phaol nail tsaol-aq juq nail lavqkhoel khe teevq gaq, aivq nail thaoma gaol dov khi, Philma nail yaqkav bhai tsil gai aivq khi, naq kov teevq phao bal-nvq ceiv ail-a nail ngaol.

48Yeiqsul aqyu juq bhai ge bhiq-a nail: “Nul juq tsaolpheel bhai nieivq nail khe-ai, thaoma khi doiqthoi bavq khi, ngaq bhai nieivq lee-a nail laiq. 49Ngal yaoq n yaoq-ao nee uqhuq thaoq nail ilkhaol il ma bhai cavq bhiq cov bhiq-u phao, nul juq jaol khi ngaol-aoq, nul juq ngaq bhai maq nieivq-ail. Niailhai pevq lal-a nail neq, Jal liq lavqkhoel-ai gevq-ai thaq nail khe-ai bhee lal dai, pevq lal-a nail ngaol” dai, aivq ge bhiq-a nail ngaol. 50Aq-u phao, yaq laol juq iqsanl mail, aivq bhai khaonq ail ceevq khi, tsaoq gil-a nail ngaol.

Yaqyov-aq yaqnoil teevq gaq tsaoq-a nail ganl

51Aq-u phao, yaqyov-aq yaqnoil teevq gaq, haqphal aqjeel-i mail yavq-ai thaq nail bhee yaq teevq keiv lee jeeq khi, Yeiqsul nail haoqnao tsao the jaol nail ngaol. Aqyu juq aivq bhai nieivq nail khi-u phao, 52aivq bheeyaq al keiv loev ha ail ceevq khi, maoldeq laq nel ail, tsaoq jel-a nail ngaol.

Maoq bhaoq nl nail munl munl ma juq, Yeiqsul bhai yalkhaq dal-a nail ganl

53Tsaol-aq al juq, Yeiqsul bhai Philma jaol nail bha hel aivq-a nail ngaol. Philma juq, aqivq aqtsu juq khi mail Aol daoq Kovqdaoq cavq nail cov nail juq iqsanl, a bhai jil lal-a nail ngaol. 54Bheiqtuvluv neq, Philma nail ilkhaol nail khainl lavqkhoel phao kev dai, Yeiqsul nail haoqnao al jaiq-ail maq eq nail bhai, tsao the jaol-nvq thaq nail ngaol. A bhai nee ngal-aq, Philma nail yaqkav juq nee jaol deel lai khi, aqcoevq loil thail thaiq nail ngaol.

55Philma juq khi maoq bhaoq nl nail munl munl lao ail, Yeiqsul bhai ya deeq heivq dai, aivq nail kovtavq bhai oeqbal hal pov khi ngaol-aoq, maq hal pov moel-al. 56Khul khi mail dai ngal-aq neq, tsaol-aq mee nia gaq aivq nail ganl maq tsaq nail salkhil khanq khi ngaol-aoq, aqyu juq-i mail khanq nail salkhil al maq dul lai-ail.

57Aq-u phao, tsaol-aq teevq pav ga nav juq thul lal khi, Yeiqsul nail ganl maq tsaq nail phaq salkhil niail hai khanq nail ngaol: 58“ ‘Aqlavq-i mail cov-ai thaq nail uqhuq thaoq nail ilkhaol il ma niil niai ngal peiv ha khi, aqlavq-i mail maq cov-a nail uqhuq thaoq nail ilkhaol il ma yaoq il yaoq, hail n nail lavqkhoel cov phal naol’ dai, aivq ge nail bhai, nv juq ya gaiq-a nail ngaol” dai, aqyu juq ge nail ngaol. 59Aqyu juq salkhil al hai khanq khi ngaol-aoq, khanq nail salkhil al maq dul lai-ail.

60Aq-u phao, Philma aqivq gaq aqyu juq nail sivtavq bhai thul lal khi, Yeiqsul bhai ge bhiq-a nail: “Tsaol-aq niil juq naoq nail kovtavq bhai oeqbal thaq thaq ail, salkhil khanq nail bhai, naol khul teevq phaq iqsanl maq ge kovq bhiq ail laiq” dai, Yeiqsul bhai nal daiq-a nail ngaol. 61Thail hai ngaol-aoq, Yeiqsul teevq phaq iqsanl maq ge kovq bhiq dai, aq tsi tsu dai jaol nail ngaol.

