Mateo 16

Meꞌ Pariseohin makapakite tandaꞌ

(Markus 8:11-13; Lukas 12:54-56)

1Manjari niyaꞌ meꞌ Pariseo duk meꞌ Sadduseo pī pu si Isa. Batang iye kuhi-kuhide, hangkan makapakite siye tandaꞌ bang bennal taga kapatut iye amban Tuhan. 2Sambungan si Isa siye, paꞌinne, “Bang seddep ellewin paꞌinbi, ‘Hāp lahatin sumu, peggeꞌ peyat-peyat langitin.’ 3Bang salung-salung paꞌinbi, ‘Ulan ellew inin peggeꞌ peyat-peyat langitin duk maglindem lahatin.’ Kataꞌuhanbi hatiꞌ bang ine hāti meꞌ tapandogabi si bantuk langitin saguwaꞌ gaꞌi kataꞌuhanbi hāti meꞌ maꞌumantag si waktu kuweꞌitu inin. 4Meꞌ aꞌa kuweꞌitu inin laꞌat duk gaꞌi nuhut Tuhan duk māku tandaꞌ. Saguwaꞌ gaꞌ niyaꞌ tandaꞌ pinakitehan si kaꞌam luwal hadja tandaꞌ Nabi Yunus awwalley.” Ubus miyaꞌan inambanan siye weꞌ si Isa bu tahalaꞌ iye.

Sinessaꞌan weꞌ si Isa meꞌ tindegnen dinaꞌak siye maghalliꞌ si meꞌ toloꞌ meꞌ Pariseohin duk Sadduseohin

(Markus 8:14-21)

5Pagtekka meꞌ tindeg si Isahin si dambiyaꞌ lamew, gaꞌ siye makaꞌesseb moꞌo pan. 6Paꞌin si Isa si siye, “Pahatul-hatul kaꞌam. Halliꞌanun bi pasulig meꞌ Pariseohin duk meꞌ Sadduseohin.” 7Magbissā-bissā meꞌ tindegnen sabab pinaꞌinne miyaꞌan peggeꞌ gaꞌ tahātide. Paꞌinde, “Hangkan hatu iye missā kuweꞌ miyaꞌan, peggeꞌ gaꞌ kite bi makaboꞌo pan.” 8Kataꞌuhan si Isa bang ine pagbissā-bissāden. Hangkan paꞌinne si siye, “Weꞌey pagbissā-bissābin sabab gaꞌ niyaꞌ panbi? Asal kulang teꞌed sandelbi si akuhin. 9Gaꞌi pe ke tahātibi? Gaꞌ ke taꞌessebbi pamahagiꞌ-mahagiꞌku pan limehin si meꞌ aꞌa lime ngibuhin duk bang piye bakaꞌ pennoꞌ weꞌ lukas tinipunbin? 10Duk gaꞌ ke taꞌessebbi pan pituꞌ binahagiꞌ-bahagiꞌku si meꞌ aꞌa ampat ngibuhin duk bang piye bakaꞌ pennoꞌ weꞌ lukas tinipunbin? 11Ulaliꞌ ku bang weꞌey gaꞌ tasabutbi weꞌ bissāku miyaꞌan dumaꞌin sabab pan. Halliꞌanun bi pasulig meꞌ Pariseohin duk meꞌ Sadduseohin.” 12Manjari bahu tahātide weꞌ dumaꞌin pinaꞌinnen sabab pasulig dem pan, saguwaꞌ subey halliꞌande meꞌ panoloꞌ meꞌ Pariseohin duk meꞌ Sadduseohin.

Magbennal si Petros sabab si Isa

(Markus 8:27-30; Lukas 9:18-21)

