Maqkul 13
13
Uqhuq thaoq nail ilkhaol il ma luq ail seil ail nail ganl
1Yeiqsul uqhuq thaoq nail ilkhaol il ma nee dov-ail thail thaiq-u phao, aivq nail yaq laol teevq gaq, “Saq laq-ol, hel daiq. Lovmav niil juq khi mail ilkhaol niil juq kha dai eeq nail ngel ail” dai, Yeiqsul bhai ge bhiq-a nail ngaol.
2Yeiqsul aivq bhai ge bhiq-a nail: “Naol eeq dee dee nail ilkhaol niil juq bhai moel thail thaiq-ail nial. Niilniai lovmav teevq heeq nail kovtavq bhai teevq heeq maq jiav nia-u kev dai, peiv ail leiv ail gil naol” dai, ge bhiq-a nail ngaol.
Daoq loi loi lai nail yanq aqjail jail lal-u phao khe ganl
3Yeiqsul uqhuq thaoq nail ilkhaol il ma nail a phao bal-nvq phao jiav nail Saqloq gaoqjaoq bhai jaol deel-nvq thaq-u phao, Bheiqtuvluv, Yaqkov, Yaol haq khi mail Aq daiq laiq, aqyu juq taivq-ail lal khi ge nail: 4“Al juq khaq mao pevq lal nail-aiq. Al juq iqsanl mail pevq lal nail aqjail jail lal-u phao, nv juq khal hai ya heeq kivq nail-aiq. Ge lavq yaoq” dai, Yeiqsul bhai nal daiq bhiq-a nail ngaol.
5Yeiqsul aqyu juq bhai ge bhiq-a nail: “Tsaol-aq teevq gaq iqsanl nul juq bhai maq ya hevq bheel aivq dai, yaol phaol yaoq. 6Khul khi mail dai ngal-aq, tsaol-aq mao dai ngaq nail aqmil bhai juq juq ail, ‘Ngal neq, Khali ngaol’ dai, yovqgavq bhai yovqgavq ge ge ail, tsaol-aq mao dai bhai hevq bheel aivq nail ngaol. 7Aq jail bhai genl dev thail thaiq nail aqthel bhai maqkhaiq, eqyal bha genl dev nail bhai maqkhaiq, nul juq ya gaiq naol. Thail hai ngaol-aoq, thaq gee sil dei-eiq. Khul khi mail dai ngal-aq neq, al juq ya pevq lal nail ngaol. Al juq pevq lal khi ngaol-aoq, daoq loi loi lai nail yanq maq kev lal haq-al. 8Jeq-e teevq jeq-e khi mail teevq jeq-e, milkhaoq teevq khaoq khi mail teevq khaoq genl dev pheel jaq lal nail ngaol. Teevq dao nee teevq dao mil luv luv lal nail ngaol. Moevq nail sivq nail phaq iqsanl kev lee nail ngaol. Al juq pevq lal nail neq, haq dee aoq dee dee nail iqmoeq khe teevq-eel ngel-ai haq nail ngaol.
9Nul juq aqmeeq-ai yaol phaol khi aqdoevq doevq yaoq. Nul juq bhai yu pheethaiq khi, yalkhaq dal duq bhai hel aivq lavq naol. Uqhuq thaoq nail ilkhaol lavqkhoel bhai yu nul juq bhai neeqtsaq-i mail jiivq nail ngaol. Nul juq ngal bhaq da nee, uv thaiq nail juq khi mail heeqphaq juq nail sivtavq bhai ya thul phaol lai khi, salkhil ya khanq lai naol. 10Thail hai ngaol-aoq, lavqkhiq tsail nail geeqlaoq daoq niil, jeq-e jaq-a iqsanl bhai iqmoeq ya cavq ail bhiq nail ngaol. 11Yu nul juq bhai hel aivq lavq khi aqyu juq nail aqlavq lavqkhoel bhai av bhiq-u phao, nul juq khal hai ya ge ya thail nail meeq dai, khaoq thaq laol. Aq yanq al lavqkhoel Miqyail nul juq bhai bhi ge bhi thail lavq nail khe-ai, ge yaoq thail yaoq. Khul khi mail dai ngal-aq neq, daoq ge nail gaq neq, nul juq maq ngel ail, Meeq nail Haol nail Aqhaqlal ngaol.
