Genesis 14
14
Iqmoeq 14
Aqbhaqlaq-i mail Laoltavq bhai hevq jel bhiq-a nail ganl
1Aq-u phao, heeqphaq liq gaq pevq nail Bhaqbhulloq nail heeqphaq Anqlaqphei, Eillaqsaq nail heeqphaq Alliqoq, Eillanq nail heeqphaq Kheiqdallaolmeiq dai khi, Gaolyinq nail heeqphaq Tiqdal, aqyu juq neq,
2heeqphaq ngaq gaq pevq nail Saoldoq nail heeqphaq Bheiqlal, Gaolmaollav nail heeqphaq Bhillaqsav, Aqthalmaq nail heeqphaq Silnav, Seiqbhuqyinq nail heeqphaq Seilmeiqbheiqlav dai khi Saol-aq dai iqsanl khul nail Bheiqlaq nail heeqphaq niil juq bhai genl dev lal-a nail ngaol.
3Heeqphaq ngaq gaq niil neq, aqtsaoq tsaoq tavq khi, niil aq-il khe iqyaq iq ma aqsil nail aqjail bhai jiav nail Sildinq nail gavqlaovq bhai tavq cov khi mail jaol nail ngaol.
4Aq-u phao, heeqphaq thoil juq neq, heeqphaq Kheiqdallaolmeiq nail kov-uvq bhai 12 kovq bhee dai, uv thaiq nail bhai daq khi, 13 kovq bhee lal-u phao, heeqphaq al gaq bhai gaoq lav tsoiq lal-a nail ngaol.
514 kovq bhee lal-u phao, heeqphaq Kheiqdallaolmeiq neq, aivq nee mail aqtsaoq tsaoq tavq-ai thaq nail juq nee mail genl dev lal khi, Aqsailtaqlol Kaqneiqyinq meenq bhai jaol nail Leiqphaqinq nail tsaol-aq juq bhai maqkhaiq, Haqmav nail meenq bhai jaol nail Suqseiq nail tsaol-aq juq bhai maqkhaiq, Saqweiq Kiqlilyaqthaqyinq nail daiqkhao bhai jaol nail Eiqmeiq nail tsaol-aq juq bhai maqkhaiq,
6Sol-iq nail gaoqjaoq gaoq dul bhai jaol nail Haolliv nail tsaol-aq juq bhai maqkhaiq, genl dev gaq khi tsalhail daikav nail aqjail bhai jiav nail Eil Paqlanq nail meenq bhai kev dai, the the-ail genl dev kel-aivq-a nail ngaol.
7A bhai nee ngal-aq, kovq lal-u phao, niil aq-il neq, Kaqdeiqsav dai khul nail Eiqmilsaqpal nail meenq bhai kev lal-u phao, Aqmaqlail tsaol-aq juq dai khi, Haqsalsoq Taqmaq nail meenq bhai jaol nail, Aqmaolliv tsaol-aq juq bhai genl dev gaq-a nail nee ovqtavq, aqyu juq nail miltsaq iqsanl bhai uv thaiq-a nail ngaol.
8A bhai nee ngal-aq, heeqphaq ngaq gaq pevq nail Saoldoq nail heeqphaq, Gaolmaollav nail heeqphaq, Aqthalmaq nail heeqphaq, Seiqbhuqyinq nail heeqphaq, Saol-aq dai iqsanl khul nail Bheiqlaq nail heeqphaq niil juq nail genl dev yaq juq neq, Sildinq nail gavqlaovq bhai jil gil lal khi,
9heeqphaq liq gaq pevq nail Eillanq nail heeqphaq, Gaolyinq nail heeqphaq, Bhaqbhulloq nail heeqphaq, Eillaqsaq nail heeqphaq juq nee mail, genl dev-a nail ngaol.
10Sildinq nail gavqlaovq al laovq bhai neq, teivqnav kheel aqneovq deel nail khaqduq jiav gao nail ngel-i mail, Saoldoq nail heeqphaq dai khi Gaolmaollav nail heeqphaq neq, genl maq dev gaq nia-ail tsaoq-u phao, aqyu nvq nail genl dev yaq teevq pav gav nav juq neq, khaq duq al bhai ga bhoel-ail bhiq-a nail ngaol. Jail nail heeqphaq hail gaq khi mail aqyu juq nail genl dev yaq juq neq, gaoqjaoq phao tsaoq dal laivq-a nail ngaol.
11Gaq lai-a nail heeqphaq liq gaq neq, Saoldoq nail meenq dai khi Gaolmaollav nail meenq khe jaq nail daol nail phaq dai khi, khal jiav nail nlmaoq yalkav juq oil khi mail kovq ail-a nail ngaol.
12Saoldoq nail meenq bhai jaol nail Aqbhaqlaq nail dulniil pevq nail Laoltavq nee mail teevq gaq khe-ai, aivq nail ildaoq maoqgaiq khal jiav nail iqsanl mail, bhi oil gil laivq-a nail ngaol.