“Naol neq, geeqlaoq eeq nail Miqyail nail Yaqyov Khali dai, khul nail al gaq ngaol laiq” dai, Philma aqivq gaq aivq bhai gaoq nal daiq-a nail ngaol.

62Yeiqsul ge nail: “Ngal neq, al gaq ngaol. Al ovqtavq, Tsaol-aq nail Yaqyov bhaqaoq eeq dee dee nail Miqyail nail lavqmal phao jaol deel-nvq thaq nail bhai maqkhaiq, nqdil jeeq khi yavq kha lee nail bhai maqkhaiq, nul juq ya moel nail ngaol” dai, ge kovq bhiq-a nail ngaol.

63Aq-u phao, Philma aqivq gaq aivq nail phailkhaoq aivq he pav khi ge nail: “Ngadao juq khul nail salkhil gaoq loq nail-aiq. 64Aivq Miqyail bhai khal ge movq ail ge nail bhai, nv juq ya gaiq-ao nail ngaol. Nul juq bhai khal hai noeq nail-aiq” dai, nal daiq-u phao, “Aivq sil nail tsaq nail ngaol” dai, aqyu juq iqsanl mail neema tsaq nail ngaol.

65A bhai nee ngal-aq, tsaol-aq teevq pav ga nav juq, Yeiqsul bhai thaiqkhaq thaiqbav-a nail ngaol. Aivq nail maivphaoq bhai maivpheeq pheeq khi, aivq bhai deeq deeq ail khi ge nail: “Naoq bhai khaq sil gaq deeq nail-aiq dai, Miqyail nail haqbhoil ge dan nail gaq khe-ai, nv juq bhai ge daiq lavq yaoq” dai, ge bhiq-a nail ngaol. Philma nail yaqkav jiovq nail juq iqsanl, aivq nail bhaq bha bhai teiv-a nail ngaol.

Yeiqsul bhai maq heeq kivq ail dai, Bheiqtuvluv jil-a nail ganl

66Bheiqtuvluv ilkhaol nail khainl lavqkhoel bhai jaol-u phao, Philma nail yaqkav yaqmai-aq yaqnoil teevq gaq lee-a nail ngaol. 67Yaqmai-aq al gaq, Bheiqtuvluv aqcoevq loil thail thaiq nail bhai ya moel-u phao, Bheiqtuvluv bhai hel daiq cov-ai thaq khi, “Naol iqsanl, Naq saq lail meenq yaq Yeiqsul nee mail jaol nail ngaol” dai, ge bhiq-a nail ngaol.

68“Naol ge nail daoq bhai, ngal maq heeq kivq-ail. Gov iqsanl maq gov heeq kivq-il” dai, Bheiqtuvluv jil-a nail ngaol.

69A bhai nee ngal-aq, lolgov jiav nail phao Bheiqtuvluv aol ail-a nail ngaol. Yaqkav jiovq nail yaqmai-aq yaqnoil al gaq Bheiqtuvluv bhai gaoq moel khi, “Thoil gaq aqyu juq nail munl lavqkhoel bhai aol nail teevq gaq ngaol” dai, aqjail bhai thul phaol nail juq bhai ge bhiq-a nail ngaol. 70“Maq ngel ail” dai, aivq teevq pov gaoq jil-a nail ngaol.

Teevq yanq gaoq khi al ngal-aq neq, a bhai thul phaol nail juq ge nail: “Naol neq, mal dil aqyu juq nee mail tavq nail nial. Khul khi mail dai ngal-aq neq, naoq nail aqthel neq, Gaq liq lail tsaol-aq nail aqthel niil” dai, Bheiqtuvluv bhai ge bhiq-a nail ngaol.

71Aq-u phao, Bheiqtuvluv aivq bhai aivq ivqkhail yavq yavq ail, “Nul juq-i mail ge nail gaq bhai, ngal maq heeq kivq ail” dai, khanq-a nail ngaol.

72Teevq pov taivq-ail yavphoil nvq pov teevq pov gaoq doil dov lal-a nail ngaol. “Yavphoil nvq pov maq doil lal-u phao, naol ngaq bhai maq heeq kivq ail dai, hail pov kev dai, jil nail ngaol” dai, Yeiqsul-i mail aivq bhai ge bhiq-a nail daoq al daoq bhai, Bheiqtuvluv noeq dov lal bhiq khi nioil dee dee-a nail ngaol.

ప్రస్తుతం ఎంపిక చేయబడింది:

Maqkul 14: aeu

హైలైట్

షేర్ చేయి

కాపీ