13Manjari pī disi Isa si lahat tapit si puweblo Kesarea Pilipi. Paglaꞌi siye tinilew weꞌ ne meꞌ tindegnen, paꞌinne, “Ine paꞌin meꞌ aꞌahin? Aku, Anak Manusiyaꞌin, sine koꞌ ku?” 14Paꞌinde, “Niyaꞌ meꞌ aꞌa magpaꞌin weꞌ kaꞌu koꞌ si Yahiya magpandi-pandi meꞌ aꞌahin ellum balik. Sinduwehin isab magpaꞌin weꞌ Nabi Eliyas koꞌ kew duk niyaꞌ pe isab magpaꞌin weꞌ Nabi Jeremiya koꞌ kew atawa dambuwaꞌ meꞌ nabi awwalley.” 15“Saguwaꞌ bang kaꞌam,” paꞌin si Isa, “ine paꞌinbi? Sine teꞌ ku?” 16Nambung si Simon Petros, paꞌinne, “Kaꞌu Almasihin, tapeneꞌ Tuhan magbayaꞌin. Kaꞌu Anak Tuhan maꞌellumin.” 17Paꞌin si Isa si iye, “Hāp pe kew, Simon, anak Yahiyahin. Peggeꞌ dumaꞌin amban manusiyaꞌ puꞌunnu ngataꞌuhanne inin saguwaꞌ pinakataꞌu inin si kaꞌu weꞌ Samaku si surgaꞌin. 18Na, inin paꞌinku si kaꞌu, Petros. Kuweꞌ batu kew, duk diyataꞌ batu inin hinangku langgalkun, hāti langgalkun meꞌ aꞌa manuhut akuhin. Gaꞌi siye tadaꞌag weꞌ nakuraꞌ seyitanin. 19Urungante kew kapatut magmahalayak si kēmon manusiyaꞌ aka-aka hāp sabab pagbayaꞌ Tuhanin. Kuweꞌ kew dalil kaꞌurunganku kunsiꞌ gawang padiyaleman pī si pagbayaꞌan Tuhanin. Ine-ine pamagesannu tuꞌu si dunya, pamagesan du isab iyan si surgaꞌ, duk ine-ine pangandaꞌakannu tuꞌu si dunya, pangandaꞌakan du isab iyan si surgaꞌ.”

20Manjari sinessaꞌan weꞌ si Isa meꞌ tindegnen weꞌ subey siye gaꞌi magaka-aka bisan pu sine weꞌ Almasihin iye.

Pinaꞌal weꞌ si Isa kamateynen

(Markus 8:31–9:1; Lukas 9:22-27)

21Manjari puwas miyaꞌan, nagnaꞌ pahāti si Isa si meꞌ tindegnen weꞌ iye kahandak Tuhanin, subey iye hap pī si Awrusalam duk ekka kabinasahan sandalanne amban meꞌ kabahiꞌanin duk meꞌ nakuraꞌ imamin duk meꞌ guru si saraꞌ āgamahin. Ubus pinapatey du iye duk ellum du iye balik katellum bahanginen. 22Binoꞌo si Isa weꞌ si Petros patala-tala bu inamāhan iye weꞌ ne, paꞌinne, “Karayaw gaꞌi paꞌatag Tuhanin, Tuwan. Gaꞌi iyan umantag si kaꞌu.” 23Saguwaꞌ paharap si Isa duk paꞌinne pu si Petros, “Tahalaꞌ kew amban aku, Seyitan. Iyuꞌ kew nassat aku si kalaꞌatan, peggeꞌ pikilannun pikilan amban manusiyaꞌ hadja dumaꞌin amban Tuhan.” 24Ubus paꞌinne si meꞌ tindegnen, “Bang niyaꞌ aꞌa mabayaꞌ nuhut aku subey iye tuhutne kinabayaꞌankun dumaꞌin kinabayaꞌannen. Duk subey isab iye moꞌo olom pamapateyan iyehin, hātinen maglillaꞌ iye nandal kabinasahan duk bisan pe matey. Manjari makajari ne iye nuhut aku. 25Peggeꞌ,” paꞌin si Isa, “bang aꞌahin ellegne umulnen, gaꞌ niyaꞌ umulne salama-lama. Saguwaꞌ bang aꞌahin gaꞌi ellegne umulnen duk maglillaꞌ pe iye matey hawal tuyuꞌne manuhut akuhin, na, aꞌa iyan taga umul du salama-lama. 26Peggeꞌ aꞌahin, bisan pe tepe si iye kēmon alataꞌ dem dunyahin, gaꞌ du niyaꞌ gunane bang gaꞌi tepe si iye umul salama-lamahin. Peggeꞌ gaꞌ niyaꞌ alataꞌ si dunya makalekkat iye supaya tepe si iye umul salama-lamahin. 27Aku, Anak Manusiyaꞌin, pitu du ku balik duk meꞌ malaꞌikatkun, liput weꞌ sahaya Samaku Tuhanin. Ubus tumbasanku du kēmon aꞌahin matalep si meꞌ hinanganden.” 28Paꞌin si Isa pe, “Sabennal akahante kaꞌam, niyaꞌ kaꞌam matuꞌu inin gaꞌi matey bang gaꞌi dahuꞌ takitebi ku, Anak Manusiyaꞌin, pitu magbayaꞌ si meꞌ aꞌahin.”

ప్రస్తుతం ఎంపిక చేయబడింది:

Mateo 16: yakV

హైలైట్

షేర్ చేయి

కాపీ