13Thail hai ngaol-aoq, meenq khe teevq gaq neq, tsaoq jel lavq khi Heiqbhail nail jeq-e pevq nail Aqbhaqlaq bha, pevq jel lavq-a nail ganl iqsanl mail, ge bhiq lal-a nail ngaol. Aqbhaqlaq neq, Manqleiq dai khul nail Aqmaolliv tsaol-aq teevq gaq nail aqbhaol bhaol ma doevq nail aqjail bhai jaol nail ngaol. Manqleiq dai khi, aivq nail jaqbheq juq pevq nail Eilsaqkollav dai khi, Aqneiqlav neq, Aqbhaqlaq nail aqtsaoq juq pevq nail ngaol.
14Aivq nail dulniil bhi neil-aivq-a nail ganl ya gaiq-u phao, Aqbhaqlaq neq, aivq nail jaolduq nee mail genl dev nail phao nia nail juq 318 gaq bhai khul jil khi, heeqphaq liq gaq nail haoqnao Danq nail meenq bha kev dai, the-a nail ngaol.
15Meenq al meenq-ai aivq nail tsaol-aq juq bhai munl bhoil pav khi nqkiv liv ma phao, aqyu juq bhai neejiav jiav nail juq bhai genl dev-a nail ngaol. A bhai nee ngal-aq, Aqbhaqlaq neq, aqyu juq bhai Daqmaq sail nail meenq pultavq phao jiav nail Haolbav meenq bhai kev dai, the khi genl dev-a nail ngaol.
16Laoltavq nail nlmaoq yalkav juq iqsanl mail gaoq ya kovq gil-a nail ngaol. Dulniil Laoltavq dai khi aivq nail nlmaoq yalkav juq maqkhaiq, yaqmai-aq juq dai khi mail, jail nail juq iqsanl mail bhai maqkhaiq, gaoq khul kovq gil leevq-a nail ngaol.
Maqlaqkhilsaqdaiv Aqbhaqlaq bhai geeqlaoq bivq-a nail ganl
17Aqbhaqlaq neq, Eillanq nail heeqphaq Kheiqdaollaolmaq dai khi, jail nail heeqphaq juq bhai genl dev gaq khi mail kovq lal-u phao, Saoldoq nail heeqphaq neq, aivq bhai hav lavq lal nail galduq, Saqbheiq nail gavqlaovq bhai dov lal-a nail ngaol. Gavqlaovq al laovq bhai, heeqphaq nail gavqlaovq dai gail, khul nail ngaol.
18Saqlinq nail heeqphaq gail pevq nail Maqlaqkhilsaqdaiv neq, Aqbhaqlaq bha khaqmul dai khi aqheeq tsilju nail ullul oil leevq bhiq-a nail ngaol. Aivq neq, khal eeq khal heel jaiq nail Miqyail nail philma pevq khi
19Aqbhaqlaq bhai geeqlaoq niail hai bivq-a nail ngaol: "Nqtavq khi mail miltsaq bhai teivq-a nail khal eeq khal heel jaiq nail Miqyail neq, naoq bhai geeqlaoq bivq dei-eiq.
20Naoq bhai neejiav jiav nail gaq bhai, bhi gaq lai lavq-a nail gaq pevq nail khal eeq khal heel jaiq nail Miqyail bhai tsiq eeq dei-eiq" dai, geeqlaoq bivq-a nail ngaol.
A bhai nee ngal-aq, Aqbhaqlaq neq, aivq-i mail genl dev khi khal oil kol lavq-a nail nlmaoq yalkav nail lavqkhoel khe tsel bhoil teevq bhoil neq, Maqlaqkhilsaqdaiv bhai bivq-a nail ngaol.
21A bhai nee ngal-aq, Saoldoq nail heeqphaq ge nail: "Naoq-i mail oil kol lavq-a nail nlmaoq yalkav juq iqsanl mail naol oil yaoq. Ngaq nail tsaol-aq juq taivq-ail bivq kovq lavq yaoq" dai, ge bhiq-a nail ngaol.
22Thail hai ngaol-aoq, Aqbhaqlaq Saoldoq nail heeqphaq bhai niail ha gaoq ge kovq bhiq-a nail: "Ngal nqtavq khi mail miltsaq bhai teivq-a nail, 'Yawei' dai khul nail khal eeq khal heel jaiq nail Miqyail bhai juq khi mail niail hai khanq nail ngaol:
23Naoq nail nlmaoq yalkav juq khul teevq phaq iqsanl mail, ngal maq oil-ail. Thail hai maq oil nail ngel-i mail, ngaq bhai hulmeeq hulbhao bhi bhao lal-a nail gaq neq, ngal dai naol, maq ge nia-ail. Ngal khul nail nlmaoq yalkav teevq laiq iqsanl, maq oil nail nee ovqtavq, saiqnaov nail neeqtsaq teevq deeq iqsanl, maq oil-ail.
24Ngaq nail tsaol-aq juq-i mail jaq gaq-ai thaq nail juq taivq-ail ngal oil nail ngaol. Thail hai ngaol-aoq, ngaq-ai nee mail teevq gaq khe-ai, genl dev tsaoq juq pevq nail Aqneiqlav, Eilsaqkaollav dai khi Manqleiq juq bhai neq, aqyu juq nail jaiqbhoil ya bhoil pav bhiq nail ngaol" dai, ge bhiq-a nail ngaol.
ప్రస్తుతం ఎంపిక చేయబడింది:
Genesis 14: aeu
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2016, Wycliffe Bible Translators, Inc. All rights reserved.
