Okutandika 9
9
Endagaano ya Ruhanga na Noa
1Ruhanga yaaha Noa n'abatabani omugisha, yaabagira ati: Muzaare, mukanye, mwijure ensi. 2#Yak 3:7. Enyamaishwa zoona ez'omu nsi n'ebirikuguruka byona muryabiitsa obwoba, bibatiine, na byona ebirikugyendesa enda ahansi n'eby'omu nyanja byona; mubihairwe kubitegyeka. 3Ebirikwegyendesa byona ebiine amagara biryaba eby'okurya byanyu; mbibahaire byona, nk'oku naabahaire ebirikumera. 4#Bir 12:23; Byak 15:20, 29. Kwonka mutarirya enyama n'amagara gaayo, niyo shagama yaayo. 5#Kub 35:31. Kandi buzima eshagama y'amagara gaanyu ndyagihoora, ngihoorere enyamaishwa yoona n'omuntu; amagara g'omuntu weena ndyagahoora ahabwa mugyenzi we. 6#Lev 24:17. Orisheesha eshagama y'omuntu, n'eye baryagisheesha; ahakuba Ruhanga akahangira omuntu omu muringo gwe. 7Mbwenu muzaare, mukanye, muzaare munonga omu nsi, mugiijure. 8Ruhanga yaagambira Noa n'abatabani, ati: 9Reeba, nyowe naahamya endagaano yangye naimwe, kandi na baijukuru baanyu abaribakurata, 10n'ebihangirwe byona ebiine amagara ebiri hamwe naimwe, ebirikuguruka, amatungo n'enyamaishwa yoona eri hamwe naimwe omu nsi, nka byona ebirugire omu meeri oku biri. 11Kandi nimpamya endagaano yangye naimwe, ebiine omubiri byona tibirigaruka kucwekyerezibwa maizi g'omwegyemure; kandi tiharigaruka kubaho mwegyemure kucwekyereza ensi. 12Ruhanga yaagira ati: Aka niko kamanyiso k'endagaano ei naaragaana naimwe na buri kihangirwe kyona ekiine amagara ekiri hamwe naimwe okuhitsya obusingye bwona; 13naata omuhanganzima gwangye omu kicu, gugume guri akamanyiso k'endagaano ei naaragaana n'ensi. 14Ahundihikisiza enjura hoona, omuhanganzima gwareebeka omu bicu, 15#Isa 54:9. ndyaijuka endagaano yangye naimwe n'ekihangirwe kyona ekiine omubiri; amaizi tigarigaruka kuba omwegyemure gw'okuhwerekyereza ebiine omubiri byona. 16Omuhanganzima ku guriba guri omu bicu, ndyagureeba, nyijukye endagaano etarihwaho ey'Omuhangi n'ekihangirwe kyona ekiine amagara ekiri omu nsi. 17Ruhanga yaagambira Noa ati: Aka niko kamanyiso ak'endagaano ei naaragaana n'ebiine omubiri byona, ebiri aha nsi.
Ekibi kya Noa
18Batabani ba Noa abaarugire omu meeri ni Sheemu, Haamu na Yafeesi; kandi Haamu niwe ishe wa Kanaani. 19Abo bonshatu nibo batabani ba Noa; kandi nibo baakomookirweho abaabugire ensi yoona.
20Noa yaatandika kuhinga; yaabyara omusiri gw'emizaabibu; 21#Enf 20:1. yaanywa viinyo yaayo, yaasinda, yaabyama omu ihema rye ajwaire busha. 22Haamu ishe wa Kanaani ku yaareebire ishe ajwaire busha, yaashohora, yaagambira bakuru be aheeru. 23#Gal 6:1. Sheemu na Yafeesi baatwara ekijwaro, bakitaire aha mabega gaabo bombi, baagyenda ekisiganyima, baashweka ishebo ajwaire busha. 24Noa ku yaasinduukire, yaamanya eki omutabani omuto akozire; 25#1 Bag 9:20. yaagira ati: Kanaani akyeenwe; aryaba omuhuuku w'abahuuku ahari beene ishe. 26Kandi ati: MUKAMA Ruhanga wa Sheemu asiimwe; kandi Kanaani abe omuhuuku we. 27Ruhanga ahangusye Yafeesi; atuure omu mahema ga Sheemu, kandi Kanaani abe omuhuuku we.
28Bwanyima y'omwegyemure Noa yaamara emyaka magana ashatu na makumi ataano. 29#Zab 89:48. Emyaka yoona ei Noa yaamazire, yaahika magana mwenda na makumi ataano; yaafa.
ప్రస్తుతం ఎంపిక చేయబడింది:
Okutandika 9: RR64
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible in Runyankore-Rukiga © United Bible Societies, 1964