12Aq-u phao, yovqgavq nail mailnail nail gaiqlaq bhai teevq gaq nee teevq gaq sil dai, yu nail aqlavq lavqkhoel bhai av bhiq nail ngaol. Aqbhu juq iqsanl yovqgavq nail yaq sil dai, av bhiq nail ngaol. Yaqmiq yaqyov juq iqsanl, yovqgavq nail aqbhu aqma bhai pheeq khi bhi deeq heivq nail ngaol. 13Ngaq nail aqmil bhaq da nee tsaol-aq iqsanl mail nul juq bhai neejiav jiav lal nail ngaol. Thail hai ngaol-aoq, daoq loi loi lai-u kev dai, ivq nail tsaol-aq neq, hevq kovq nail phaq ya nail ngaol” dai, ge bhiq-a nail ngaol.
Haq dee aoq dee dee nail phaq
14Yeiqsul gaoq ge nail: “Miqyail nail haqbhoil ge dan nail Daqyeiqlal-i mail ge-ai thaq nail khe-ai, luq ail seil ail nail aq jiivq aq cavq phaq al, maq bhi jiav khaoq nail jaol duq bhai jiav lal thaq nail bhai nul juq ya moel-u phao, Yuldav milkhaoq bhai jaol nail tsaol-aq juq gaoqjaoq phao tsaoq dal laivq yaoq. (Haoq gavq niil niai khal ge nail tsaol-aq juq neq, gov heeq nia dei-eiq.) 15Khaolpoiv bhai dav nail juq yavq kha lee-u phao, tsaoq yaoq. Yalkav oil ail nail dai khi, ilkhaol bhai thaq aol-ail. 16Yalgaol bhai jaol nail tsaol-aq juq iqsanl, tsaoq yaoq. Il khaol bha kovq-ail khi, yovqgavq nail aqgaq aqdoi thaq he-ail. 17Aqn aqyanq al kev lee-u phao, aqhaq aqmaol liq nail yaqmai-aq juq khi mail, aqtsil cuvq yaq jaol nail aqma juq neq, gaoq haq khal haq ail ya noeq haq dee dee nail ngaol. 18Nul juq ya tsaoq nail yanq al yanq coevqjieiv jieiv nail yanq bhai maq ya tsaq dai, geeqlaoq hal yaoq.#13.18 Aq-u khe coevqjieiv jieiv yanq neq, maoq-aol iqsanl aol nail ngaol. 19Khul khi mail dai ngal-aq neq, Miqyail-i mail miltsaq teivq-u n-gaol nee yaq n n-gaol kev dai, maq pevq lal daiq-a nail nee ovqtavq, yaqhao iqsanl maq pevq lal nail, haq dee aoq dee dee nail phaq yanq al yanq nail lavqkhoel bhai kev lee nail ngaol. 20Miqyail yanq al yanq bhai maq lav nil lavq haq neq, tsaol-aq teevq gaq iqsanl maq jel-ail nia-ail. Thail hai ngaol-aoq, aivq-i mail tsel dov-ai thaq nail tsaol-aq nail haqbhoil Miqyail yanq al yanq lav nil bhi nail ngaol. 21Aq-u phao, ‘Hel daiq lal yaoq. Khali niil niai jaol-ail nial. A bhai jaol-ail nail ngaol’ dai, tsaol-aq teevq gaq ga nav nul juq bhai ge lal khi ngaol-aoq, neema thaq thaq tsaol. 22Khul khi mail dai ngal-aq neq, mal dil Khali maq ngel nail juq dov lal naol. Miqyail nail haqbhoil ge dan naol dai, ge khi ngaol-aoq, mal dil maq ngel nail juq iqsanl dov lal nail ngaol. Khi kivq haq neq, tsel dov-ai thaq nail tsaol-aq bhai iqsanl hevq bheeq nail dai, aqyu juq noeq-u maq dov nail phaq khi mail bhi heeq bhi moel nail juq, nl daiq lavq nail ngaol. 23Thail hai ngaol-aoq, nul juq yaol phaol yaoq. Maq pevq lal-u nee mail, yaoq phaq yaoq-ao nee ngal nul juq bhai ge bhiq-ai thaq nail ngaol dei-eiq” dai, ge bhiq-a nail ngaol.
Tsaol-aq nail Yaqyov yavq kha lee nail ganl
24Yeiqsul gaoq ge nail: “Haq dee aoq dee dee nail al jel ail-u phao, nlma nav tsee dai pevq-ail khi, bhala iqsanl aqbhaq maq bhaq dai, pevq-ail nail ngaol. 25Aqgil juq nqtavq nee ga kha lee khi, nqtavq khe bhaqaoq juq iqsanl luv luv dai, dao lal nail ngaol.
26Aq-u phao, Tsaol-aq nail Yaqyov neq, seiqleiq khaoqsail khi mail bhaqaoq eeq dee dee nail lavqkhoel nee nqdil jeeq khi yavq kha lee nail bhai aqyu juq ya moel nail ngaol. 27Miqyail nqtavq gaqkhoel juq bhai mil ma liq phao liq khoel bhai khoel gai aivq khi, nq jail mil jail a phao nee nia phao dov dai jaol nail, aivq-i mail tsel dov-ai thaq nail tsaol-aq juq bhai bhi hevq jil lavq nail ngaol.
28Heeqpuv aqbhaol bhai hel daiq khi, ganl niil bhai noeq thaq yaoq. Aq bhaol al lavqmeiv meiv lal khi, bhoenaiq naiq lal haq neq, jaolla yanq dov lee aiq nial dai, nul juq heeq nia nail ngaol. 29Al hai dul dai, nul juq ganl al juq iqsanl mail pevq lal thail thaiq nail bhai ya moel-u phao, Tsaol-aq nail Yaqyov kovq kha lee nail yanq aqjail jail lal-aoq thaq nial dai, heeq kivq-ai thaq yaoq. 30Ngal nul juq bhai mal dil dai, ge lavq bhel. Yeel niil yeel maq gil-u nee mail, al juq iqsanl mail pevq lal nail ngaol. 31Nqtavq khi miltsaq peivq ail nail ngaol. Thail hai ngaol-aoq, ngaq nail daoq neq, maq peivq ail dei-eiq.
32Tsaol-aq teevq gaq iqsanl aqn aqyanq al maq heeq nia-ail. Nqtavq gaqkhoel iqsanl, Tsaol-aq nail Yaqyov iqsanl maq heeq nia-ail. Aqbhu Miqyail taivq-ail heeq nia nail ngaol. 33Aq yanq al yanq khaq mao kev lee nail dai, nul juq maq heeq nia nail ngel-i mail, geeqlaoq hal nail lavqkhoel nee yaol phaol yaol phaol ail daonq yaoq. 34Aq yanq al neq, tsaol-aq teevq gaq yaoq khaoq yaoq mil yaoq bhai ail-a nail khe-ai, dul nail ngaol. Aivq ail nail khi-u phao, aivq nail yaqkav teevq gaq gil-aq teevq gaq bhai ganl bhoil bhiq ail ceevq-a nail ngaol. Lol gov bhai lovq nail gaq bhai iqsanl, aqmeeq-ai lovq dei-eiq dai, daoq bivq ail ceevq-a nail ngaol.
35Al heel ngel-i mail, ilheel gaq kovq lal nail neq, nqkiv maq heeq, hul-iq tsil ma maq heeq, yavphoil doil lal-u phao maq heeq, nqhao phao maq heeq, khaq mao kovq kev lal nail dai, nul juq maq heeq nia nail ngel-i mail, aqgeel geel dai, jaol yaoq. 36Al hai maq ngel haq neq, aivq thaiq phuq dai kovq kev lal-u phao, nul juq iq thaiq thail thaiq nail bhai, aivq ya moel nail ngaol. 37‘Aqgeel geel dai jaol yaoq’ dai, ngal nul juq bhai ge bhiq thail thaiq nail khe-ai, tsaol-aq iqsanl bhai gail ge bhiq thail thaiq nail ngaol” dai, Yeiqsul aqyu juq bhai ge bhiq-a nail ngaol.
ప్రస్తుతం ఎంపిక చేయబడింది:
Maqkul 13: aeu
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2016, Wycliffe Bible Translators, Inc. All rights reserved.
